Sajda-e-Tilawat Ka Bayan
Sawal:1) Sajada-e-Tilawat Kise Kehte Hain?
Jawab ▶️ QurAan Me'n 14 Maqamaat Aise Hain Ke Jin Ke Padhne Ya Sunne Se Sajdah Wajib Hota Hai Ise Sajda-e-Tilawat Kehte Hian.
Sawal:2) Sajda-e-Tilawat Ki Niyyat Kis Tarah Ki Jati Hai?
Jawab▶️ Niyyat Ki Me'n Ne Sajdah Tilawat Ki Allah Ta'Ala Ke Waste Muh Mera Taraf Ka'aba Shareef Ke Allahu Akbar.
Sawal:3) Sajda-e-Tilawat Ka Tariqah Kya Hai?
Jawab▶️ Sajda-e-Tilawat Ka Masnoon Tariqah Yeh Hai Ke Khade Ho Kar Allahu Akbar Kehta Huwa Sajdah Me'n Jaye Aur Kam Se Kam 3-Martabah Subhana Rabbiyal Aala Kahe Phir Allahu Akbar Kehta Huwa Khade Hojaye Bas. Naa Is Me'n Allahu Akbar Kehte Huwe Hath Uthana Hai Aur Naa Is Me'n Tashahhud Hai Aur Naa Salam.
(Aalamgiri, Durre Mukhtar, Bahare Shari'at)
Sawal:4) Agar Beth Kar Sajdah Kiya To Hoga Ya Nahi?
Jawab▶️ Ada Hojayega Magar Masnoon Yahi Hai Ke Khade Ho Kar Sajdah Me'n Jaye Aur Sajdah Ke Ba'd Khada Ho.
(Bahar-E-Shari'at)
Sawal:5) Sajdah Tilawat Ki Shara'it Kya Hain?
Jawab▶️ Sajdah Tilawat Ke Liye Tehreemah Ke Siwa Tamam Shara'it Hain Jo Namaz Ke Liye Hain. Maslan Taharat, Satare Awrat, Isteqbale Qiblah Aur Niyyat Waghairah.
Sawal:6) Urdu Zuban Me'n Aayate Sajdah Ka Tarjumah Padha To Sajdah Wajib Hoga Ya Nahi?
Jawab▶️ Urdu Ya Kisi Zuban Me'n Aayate Sajdah Ka Tarjumah Padhne Aur Sunne Se Bhi Sajdah Wajib Hota Hai.
(Aalamgiri, Bahare Shari'at)
Sawal:7) Kya Aayate Sajdah Padhne Ke Fauran Ba'd Sajdah Kar Lena Wajib Hota Hai?
Jawab▶️ Agar Aayate Sajdah Namaz Ke Bahar Padhi Hai To Fauran Sajdah Kar Lena Wajib Nahi Haan Behtar Hai Hai Ke Fauran KarLe Aur Wazu Hoto Takheer Makruh Tanzihi Hai.
(Fatawa Ridawiyyah)
Sawal:8) Agar Namaz Me'n Aayate Sajdah Padhi To Kya Hukm Hai?
Jawab▶️ Agar Namaz Me'n Aayate Sajdah Padhi To Fauran Sajdah Kar Lena Wajib Hai. Teen(3) Aayat Se Zyadah Ki Takheer Karega To Gunahgaar Hoga. Aur Fauran Namaz Ka Sajdah Kar Liya Yaani Aayate Sajdah Ke Ba'd Teen(3) Aayat Se Zyada Naa Padha Aur Ruku Karke Sajdah Kar Liya To Agarche Sajda-E-Tilawat Ki Niyyat Naa Ho Sajdah Ada Hojayega.
(Bahare Shari'at)
Sawal:9) Ek Majlis Me'n Sajdah Ki Aayat Ko Kayi Bar Padha To Ek Sajdah Wajib Hoga Ya Kayi Sajde?
Jawab▶️ Ek Majlis Me'n Sajdah Ki Aayat Ko Bar Bar Padhne Ya Sunne Se Ek Hi Sajdah Wajib Hota Hai.
(Durre Mukhtar, Rudul Mukhtar)
Sawal:10) Ek Majlis Me'n Sajdah Ki Aayat Suni Ya Padhi Aur Sajdah Kar Liya Phir Usi Majlis Me'n Wahi Aayat Padhi Gayi To Dusra Sajdah Wajib Hoga Ya Nahi?
Jawab▶️ Dusra Sajdah Wajib Nahi Hoga Wahi Pehla Sajdah Kaafi Hai.
(Durre Mukhtar)