◆Istelahaat
Isse Qabl Ke Ham Munasike Hajj Bayan Kare'n Munasib Ye Hai Ke Aap Haaji Saheban Mandarje Istelahaat Aur Asmaye Maqamaat Waghairah Zahan Nasheen Karle'n Taake Aage Mutle'ah Karne Me'n Aasani Rahe.
1_ Ahraam: Jab Hajj, Umrah Ya Dono'n Ki Niyyat Karke Talbiyah Padhte Hain To Kuch Halaal Chize'n Bhi Haraam Hojati Hai Is Haalat Ko Ahraam Kehte Hain. Urfe Aam Me'n In Chadaro'n Ko Bhi Ahraam Kehte Hain Jo Ahraam Ki Haalat Me'n Istamaal Hoti Hain.
2_ Talbiyah: Labbaik Allahumma Labbaik Padhna . Labbaik Ye Hai:
"Labbaik. Allahumma Labbaik. Labbaik Laa Sharika Laka Labbaik. Innal Hamda Wan-Neemata Laka Wal-Mulk. Lasharika Laka"
3_ Isteba'a: Ahraam Ki Uppar Waali Chadar Ko Seedhi Baghal Se Nikaal Kar Is Tarah Ulte Kandhe Par Daalna Ke Seedha Kandha Khula Rahe.
4_ Ramal: Tawaaf Ke Ibtedayi Teen Phero'n Me'n Shaane Hilate Huwe Chote Chote Qadam Uthate Huwe Qadre Tezi Se Chalna Jaise Qawi Aur Bahaddur Log Chalte Hain.
5_ Tawaaf: Khana-E-Ka'aba Ke Gird Saat(7) Chakkar Lagana, Ek Chakkar Ko Shawt Kehte Hain.
6_ Mataaf: Ka'aba-E-MuAzzamah Ke Ird Gird Wo Jagah Jis Me'n Tawaaf Kiya Jata Hai.
7_ Tawaafe Qadoom: Makkah MuAzzamah Me'n Dakhil Hone Par Pehla Tawaaf. Ye Afraad Ya Qaraan Ki Niyyat Se Hajj Karne Waalo'n Ke Liye Sunnat Hai. Tamattu Karne Waalo'n Ke Liye Ye Tawaaf Nahi.
8_ Tawaafe Ziyarat: Ise Tawaafe Izafah Bhi Kehte Hain, Ye Hajj Ka Rukn Hai. Isi Ka Waqt 10 /Zul-Hijjah Ki Subah Saadiq Se 12/Zul-Hijjah Ke Ghurube Aaftab Tak Hai Magar 10/Zul-Hijjah Ko Karna Afzal Hai.
9_ Tawaafe Wada: Wo Tawaaf Jo Makkah Mukarramah Se Rukhsat Hote Huwe Kiya Jata Hai. Ye Har Aafaaqi Haaji Par Wajib Hai. Use Tawaafe Sadar Bhi Kehte Hain.
10_ Tawaafe Umrah: Ye Tawaaf Umrah Karne Waalo'n Par Farz Hai.
11_ Istelaam: Hajre Aswad Ko Bosa Dena Ya Hath Ya Lakdi Se Cchu Kar Haath Ya Lakdi Ko Choom Lena Ya Hatho'n Se Uski Taraf Ishara Karke Unhe'n Choom Lena.
12_ Sa'ee: Safa Aur Marwah Ke Mabain Saat(7) Phere Lagana. (Safa Se Marwah Tak Ek Phera Aur Marwah Se Safa Tak Dusra Phera Hota Hai Yu'n Marwah Par Saat(7) Chakkar Pure Honge)
13_ Kohe Safa: Ka'aba Shareef Ke Junoob Me'n Waaqe Hai Aur Yahi'n Se Sa'ee Shuru Hoti Hai.
14_ Kohe Marwah: Kohe Safa Ke Samne Waaqe Hai. Safa Se Marwah Tak Pohanchne Par Sa'ee Ka Ek Phera Khatam Hojata Hai Aur Saatwa'n (7wa'n) Phera Yahi'n Marwah Par Khatam Hota Hai.
15_ Rami: Jamraat (Yaani Shaytano'n) Par Kankariya'n Maarna.
16_ Halaq: Ahraam Se Bahar Hone Ke Liye Hudude Haram Me'n Pura Sar Mundana.
17_ Qasar: Baal Katarwana, Sar Me'n Jitne Baal Hain Un Me'n Ke Chauthayi(1/4) Baalo'n Me'n Se Kam Az Kam Ungli Ke Ek Pure Ke Barabar Katarwana. Ye Ahraam Se Bahar Hone Ke Liye Zaruri Hai.
18_ Babus Safa: Masjid-ul-Haram Ke Junubi Darwazo'n Me'n Se Ek Darwazah, Jiske Nazdeek Kohe Safa Hai.
19_ Milaini Akhdarain: Yaani Do Sabz Nishan. Safa Se Janib Marwah Kuch Door Chalne Ke Ba'd Thode Thode Faasle Par Dono'n Taraf Ki Diwar Aur Cchat Me'n Sabz Lighte'n Lagi Huwi Hain. Nez Ibteda Aur Inteha Par Farsh Bhi Sabz Marbal Ka Patta Bana Huwa Hai. In Dono'n Sabz Nishano'n Ke Darmiyan Daurane Sa'ee Mardo'n Ko Daudna Sunnat Hai.
20_ Mas'aa: Milaine Akhdarain Ke Darmiyani Faaslah Jaha'n Daurane Sa'ee Mard Ko Daudna Sunnat Hai.
21_ Miqaat: Miqaat Us Jagah Ko Kehte Hain Ke Jis Ke Aage Makkah Jane Waale Ko Baghair Ahraam Jana Jaaiz Nahi.
22_ Miqaati: Wo Shakhs Jo Miqaat Ki Hudood Ke Andar Rehta Hai.
23_ Aafaaqi: Wo Shakhs Jo Miqaat Ki Hudood Se Bahar Rehta Hai.
24_ Haram: Makkah MuAzzamah Hurmat-O-Taqaddus Ki Wajah Se Haram Kehlata Hai Har Janib Uski Had Par Nishan Lage Hain
Hudude Haram Me'n Ghair Muslim Ka Dakhilah Mamnu Hai. Jo Shakhs Hudude Haram Me'n Rehta Ho Use Harami Ya Ahle Haram Kehte Hain.
25_ Hil: Hudude Haram Se Bahar Miqaat Tak Ki Zameen Ko Hil Kehte Hain Us Jagah Wo Chize'n Halaal Hojati Hain Jo Haram Me'n Haram Ki Hurmat Ki Wajah Se Haraam Hain Maslan Shikar Karna, Khudru Paude Ka Ukhedna.
26_ Mina: Masjid-ul-Haram Se 5Km Par Waadi Jaha'n Haaji 8 Se 12/Zul-Hijjah Tak Qiyam Karte Hain.
27_ Jamraat: Mina Aur Makkah Ke Darmiyan Me'n Wo Teen Maqamaat Jaha'n Kankariya'n Maari Jati Hain Pehle Ka Naam Jamrat-ul-Uqbah Hai. Use Bada Shaytaan Bhi Bolte Hain Ye Makkah MuAzzamah Se Pehla Aur Masjide Khafeef Se Pichla Hai Dusre Ko Jamrat-ul-Ustaa Manjhala Shaytaan Aur Tisre Ko Jamrat-ul-ULaa Cchota Shaytaan Kehte Hain. Ye Masjide Khafeef Se Qareeb Hai.
28_ Arafaat: Mina Se Taqriban 11Km Door Maidaan Jaha'n 9/Zul-Hijjah Ko Tamam Hujjaaje Kiraam Jama Hote Hain.
29_ Jabale Rahmat: Arafaat Ka Wo Muqaddas Pahad Jiske Qareeb Waqoof Karna Afzal Hai.
30_ Muzdalifah: Mina Se Qareeb Arafaat Ki Janib Maidaan Jaha'n Arafaat Se Wapasi Par Namaze Maghrib-O-Isha Ek Sath Ada Karte Hain Aur Raat Guzaar Kar Subah Saadiq Ke Ba'd Waqoof Karte Hain.
31_ Muhassar: Muzdalifah Se Mila Huwa Maidaan Jaha'n As'habe Feel Par Azaab Nazil Huwa Tha Yaha'n Se Guzarte Waqt Raftar Tez Karna Sunnat Hai. Is Me'n Waqoof Jaaiz Nahi Hai.
32_ Batne Urnah: Ye Jagah Masjide Namirah Ke Maghribi Simt Hai, Jaha'n Haaji Ka Waqoof Karna Durust Nahi.
33_ Wadi-E-Muhassab: Masjide Haram Aur Jannat-ul-MuAlla Qabrastan Ke Mabain Jagah Jaha'n Dua Mangna Mustahab Hai.
34_ Tan'eem: Hudude Haram Se Bahar Wo Jagah Jaha'n Se Qiyame Makkah Ke Dauran Umrah Ke Liye Ahraam Bandhte Hain. Yaha'n Masjide Aayeshah Bani Huwi Hai. Is Jagah Se Ahraam Baandh Kar Umrah Karne Ko Log Cchota Umrah Kehte Hain.
35_ Ji'irranah: Makkah Mukarramah Se Taqriban 19Km Door Taayif Ke Raste Par Waaqe Hai Yaha'n Se Bhi Makkah Ke Qiyaam Ke Dauran Umrah Ka Ahraam Baandha Jata Hai. Is Jagah Se Ahraam Baandh Kar Umrah Karne Ko Log Bada Umrah Kehte Hain. Ghazwa-E-Hunain Se Wapasi Par Huzoor ﷺ Ne Yaha'n Se Umrah Ka Ahraam Zaibe Tan Farmaya , Hosake To Aap Bhi Is Sunnat Ko Ada Kare'n.
Index