◆Ahraam Ke Ahkaam
Pehle Hindustani Haaji Ke Liye Behri Safar Ki Bhi Sahulat Haasil Thi. Mumbai Se Jaddah Ka Safar Tqreeban Ek Hafte Me'n Tay Hota Tha. Teen Ya Chaar Din Ke Safar Ke Ba'd Jab Yalamlam Ka Pahad Dikhayi Dene Lagta Jo Hindustaniyo'n Ki Miqaat Hai, Is Waqt Ahraam Baandhne Ka Aelaan Hota Tha Ye Hujjaaje Kiraam Bade Itminaan Se Ahraam Baandh Lete The. Magar Aaj Hindustan Se Sirf Hawayi Safar Ki Ijazat Hai. Mumbai Se Jaddah Ka Safar Chand Ghanto'n Me'n Tay Hojata Hai. Hawayi Jahaz Me'n Bhi Miqaat Aane Se Pehle Aelaan Kiya Jata Hai Taake Hujjaaje Kiraam Ahraam Baandhle'n Magar Namaz Waghairah Ki Shulat Nahi Hoti. Hawayi Jahaz Ki Tez Raftari Ko Madde Nazar Rakhte Huwe Is Baat Ka Bhi Khatrah Hai Ke Makkah MuAzzamah Ko Jaane Waala Niyyat Karne Aur Labbaik Pukarne Se Pehle Hi Miqaat Se Guzar Jaye.
Is Surat Me'n Munasib Ye Hai Ke Ghusl Se Faarigh Hokar Mard Ahraam Ki Chadare'n Aur Aurate'n Apne Roz Marrah Ke Kapde Zaibe Tan Karle'n. Namaz, Niyyat Aur Talbiyah Pukarne Ko Us Waqt Tak Muakkhir Kare'n Jab Tak Ke Airport Pohanch Kar Apna Boarding Ka Card Haasil Naa Karle'n Aur Jab Ye Itminaan Hojaye Ke Is Din Aapka Flight Ki Rawangi Hai Tab Immigrations Aur Customs Ki Jaanch Hojane Ke Ba'd Agar Makruh Waqt Naa Hoto 2-Raka'at Namaz Padh Kar Niyyat Karle'n Aur Talbiyah Pukare'n Jiska Tariqah Aage Bayan Kiya Jayega. Airport Par Namaz Ada Karne Ke Liye Munasib Intazaam Kiya Jata Hai. Agar Aapne Ghar Se Hi Ahraam Ki Niyyat Karli To Aap Par Ahraam Ki Pabandi Shuru Hojayegi Phir Jo Log Aapko Rukhsat Karne Aaye Honge Unke Pholo'n Ke Haar Pahenna Aur Unse Musafah Karna Ya Gale Lagana Jab Ke Wo Itr Mal Kar Aaye Hon Aap Ke Liye Masa'il Paida Kar Sakta Hai Kyunke Ahraam Ki Haalat Me'n Kapde Ya Badan Par Khushbu Ka Lag Jana Basa Auqaat Dam Bhi Wajib Kar Deta Hai.
Index