◆Tawaaf Ke Masa'il
Tawaaf Ka Ye Tariqah Jo Bayan Huwa, Agar Kisi Ne Iske Khilaaf Tawaaf Kiya Maslan Baaye'n Taraf Se Shuru Kiya, Ke Ka'aba Shareef Tawaaf Karne Me'n Seedhe Hath Ko Raha Ya Ka'aba Shareef Ko Muh Ya Peeth Karke Aada Aada Tawaaf Kiya, Ya Hajre Aswad Se Shuru Naa Kiya, Ya Hateem Ke Andar Se Tawaaf Kiya. To Jab Tak Makkah MuAzzamah Me'n Hai Is Tawaaf Ka Ae'aadah Kare Aur Agar Ae'aadah Naa Kiya Aur Waha'n Se Chala Aaya To Dam Wajib Hai.
Tawaaf Saat(7) Phero'n Par Khatam Hogaya. Ab Agar Kisi Ne Aathwa'n Phera Jaan Bojh Kar Qasdan Shuru Kar Diya To Ye Ek Jadeed Tawaaf Shuru Huwa. Ab Uspar Laazim Hai Ke Wo Is Jadeed Tawaaf Ke Bhi Saat(7) Phere Kare.
Tawaafe Farz Ya Wajib Ke Phero'n Me'n Agar Shak Waaqe Ho Ke Kitne Huwe To Ab Is Tawaaf Ko Naye Sire Se Kare, Agar Kisi Ek Aadil Shakhs Ne Bata Diya Ke Itne Phere Huwe To Uske Qaul Par Amal Karna Behtar Hai Aur Do(2) Aadil Ne Bataya To Unke Kehne Par Zaroor Amal Kare. Isi Tarah Agar Tawaafe Nafl Me'n Shak Waaqe Huwa Ke Kitne Phere Huwe To Jo Gumaan Ghaalib Ho Uspar Amal Kare. Tawaafe Ka'aba Masjid-ul-Haram Ke Andar Hoga Agar Masjid Ke Bahar Se Tawaaf Kiya Naa Huwa.
Tawaaf Karte Karte Naya Wazu Karne Ke Liye Chala Gaya To Agar Usne Chaar(4) Phero'n Se Kam Kiye The To Wo Wapas Aakar Usi Pehle Tawaaf Par Bina Kar Sakta Hai, Yaani Jitne Phere Reh Gaye Hon Unhe'n KarLe Tawaaf Pura Hojayega, Naye Sire Se Shuru Karne Ki Zarurat Nahi. Agar Naye Sire Se Kiya Jab Bhi Harj Nahi. Is Surat Me'n Is Pehle Ko Pura Karna Zaruri Nahi. Bina Ki Surat Me'n Jaha'n Cchoda Tha Wahi'n Se Shuru Kare Hajre Aswad Se Shuru Karne Ki Zarurat Nahi. Aur Agar Wo Chaar(4) Ya Zyada Phere Kar Chuka To Zaruri Hai Ke Wo Bina Hi Kare, Ab Wo Naye Sire Se Shuru Nahi Kar Sakta.
Tawaaf Kar Raha Tha To Bila Zarurat Cchod Kar Chala Jana Makruh Hai Magar Tawaaf Baatil Naa Hoga Yaani Aakar Pura Karle.
Ramal Sirf Pehle Teen(3) Phero'n Me'n Sunnat Hai. Agar Kisi Wajah Se Pehle Me'n Ramal Naa Kar Sake To Sirf Dusre Aur Tisre Me'n Ramal Kare. Aur Agar Pehle Do(2) Phero'n Me'n Ramal Naa Kar Sake To Sirf Tisre Phere Me'n Ramal Kare. Ramal Sirf Is Tawaaf Me'n Sunnat Hai Jiske Ba'd Sa'ee Ho. Ramal Cchotne Par Koyi Kaffarah Nahi.
Izteba Tawaaf Ke Saato'n Phero'n Me'n Sunnat Hai. Tawaaf Ke Ba'd Izteba Naa Kiya Jaye. Izteba Sirf Isi Tawaaf Me Hai Jiske Ba'd Sa'ee Ho Aur Agar Tawaaf Ke Ba'd Sa'ee Naa Hoto Izteba Bhi Nahi. Agar Kisi Ne Izteba Karke Namaz Padhi To Makruh Hogi, Kyunke Namaz Me'n Mondha Khula Rehna Makruh Hai.
Index