◆Ahraam Ka Tariqah
1_ Ahraam Baandhne Se Pehle Aap Miswaak Kare'n Aur Wazu Kare'n Aur Khoob Mal Kar Nahaye'n, Naa Naha Sake'n To Sirf Wazu Kare'n Yaha'n Tak Ke Haiz-O-Nifaas Waali Aur Bacche Bhi Nahanye'n Aur Baa-Taharat Ahraam Baandhe'n.
2_ Agar Mard Chahe'n To Apna Sar Mundale'n Ke Ahraam Me'n Baalo'n Ki Hifazat Se Najaat Milegi Warnah Kangha Karke Khusbhu_Daar Tail Daale'n.
3_ Ghusl Se Pehle Naakhun Katre'n Khat Banwaye'n Mu-E-Baghal-O-Zere Naaf Door Kare'n Balke Piche Ke Bhi.
4_ Badan Aur Kapdo'n Par Khushbu Lagaye'n Ke Ye Sunnat Hai Agar Khushbu Aisi Ho Ke Iska Jirm Baaqi Rahega Jaise Mushk Waghairah To Kapdo'n Me'n Naa Lagaye'n.
5_ Mard Sile Kapde Aur Moze Utar De'n Ek Chadar Nayi Ya Duhli Huwi Odhe'n Aur Aisa Hi Ek Tehband Baandhe'n Ye Kapde Sufaid Aur Naye Honto Behtar Hai. Ba'z Log Ye Karte Hain Ke Usi Waqt Se Chadar Dahni Baghal Ke Niche Se Nikaal Kar Uske Dono'n Pallo Baaye'n Mondhe Par Daal Dete Hain Ye Khilaafe Sunnat Hai. Is Tarah Chadar Odhna Sirf Tawaaf Ke Waqt Sunnat Hai Aur Tawaaf Ke Aelawah Baaqi Me'n Aadat Ke Muwafiq Chadar odhi Jaye Yaani Dono'n Mondhe Aur Peeth Aur Sinah Chupa Rahe.
6_ Airport Par Zaruri Karwayi Se Faraghat Ke Ba'd Agar Makruh Waqt Naa Hoto 2-Raka'at Namaz Ba-Niyyate Ahraam Padhe'n, Pehli Raka'at Me'n Surah Fatehah Ke Ba'd Surah Kafiroon, Dusri Raka'at Me'n Surah Fatehah Ke Ba'd Surah IkhLaas Padhe'n. Agar Makruh Waqt Hoto Baghair Namaz Padhe Hi Hajj Ya Umrah Ki Niyyat Se Labbaik Kahe'n. Mard Ye Namaz Ada Karte Waqt Ahraam Ki Chadar Sar Se Odhe'n Aur Salam Pherte Hi Chadar Apne Sar Se Utar De'n.
Hajj Teen Tarah Ka Hota Hai:
(1) Ek Ye Ke Sirf Hajj Karne Ki Niyyat Ho, Use Hajje Ifraad Kehte Hain Aur Haaji Ko Mufrid Kehte Hain. Agar Aap Hajje Ifraad Ka Iradah Rakhte Hain To Salam Ke Ba'd Yu'n Niyyat Kare'n:
"Allahumma Inni Ureedul Hajja FayassirHu Li Wa-Taqabbalhu Minni Nawaitul Hajja Wa-Ahramtu Bihi Mukhlisan LillAhi Ta'Aala"
(Aye Allah Me'n Hajj Ka Iradah Karta Hon Use To Mere Liye Aasaan Kar Aur Ise Meri Taraf Se Qubool Kar Me'n Ne Hajj Ki Niyyat Ki Aur Khaalis Allah Ke Liye Me'n Ne Iska Ahraam Baandha)
(2) Dusra Ye Ke Yaha'n Se Sirf Umre Ki Niyyat Kare'n, Makkah MuAzzamah Me'n Umre Se Faarigh Hone Ke Ba'd Hajj Ki Niyyat Se Naya Ahraam Baandhe'n Ise Hajje Tamattu Kehte Hain Aur Haaji Ko Mutamatti Kehte Hain. Agar Aap Hajje Tamattu Ka Iradah Rakhte Hain To Salam Ke Ba'd Yu'n Niyyat Kare'n:
"Allahumma Inni Ureedul Umrata Fayassir Haali Wa-Taqabbalha Minni Nawaitul Umrata Wa-Ahramtu Biha Mukhlisan LillAhi Ta'Aala"
(Aye Allah Me'n Umre Ka Iradah Karta Hon Ise Mere Liye Aasaan Kar Aur Meri Taraf Se Qubool Farma Me'n Ne Umre Ki Niyyat Ki Aur Khaalis Allah Ke Liye Me'n Ne Iska Ahraam Baandha)
(3) Tisra Ye Ke Hajj-O-Umrah Dono'n Ki Yahi'n Se Niyyat Kare'n Aur Ye Sab Se Afzal Hai Use Qiraan Kehte Hain Aur Haaji Ko Qaarin Agar Aap Hajje Qiraan Ka Iradah Rakhte Hain To Salam Ke Ba'd Yu'n Niyyat Kare'n:
"Allahumma Inni Ureedul Umrata Wal-Hajja Fayassir Humaali Wa-Taqabbal Huma Minni Nawaitul Umrata Wal-Hajja Wa-Ahramtu Bihima Mukhlisan LillAhi Ta'Aala"
(Aye Allah Me'n Umre Aur Hajj Ka Iradah Karta Hon Unhe'n Tu Mere Liye Aasaan Kar Aur Unhe'n Meri Taraf Se Qubool Farma Me'n Ne Umre Aur Hajj Ki Niyyat Ki Aur Khaalis Allah Ke Liye Me'n Ne Inka Ahraam Baandha)
Aur Teeno'n Surto'n Me'n Niyyat Karne Ke Ba'd Aawaz Ke Sath Labbaik Kahe'n. Labbaik Ke Alfaaz Ye Hain:
"Labbaik○ Allahumma Labbaik○ Laa Sharika Laka Labbaik○ Innal Hamda Wan-Neemata Laka Wal-Mulk○ Laa Sharika Laka○
(Me'n Tere Paas Haazir Huwa Aye Allah Me'n Tere Huzoor Hazir Huwa Tere Huzoor Hazir Huwa Tera Koyi Shareek Nahi Me'n Tere Huzoor Hazir Huwa Beshak Ta'reef Aur Nemat Aur Milk Tere Hi Liye Hain Tera Koyi Shareek Nahi)
Jaha'n Jaha'n Waqaf Ki Alamate'n Bani Waha'n Waqaf Kare'n. Labbaik Teen Baar Kahe'n Aur Durood Shareef Padhe'n Phir Dua Maange'n Ek Dua Yaha'n Manqool Hai:
"Allahumma Inni As'aluka Ridaaka Wal-Jannata Wa-AuzuBika Min Ghadabika Wannaar"
(Ya Allah Me'n Tujh Se Teri Raza Aur Jannat Ka Sayil Hu'n Aur Tere Ghazab Aur Jahannam Se Teri Hi Panah Maangta Hu'n)
Jab Ahraam Ke Waqt Aap Labbaik Kahe'n To Uske Sath Hi Aap Ki Niyyat Bhi Ho. Niyyat Dil Ke Iradah Ko Kehte Hain. Dil Me'n Iradah Naa Hoto Ahraam Hi Naa Hoga Aur Behtar Ye Ke Aap Zuban Se Bhi Kahe'n.
Maslan Ifraad Me'n "Labbaika Bil-Hajji" Aur Tamattu Me'n "Labbaika Bil-Umrati" Aur Qiraan Me'n "Labbaika Bil-Umrati Wal-Hajji" Kahe'n.
Ahraam Ke Liye Ek Martabah Zuban Se Labbaik Kehna Zaruri Hai Aur Agar Iski Jagah "SubhanAllah" Ya "AlhamdulillAh" Ya "Laa ILaaha ILlallahu" Ya Koyi Aur Zikre ILaahi Kiya Aur Ahraam Ki Niyyat Ki To Ahraam Hogaya Magar Sunnat Labbaik Kehna Hai, Gunga Hoto Use Chahiye Ke Hont Ko Jumbish De.
Ahraam Ke Liye Niyyat Shart Hai Agar Baghair Niyyat Labbaik Kaha Ahraam Naa Huwa Yu'n Hi Tanha Niyyat Bhi Kaafi Nahi Jab Tak Labbaik Ya Uske Qaayim Maqaam Koyi Aur Cheez Naa Ho
Jo Shakhs Buland Aawaaz Se Labbaik Keh Raha Hoto Use Salam Naa Kiya Jaye Ye Makruh Hai Aur Agar Kar Liya To Wo Khatam Karke Jawab De Haan Agar Wo Samajhta Ho Ke Khatam Karne Ke Ba'd Jawab Ka Mauqa Naa Milega To Us Waqt Jawab De Sakta Hai.
Dusre Ki Taraf Se Hajj Ko Gaya To Uski Taraf Se Hajj Karne Ki Niyyat Kare Aur Behtar Ye Ke Labbaik Me'n Yu'n Kahe "Labbaika Min Fulaanin" Yaani Falaa'n Ki Jagah Uska Naam Le Aur Agar Naam Naa Liya Magar Dil Me'n Iradah Hai Jab Bhi Harj Nahi.
Agar Aap Apne Naa-Baaligh Bacche Ko Apne Sath Safare Hajj Me'n Le Jana Chahte Hain To Aapke Liye Zaruri Hai Ke:
(1) Agar Baccha Naa Samajh Hai To Bacche Ki Taraf Se Ahraam Baandhte Waqt Uske Sile Huwe Kapda Uatarle'n, Use Chadar Aur Tehband Pehnaye'n Aur Uski Taraf Se Niyyat Karle'n. Phir Use In Tamam Baato'n Se Bachaye'n Jo Mehram Ke Liye Naa-Jaaiz Hain Magar Bacche Ne Koyi Mamnu Kaam Kiya To Baap Par Kuch ILzam Nahi. Aap Tamam Arkaan Uski Taraf Se Bhi Ada Kare'n, Siwaye Tawaaf Ke Ba'd Ki 2-Raka'at Namaz Ke Ke Bacche Ki Taraf Se Aapko Nahi Padhni Hai.
(2) Agar Naa Samajh Bacche Ne Khud Apna Ahraam Baandha Ya Af'aale Hajj Ada Kiye To Hajj Naa Hoga. Ye Zaruri Hai Ki Uski Taraf Se Uska Wali Tamam Af'aale Hajj Bajalaye Siwaye Tawaaf Ke Ba'd Ki 2-Raka'ate'n Ke Baccha Ki Taraf Se Uska Wali Naa Padhega. Agar Bacche Ke Sath Uska Baap Aur Bhai Dono'n Honto Ye Arkaan Baap Ada Kare.
(3) Agar Samajh Waale Bacche Ne Khud Apna Ahraam Baandha Aur Tamam Af'aale Hajj Khud Ada Kiye To Hajj Hojayega. Magar Ye Hajje Nafl Hoga. Baaligh Hone Ke Ba'd Jab Wo Sahabe Iste'ta'at Hoga To Use Apna Hajje Farz Ada Karna Laazim Hoga. Samajh Waala Baccha Khud Af'aale Hajj Ada Karte Waqt Rami Waghairah Me'n Ba'z Baate'n Cchod De Ya Koyi Ghalti Kare
To Uspar Kaffarah Waghairah Laazim Nahi. Agar Naa-Baaligh Ne Hajj Ko Faasid Kar Diya To Qaza Wajib Nahi Agarche Wo Samajh Waala Baccha Ho.
Index