◆Multazim Par Haziri
Namaz-O-Dua Se Farigh Hokar Aap Multazim Ke Paas Jaye'n Aur Apna Sinah Aur Pet Aur Kabhi Dahna Rukhsar Aur Kabhi Baaya'n Rukhsar Uspar Rakhe'n Aur Dono'n Hath Sar Se Oonche Karke Diwar Par Phelaye'n Apna Dahna Hath Darwaza-E-Ka'aba Aur Baaya'n Hath Hajre Aswad Ki Taraf Phelaye'n, Khoob Roro Kar Aajizi Aur Inkasari Ke Sath Yaha'n Ye Dua Padhe'n:
"Yaa Wajidu Yaa Majidu Laa Tuzil Anni Ni'matan An'amtaha Alayya"
(Aye Qudrat Waale Aye Buzrug Tune Mujhe Jo Nemat Di Usko Mujhse Zaayil Naa Kar)
Hamare Aaqa ﷺ Ne Farmaya Ke Jab Me'n Chahta Hun Jibra'eel Ko Dekhta Hun Ke Multazim Se Lipte Huwe Ye Dua Kar Rahe Hain.
Multazim Ke Paas Namaze Tawaaf Ke Ke Ba'd Aana Is Tawaaf Me'n Hai Jiske Ba'd Sa'ee Hai Aur Jiske Ba'd Sa'ee Ho Us Me'n Namaz Se Pehle Multazim Se Lipte Phir Maqaame Ibraheem Ke Paas Ja Kar 2-Raka'at Namaz Padhe.
Tambeeh: Ramadan-ul-Mubarak Aur Mausame Hajj Me'n Darwazah Shareef, Multazim Aur Hajre Aswad Ke Qareeb Zabardast Bheed Hoti Hai Lihaza Khawateen Waha'n Jaane Se Ahetaraaz Kare'n Ke Mardo'n Ki Bheed Me'n Aurato'n Ka Ghusna Sakht Gunah Hai.
◆Chaahe Zam Zam Par Haziri
Multazim Par Dua Maangne Ke Ba'd Aap Zam Zam Par Aaye'n Aur Ka'aba Ki Taraf Muh Karke Teen Saanso'n Me'n Pet Bhar Kar Jitna Piya Jaa Sake Khade Hokar Piye'n. Har Baar BismillAh Se Shuru Kare'n Aur AlhamdulillAh Par Khatam Kare'n Aur Har Baar Ka'aba Shareef Ki Taraf Niagah Utha Kar Dekh Le'n. Jo Paani Bach Jaye Use Apne Badan Par Daal De'n Ya Bache Huwe Paani Se Muh Aur Sar Aur Badan Ka Masah Karle'n. Aabe Zam Zam Peete Waqt Dua Kare'n Ke Ye Qubuliyat Ka Waqt Hai. RasoolAllah ﷺ Farmate Hain Zam Zam Jis Muraad Se Piya Jaye Usi Ke Liye Hai. Zam Zam Peete Waqt Ki Dua Ye Hai:
"Allahumma Inni As-Aluka ILman Naa-Fi'aw Wa-Rizqaw Waa-Si'aw Wa-Amalam Mutaqabbalaw Wa-Shifaa Am-Mi'n Kulli Daa"
(Aye Allah Me'n Tujhse ILme Naafe Aur Kushadah Rizq Aur Amale Maqbool Aur Har Bimari Se Shifa Ka Suwal Karta Hun)
Makkah MuAzzamah Me'n Jab Tak Aap Rahenge Baar Haa Zam Zam Peena Naseeb Hoga To Kabhi Qayamat Ki Pyaas Se Bachne Kabhi Azabe Qabr Se Mahfooz Rehne, Kabhi RasoolAllah ﷺ Ki Mohabbat Badhne, Kabhi Wus'at-E-Rizq, Kabhi Shifa-E-Amraaz, Kabhi Husule ILm Waghairah Khaas Khaas Murado'n Ki Niyyat Se Peeye'n. Waha'n Jab Zam Zam Pee'o Pet Bhar Kar Pee'o Ke Hadees Me'n Hai Ham Me'n Aur Munafiqo'n Me'n Ye Farq Hai Ke Wo Zam Zam Kokh Bhar Kar Nahi Peete.
Index