Safa-O-Marwah Ki Sa'ee

on

◆Safa-O-Marwah Ki Sa'ee

 Ab Agar Takaan Waghairah Naa Hoto Fauran Warnah Kuch Aaram Le Kar Safa Marwah Ki Sa'ee Ke Liye Phir Hajre Aswad Ke Paas Aaye'n Aur Farsh Par Bani Kaale Marble Ki Line Par Hajre Aswad Ke Aine Muqabil Khade Hojaye'n Aur Kaano'n Tak Hath Is Tarah Uthaye'n Ke Aapki Hatheliya'n Hajre Aswad Ki Taraf Rahe'n Aur Kahe'n:
"Bismillahi Wal-HamdulillAhi WAllahu Akbar Wassalatu Wassalamu Ala RasulillAh"

 Ab Aap Istelaam Kare'n Yaani Agar Mauqa Hoto Hajre Aswad Ko Bosa De'n Ya Hatho'n Se Isharah Karke Unhe'n Choom Le'n Aur Ye Naa Ho Sake To Uski Taraf Muh Karke "Allahu Akbaru WaLaa ILaha ILlallahu Wal-HamdulillAh" 
Aur Durood Padhte Huwe Fauran Baabe Safa Ki Janib Rawanah Hojaye'n. Safa Par Chadhne Se Pehle Ye Dua Padhe'n:
"Abda'u Bima Bada'Allahu Bihi Innas Safa Wal-Marwata Min Sha'Aa'irillahi Faman Hajjal Bayata Awi-Tamara Falaa Junaha Alaihi Ayyat'tawwa'fa Bihima Wa-Man Tatawwa'a Khairan Fa-Innallaha Shaakirun Aleem"

 (Me'n Isse Shuru Karta Hun Jisko Allah Ne Pehle Zikr Kiya Beshak Safa-O-Marwah Allah Ki Nishaniyo'n Se Hain Jisne Hajj Ya Umrah Kiya Uspar Inke Tawaaf Me'n Gunah Nahi Aur Jo Shakhs Nek Kaam Kare To Beshak Allah Badla Dene Waala Jaanne Waala Hai)

 Zikr Durood Padhte Huwe Aap Safa Par Itna Chadhe'n Ke Ka'aba Shareef Nazar Aaye Aur Ye Thodi Hi Buland Par Chadhne Se Mumkin Hota Hai Yaani Agar Diware'n Darmiyaan Me'n Naa Hote'n To Ka'aba Shareef Yaha'n Nazar Aata Isse Uppar Chadhne Ki Haajat Nahi. Kuch Jahil Bilkul Upri Seedhi Tak Chadh Jate Hain, Aap Isse Parhez Kare'n.

 Phir Ka'aba Shareef Ki Taraf Muh Karke Dono'n Hath Mondho'n Tak Dua Ki Tarah Utha Kar Itni Der Tak Dua Me'n Masroof Rahe'n Jitni Der Me'n Surah Baqrah Ki 25 Aayato'n Ki Tilawat Ki Jaye. Yaha'n Tasbeeh-O-Tehleel-O-Takbeer-O-Durood Padhe'n Aur Apne Liye Aur Apne Dosto'n Aur Digar Musalmano'n Ke Liye Dua Kare'n Ke Yaha'n Dua Qubool Hoti Hai. Yaha'n Bhi Wahi Dua-E-Jame Padhe'n Jo Pichle Post Par Darj Hai.

 Dua Me'n Hatheliya'n Aasman Ki Taraf Rakhe'n Naa Is Tarah Jaise Ba'z Log Hatheliya'n Ka'aba Shareef Ki Taraf Karte Hain. Aksar Log Hath Kaano'n Tak Uthate Hain Phir Cchod Dete Hain Yunhi Teen Baar Karte Hain, Ye Ghalat Tariqah Hai. Balke Aap Ek Baar Dua Ke Liye Hath Uthaye'n Aur Jab Tak Dua Maange'n Hath Uthaye Rahe'n Jab Khatam Hojaye Hath Cchod De'n. 
Index