◆Aadabe Safar
1_ Jiska Qarz Aata Ho Ya Amant Paas Ho Ada Kar De Jin Ke Maal Naa-Haq Liye Hon Wapas De Ya Muaf KaraLe Agar Patah Naa Chale To Utna Maal Faqiro'n Ko Dede. Jiska Uspar Qarz Aata Hai Us Waqt Naa De Sake To Usse Bhi Ijazat Le.
2_ Namaz, Rozah, Zakaat Jo Ibadaat Zimmah Par Hon Ada Kare Aur Taayib Ho Aa'indah Gunah Naa Karne Ka Pakka Iradah Kare.
3 _ Jis Ki Ijazat Ke Baghair Safar Makruh Hai Jaise Maa'n Baap Shauhar Use Raza Mand Kare. Hajje Farz Kisi Ki Ijazat Naa Dene Se Ruk Nahi Sakta Ijazat Me'n Koshish Kare Naa Mile Jab Bhi Chala Jaye.
4_ Apni Niyyat Ko Durust KarLe, Is Safar Se Maqsood Sirf Allah Azza-O-Jal Aur RasoolAllah ﷺ Ki Raza Ho Riya-O-Sam'a-O-Fakhr Se Bacha Rahe.
5_ Aurat Ke Sath Jab Tak Shauhar Ya Mehram Baaligh Qabile Itmenaan Naa Ho Jisse Nikah Hamesha Haraam Hai Safar Haraam Hai. Agar Karegi Hajj Hojayega Magar Har Qadam Par Gunah Likha Jayega.
6_ Tausha Maale Halaal Se Le Warna Qubue Hajj Ki Ummeed Nahi Agarche Farz Utar Jayega Agar Apne Maal Me'n Kuch Shuba Hoto Qarz Lekar Hajj Ko Jaye Aur Wo Qarz Apne Maal Se Ada Kare.
7_ Haajat Se Zyada Tausha Lekar Rafiqo'n Ki Madad Aur Faqiro'n Par Tasadduq Karta Chale Ye Hajje Mabroor Ki Nishani Hai.
8_ Aalim Kutube Fiqh Ba-Qadr Kifayat Sath Le Aur Jo Masa'il Se Naa-Waqif Hai Wo Kisi Aalim Ke Sath Jaye Ye Bhi Naa Mile To Kam Az Kam Ye Risala Hamrah Ho.
9_ Aainah, Surmah, Kangha, Miswaak Saath Rakhe Ke Ye Sunnat Hai.
10_ Akela Safar Naa Kare Kyunke Ye Mana Hai. Rafeeq Deen_Daar Aur Sauleh Ho Ke Bad-Deen Ke Hamrah Hargiz Naa Jaye Isse Akela Jana Behtar Hai.
11_ Hadees Me'n Hai Ke Jab Teen Admi Safar Ko Jaye'n Apne Me'n Se Ek Ko Ameer Banale'n, Us Me'n Kaamo'n Ka Intazaam Rehta Hai. Ameer Use Banaye'n Jo Khush Khalq, Aaqil Aur Deen_Daar Ho. Ameer Ko Chahiye Ke Apne Rafiqo'n Ke Aaram Ko Apni Aasaa'ish Par Muqaddam Rakhe.
12_ Chalte Waqt Sab Azizo'n Dosto'n Se Mile Aur Apne Qusoor Muaf Karaye Aur Ab Unpar Laazim Ke Dil Se Muaf Kar De'n Hadees Shareef Me'n Hai Ke Jiske Paas Uska Musalman Bhai Mazarat Laaye Uspar Wajib Hai Ke Qubool Karle Warna Hauze Kausar Par Aana Naseeb Naa Hoga.
13_ Waqte Rukhsat Sab Se Dua karaye Ke Barkat Haasil Hogi Kyunke Dusro'n Ki Dua Ke Qubool Hone Ki Zyada Ummeed Hai Aur Ye Nahi Ma'loom Ke Kis Ki Dua Maqbool Ho. Lihaza Sab Se Dua Karaye Aur Wo Log Jo Haaji Ya Kisi Ko Rukhsat Kare'n To Waqte Rukhsat Uske Liye Dua Kare'n.
14_ Libase Safar Pahen Kar Ghar Me'n 4-Raka'at Nafl Namaz Is Tarah Padhe'n Ke Pehli Raka'at Me'n AlhamdulillAh Shareef Ke Ba'd Surah Kafiroon Dusri Me'n Surah IkhLaas Tisri Me'n Surah Falaq Aur Chauthi Me'n Surah Naas Padhe'n. Ye Raka'ate'n Wapas Aane Tak Uske Ahl-O-Maal Ki Nigehbani Karengi.
15_ Ghar Se Nikalne Ke Pehle Aur Ba'd Kuch Sadqah Kare.
16_ Ghar Se Nikle To Ye Khayal Kare Jaise Dunya Se Ja Raha Hai. Chalte Waqt Ye Dua Padhe: "Allahumma Innaa Na-u'zubika Miw-Wa'a-Saa Is Safari Wa Kaabatil Munqalabi Wa-Su IL-Manzari Fil Maali Wal-Ahli Wal-Walad"
In Shaa Allah Wapasi Tak Maal-O-Ahl-O-Ayaal Mahfooz Rahenge.
17_ Daewazah Se Bahar Nikalte Hi Ye Dua Padhe Aur Durood Shareef Ki Kasrat Kare: "BismillAhi Wa-BillAhi Wa-Tawakkaltu Alallaahi Wala Hawla Wala Quwwata ILla BillAh"
18_ Sabse Rukhsat Hone Ke Ba'd Apni Masjid Se Rukhsat Ho, Agar Waqte Karahat Naa Hoto Us Me'n 2-Raka'at Nafl Namaz Padhe.
19_ Usi Waqt Aayatul Kursi, Surah Kafiroon, Surah Izaja, Surah IkhLaas, Surah Falaq Aur Surah Naas Sab Ma'a BismillAh Padhe Phir Aakhir Me'n Ek Baar BismillAh Shareef Padhle In Shaa Allah Rastah Bhar Aaram Se Rahega.
20_ Nez Us Waqt "Innal Lazi Farada Alaikal QurAana Laradduka ILaa Ma'Aad"
Ek Baar Padhle Bil-Khair Wapas Aayega.
21_ Jab Sawari Par Sawar Ho BismillAh Shareef 3-Baar Aur " Laa ILaaha ILlallahu" Ek Baar Kahe Phir Ye Padhe:
"Subhanallazi Sakhkhara Lana Haaza Wama Kunna Lahu Muqrineen. Wa-Inna ILa Rabbina Lamun Qaliboon"
22_ Agar Paani Ke Jahaz Me'n Sawar Ho Ye Kahe: "BismillAhi Majriha Wa-Mursaha. Inna Rabbi Laghafu-RurRaheem. Wama Qadarul Laaha Haqqa Qadrih. Wal Ardu Jami'an Qabdatuhu Yaumal Qiyamati Was-Samawatu Matwiyyaatum Biyaminih. Subhanahu Wa-Ta'Aala Amma Yushri Koon"
In Shaa Allah Doobne Se Mahfooz Rahega.
23_ Wapasi Ki Tareekh Aur Waqt Ki Itlaa Aane Se Pehle Dede, Baghair Itlaa Hargiz Naa Jaye Khususan Raat Me'n.
24_ Logo'n Ko Chahiye Ke Haaji Ka Istaqbaal Kare'n Aur Uske Ghar Pohanchne Se Qabl Dua Karaye'n Ke Haaji Jab Tak Apne Ghar Me'n Qadam Nahi Rakhta Uski Dua Qubool Hoti Hai.
25_ Sab Se Pehle Apni Masjid Me'n Aakar 2-Raka'at Nafl Padhe, Phir 2-Raka'at Ghar Me'n Aakr Padhe Iske Ba'd Sabse Ba-Kushadah Peshani Mile.
26_ Azizo'n Aur Dosto'n Ke Liye Kuch Naa Kuch Tohfa Zaroor Laye. Haaji Ka Tohfah Tabarrukaate Haramain Sharifain Se Badh Kar Kya Ho Sakta Hai? Dusra Tohfah Dua Ka Ke Ghar Pohanchne Se Pehle Istaqbaal Karne Waalo'n Aur Tamam Musalmano'n Ke Liye Dua Kare.
27_ Jab Aap Hajj Aur Umrah Ke Safar Par Niklenge To Jagah Jagah Dushwariya'n Pesh Aayengi. Apko Apne Hamrayo'n Se Ya Arab Bashindo'n Se Takleef Ponhchegi. Aisi Surat Me'n Aap Sabr-O-Tahammul Ka Daman Haath Se Naa Cchode'n. Naa Hi Shikwah-O-Shikayat Zauban Par Laaye'n Aur Naa Hi Kisi Se Jhagda Mol Le'n Isse Sawaab Me'n Kami Ho Sakti Hai. Kyunke Allah Azza-O-Jal Ne Qubule Hajj Ke Liye Teen Sharte'n Bayan Farmayi Hain:
فَلَا رَفَثَ وَلَا فُسُوۡقَۙ وَلَا جِدَالَ فِى الۡحَجِّ ؕ
(Surah Al-Baqarah:197)
(To Naa Aurato'n Ke Samne Sohbat Ka Tazkirah Ho Naa Koyi Gunah Naa Kisi Se Jhagda Hajj Ke Waqt Tak)
Aap Ko Jab Kabhi Kisi Ma'siyat Ka Khayal Ho Fauran Sar Jukha Kar Qalb Ki Taraf Mutawajjih Hon Aur Is Aayat Ki Tilawat Kare'n Aur Lahawla Shareef Padhe'n To Ye Baat Jati Rahegi, Zaruri Nahi Ke Jhagda Ki Ibteda Aapki Taraf Se Ho Ya Aapke Rafaqa Hi Ke Sath Jadaal Ho Balke Ba'z Auqaat Imtehanan Kisi Se Bhi Be-Sabab Uljha Dete Hain Balke Sab Wa Shitam-O-La'an Ko Tayyar Hote Hain. Aap Har Waqt Hoshiyar Rahe. Mubaad Ek Do Kalme Me'n Saari Mehnat Aur Rupeya Barbad Hojaye. Ahle Makkah Sakht Mizaaj Hote Hain Unse Narmi Ikhtiyaar Kare'n Aur Khususan Ahle Madinah Ke Af'aal Par Aetaraaz Naa Kare'n Naa Hi Dil Me'n Kadurat Laaye'n. Usi Me'n Dono'n Jaha'n Ki Sa'aadat Hai.
28_ Khabar_Daar Daurane Safar Namaz Hargiz Naa Tark Kare'n Ke Ye Gunahe Kabirah Hai. Aur Aap Allah -O- Rasool Ke Darbar Me'n Haazir Hone Ja Rahe Ho Unke Hukm Ki Naa-Farmani Karte Ho! Kya Wo Aap Se Raazi Honge? Bohat Se Hajjaaj Ko Dekha Gaya Hai Ke Namaz Se Ghaflat Karte Hain Aur Thodi Takleef Par Namaz Cchod Dete Hain Halanke Shara'a Motahherah Ne Jab Tak Aadmi Hosh Me'n Hai Namaz Saaqit Nahi Ki.
Index