◆Ka'aba Shareef Ka Bayan
Ise Baitullah Bhi Kehte Hain. Saari Dunya Ke Musalman Isi Ki Taraf Rukh Kar Ke Namaze'n Ada Karte Hain Aur Jab Haram Shareef Me'n Haziri Ka Sharf Haasil Hota Hai To Musalman Parwanah_Waar Iska Tawaaf Karte Hain. Ye Wo Imarat Hai Jo Is Zameen Par Allah Ki Ibadat Ke Liye Sab Se Pehle Ta'meer Huwi Aur Jo Zameen Ke Aine Wast Me'n Hai. Iski Azmat Ka Andazah Yu'n Lagaiye Ke Uski Taraf Dekhna Sawaab. Is Muqaddas Imarat Ke Muta'alliq Chand Zaruri Baate'n Zikr Ki Jati Hai Taake Tawaaf Karte Waqt Kaam Aaye'n.
Ka'aba Shareef Ek Chaukar Imarat Hai Jiske Chaar(4) Kone Hain Aur Har kona Rukn Kehlata Hai.
Rukne Aswad: Junoob-O-Mashriq Ke Goshah Me'n Waaqe Hai Isi Me'n Jannati Patthar Hajre Aswad Nasb Hai.
Rukne Iraqi: Ye Iraaq Ki Simt Shumal Mashriqi Konah Hai.
Rukne Shaami: Ye Mulke Shaam Ki Simt Shumal Maghribi Konah Hai.
Rukne Yamaani: Ye Yaman Ki Janib Junoob Maghribi Konah Hai.
Baab-ul-Ka'abah: Rukne Aswad Aur Rukne Iraqi Ke Bich Ki Mashriqi Diwar Me'n Zameen Se Buland Par Sone Ka Drwazah Hai.
Multazim: Rukne Aswad Aur Baab-ul-Ka'abah Ki Darmiyani Diwar Ka Hissah
Hateem: Ka'aba-E-MuAzzamah Ki Shumali Diwar Ke Paas Nisf Daairah Ki Shakal Me'n Faseel Yaani Boundry Ke Andar Ka Hissah. Hateem Ka'aba Shareef Ka Hi Hissah Hai Aur Is Me'n Daakhil Hona Aine Ka'abatullAh Me'n Daakhil Hona Hai.
Mustajaar: Rukne Yamaani Aur Shaami Ke Bich Me'n Maghribi Diwar Ka Wo Hissah Jo Multazim Ke Muqabil Hai.
Mizabe Rahmat: Sone Ka Par Naalah, Ye Rukne Iraqi-O-Shaami Ki Shumali Diwar Ki Janib Cchat Par Nasb Hai. Isse Barish Ka Paani Hateem Me'n Girta Hain.
Mustajaab: Rukne Yamaani Aur Rukne Aswad Ke Bich Ki Junubi Diwar. Yaha'n 70,000 Hazar Farishte Dua Par Aameen Kehne Ke Liye Muqarrar Hain. Isliye Is Muqaam Ko Mustajaab Yaani Dua Ki Qubuliyat Ka Maqaam Kehte Hain.
Maqaame Ibraheem: Darwaza-E-Ka'aba Ke Samne Ek Qubbah Me'n Ye Jannati Patthar Hai. Jis Par Khade Hokar Hazrat Sayyiduna Ibraheem Alaihissalam Ne Ka'aba Shareef Ki Imarat Ta'ameer Ki Thi Is Mubarak Patthar Par Aapke Qadamain Sharifain Ke Naqsh Aaj Bhi Maujood Hain.
Bire Zam Zam: Wo Muqaddas Kunwa'n Jo Hazrat Sayyiduna Isma'eel Alaihissalam Ke Mubarak Qadmo'n Ki Ragad Se Jaari Huwa Tha. Uska Paani Peena Aur Badan Par Daalna Sawaab Aur Bimariyo'n Ke Liye Shifa Hai. Ye Mubarak Kunwa'n Maqame Ibraheem Se Junoob Me'n Waaqe Hai. Ab Ye Mataaf Ke Farsh Ke Niche Hai Waha'n Tak Jaane Ka Rasta Baabe Ka'aba Ke Samne Mataaf Ke Kinare Se Hai.
Index