◆Hajj Ke Wajibat
Hajj Ke Wajibat Ye Hain:
1_ Miqaat Se Ahraam Bandhna Yaani Miqaat Se Baghair Ahraam Naa Guzarna, Miqaat Se Pehle Hi Ahraam Baandh Liya To Jaaiz Hai.
2_ Safa Marwah Ke Darmiyan Daudna Isko Sa'ee Kehte Hain.
3_ Sa'ee Ko Safa Se Shuru Karna Aur Agar Marwah Se Shuru Ki To Pehla Shumar Naa Kiya Jaye.
4_ Agar Uzr Naa Hoto Paidal Sa'ee Karna. Sa'ee Ka Tawaaf Ke Kam Se Kam Chaar(4) Phero'n Ke Ba'd Hona.
5_ Din Me'n Waqufe Arfah Kiya To Itni Der Tak Waqoof Kare Ke Aaftab Doob Jaye To Khwah Aaftab Dhalte Hi Shuru Kiya Ho Ya Ba'd Me'n, Ghuroob Aaftab Tak Waqoof Me'n Mashghool Rahe Agar Raat Me'n Waqoof Kiya To Uske Liye Kisi Khaas Had Tak Waqoof Karna Wajib Nahi Magar Wo Is Wajib Ka Tarik Huwa Ke Din Me'n Ghuroob Tak Waqoof Karta.
6_ Waqoof Me'n Raat Ka Kuch Juz Aajana.
7_ Muzdalifah Me'n Thaherna.
8_ Maghrib Aur Isha Ki Namaze'n Waqte Isha Me'n Muzdalifah Aakar Padhna.
9_ Teeno'n Jamro'n Par 10wi'n 11wi'n Aur 12wi'n Teeno'n Din Kankariya'n Maarna Yaani 10wi'n Ko Sirf Jamrat-ul-Uqbah Par Aur 11wi'n 12wi'n Ko Teeno'n Jamraat Ki Rami Karna.
10_ Jamra-E-Uqbah Ki Rami 10wi'n Ke Din Halaq Se Pehle Hona.
11_ Har Rooz Ki Rami Ka Usi Din Hona.
12_ Sar Mundana Ya Baal Katarwana.
13_ Aur Uska Ayyame Nahar (10, 11, 12 Zul-hijjah) Me'n Aur
14_ Haram Shareef Me'n Hona Agarche Mina Me'n Naa Ho.
15_ QurAan-O-Tamattu Waale Ko Qurbani Karna.
16_ Is Qurbani Ka Haram Aur Ayyame Nahar Me'n Hona.
17_ Tawafe Izafah Ka Aksar Hissah Ayyame Nahar Me'n Hona Arfaat Se Wapasi Ke Ba'd Jo Tawaaf Kiya Jata Hai Uska Naam Tawaafe Izafah Hai Aur Use Tawaafe Ziyarat Bhi Kehte Hain.
18_ Tawaaf Hateem Ke Bahar Se Hona.
19_ Dahni Taraf Se Tawaaf Karna Yaani Ka'aba-E-MuAzzamah Tawaaf Karne Waale Ki Baaye'n Janib Ho.
20_ Uzr Naa Hoto Paao'n Se Chal Kar Tawaaf Karna.
21_ Tawaaf Karne Me'n Najasate Hukmiyah Se Paak Hona Yaani Be-Ghusl Ya Be-Wazu Naa Hona Aur Be-Wazu Ya Janabat Me'n Tawaaf Kiya To Ae'aadah Kare.
22_ Tawaaf Karte Waqt Satar Chupana.
23_ Tawaaf Ke Ba'd 2 Raka'at Namaz Padhna. Agar Naa Padhi To Dam Wajib Nahi.
24_ Kankariya'n Phenkne, Qurbani Karne, Sar Mundane Aur Tawaaf Me'n Tarteeb Hona Yaani Pehle Kankariya'n Phenkenge Phir Ghair Mufarrad Qurbani Kare Phir Sar Mundaye Phir Tawaaf Kare.
25_ Tawaafe Sadar Yaani Miqaat Se Bahar Ke Rehne Waalo'n Ke Liye Rukhsat Ka Tawaaf Karna. Jo Aurat Haiz Ya Nifaas Se Hai Aur Taharat Se Pehle Qafilah Rawana Ho Raha Hoto Uspar Tawaafe Rukhsat Nahi.
26_ Waqufe Arfah Ke Ba'd Tawaafe Ziyarat Aur Sar Mundane Tak Jima Naa Hona.
27_ Ahraam Ke Mamnu'aat Maslan Sila Kapda Pahenne Aur Muh Ya Sar Chupane Se Bachna.
Note: Wajib Ke Tark Se Dam Laazim Aata Hai Khwah Qasdan Tark Kiya Ho Ya Sahwan, Khata Ke Taur Par Ho Ya Bhool Kar, Wo Shakhs Iska Wajib Hona Jaanta Ho Ya Nahi. Haan Agar Qasdan Kare Aur Janta Bhi Hoto Gunehgaar Bhi Hoga Magar Wajib Ke Tark Karne Se Hajj Baatil Naa Hoga. Albattah Ba'z Wajib Ka Is Hukm Istasna Hai Ke Tark Par Dam Laazim Nahi Hota.
Maslan Tawaaf Ke Ba'd K 2 Raka'ate'n Ya Kisi Uzr Ki Wajah Se Sar Mundana Ya Muzdalifah Me'n Maghrib Ki Namaz Ka Isha Tak MuAkkhir Naa Karna Ya Kisi Wajib Ka Tark Aise Uzr Ki Wajah Se Ho Jisko Shara'a Ne Motabar Rakha Ho Yaani Waha'n Ijazat Di Ho Aur Kaffarah Saaqit Kar Diya Ho. In Surto'n Me'n Dam Laazim Nahi.
Index