◆Mubahaate Ahraam
Ahraam Me'n Mandarje Zail Baate'n Jaaiz Hain:
(1) Kurta Ya Sherwani Ya Chughah Let Kar Badan Par Is Tarah Daal Lena Ke Sar Aur Muh Naa Chhupe Ya In Chizo'n Ka Pajama Ka Tehband Baandh Lena (2) Chadar Ke Aanchalo'n Ko Tehband Me'n Gharasna (3) Thaili Ya Patti Ya Hathiyar Baandhna (4) Be-Mail Cchudaye Nahana (5) Paani Me'n Ghota Lagana (6) Kapde Dhona Jab Ke Ju'n Maarne Ki Gharaz Se Naa Ho (7) Miswaak Karna (8) Kisi Cheez Ke Saaya Me'n Bethna Ya Chhatari Lagana (9) Angooti Pahenna (10) Be-Khushbu Ka Surma Lagana (11) Daadh Ukhadna (12) Tute Huwe Nakhun Ko Juda Kar Dena (13) Chhala Ya Phunsi Tod Dena (14) Khatnah Karna (15) Aankh Me'n Jo Baal Nikle Use Juda Karna (16) Sar Ya Badan Is Tarah Ahista Khujana Ke Baal Naa Tote (17) Ahraam Se Pehle Jo Khushbu Lagayi Ho Uska Laga Rehna (18) Paltu Janwar Jaise Oont, Gaay, Bakri, Murghi Waghairah Ka Zibah Karna, Pakana, Khana Uska Doodh Dohna Uske Ande Todna, Bhunna Aur Khana (19) Jis Janwar Ko Ghaire Mehram Ne Shikar Kiya Aur Kisi Mehram Ne Uske Shikar Ya Zibah Karne Me'n Kisi Tarah Ki Madad Naa Ki Ho Uska Khana Bashart Ye Ke Wo Janwar Naa Haram Ka Ho Aur Naa Hi Haram Me'n Zibah Kiya Gaya Ho (20) Khane Ke Liye Machli Ka Shikar Karna (21) Dawa Ke Liye Kisi Daryayi Janwar Ka Maarna, Shikar Karna Sirf Tafreeh Ke Liye Naa Ho. Jis Tarah Logo'n Me'n Tafrihan Shikar Raa'ij Hai Aisa Shikar Darya Ka Ho Ya Jangal Ka Khud Hi Haraam Hai Aur Ahraam Me'n Sakht Tar Haraam (22) Berune Haram Ki Ghaas Ukhadna Ya Darakht Kaatna (23) Cheel, Kawwa, Chuha, Girgat, Chipkali, Saanp, Bicchu, Khatmal, Macchar, Pissu, Makkhi Waghairah Khabees-O-Muzi Janwaro'n Ka Maarna Agarche Haram Me'n Ho (24) Muh Aur Sar Ke Siwa Kisi Aur Jagah Zakham Par Patti Baandhna (25) Sar Ya Gaal Ke Niche Takyah Rakhna (26) Sar Ya Naak Par Apna Ya Dusre Ka Hath Rakhna (27) Kaan Kapde Se Chhupana (28) Thodi Se Niche Daadhi Par Kapda Aana (29) Sar Par Sini Ya Bori Uthana (30) Wo Khane Jis Ko Pakana Me'n Mushk, ILaaichi, Laung Waghairah Daale Gaye Hon Agarche Khushbu De'n (Jaise Biryani) Uska Khana (31) Baghair Pakaye Jis Cheez Me'n Koyi Khushbu Daali Gayi Ho Magar Bu Nahi Deti Uska Khana Peena (32) Ghee Ya Charbi Ya Kadwa Tail Ya Naryal Ya Badam Ya Kaddu Ka Tail Jis Me'n Khushbu Naa Daali Gayi Ho Baalo'n Ya Badan Me'n Lagana (33) Khushbu Se Range Kapde Pahenna Jab Ke Unki Khushbu Jati Rahi Ho (Magar Kusum Kesar Ka Rang Mard Ko Waise Hi Haraam Hai) (34) Deen Ke Liye Jhagadna Balke Jab Haajat Hoto Farz Aur Wajib Hai (35) Aisa Juta Pahenna Jo Paao'n Ke Wast Ke Jod Ko Naa Chhupaye (36) Be Sile Kapde Me'n Taweez Lapet Kar Gale Me'n Daalna (37) Aainah Dekhna (38) Aisi Khushbu Ka Chhuna Jis Me'n Fil_Haal Mahek Nahi Jaise Ood, Lubaan, Sandal Ya Uska Aanchal Me'n Baandhna (39) Nikah Karna (40) Jin Mashrubaat, Ice cream, Cold Drinks Waghairah Ke Baare Me'n Ma'loom Ho Ke Un Me'n Khushbu Daal Kar Pakayi Jati Hai Unke Istamaal Me'n Harj Nahi Aur Jin Ke Baare Me'n Ma'loom Naa Ho Unse Bachna Chahiye.
Jo Masa'il Uppar Bayan Huwe Un Me'n Mard Aur Aurat Barabar Hain Magar Aurat Ko Chand Baate'n Jaaiz Hain:
(1) Sar Chupana Balke Na-Mehram Ke Samne Aur Namaz Me'n Farz Hai To Sar Par Bistar, Baqcha Uthana Badarje Aula Jaaiz Hai (2) Gond Waghairah Se Baal Jamana (3) Sar Waghairah Par Patti Khwah Baazu Ya Gale Par Ta'weez Baandhna Agarche Sila Huwa Ho (4) Ghilafe Ka'aba Ke Andar Yu'n Dakhil Hona Ke Sar Par Rahe Muh Par Naa Aaye (5) Dastane, Moze Aur Sile Kapde Pahenna (6) Aurat Itni Aawaz Se Labbaik Naa Kahe Ke Na-Mehram Sune Magar Itni Aawaz Zaroor Hoke Uske Apne Kaan Tak Aaye.
Tambeeh: Ahraam Me'n Muh Chhupana Aurat Ko Bhi Haraam Hai Na-Mehram Ke Aage Koyi Pankha Waghairah Muh Se Bacha Huwa Samne Rakhe. Jo Baate'n Ahraam Me'n Naa-Jaaiz Hain Wo Agar Kisi Uzr Se Ya Bhool Kar Hojaye'n To Gunah Nahi Magar Unpar Jurmana Muqarrar Hai Uska Dena Wajib Hai Agarche Be-Qasd Hon Ya Sahwan Ya Jabran Ya Sote Hain.
Aap Aksar Auqaat Labbaik Ki Kasrat Rakhe'n. Uthte, Bethte, Chalte Phirte, Wazu Ya Be-Wazu Har Haal Me'n Khususan Chadayi Par Chadte Waqt Ya Chadayi Se Utarte Waqt, Do Qafilo'n Ke Milte Waqt, Subah Shaam, Pichli Raat, Paancho'n Namazo'n Ke Ba'd Gharz Ye Ke Har Haalat Ke Badalne Par Mard Baa-Aawaz Kahe Magar Naa Itni Buland Ke Apne Aap Ya Dusre Ko Takleef Ho Aur Aurate'n Past Aawaz Se Magar Naa Itni Past Ke Khud Bhi Naa Sune'n.
Jaddah Utarne Ke Ba'd Jab Aap Tamam Qanuni Karwaiyo'n Se Faarigh Hojaye'n Ge Tab Aap Ko MuAllim Ki Bas Se Makkah MuAzzamah Ki Taraf Rawana Kar Diya Jayega. Aap Wo Khush Naseeb Insan Hain Jisko Anqareeb Is Muqaddas Shahar Ki Haziri Ki Sa'adat Haasil Honi Hai, Jaha'n Allah Azza-O-Jal Ke Mahboob Aur Hamare Aaqa Janabe Muhammadur RasoolAllah ﷺ Ki Wiladat Huwi. Jaha'n Huzoor ﷺ Par Pehli Wahi Nazil Huwi Aur Aap ﷺ Ne Apni Nubuwwat Ka Aelaan Farmaya. Wo Shahar Jis Me'n Aap Ne Apni Zindagi Ke 13 Saal Shadeed Mukhalifat Ke Bawajood Dawate Haq Me'n Guzara. Wo Hurmat Wala Shahar Jis Me'n Hazrat Aadam Alaihissalam Ne Phir Hazrat Ibraheem Khailullah Alaihissalam Ne BaitullAh Ki Ta'meer Farmayi. Aap Allah Ki Kibriyayi Aur Apni Aajizi Ka Ahsaas Karte Huwe Uski Shaane Karimi Ka Shukr Ada Kare'n Ke Us Ne Aapko Apne Haram Me'n Mehmani Se Sarfaraz Farmaya. Aap Is Safar Me'n Labbaik Ki Kasrat Kare'n, Apne Gunaho'n Ki Taubah Kare'n Aur Allah Ta'Aala Ki Baargah Me'n Is Muqaddas Shahar Ki Ta'zeem Karne Ki Taufeeq Talab Kare'n.
Index