◆Tawaaf Ki Niyyat
Ab Aap Ka'aba Ki Taraf Muh Karke Hajre Aswad Ke Qareeb Yu'n Khade Hon Ke Kaale Marble Ki Line Aapke Dahne Hath Ko Rahe, Phir Aap Baghair Hath Uthaye Tawaaf Ki Niyyat Kare'n:
"Allahumma Inni Ureedu Tawaafa Baitikal Muharrami Fayassarhu Li Wa-Taqabbalhu Minni"
(Ya Allah Me'n Tere Izzat Waale Ghar Ka Tawaaf Karna Chahta Hu'n Isko Tu Mere Liye Aasaan Farma Aur Isko Mujhse Qubool Kar)
Niyyat Karne Ke Ba'd Aap Ka'aba Ko Muh Kiye Huwe Apni Dahni Janib Thoda Sarke'n Aur Farsh Par Bani Kaale Marble Ki Line Par Hajre Aswad Ke Aine Muqabil Khade Hojaye'n Ye Baat Adna Barkat Me'n Haasil Hojayegi, Phir Kaano'n Tak Hath Is Tarah Uthaye'n Ke Aapki Hatheliya'n Hajre Aswad Ki Taraf Rahe'n Aur Kahe'n:
"Bismillahi Wal-HamdulillAhi WAllahu Akbar Wassalatu Wassalamu Alaa Rasulillah"
Niyyat Ke Waqt Hath Naa Uthaye'n Jaise Ba'z Mutawwif Karte Hain Ke Ye Bid'at Hai.
Note: Niyyat Dil Ke Iradah Ka Naam Hai. Jo Niyyat Arbi Zuban Me'n Kare Wo Iske Maana Apne Zahan Me'n Haazir Rakhe, Warna Niyyat Apni Madri Zuban Me'n Bhi Ho Sakti Hai. Ye Zahan Nasheen Karle'n Ke Aapne Agar Tamattu Ya Qiraan Ka Ahraam Baandha Hai To Ye Tawaaf Umrah Hai Aur Agar Ifraad Ka Ahraam Baandha Hai To Ye Tawaafe Qadoom Hai.
Ab Agar Muyassar Hosake To Hajre Aswad Par Dono'n Hatheliya'n Aur Unke Bich Me'n Muh Rakh Kar Yu'n Bosa De'n Ke Aawaz Naa Paida Ho. Aisa Teen Baar Kare'n. Ye Naseeb Hojaye To Kamale Sa'adat Hai Yaqinan Hamare Aaqa-O-Maula Mohammadur RasoolAllah ﷺ Ne Ise Bosa Diya Aap Ki Khush Nasibi Ke Aap Ka Muh Waha'n Tak Pahuncha Aur Hujoom Ke Sabab Naa Ho Sake To Naa Dusro'n Ko Eza Do Naa Dabo Kuchlo Balke Uske Aewaz Hath Se Cchu Kar Use Choom Lo Aur Haath Naa Pohanche To Lakdi Se Cchu Kar Use Choom Lo Aur Ye Bhi Naa Ho Sake To Hatho'n Se Uski Taraf Isharah Karke Unhe'n Bosa De Lo. Hajre Aswad Ko Bosa Dene Ya Hath Ya Lakdi Se Cchu Kar Choom Lene Ya Isharah Karke Hatho'n Ko Bosa Dena Ko Istelaam Kehte Hain.
Aisa Karne Me'n Bhi Sawaab Me'n Koyi Kami Nahi Hogi.
Istelaam Ke Waqt Ye Dua Padhe'n:
"Allahummagh Firli Zunubi Wa-Tahhirli Qalbi Washrahli Sadri Wa-Yassirli Amri Wa-Aafini Fee'man Aafait"
(ILaahi Mere Gunah Bakhsh De Aur Mere Dil Ko Paak Kar Aur Mere Sinah Ko Khol De Aur Mere Kaam Ko Aasaan Kar Aur Mujhe Aafiyat De Un Logo'n Me'n Jinki Tune Aafiyat Di)
Tambeeh: Hajre Aswad Ya Ka'aba Shareef Ki Imarat Par Kuch Log Itr Ya Khushbu Chidakte Rehte Hain. Tawaaf Karne Waalo'n Ke Liye Laazim Hai Ke Agar Hajre Aswad Par Khushbu Padi Hoto Use Ahraam Ki Haalat Me'n Hath Lagane Ya Bosa Dene Se Bache' Wo log Jinhone'n Hajje Tamattu Ya Sirf Umrah Ka Ahraam Baandha Ho Wo Tawaaf Shuru Karte Waqt Hajre Aswad Ka Pehla Bosa Lete Hi Labbaik Cchod De'n.
Ab Darwaza-E-Ka'aba Ki Taraf Badhe'n Jab Hajre Aswad Ke Samne Se Guzar Jaye'n To Seedhe Hole'n. Khana-E-Ka'aba Ko Apne Baaye'n Hath Par Le Kar Yu'n Chale'n Ke Kisi Ko Eza Naa Ho.
Pehle Teen Phero'n Me'n Mard Ramal Karte Chale'n Yaani Jald Jald Chote Qadam Rakhte, Shaane Hilaate Jaise Qawi-O-Bahaddur Log Chalte Hain Naa Kodte Daudte. Jaha'n Zyada Hujoom Hojaye Aur Ramal Me'n Apni Ya Dusre Ki Eza Hoto Itni Dar Tak Ramal Tark Kar De'n, Magar Ramal Ki Khatir Aap Naa Ruke'n Balke Tawaaf Jaari Rakhe'n. Phir Jab Mauqa Mil Jaye To Jitni Der Tak Ke Liye Ramal Ke Sath Tawaaf Mumkin Ho Kare'n. Tawaaf Me'n Jis Qadar Khana-E-Ka'aba Se Nazdeek Hon Behtar Hai Magar Naa Itna Qareeb Ke Jism Ya Kapda Diware Ka'aba Se Lage Aur Agar Ka'aba Ke Nazdeek Hujoom Ke Sabab Ramal Naa Hosake To Tawaaf Door Se Karna Behtar Hai Taake Ramal Tark Naa Ho. Jab Multazim Ke Samne Aaye'n To Ye Dua Padhe'n :
"Allahumma Haazal Baitu Baituka Wal Haramu Haramuka Wal-Amnu Amnuka Wa Haaza Maqamul Aa'e'zibika Minannari Fa'Ajirni Minannar. Allahumma Qannini Bima Razaqtani Wa-Barikli Feehi Wakhluf Alaa Kulli Ghaa'e'batim Bi-Khairin Laa ILaaha ILlallahu Waahdahu Laa Sharika Lahu Lahul Mulku Wa-Lahul Hamdu Wa-Hu-Wa Alaa Kulli Shai'in Qadeer"
(Aye Allah Ye Ghar Tera Ghar Hai Aur Haram Tera Haram Hai Aur Aman Tera Hi Aman Hai Aur Jahannam Se Teri Panah Mangne Waale Ki Ye Jagah Hai Tu Mujh Ko Jahannam Se Panah De Aye Allah Jo Tune Mujhko Diya Mujhe Uspar Qaane Karde Aur Mere Liye Is Me'n Barkat De Aur Har Ghayib Par Khair Ke Sath Tu Khalifah Hoja Allah Ke Siwa Koyi Ma'bood Nahi Jo Akela Hai Uska Koyi Shareek Nahi Usi Ke Liye Mulk Hai Aur Uski Ke Liye Hamd Hai Aur Wo Har Shay Par Qadir Hai)
Ab Aap Rukne Iraqi Ki Taraf Badhe'n Aur Ye Padhta Chale'n:
"Subhan Allahi Wal-HamdulillAhi Wa-Laa ILaha ILlallahu Wallahu Akbar Wala Hawla Wala Quwwata ILla BillAh"
(Allah Ke Liye Paaki Hai Aur Allah Ke Liye Hamd Hai Aur Allah Ke Siwa Koyi Ma'bood Nahi Aur Allah Bahot Bada Hai Aur Gunah Se Pherne Aur Neki Ki Taqat Nahi Magar Allah Ki Madad Se)
Aur Jab Rukne Iraqi Par Pohnche'n To Ye Du Padhe'n:
"Allahumma Inni Auzubika Minashshakki Washshirki Washshiqaaqi Wannifaaqi Wa-Su'il Akhlaaqi Wa-soo IL-Munqalabi Filmaali Wal-Ahli Wal-Walad"
(Aye Allah Me'n Teri Panah Mangta Hu'n Shak Aur Shirk Aur Ikhtelaaf-O-Nifaaq Se Aur Maal -O-Ahle-O-Aulaad Me'n Wapas Hokar Buri Baat Dekhne Se)
Aur Jab Mezabe Rahmat Ke Samne Aaye'n To Ye Dua Padhe'n:
"Allahumma Azillini Tahta Zilli Arshika Yauma Laa Zilla ILla Zilluka Wa-La Baaqin ILla Wajhuka Was'qini Min Haudi Nabiyika Mohammadin Sallallahu Ta'Aala Alaihi Wa Sallam Sharbatan Hanee'atan Laa Azma'u Ba'daha Abada"
(ILaahi Tu Mujhko Apne Arsh Ke Saayah Me'n Rakh Jis Din Tere Saayah Ke Siwa Koyi Saayah Nahi Aur Teri Zaat Ke Siwa Koyi Baaqi Nahi Aur Apne Nabi Mohammed ﷺ Ke Hauz Se Mujhe Khush_Gawar Paani Pila Ke Uske Ba'd Kabhi Pyaas Naa Lage Aur Phir Jab Aap Rukne Shaami Ke Samne Aaye'n To Ye Dua Padhe'n:
"Allahummaj Alhu Hajjam Mabruraw Wa-Sa'yam Mashkuraw Wa-Zambam Maghfuraw Wa-Tijaratal Lan Tabura Ya Aalima Maafis Suduri Akhrijni Minazzulumati ILannoor"
(Aye Allah Tu Is Ko Hajje Mabroor Kar Aur Sa'ee Mashkoor Kar Aur Gunah Ko Bakhsh De Aur Isko Wo Tijarat Karde Jo Halaak Naa Ho Aye Sino'n Ki Baate'n Janne Waale Mujhko Tarikiyo'n Se Noor Ki Taraf Nikaal)
Ab Aap Ka'aba Ke Tisre Kone, Rukne Yamaani Ke Paas Aaye'n To Use Dono'n Hatho'n Se Ya Sirf Dahne Hath Se Tabarrukan Chhule'n Aur Agar Mumkin Hoto Rukne Yamaani Ka Bosa Bhi De'n Aur Naa Ho Sake To Yaha'n Lakdi Se Chhuna Ya Isharah Karke Hath Choomna Nahi. Sirf Baaye'n Hath Se Chhuna Mana Hai. Basa Auqaat Yaha'n Bhi Log Itr Dalte Hain Agar Itr Waghairah Hoto Use Ahraam Ki Haalat Me'n Hath Naa Lagaye'n Warna Kaffarah Laazim Aa Sakta Hai. Aksar Log Tawaaf Ke Dauran Rukne Yamaani Ki Taraf Hath Lehrate Huwe Door Se Guzarte Hain Ye Khilaafe Sunnat Hai.
Yaha'n Aap Ye Dua Padhe'n:
"Allahumma Inni As'alukal Afwa Wal-Aafiyata Fiddeeni Waddunya Wal-Aakhirah"
(Aye Allah Tujh Se Suwal Karta Hu'n Gunaho'n Se Muafi Ka Aur Deen,Dunya Aur Aakhirat Me'n Aafiyta Ka)
Rukne Shaami Ya Iraqi Ko Cchuna Ya Bosa Dena Nahi.
Jab Rukne Yamaani Se Rukne Aswad Ki Taraf Badhenge To Ye Mustajab Hai Jaha'n Sattar Hazar Farishte Dua Par Aameen Kehne Ke Liye Muqarrar Hain Yaha'n Wahi Dua-E-Jame Padhe'n Jo Pichli Post Me'n Darj Hai.
Yaha'n Apne Aur Sab Ahbaab-O-Muslimeen Aur Is Kitaab Ke Musannif Ke Liye Dua Mange'n Aur Agar Duae'n Naa Yaad Honto Sirf Durood Shareef Padhe'n Ye Kaafi-O-Waafi Hai Ke Mohammadur RasoolAllah ﷺ Ke Sacche Wa'de Ke Mutabiq Durood Shareef Ka Padhna Tamam Duao'n Se Behtar-O-Afzal Hai Yaani Yaha'n Aur Tamam Muwaqe Me'n Apne Liye Dua Ke Badle Huzoor Aqdas ﷺ Par Durood Bheje'n Kyunke Ke RasoolAllah ﷺ Ne Farmaya Ke "Aisa Karega To Allah Tere Sab Kam Bana Dega Aur Tere Gunah Muaf Farma Dega".
Tawaaf Me'n Dua Ya Durood Shareef Padhne Ke Liye Ruke'n Nahi Balke Chalte Me'n Padhe'n. Dua-O-Durood Chilla Chilla Kar Naa Padhe'n Jaise Mutawwif Padhaya Karte Hain Balke Ahistah Padhe'n, Aawaz Sirf Is Qadar Ho Jo Apne Kaan Tak Aaye. Ab Jab Aap Charo'n Taraf Ghoom Kar Hajre Aswad Ke Paas Pohnche'n Ye Ek Phera Huwa. Yaha'n Log Door Hi Door Se Apne Hath Lehrate Huwe Guzarte Hain, Ye Khilafe Sunnat Hai. Aap Phir Farsh Par Bani Kaale Marble Ki Line Par Hajre Aswad Ke Aine Muqabil Khade Hokar Kahe'n.
"Bismillahi Wal-HamdulillAhi WAllahu Akbar Wassalatu Wassalamu Alaa Rasulillah"
Aur Istelaam Kare'n Yaani Agar Mauqa Hoto Hajre Aswad Ko Bosa De'n Ya Hatho'n Se Isharah Karke Unhe'n Choom Le'n. Phir Ka'aba Shareef Ko Apne Baaye'n Taraf Lekar Dusra Chakkar Shuru Kare'n. Har Phera Kahtam Hone Par Aisa Hi Kare'n. Is Tarah Aap Saat (7) Phere Pure Kare'n. Niyyat Sirf Tawaaf Shuru Karte Waqt Karenge Baaqi Phero'n Me'n Niyyat Nahi Karni Hai. Ramal Aap Sirf Pehle Teen Phero'n Me'n Kare'n Aakhri Chaar Phero'n Me'n Ahistah Baghair Shaana Hilaye Ma'muli Chaal Chale'n.
Jab Saato'n7) Phere Pure Hojaye'n, To Aakhir Me'n Phir Aap Istelaam Kare'n Yaani Agar Mauqa Hoto Hajre Aswad Ko Bosa De'n Ya Hatho'n Se Isharah Karke Unhe'n Choom Le'n. Tawaaf Pura Hogaya Ab Aap Apne Ahraam Ki Chadar Se Apna Dahna Kandha Dhaank Le'n.
Index