Naa Pasandidah Rasoom*
Har Shakhs Ko Ek Din Marna Aur Is Dunya Se Jaana Hai Aur Kya Khabar Hai Ke Kiski Maut Kis Jagah Aur Kis Waqt Aajaye. Isliye Har Musalman Ko Laazim Hai Mayyat Ke Ghusl Aur Kafan Dafan Ke Masayil Seekhe Agar Kisi Jagah Zarurat Pad Jaye To Uska Kaam Naa Ruke. Ham Ne Aaj Yeh Samajh Rakha Hai Ke Mayyat Ka Ghusl Aur Kafan Sirf Mulla'on Ka Kaam Hai. Hamari Is Me'n Be-Izzati Hai Lekin Agar Kisi Ka Baap Ya Koyi Qarabat_Daar Marjaye Aur Woh Apne Haath Se Usko Qabar Tak Pohchane Ka Saamaan Karde To Is Me'n Be-Izzati Kya Hogi? Kya Baap Ke Marne Ke Ba'd Usko Chhuna Bhi Be-Izzati Hai?
Ek Musalman Saheb Bahaddur Ka Intaqal Nayi Delhi Me'n Hogaya. Woh Hazrat Punjab Ke Rehne Waale The. Waha'n Koyi Ghusl Dene Waala Naa Mila. Bohat Der Tak Unke Waalid Ki Laash Be-Ghusl Padi Rahi.
Zilla Badayoon Me'n Ek Jagah Ek Shakhs Ke Waalid Ka Fatehah Tha. Chunke Wo Majma Saheb Bahdduro'n Ka Tha. Kisi Ko QurAan Paak Padhna Naa Ata Tha. Ab Badi Mushkil Padi. Aakhir Kaar Phonograph Me'n Surah Yaseen Ka Record Baja Kar Us Record Ka Sawaab Murdah Baap Ki Ruh Ko Pohchaya.
Yeh Do(2) Baate'n Hain Jis Par Musalman Ki Haalat Par Maatam Karna Padta Hai Isliye Sabse Pehle Zaruri Hai Ke Maut Aur Miraas Ke Zaruri Masayil Musalman Seekhe'n Aur In Tamam Masayil Ke Liye Bahare Shari'at Ko Mutale'ah Me'n Rakho.
Ham Ko Is Jagah Un Rasumo'n Se Guftagu Karni Hai Jo Musalmano'n Me'n Naa-Jaaiz Fazool Kharchiyo'n Ki Padi Huwi Hain. Ye Rasme'n Do(2) Tarah Ki Hai.
Ek To Maut Ke Waqt Ki Rasme'n
Aur Dusra Maut Ke Ba'd Ki Rasme'n
Maut Ke Waqt Ki Rasme'n
Aam Taur Par Yeh Riwaj Hai Ke Marte Waqt Jo Log Maujood Hote Hain. Waha'n Dunyawi Baate'n Karte Hain. Jab Intaqaal Hojata Hai To Rone Peetne Ki Haalat Me'n Be-Sabri Aur Ba'z Waqt Kufr Ke Kalme Muh Se Nikaal Dete Hain Ke Haay Khuda Ne Be-Waqt Maut Dedi, Malikul Maut Ne Zulm Kar Diya, Kya Hamara Hi Ghar Maut Ke Liye Reh Gaya Tha... Waghairah Mar chukney Ke Ba'd Jo Khawesh Wa aqaraba bahar Pardes Me'n Hote Hain Unko Taar (Aajkal Aasan Zari'ah Mobile) Se Khabar Dete Hai Hain. Phir Unke Aane Ka Intazar Karte Hain. Punjab Me'n Yeh Bimari Bohat Hai. Me'n(Musannif) Ne Ba'z Jagah Dekha Hai Ke Do Din Tak Laash Rakhi Rehti Jab Khawesh-O-Aqraba Aaye Tab Dafan Kiya Gaya. Phir Jis Qaum Ya Jis Muhallah Me'n Maut Hogayi Waha'n Saari Qaum Aur Saara Muhallah Roti Naa Pakaye Ab Ek Din Mayyat Padi Rahi To Zindo'n Ki Bhook Ke Maare Aadhi Jaan Ghal Gayi. Ab Jabke Dafan Se Faraghat Ho Chuki To Kisi Qarabat_Daar Ne Un Sabke Liye Roti Pakaayi Aur Roti Pakaane Par Ye Zaruri Hai Ke In Tamam Logo'n Ke Liye Khaana Pakaaye Jinke Ghar Ab Tak Dafan Ke Intazar Me'n Roti Naa Paki Thi Yaani Saari Biradari Ya Saare Muhalle Ke Liye .
U.P. Me'n Ba'z Jagah Dekha Gaya Hai Ke Muat Ki Roti Muhallah Daaro'n Ko Raat Utha Utha Kar Pohchate Hain Agar Kisi Ke Ghar Naa Pohche To Uski Sakht Shikayat Hoti Hai Jaise Ke Shadi Ki Roti Ki Shikayat Hoti Hai. Punjab Me'n Yeh Bhi Riwaaj Hai Ke Mayyat Ke Sath Ek Deg Chawalo'n Ki Pakaa Kar Qabrastaan Me'n Jaati Hai Jo Ke Dafan Ke Ba'd Waha'n Fuqra Ko Taqseem Ki Jaati Hai Aur U.P. Me'n Kaccha Ghallah Aur Paise Le Jaate Hain Jo Qabrastan Me'n Taqseem Hote Hai.
Mayyat Ke Rasmo'n Ki Kharabiya'n
Insaan Ke Liye Naza'a Ka Waqt Bohat Sakht Waqt Hai Ke Umar Bhar Ki Kamayi Ka Nichod Is Waqt Ho Raha Hai. Is Waqt Qarabat_Daaro'n Ka Waha'n Dunyawi Baate'n Karna Sakht Ghalti Hai Kyunke Isse Mayyat Ka Dhyan Hatne Ka Andeshah Hai Faqat Aankho'n Se Aansu Bahe'n Ya Mamuli Aawaz Muh Se Nikle Aur Kuch Sabar Waghairah Ke Lafz Bhi Muh Se Nikal Jaye'n To Koyi Harj Nahi Magar Peetna, Muh Par Tamacha Maarna, Baal Nochna, Kapde Phaadna, Be-Sabri Ki Baate'n Muh Se Nikaalna Nohah Hai Aur Noha Haram Hai. Nohah Karne Waake Sakht Gunehgaar Hain. Ye Samajhlo Ke Nohah Karne Aur Nochne Peetne Se Murdah Wapas Nahi Aajata Balke Sabr Ka Jo Sawab Milta Hai Woh Bhi Jata Rehta Hai. Do Hi Waqt Imtehaan Ke Hote Hain. Ek Khuhsi Ka Dusra Gham Ka.
Jo In Do Waqto'n Me'n Qaayim Raha Woh Waqa'ee Mard Hai. Musibat Ke Waqt Yeh Khayal Rakho Ke Jis Rab Ne Umar Bhar Aaram Diya Agar Wo Kisi Waqt Koyi Ranj Ya Gham Bhej De To Sabr Karna Chahiye. Kisi Qarabat_Daar Ke Aane Ke Intazar Me'n Mayyat Ke Dafan Me'n Der Lagana Sakht Mana Hai Aur Is Me'n Har Tarah Ka Khatrah Hi Hai Agar Zyadah Rakhne Se Mayyat Ka Jism Bigad Jaye Ya Kisi Qism Ki Bu Waghairah Paida Hojaye Ya Kisi Qism Ki Kharabi Paida Hojaye To Is Me'n Musalman Mayyat Ki Tauheen Hai. Qarabat_Daar Aakar Mayyat Ko Zindah Nahi Kar Lenge Aur Muh Dekh Kar Bhi Kya Karenge. Isliye Dafan Me'n Jaldi Karna Zaruri Hai Chand Chizo'n Me'n Bilawajah Der Lagana Mana Hai.
Ladki Ki Shadi, Qarz Ka Ada Karna, Namaz Ka Padhna, Taubah Karna. Mayyat Ko Dafan Karna Nek Kaam Karna Kisi Ke Marne Se Muhallah Me'n Roti Pakana Ya Khana Mana Nahi Hojata. Haan Chunke Mayyat Ke Khaas Rishtah Daar Dafan Me'n Mashghool Hone Aur Zyadah Ranj-O-Gham Ki Wajah Se Khaana Nahi Pakaate Unke Liye Khaana Tayyar Karna Balke Unhe'n Apne Sath Khilana Sunnat Hai Magar Khayal Rahe Ke Khaana Sirf Un Logo'n Ke Liye Pakaya Jaye Aur Wahi Log Khaye'n Jo Ranj-O-Gham Ki Wajah Se Ghar Me'n Naa Paka Sake'n. Muhallah Waalo'n Aur Biradari Ko Rasmi Tariqah Par Khilana Bhi Jaaiz Hai Aur Khaana Bhi. Gham Aur Ranj Da'wato'n Ka Waqt Nahi Mayyat Ke Sath Deg Ya Kuch Ghallah Le Jaane Me'n Harj Nahi Magar Do Baato'n Ka Zaroor Khayal Rahe. Awwal Ye Ke Log Is Khairaat Ko Itna Zaruri Naa Samajhle'n Ke Naa Hoto Qarz Lekar Kare'n Agar Mayyat Ke Wariso'n Me'n Se Koyi Waris Bacchah Ho Ya Koyi Safar Me'n Hoto Mayyta Ke Maal Se Ye Khairaat Naa Kare'n Balke Shakhs Apni Taraf Se Karde. Dusre Ye Ke Qabrastaan Me'n Taqseem Karte Waqt Ye Khayal Rakha Jaaye Ke Fuqra-O-Ghurba Qabro'n Ko Paao'n Se Naa Ronde'n Aur Ye Khaana Ya Ghallah Niche Naa Gire. Behtar To Ye Hai Ke Ghar Par Hi Khairaat Kardi Jaaye Kyunke Ye Dekha Gaya Hai Ke Khairaat Lene Waale Fuqra Ghallah Lene Ke Liye Qabro'n Par Khade Hojate Hain Aur Chawal Waghairah Bohat Kharab Hojate Hain.
Maut Ke Waqt Ki Islami Rasme'n
Jaan Kani Ki Nishani Hi Hai Ke Bimar Ki Naak Tedhi Pad Jati Hai Aur Kanpatti Niche Beth Jati Hai Jab Ye Alamat Bimar Me'n Dekh Li Jaye To Fauran Uska Muh Ka'abah Shareef Ko Kar Diya Jaye Ya To Uski Chaar Paayi Qabr Ki Tarah Rakhi Jaye Yaani Shumaal Ko Sar Aur Junoob(Dakkan) Ko Pao'n Aur Mayyat Ko Seedhi Karwat Par Lita Diya Jaye Magar Isse Jaan Nikalne Me'n Dushwari Hoti Hai Behtar Hai Ke Mayyat Ke Paao'n Qiblah Ki Taraf Kar Diye Jaye'n Aur Usko Chat Lita Diya Jaye Taake Ka'abah Shareef Ko Muh Hojaye. Karwat Ki Zarurat Naa Rahe. Chand Jagah Ka'abah Ki Taraf Paao'n Karna Jaaiz Hain. Let Kar Namaz Padhte Waqt, Jaan Nikalne Ke Waqt, Mayyat Ko Ghusl Dete Waqt Aur Qabrastan Le Jate Waqt Qabrastan Mashriq Ki Taraf Ho Phir Uske Paas Bethne Waale Koyi Dunyawi Baat Naa Kare'n Aur Is Waqt Khud Bhi Naa Roye'n Balke Sab Log Is Qadr Aawaz Se Kalmah Taiyabah Padhe'n Ke Mayyat Ke Kaan Me'n Wo Aawaz Pohachti Rahe Aur Koyi Shakhs Is Waqt Muh Me'n Paani Daalta Rahe Kyunke Is Waqt Pyaas Ki Shiddat Hoti Hai Agar Garmi Zyadah Pad Rahi Hai To Koyi Pankhe Se Hawa Bhi Karta Rahe. Surah Yaseen Shareef Padhe'n Taake Uski Mushkil Aasaan Ho Aur Rab Ta'Aala Se Dua Kare'n Ke Ya Allah Iska Aur Ham Sabka Beda Paar Lagao.
اللھم ربنا ارزقنا حسن الخاتمہ
Jab Jaan Nikal Jaye To Kisi Ko Rone Se Naa Roke'n Kyunke Zyadah Gham Me'n Naa Rona Sakht Bimari Paida Karta Hai Haan Yeh Hukm De'n Ke Nohah Naa Kare'n Yaani Muh Par Tapphad Naa Lagaye'n Aur Be-Sabri Ki Baate'n Naa Bake'n.
Ghusl Aur Kafan Se Farigh Hokar Naat Khwani Karte Huwe Ya Buland Aawaz Se Durood Shareef Aur Kalmah Tayyabah Padhte Huwe Mayyat Ko Le Chale'n Kyunke Aaj Kal Agar Zikre ILaahi Aawaz Se Naa Hoto Log Dunya Ki Baate'n Karte Huwe Jate Hain Aur Yeh Mana Hai. Nez Is Naat Khwani Aur Durood Shareef Ki Aawaz Se Gharo'n Me'n Log Samajh Jate Hain Ke Koyi Mayyat Ja Rahi Hai To Aakar Namaz Aur Dafan Me'n Shareek Hojate Hain. Namaze Janazah Padh Kar Kam Az Kam Teen Baar Surah IkhLaas Aur Surah Flaq, Surah Naas Aur Surah Fatehah Padh Kar Mayyat Ko Sawaab Bakhshe'n Ke Janazah Ki Namaz Ke Ba'd Dua Karna Sunnate RasoolAllah صلی اللہ علیہ وسلم
Aur Sunnate Sahabah Alaihimurridwaan Hai. Dekho Kitab Jaal_Haq Me'n.
Dafan Se Farigh Hokar Qabr Ke Sirhane Se Surah Baqrah Ki Shuru Ki Aayate'n Muflihoon Tak Aur Qabr Ke Paao'n Ki Taraf Surah Baqrah Ka Aakhri Ruku Padh Kar Mayyat Ko Sawaab Bakhshe'n. Jab Dafan Se Farigh Hokar Log Lot Jaye'n Tab Qabr Ke Sirhane Ki Taraf Khade Hokar Azaan Keh De'n To Accha Hai Ke Isse Azabe Qabr Se Najaat Hai Aur Murdah Ko Nakirain Ke Sawalat Ka Jawab Bhi Yaad Aajayega. Phir Qarabat_Daar Aur Mayyat Ke Sirf Ghar Waalo'n Ko Khaana Khilaye'n Balke Behtar Yeh Hai Ke Paka Kar Laane Waala Khud Bhi Unke Sath Khaaye Aur Unko Majboor Karke Khilaye.
Maut Ke Ba'd Ki Murawajjah Rasme'n
Maut Ke Ba'd Har ILaqah Me'n Alehdah Alehdah Rasme'n Hoti Hain Magar Kuch Aisi Hain Jo Thode Farq Se Har Jagah Ada Ki Jati Hain. Inhi Ka Ham Yaha'n Zikr Karte Hain. Dulhan Ka Kafan Iske Mayke Se Aata Yaani Ya To Uske Maa'n Baap Kafan Khareed Kar Laate Hain Ya Ba'd Ko Uski Qimat Dete Hain. Isi Tarah Dafan Aur Taqriban Maut Ka Teen Din Ka Saara Kharch Mayke Waala Karte Hain. Dulhan Ki Aulaad Ka Kafan Bhi Mayke Waalo'n Ki Taraf Se Hona Zaruri Hai. Teen Din Mayyat Waalo'n Ke Ghar Qarabat_Daaro'n Aur KhaasKar Samdhyanah Se Khaana Aana Zaruri Hai Aur Khaana Bhi Itna Zyada Laana Padta Hai Ke Saare Kumbe Balke Saari Biradari Ko Kaafi Ho. Chhe Waqt Khaana Bhejna Padta Hai Agar 25-25 Aadmiyo'n Ka Har Waqt Khaana Pakaya Gaya To Is Qahet Saali Ke Zamanah Me'n Kam Az Kam Pachaas (Aajke Laakho'n) Rupeya Kharch Huwa. Phir Jab Khair Se Teen Din Guzar Gaye To Ab Mayyat Waalo'n Ke Zimmah Laazim Hai Ke Tisre Din Teejah (Suwyam) Kare Jis Me'n Saari Biradari Balke Saari Basti Ki Roti Kare Jis Me'n Ameer-O-Ghareeb Dawlat Mand Log Zaroor Shareek Hon Aur Ghazab Yeh Ke Bohat Jagah Ye Biradari Ki Dawat Khud Mayyat Ke Maal Se Hoti Hai Halanke Mayyat Ke Chhote Yateem Bacche, Bewah Aur Ghareeb Budhe Maa'n Baap Bhi Hote Hain Magar In Sab Ke Muh Se Yeh Paisah Nikaal Kar Is Mela Ko Khilaya Jata Hai. Maut Ke Ba'd 3-Din Tak Mayyat Ke Ghar Waale Ta'ziyat Ke Liye Bethte Hain Jaha'n Bajaye Dua Aur Ta'ziyat Ke Huqqe ke Daur Chalte Hain Aur Kuch QurAan Kareem Padh Kar Bakhshe Bhi Hain To Is Tarah Ke Huqqah munh Me'n Hai Aur Hath Uthe Huwe Hain. Phir 40-Roz Tak Barabar Do Rotiya'n Har Roz Khairaat Ki Jati Hain Aur Iske Darmiyan 10wa'n, 20wa'n Aur 40wa'n Bada Dhoom Dhaam Se Hota Rehta Hai Jis Me'n Biradari Ki Aam Dawate'n Hoti Hain Aur Fatehah Ke Liye Har Qism Ki Mithaiya'n Aur Fruit (Mewey) Aur Kam Az Kam Ek Umdah Kapdo'n Ka Joda Rakha Jata Hai. Fatehah Ke Ba'd Woh Mithaiya'n Aur Fruit To Ghar Ke Baccho'n Me'n Taqseem Kiya Jata Hai Aur Kapdo'n Ka Joda Khairaat Hota Hai. Phir Chhe Mah Ke Ba'd Chhe Maahi Aur Saal Ke Ba'd Mayyat Ki Barsi Hoti Hai. Is Barsi Me'n Biradari Aur Basti Ki Roti Ki Jaati Hai. Lo Saheb! Aaj Rasmo'n Se Peecha Chhuta Ba'z Jagah Dekha Gaya Hai Ke Kafan Par Ek Nihayat Khoobsurat Reshmi Ya Ooni Chadar Daali Jaati Hai Jo Ba'd Dafan Khairaat Hoti Hai Magar Dosto! Yeh Bhi Khayal Rahe Ke 99% Yeh Rasme'n Apne Naam Aur Shohrat Ke Liye Hoti Hain Agar Yeh Kaam Naa Honge To Naak Kat Jayegi.
Maut Ke Rasmo'n Ki Kharabiya'n
Shari'at Me'n Kafan Uske Zimmah Hai Jiske Zimmah Uski Zindagi Ka Kharchah Hai. Lihaza Jawan, Maaldaar Ka Kafan Uske Apne Maal Se Diya Jaana Chahiye Aur Chhote Baccho'n Ka Kafan Uske Maa'n Baap Ke Zimme Hai. Isi Tarah Agar Biwi Ka Intaqal Rukhsat Se Pehle Hogaya To Biwi Ka Baap Ke Zimmah Hai Agar Rukhsat Ke Ba'd Intaqal Huwa To Shauhar Ke Zimmah. Shauhar Ke Hote Huwe Uske Baap Bhai Se Jabran Kafan Lena Zulm Hai Aur Sakht Mana.
Sunnate Yeh Hain Ke Mayyat Ke Padosi Ya Qarabat_Daar Musalman Sirf Ek Din Yaani Do Waqt Khaana Mayyat Ke Ghar Bheje'n Aur Woh Khaana Sirf Un Logo'n Ke Liye Ho Jo Gham Ya Mashghuliyat Ki Wajah Se Aaj Pakaa Naa Sake. Aam Muhallah Waalo'n Aur Biradari Ko Is Khaane Ka Haq Nahi, Unke Liye Yeh Khaana Sakht Mana Hai. Haan Mayyat Ke Ghar Jo Mehmaan Bahar Se Aaye Hain Unko Is Khaane Se Khaana Jaaiz Hai. EK Din Se Zyada Khaana Bhejna Mana Hai. Mayyat Waalo'n Ko Ghar Teejah Aur 40wa'n Ki Roti Karana Aur Isse Biradari Ki Roti Lena Haraam-O-Makruh Tehrami Hai.
Lihaza Yeh Murawajjah Teejah, 10Wa'n, 40Wa'n, 6 Maahi Barsi Ki Biradari Ki Dawate'n Khilaane Waale Aur Khaane Waale Dono'n Gunehgaar Hain Yeh Khaana Sirf Gharibo'n Faqiro'n Ka Haq Hai Kyunke Yeh Sidq-O-Khairaat Hai Aur Agar Mayyat Ka Koyi Waris Bacchah Hai Ya Safar Me'n Hai To Baghair Taqseem Kiye Huwe Uska Maal Khairaat Karna Bhi Haraam Hai Ke Naa Yeh Faqiro'n Ko Jaaiz Aur Naa Maaldaro'n ko. Lihaza Ya To Koyi Waris Khaas Apne Maal Se Yeh Khairaat Kare Ya Pehle Mayyat Ka Maal Taqseem Karle'n Phir Naa-Baaligh Aur Ghayeb Ka Hissah Nikaal Kar Hazir Baaligh Waris Apne Hissah Se Kare'n In Dawato'n Ka Yeh Shara'ee Hukm Tha.
Ab Dunyawi Haalaat Par Nazar Karo To Aapko Ma'loom Hoga Ke Teejah 40Wa'n Aur Barsi Ki Rasmo'n Ne Kitne Musalmano'n Ke Ghar Barbad Kar Diye. Mere Samne Bohat Aisi Misale'n Hain Ke Musalmano'n Ki Dukane'n Jayedade'n Aur Makanaat 40Wa'n Aur Teejah Khaa Gaya. Aaj Woh Thokare'n Khaate Phir Rahe Hain. Ek Saheb Ne Baap Ke 40We'n Ke Liye Baniye (Kadaad) Se 400 Rupe Qarz Liye The. 2700 Rupeya Ada Kar Chuke Magar Qarz Khatam Nahi Huwa. Phir Lutf Yeh Hai Ke Is Teeje Aur 40We'n Ki Rasmo'n Se Sirf Ek Hi Ghar Tabah Nahi Hota Balke Dulhan Ke Mayke Waale Bhi Sath Tabah Hote Hain. Yaani
Ham To Dube Hain Sanam Tum Ko Bhi Le Dubenge
Kyunke Qaa'idah Yeh Hota Hai Ke Agar Teejah Mayyat Waala Kare To 40We'n Ki Roti Uske Samdhyane Waale Kare'n. Mere Is Kalaam Ka Tajrubah Unko Khoob Huwa Hoga Ke Jinko Kabhi In Rasmo'n Se Waastah Pada Ho. Dekha Yeh Gaya Hai Ke Mayyat Ka Dam Nikla Aur Mahallah Waali Aurato'n Mardo'n Ne Ghar Gher Kiya Awwal To Paan Daan Ke Tukde Uda Diye. Ab Sab Log Jama Hain. Khaana Aane Ka Intazar Hai. Becharah Mayyat Waala Musibat Ka Maara Apna Gham Bhool Jata Hai Yeh Fikr Pad Jati Hai Me Is Meley Ka Pet Kis Tarah Bharu'n Phir Jab Tak Us Bechare Ka Diwaliyah Nahi Nikal Jata Ye Melah Nahi Hatta.
Lihaza Aye Musalmano'n! In Naa-Jaaiz Aur Kharab Rasmo'n Ko Bilkul Band Kardo.
Maut Ke Ba'd Ki Islami Rasme'n
Kafan Dafan Ka Saara Kharchah Ya To Khud Mayyat Ke Maal Se Ho Aur Agar Kisi Ki Biwi Ya Bacchah Mara Hai To Shauhar Ya Baap Ke Maal Se Ho Mayke Se Hargiz Hargiz Naa Liya Jaye, Mayyat Ke Maal Se Kare'n. In Dawato'n Ka Yeh Shara'ee Hukm Hai Kisi Se Hargiz Hargiz Naa Liya Jaye. Mayyat Waalo'n Ke Ghar Padosi Ya Qarabat_Daar Sirf Ek Din Khaana Le Jaye'n Aur Woh Bhi Itna Jitna Ke Khaalis Ghar Waalo'n Ya Unke Pardesi Mehmano'n Ko Kaafi Ho Aur Is Me'n Sunnat Ki Niyyat Kare'n Naa Ke Dunyawi Badlah Aur Naam-O-Namood Ki. Agar Teen Roz Tak Ta'ziyat Ke Liye Mayyat Waale Mard Kisi Jagah Bethe'n To Koyi Harj Nahi Magar Is Baat Me'n Huqqah Ka Daur Bilkul Naa Ho Balke Aane Waale Fatehah Padhte Aaye Aur Sabr Ki Hidayat Karte Jaye Teen Din Ke Ba'd Ta'ziyat Ke Liye Koyi Naa Bethe Aur Naa Koyi Aaye, Haan Jo Pardesi Qarabat_Daar Safar Se Aaye To Jab Bhi Pohche Mayyat Waalo'n Ki Ta'ziyat Karte Yaani PurSa De. Aurate'n Jab Kisi Ke Ghar Pursa Deen Aati Hain To Khwah Makhwah Mayyat Waalo'n Se Mil Kar Roti Hain Chahe Aansu Naa Aaye'n Mil Kar Aawaz Nikalna Zaruri Hota Hai Yeh Bilkul Ghalat Tariqah Hai. Inko Sabr Ki Talqeen Karo.
Aur 10wa'n Aur 40wa'n Aur Barsi Waghairah Zaroor Karna Chahiye. Magar Is Do Baato'n Ka Khayal Zauri Hai. Ek To Yeh Ke Jaha'n Hai Hosake Mayyat Ke Maal Se Naa Kare'n Agar Koyi Bacchah Waris Hai Tab Uske Haq Se Yeh Khairaat Karna Haraam Hai. Lihaza Koyi Qarabat_Daar Khaana Peena Waghairah Apne Maal Se Kare Aur Dusre Yeh Ke Khaana Sirf Fuqara Aur Ghurba Ko Khilaya Jaye. Aam Biradari Ki Roti Hargiz Hargiz Naa Ki Jaye Aur Fuqara Par Is Qadr Kharch Kiya Jaye Jitni Haisiyat Ho Qarz Lekar To Hajj Aur Zakaat Dena Bhi Jaaiz Nahi, Yeh Sadqah Waghairah Se Badh Kar Nahi. Iski Puri Tehqeeq Ke Liye Aalahazrat Qudda Sirrahu Ki Kitaab جلی الصوت لنھی الدعوۃ عن اجل الموت Dekho.
Balke Dekhne Waalo'n Se Hamko Ma'loom Huwa Ke Aalahazrat Fazile Bareilwi Rahmatullahi Alaih Jab Kisi Ke Yaha'n Pursa Dene Jate To Uske Ghar Huqqah, Paan Bhi Istemaal Naa Karte The Kisi Ne Arz Kiya Ke Hazrat Yeh To Dawat Nahi, Faqat Ek Tawadu Hai Yeh Kyun Nahi Istemaal Farmate To Farmaya Ke Zukaam Ko Roko Taake Bukhar Se Aman Rahe.
Hamari Is Guzarish Ka Maqsad Yeh Nahi Hai Ke Teejah, 10wa'n, 40wa'n Waghairah Naa Karo. Yeh To Devbandi Ya Wahabi Kahega.
Maqsad Yeh Hai Ke Isko Auliya-E-Kiraam Ke Naam-O-Namood Ke Liye Karo Balke Naa-Jaaiz Aur Fuzool Rasmo'n Ko Isse Nikaal Do.
Haq Ta'Aala Tawfeeq Ata Farma De... Aameen