IsLaam Ki Buniyad Paanch(5) Chizo'n Par Hai.
(1) Eemaan (Kalma) (2) Namaz (3) Rozah (4) Zakaat (5) Hajj.
Hajj Wo Rukne IsLaam Hai Jo Sirf Musalman Par Zindagi Me'n Ek Baar Farz Hai Jo Iski Ite'taa'at Rakhta Ho. Iski Farziyat Ka Inkar Karne Waala Kaafir Hai.
Is Azeem Ibadat Ki Sa'aadat Baar Baar Naseeb Nahi Hoti. Aksar Logon Ko Zindagi Me'n Hajj Ka Ek Hi Baar Mauqa Milta Hai. Agar Khuda_Na_Khwastah Is Me'n Koyi Khaami Ya Nuqs Waaqe Hojaye To Sakht Mehrumi Aur Zindagi Bharka Pachtawa Ho.
Isliye Safare Hajj Se Pehle Hi Iske Ahkaam-O-Masayil Acchi Tarah Seekh Lena Chahiye Taake Hajje Mabroor Ki Sa'aadat Haasil Ho Ke Hajje Mabroor Hi Ke Baare Me'n Rasule Akram ﷺ Ne Farmaya Ke Iska Sawaab Jannat Hai.
Kisi Bhi Ibadat Ko Allah Azza-O-Jal Ki Baargah Me'n Maqbool Hone Ki Bunyadi Shart Ye Hai Ke Wo Allah-O-Rasool ﷺ Ke Bataye Huwe Tariqe Par Ki Gayi Ho. Jab Ham Kisi Ibadat Ke Ahkaam Aur Tariqe Se Waqif Hi Naa Honto Hamare Liye Ye Mumkin Hi Nahi Ke Ham Is Ibadat Ko Kama Haqqah Kaamil Tariqe Se Ada Kar Sake'n Aur Naa Hi Ham Ye Jaan Sakte Hain Ke Is Ibadat Ki Adayegi Me'n Ham Se Kya Kotahiya'n Aur Ghaltiya'n Sarzad Huwe'n, Lihaza Ye Ashad Zaruri Hai Ke Ham Ibadat Ke Ta'alluq Se Shari'ate Mutehharah Ke Bataye Huwe Tariqe Ko Seekhe'n Aur Ibadat Ke Dauraan Ise Zahen Me'n Rakhe'n Aur Hasbe Iste'taa'at Koshish Kare'n Ke Hamari Ibadat Mustafa Jaane Rahmat ﷺ Ki Ta'Leem Ke Mutabiq Ada Ho. Aur Phir Khuda_Na_Khwastah Ham Se Koyi Ghalti Hojaye To Isi ILm Ki Roshni Me'n Iska Tadraak Kiya Jaye.
Huzoor ﷺ Ne Hajj Ke Jo Faza'il Bayan Farmaye Hain Wo Usi Waqt Haasil Ho Sakte Hain Jab Hajj Ki Adayegi Ahsan Tariqe Se Hogi Aur Agar Ibadat Hi Naa-qis Hoto Kamil Fazilat Ki Tawaqqoh Kaise? Balke Ibadat Ke Masa'il Naa Seekhna Aur Allah-O-Rasool Ke Bataye Huwe Tariqah Ke Khilaaf Ibadat Karna Allah-O-Rasool Ko Naraaz Karna Aur Gunah-O-Ma'siyat Me'n Mubtela Hona Hai. Wo Log Jo Hajj-O-Umrah Ka Iradah Rakhte Hon Unko Chahiye Ke Wo Is Kitaab Ka Baghauar Mutale'ah Kare'n Aur Hajj-O-Umrah Ke Tamam Masa'il Zahen Nasheen Farmale'n. Mukhtalif Duae'n Jo Is Kitaab Me'n Naqal Ki Gayi Hain Wo Bhi Hosake To Yaad Karle'n. Duae'n Yaad Naa Honto Pareshan-O-Fikr Mand Naa Hon Balke Har Mauqa Par Durood Shareef Padhe'n Ke Tamaam Duao'n Se Behtar-O-Afzal Hai. Aur Agar Muyassar Hoto Kisi Sunni Aalime Deen Ke Hajj Ke Tarbiti Programme Me'n Shareek Hokar Apni Ma'lumaat Ko Pukhtah Karle'n Taake Hajj Kaamil Tariqe Se Ada Hosake Aur Aap Hajj Ke Faizan-O-Barkaat Se Mustafeez Hon.
Index