JaanDaar Ki Tasweer Haraam Hai
"Hazrat Abu Talha RadiyAllahu Ta'Ala Anhu Ne Kaha Ke,
Huzoor ﷺ Ne Farmaya Ke, Jis Ghar Me'n Kutta Ya Taswire'n Hon Us Me'n Rahmat Ke Farishte Nahi Aate".
(Bukhari, Muslim)
"Hazrat Abdullah Bin Masood RadiyAllahu Ta'Aala Anhu Ne Farmaya Ke Me'n Ne Rasool-e-Kareem ﷺ Ko Farmate Huwe Suna Ke Khuda-E-Ta'Ala Ke Yaha'n Sabse Zyada Azaab Un Logo'n Ko Diya Jayega Jo Jaandaar Ki Tasweer Banate Hain".
(Bukhari, Muslim)
"Hazrat Ibne Abbaas RadiyAllahu Ta'Aala Anhu Ne Farmaya Ke Me'n Ne Rasool-e-Kareem ﷺ Ko Farmate Huwe Suna Ke,
Jo Shakhs (JaanDaar) Ki Tasweer Banayega Khuda-E-Ta'Aala Bil-Yaqeen Use Azaab Dega. Yaha'n Tak Ke Woh Apni Banayi Huwi Tasweer Me'n Jaan Daal De. Aur Yeh Haqiqat Hai Ke Woh Is Me'n Kabhi Bhi Jaan Nahi Daal Sakega. (Isliye Azaab Ka Mustahiq Hona Yaqeeni Hai)".
(Bukhari)
"Hazrat Aayeshah Siddiqua RadiyAllahu Ta'Aala Anha Ne Kaha Ke Nabi Kareem ﷺ Ne Farmaya Ke,
Habshah Ke Logo'n Ka Haal Yeh Hai Ke Jab In Me'n Koyi Nek Aadmi Marjata Hai To Woh Log Us Qabr Par Ibadat Khaanah Bana Lete Hain Phir Is Me'n Un (Nek Logo'n Ki) Tasweer Banate Hain. Yeh Log Khuda-E-Ta'Aala Ki Bad-Tareen Makhlooq Hain"
(Mishkaat)
Zaruri Intibah
Aaj Kal Bohat Se Jahil Ganwaar Sufi Kehlane Waale Aur Buzrugaan Kehlane Waale Aur Buzrugaane Deen Se Jhuti Mohabbat Ka Dawa Karne Waale, Hazrat Ghaus-E-Paak, Hazrat Khwaja Gharib Nawaz, Hazrat Mahbube ELaahi, Hazrat Sabir Kalyari, Hazrat Kalimullah Shah Jaha'n Abadi, Hazrat Tajuddeen Nagpuri Hazrat Waris Ali Shah Aur Digar Auliya-E-Karaam-O-Buzrugaane Deen RadiyAllahu Ta'Aala Anhum Ajma'een Ki Taswire'n Apne Gharo'n Me'n Aur Dukano'n Me'n Rakhte Hain Yeh Sakht Naa-Jaaiz Hai Aur Gunah Hai. Aur Ba'z Log Buzrugaan Ki Tasweer Ke Saamne Adab Se Beth Kar Unka Tasawwur Karte Hain Aur Yeh But Parasti Ke Mushabah Hai Balke Islam Me'n But Parasti Ka Darwaza Kholna Hai Jo Sakht Haraam Aur Naa-Jaaiz Hai.
[Anwar-ul-Hadees, Safha:304/305]