◆Miqaat Ka Bayan
Miqaat Us Jagah Ko Kehte Hain Ke Makkah MuAzzamah Jaane Waale Ko Baghair Ahraam Waha'n Se Aage Jana Jaaiz Nahi, Chahe Tijarat Ke Liye Ya Kisi Bhi Gharz Se Jata Ho. Yaha'n Tak Ke Makkah Mukarramah Me'n Rehne Waale Bhi Agar Miqaat Se Bahar Jaye'n To Unhe'n Bhi Baghair Ahraam Makkah MuAzzamah Aana Jaaiz Nahi Hai.
Miqaat Paanch(5) Hain:
1_ ZulHulaifah: Ye Madinah Tayyabah Ki Miqaat Hai Is Zamanah Me'n Us Jagah Ka Naam Abyare Ali Hai Jo Log Hajj Se Pehle Agar Madinah Tayyabah Ko Jaye'n Aur Waha'n Se Phir Makkah MuAzzamah Ko Lote'n To Wo Zulhulaifah Se Ahraam Baandhe'n.
2_ Zaate Irq: Ye Iraaq Waalo'n Ki Miqaat Hai.
3_ Yalamlam: Ahle Yaman Ki Miqaat Hai.
4_ Juhfah: Ye Shamiyo'n Ki Miqaat Hai Magar Juhfah Ab Bilkul Ma'doom Saa Hogaya Hai Waha'n Aabadi Nahi Rahi Sirf Ba'z Nishan Paaye Jate Hain Uske Jaanne Waale Ab Kam Honge Lihaza Ahle Shaam Ab Raabagh Se Ahraam Baandhte Hain Jo Ke Juhfah Ke Qareeb Hai.
5_ Qarnul Manazil: Ye Najd Waalo'n Ki Miqaat Hai Jo Taayif Ke Qareeb Hai.
Ye Miqaate'n Unke Liye Bhi Hain Jinka Zikr Huwa Aur Unke Aelawah Jo Shakhs Jis Miqaat Se Guzre Uske Liye Wahi Miqaat Hai Aur Agar Miqaat Se Naa Guzra To Jab Miqaat Ke Muhazaat Me'n Aaaye Us Waqt Ahraam Baandhle Maslan Hindiyo'n Ki Miqaat Kohe Yalamlam Ki Muhazaat Hai. Muhazaat Me'n Aana Use Khud Ma'loom Naa Hoto Kisi Jaanne Waale Se Puch Kar Ma'loom Kare Aur Agar Koyi Aisa Naa Mile Jis Se Daryaft Kare To Tehri Kare Agar Kisi Tarah Muhazaat Ka ILm Naa Hoto Makkah MuAzzamah Jab Do Manzil Baaqi Rahe Tab Ahraam Baandhle.
Makkah MuAzzamah Jane Ka Iradah Naa Ho Balke Miqaat Ke Andar Kisi Aur Jagah Maslan Jaddah Jana Chahta Hai To Use Ahraam Ki Zarurat Nahi Phir Waha'n Se Agar Makkah MuAzzamah Jana Chahe To Baghair Ahraam Ja Sakta.
Miqaat Se Peshtar Ahraam Baandhne Me'n Harj Nahi Balke Ye Behtar Hai Shart Ye Hai Ke Hajj Ke Mahino'n Me'n Aur Shawwal Se Pehle Hoto Mana Hai. Haram Ke Rehne Waale Hajj Ka Ahraam Haram Se Baandhe'n Aur Behtar Ye Ke Masjid-ul-Haram Shareef Me'n Ahraam Baandhe'n Aur Umrah Ka Berune Haram Se Aur Behtar Ye Ke Tan'eem Se Ho.
Index