◆Tawaaf Ke Ahkaam
Masjid-ul-Haram Me'n Dakhil Hone Aur Ziyarate Ka'aba Shareef Ke Ahkaam Bayan Ho Chuke. Aap Jab Masjid-ul-Haram Me'n Dakhil Hon Aur Agar Kisi Namaz Ka Waqt Hoto Aap Usse Farigh Hole'n Aur Phir Tawaaf Ke Liye Tayyar Hojaye'n. Ka'aba Shamma Hai Aur Aap Parwanah! Kya Aap Ne Dekha Nahi Ke Parwanah Shamma Ke Gird Kis Tarah Qurban Hota Hai? To Aap Bhi Is Shamma Par Qurban Hone Ke Liye Musta'id Hojaye'n. Tawaaf Shuru Karne Se Pehle Hamara Mashwarah Hai Ke Aap Ka'aba Shareef Ka Acchi Tarah Didaar Karle'n Aur Iske Mukhtalif Maqamaat Jinki Tafseel Pehle Bayan Ho Chuki Hai Acchi Tarah Zahan Nasheen Karle'n Taake Tawaaf Saheeh Tariqah Se Ada Kar Sake'n.
Tawaaf Waghairah Ki Dua'en Acchi Tarah Saheeh Talaffuz Ke Sath Yaad KarLi Jaye'n Agar Duae'n Yaad Naa Hon Ya Saheeh Naa Padh Sake'n To Tawaaf Me'n Balke Har Mauqa Par Durood Shareef Padhe'n Ke Afzal Hai.
Jo Bhi Padhe'n Ahistah Padhe'n Chilla Kar Naa Padhe'n.
Masjid-ul-Haram, Ek Gol Wasee Aehatah Hai Jiske Kinare Kinare Dalaan Aur Aane Jaane Ke Darwaze Hain Aur Bich Me'n Mataaf Yaani Tawaaf Karne Ki Jagah, Hujjaje Kiram Ki Sahulat Ke Liye Hajre Aswad Se Le Kar Masjid Ki Imarat Tak Mataaf Ki Zameen Par Ek Kaale Marble Ki Line Kheench Di Gayi Hai Aur Masjid Ki Imarat Par Hari Tubelight Lagi Huwi Hai, Jo Is Baat Ki Nishandahi Karti Hai Ke Tawaaf Yaha'n Se Shuru Kiya Jaye.
Jab Aap Hajre Aswad Ke Qareeb Pohnche'n Ye Dua Padhe'n:
"Laa-ILaha ILlallahu Waahdahu Sadaqa Wa'dahu Wa-Nasara Abdahu Wa-Hazamal Ahzaba Waahdahu Laa-ILaha ILlallahu Waahdahu LaaSharika Lahu Lahul Mulku Wa-Lahul Hamdu Wa-Hu-Wa Alaa Kulli Shai'in Qadeer"
(Allah Ke Siwa Koyi Ma'bood Nahi Wo Tanha Hai Uska Koyi Shareek Nahi Usne Apna Wa'da Saccha Kiya Aur Apne Bandah Ki Madad Ki Aur Tanha Usi Ne Kuffar Ki Jama'ato'n Ko Shikast Di Allah Ke Siwa Koyi Ma'bood Nahi Wo Tanha Hai Uska Koyi Shareek Nahi Usi Ke Liye Mulk Hai Aur Usi Ke Liye Hamd Hai Wo Har Shay Par Qadir Hai.
Tawaaf Shuru Karne Se Pehle Mard Izteba Karle'n Yaani Chadar Ko Dahni Baghal Ke Niche Se Is Tarah Nikale'n Ke Dahna Mondha Khula Rahe Aur Chadar Ke Dono'n Kinare Baaye'n Mondhe Par Daal De'n.
Index