◆Namaze Tawaaf
Tawaaf Ke Ba'd Aap Maqame Ibraheem Par Aakar Ye Aayat Padhe'n:
(Aur Ibraheem Ke Khade Hone Ki Jagah Ko Namaz Ka Maqaam Banao)
Ab Maqaame Ibaraheem Ke Nazdeek Jagah Mile To Behtar Warnah Masjide Haram Me'n Jaha'n Jagah Mile 2-Raka'at Namaz Wajibul Tawaaf Agar Makruh Waqt Naa Hoto Padhe'n. Afzal Ye Hai Ke Pehli Raka'at Me'n Alhamd Ke Ba'd Surah Kafiroon Aur Dusri Me'n Alhamd Ke Ba'd Surah IkhLaas Padhe'n. Hadees Me'n Hai Jo Maqaame Ibraheem Ke Piche 2-Raka'ate'n Padhe Uske Agle Pichle Gunah Bakhsh Diye Jayenge Aur Qayamat Ke Din Aman Waalo'n Me'n Mahshoor Hoga.
Ye Raka'ate'n Padh Kar Mandarja Zail Dua Maange'n:
"Allahumma Innaka Ta'lamu Sirri Wa-Ala Niyati Faqbal Ma'zirati Wa-Ta'lamu Haajati Faa'tini Su'li Wa-Ta'lamu Maafi Nafsi Faghfirli Zunubi Allahumma Inni As'aluka Eemanay Yubaa Shiru Qalbi Wa-Yaqinan Saadiqan Hatta Aa'lama Annahu Laa Yuseebuni ILla Maa Katabta Li Wa-Ridayam Minal Ma'ee'Shati Bimaa Qasamta Li Ya Arhamar Raahimeen"
(Aye Allah Tu Mere Poshidah Aur Zahir Ko Jaanta Hai Tu Meri Ma'zarat Ko Qubool Kar Aur Meri Haajat Ko Ata Kar Aur Jo Kuch Mere Nafs Me'n Hai Tu Use Jaanta Hai Tu Mere Gunaho'n Ko Bakhsh De Aye Allah Me'n Tujhse Eemaan Ka Suwal Karta Hun Jo Mere Qalb Me'n Sarayat Kar Jaye Aur Yaqeen-E-Sadiqan Maangta Hun Taake Me'n Jaan Lu'n Ke Mujhe Wahi Pohnchega Jo Tu Mere Liye Likha Hai Aur Jo Kuch Tune Mere Qismat Me'n Kiya Hai Uspar Raazi Hon Aye Sab Maherbano'n Se Zyada Maherban)
Hadees Me'n Hai Ke Allah Azza-O-Jal Farmata Hai Jo Ye Dua Karega Me'n Uski Khata Bakhsh Dunga, Gham Door Karunga, Mohtaji Usse Nikaal Lunga Aur Har Taajir Se Badh Kar Uski Tijarat Rakhunga Dunya Naa-Chaar-O-Majboor Uske Paas Aayegi Agarche Wo Use Naa Chahe. Is Muqaam Par Ba'z Aur Duae'n Mazkoor Hain Jo Bahare Shari'at Hissah Shashsham Me'n Mulahezah Farmaye'n.
Agar Bheed Ki Wajah Se Maqaame Ibaraheem Par Namaz Naa Padh Sake'n To Masjid Shareef Me'n Kisi Aur Jagah Ya Hudude Haram Me'n Kahi'n Aur Padhi Jab Bhi Hojayegi. Maqaame Ibaraheem Ke Ba'd Is Namaz Ke Liye Sabse Afzal Ka'aba-E-MuAzzamah Ke Andar Padhna Hai Phir Hateem Me'n Mizaabe Rahmat Ke Niche, Iske Ba'd Hateem Me'n Kisi Aur Jagah, Phir Ka'aba-E-MuAzzamah Se Qareeb Tar Jagah Me'n, Phir Masjide Haram Me'n Kisi Jagah Aur Phir Harame Makkah Ke Andar Jaha'n Bhi Ho. Sunnat Ye Hai Ke Waqte Karahat Naa Hoto Tawaaf Ke Ba'd Fauran Namaz padhe Beech Me'n Faaslah Naa Ho Aur Agar Naa Padhi To Umar Bhar Me'n Jab Padhega Ada Hi Hai Qaza Nahi Magar Bura Kiya Ke Sunnat Foat Huwi. Farz Namaz In Raka'to'n Ke Qaayim Maqaam Nahi Ho Sakti.
Index