◆ Murawajjah Rasme'n (Behuda Raayij Ki Huwi Rasme'n)
Shadi Ke Ba'd Bhi Mukhtalif Qism Ki Rasme'n Qareeb Qareeb Har Jaga Maujood Hain Lekin Nikah Ke Ba'd Ki Rasmo'n Me'n U.p Ka ILaqa Sab Mulko'n Se Aage Badha Huwa Hai. U.p Me'n Teen Tarah Ki Rasme'n Hain. Ek Chauthi, Dusri Ganga Aur Sehra Kholne Ki Rasam, Tisri Kheer Ki Rasam. Chauthi Ko Ye Hota Hai Ke Rukhsat Ke Dusre Din Dulhan Ke Mayke Se 30 Ya 40 Aadmi Ya Kuch Kam-O-Besh Chauthi Lota Ne Ke Liye Dulha Ke Ghar Jate Hain Jaha'n Unki Pur Takalluf Dawat Hoti Hai Khana Kha Kar Meethe Chawalo'n Ke Thaal Me'n Apni Haisiyat Se Zyada Rupeya Rakhte Hain. Ye Rupeya Bhi Dulhan Walo'n Ki Taraf Se Chanda Hokar Bataur Newta Jama Hota Hai. Phir Ladki Ko Apne Hamrah Le Aate Hain Chauthe Din Dulha Ki Taraf Se Kuch Aurate'n Aur Kuch Mard Dulhan Ke Mayke Jate Hain Apne Saath Sabz Tarkariya'n Aalu, Baigan Waghairah Aur Kuch Mithayi Jis Me'n Laddo Zaroor HonLe Jate Hain. Waha'n Ki Tawaduh Khatir Ke Liye Patli Patli Kheer Tayyar Hoti Hai. Ek Toti Kursi Par Kheer Ki Thaali Bhari Huwi Rakh Kar Uppar Se Safaid Chadar Daal Dete Hain. Dulha Ko Bethne Ke Liye Wo Kursi Pesh Ki Jati Hai Dulha Miya'n Be-Khabar Uspar Bethta Hai. Bethte Hi Tamam Kapde Kheer Me'n Kharab Hojate Hain Aur Hasi Udati Hai Phir Dulhan Wale Dulha Walo'n Ke Kapde Aur Muh Khoob Acchi Tarah Kharab Karne Ki Koshish Karte Hain Wo Apna Bachao Karte Hain. Is Me'n Khoob Dil Lagi Rehti Hai. Jab Is Shaitaani Rasam Se Najaat Huwi Tab Khana Khilaya. Ba'd Namaze Zuhar Ek Chauki Par Dulhan Dulha Aamne Saamne Bethe, Wo Laddo Jo Dulha Ki Taraf Se Laye Gaye Hain Aas Paas Phekwaye Gaye Yaani Dulha Ne Dulhan Ki Taraf Phenka Aur Dulhan Ne Dulha Ki Taraf. Jab 7 Chakkar Pure Hogaye Tab Wo Tufaan Bad-Tameezi Barpa Hota Hai Ke Shaitaan Bhi Dum Daba Kar Bhaag Jaye. Wo Tarkariya'n Aur Aalu, Shalgam, Baigan Waghairah Jo Dulha Wale Sath Laye The Ab Un Ke Do Hisse Kiye Jate Hain. Ek Hissah Dulha Walo'n Ka Aur Dusra Hissa Dulhan Walo'n Ka. Phir Ek Dusre Ko Isse Maar Lagate Hain Iske Ba'd Jo Aur Taraqqi Hoti Hai Wo Bayan Ke Qaabil Nahi, Ye To Chauthi Huwi.
Ab Aage Chaliye Jab Dulhan Ko Wapas sasuraal Le Gaye Tab Gangna Kholne Ki Rasam Ada Huwi. Wo Is Tarah Ke Dulhan Se Gangna Khulwaya Gaya. Idhar Se Dulha Ne Uski Gaanthe'n Sakht Rakhi Hain Idhar Se Dulhan Ki Puri Koshish Hai Ke Usko Khool Daale Jab Ye Ba-Mushki Khola Ja Chuka Tab Aapas Me'n Ek Dusre Par Paani Phenka Aur Us Me'n Bada Har Wo Maana Jata Hai Jo Kisi Shareef Aadmi Ko Dhoke Se Bula Kar Usko Bhigo De Aur Jab Wo Khafa Hoto Idhar Se Khushi Me'n Taaliya'n Baje'n, Sehra Kholne Ki Ye Rasam Hai Ke Jab Sehra Khola Gaya To Kisi Qareeb Ke Darya Me'n Aur Agar Darya Maujood Na Hoto Kisi TaLaab Me'n Agar TaLaab Bhi Na To Kisi Ghair Aabad Kunwe'n Me'n Daal Diya Jaye. Magar Ye Sehra Agar Daalne Ke Liye Aurate'n To Gaati Bajati Huwi Aur Wapas Honto Gaati Bajati Huwi Aur Agar Mard Jakar Daale'n To Padhe Likhe To Waise Hi Phenk Aate Hain Aur Jaahil Log Darya Ko Salam Karke Is Me'n Dalte Hain Phir Kuch Meethe Chawal Paka Kar Khwaja Khizar Ki Fateha Niyaaz Hoti Hai. Lijiye Janab Aaj In Rasmo'n Se Peecha Chhoda.
◆In Rasumo'n Ki Kharabiya'n
Ye Rasme'n Saari Hinduwani Hain Jis Me'n Aurato'n Mardo'n Ka Ikhtilaat Yaani Main Jool Hai Ye Bhi Haram Aur Kheer Aur Tarkariyo'n Ki Barbadi Hai Ye Bhi Haram Hai. Musalmano'n Ke Kapde Kharab Karke Unko Takleef Pohchayi Ye Bhi Haram Phir Chauthi Me'n Ek Dusre Ki Marammat Karna Eeza Dena Ye Bhi Haram Ke Is Me'n Dil Shikni Bhi Hai. Aur Sar Shikni Bhi. Darya Ko Aur Paani Ko Salam Karna Ye Bhi Balke Mushriko'n Ka Kaam Hai, Gaana Bajana Ye Bhi Haram Hai.
◆Inki IsLah
In Rasmo'n Ki IsLaah Ye Hai Ke Az Awwal Taa Aakhir Ye Tamam Rasme'n Bilkul Band Kar Di Jaye'n. Ba'z Jaga Ye Bhi Riwaaj Hai Ke Dulhan Sasuraal Me'n Kaam Nahi Karti Aur Jab Pehla Kaam Karti Hai To Usse Puriya'n Pakwa Kar Taqseem Karwayi Jati Hain. Ye Bhi Bilkul Fazool Hai Isse Koyi Faida Nahi Agar Us Waqt Barkat Ke Liye Hath Ka Pehla Khana Pakwa Kar Huzoor Ghuase Paak RadiyAllahuTa'Aala Anhu Ki Fateha Kar Di Jaye Taake Barkat Rahe To Bahot Accha Hai.
◆Zaruri Hidayaat
Sasural Ki Ladaiya'n Chand Waja Se Hoti Hain. Kabhi To Dulhan Tez Zuban Aur Gustakh Hoti Hai Saas Nanad Ko Sakht Jawab Deti Hai IsLiye Ladaiya'n Hoti Hai. Kabhi Shauhar Ki Chizo'n Ko Haqeer Janti Hai Aur Waha'n Apne Mayke Ki Badayi Karti Rehti Hai Ke Mere Baap Ke Ghar Ye Tha Wo Tha. Kabhi Saas Nande'n Dulhan Ke Maa'n Baap Ko Uski Maujoodgi Me'n Bura Bhala Kehti Hain Jisko Wo Bardasht Nahi Kar Sakti. Kabhi Sasuraal Ke Kaam Se Jee Churati Hai Kyunke Mayke Me'n Kaam Karne Ki Aadat Na Thi Kabhi Mayke Bhejne Par Jhagda Hota Hai Ke Dulhan Kehti Hai Ke Mayke Jayengi. Sasuraal Wale Nahi Bhejte Phir Dulhan Apni Taklife'n Apne Mayke Walo'n Se Jakar Kehti Hai To Uski Taraf Se Ladayi Karte Hain. Ye Aisi Aag Lagti Hai Ke Bujhaye Nahi Bhujti. Kabhi Saas Nanade'n Bilawaja Dulhan Par Bad_Gumani Karti Hain Ke Hamari Dulhan Chizo'n Ki Chori Karke Mayke Pohchati Hai Ye Wo Shikayat Hain Jin Ki Waja Se Hamare Yaha'n Khana Jangiya'n Rehti Hain Aur In Shikayaat Ki Jad Ye Hai Ke Ek Dusre Ke Huqooq Se Be-Khabar Hain. Dulhan Ko Nahi Ma'aloom Ke Mujh Par Shauhar Aur Saas Ke Kya Haq Aur Saas Aur Shauhar Ko Nahi Khabar Ke Ham Par Dulhan Ke Kya Haq Hain.
Saas Aur Shauharo'n Ko Ye Khayal Chahiye Ke Nayi Dulhan Ek Qism Ki Chidya Hai Jo Abhi Bhi Qafas (Pinjre) Me'n Phansi Hai To Phad Phadati Bhi Hai Aur Bhaagne Ki Bhi Koshish Karti Hai Magar Shikari Aur Paalne Waala Usko Khane Paani Ka LaLach De Kar Pyar Karke Behlata Aur Uske Dil Lagane Ki Koshish Karta Hai Phir Ahista Ahista Uska Dil Lag Jata Hai. Isi Tarah saas Nanado'n Aur Shauharo'n Ko Chahiye Ke Uske Sath Aisa Accha Bartao Kare'n Ke Wo Jald Unse Hil Mil Jaye.
Dosto! Chaar Din Tauqeer Ke Bhi Bhari Hote Hain Aur Khayal Rakho Ke Ladki Sab Kuch Sun Sakti Hai Magar Apne Maa'n Baap Behen Bhai Ki Burayi Nahi Sun Sakti Uske Samne Uske Maa'n Baap Ko Hargiz Bura Na Kaho.
Dekho Abu Jahal Ka Farzand Hazrat Akrama RadiyAllahu Ta'Aala Anhu Jab Eemaan Laaye To Huzoor ﷺ Ne Sahaba Kiraam Alaihimur Ridwaan Ko Hukm Diya Ke Akrama Ke Saamne Koyi Bhi Unke Baap Abu_Jahal Ko Bura Na Kahe.
(Madarijun Nabuwwah)
Ye Kyun The?
Sirf IsLiye Ke Har Shakhs Ki Fitri Aadat Hai Ke Apne Maa'n Baap Ki Burayi Na Sun Sake.
Agar Ladki Ko Kisi Kaam Kaaj Me'n Maharat Na Hoto Aahistagi Se Sikhale'n Gharz Ke Uske Sath Wo Sulook Karen Jo Apni Aulaad Se Karte Hain Ya Apni Beti Ke Liye Ham Khud Chahte Hain.. Wo Bhi Kisi Ki Bacchi Hai Jo Cheez Apni Bacchi Ke Liye Gawarana Karo Wo Dusre Ki Bacchi Se Bhi Gawarana Karo Aur Kisi Par Bilawaja Bad_Gumaani Karna Haram Hai Is Bad_Gumaani Ne Sadha Gharo'n Ko Tabaah Kar Daala.
Dulhano'n Ko Chahiye Ke Uska Khayal Rakhe'n Ke Zaban Shiri'n Se Mulk Giri Hoti Hai. Naram Zaban Se Insan Janwaro'n Ko Qabze Me'n Kar Leta Hai Ye Saas Nanade'n To Phir Insaan Hain. Khayal Rakho Ke Qudrat Ne Pakadne Ke Liye Do Haath, Chalne Ke Liye Do Paao'n, Dekhne Ke Liye Do Aankhe'n Aur Sunne Ke Liye Do Kaan Diye Hai Magar Bolne Ke Liye Zaban Sirf Ek Hi Di Jiska Maqsad Sirf Ye Ke Bolo Kam Magar Kaam Zyada Karo. Agar Tum Apne Maa'n Baap Ki Badayi Sab Ko Jatlati, Phir To Be_kaar Hai Lutf To Jab Hai Ke Tumhari Raftaar Guftaar Khush Khalqi Kaam Dhanda Acche Akhlaaq Aise Hon Ke Saas Nanad Aur Shauhar Ya Ke Har Dekhne Wala Tum Ko Dekh Kar Tumhare Maa'n Baap Ki Ta'reef Kare'n Ke Dekho To Ladki Ko Kaisi Umda Ta'Leem, Tarbiyat Di.
Sasural Me'n Kaisi Hi Ladayi Hojaye Maa'n Baap Ko Hargiz Uski Khabar Na Do. Agar Koyi Baat Tumhari Marzi Ke Khiaaf Bhi Hojaye To Sabr Se Kaam Lo. Kuch Dino'n Me'n Ye Saas Nanade'n Aur Shauhar Sab Tumhari Marzi Par Chale'nge. Ham Ne Wo Laayiq Shareef Ladkiya'n Bhi Dekhi Hain Jinhone'n Sasural Me'n Pehle Kuch Dushwari Uthayi Phir Apne Akhlaaq Se Sasural Walo'n Ko Aisa Girwidah Bana Liya Ke Unhone'n Ne Saare Ke Saare Ikhtiyar Dulhan Ko De Diye Aur Kehne Lage Ke Beti Ghar Baar Tu Jaane Hamko To Do Waqt Jo Tera Jee Chahe Paka Kar De Diya Kar
Aur Kayal Rahe Ke Tumhare Shauhar Ki Raza Me'n Allah Ta'Aala Aur RasoolAllah ﷺ Ki Raza_Mandi Hai. Huzoor ﷺ Ne Farmaya Hai Ke Agar Khuda Ke Siwa Kisi Ko Sajdah Karna Jaaiz Hota To Me'n Aurato'n Ko Hukm Deta Ke Wo Apne Shauharo'n Ko Sajdah Kare'n
Aur Aye Shauhar! Tum Yaad Rakho Ke Dunya Me'n Insaan Ke Chaar Baap Hote Hain Ek To Nisbati Baap, Dusre Apna Sasur, Tisre Apna Ustaad, Chauthe Apna Peer. Agar Tumne Apne Sasur Ko Bura Kaha To Samajh Lo Ke Apne Baap Ko Bura Kaha. Huzoor AlaihisSalatu Wassalaam Ne Farmaya Bahot Kamiyab Shakhs Wo Hai Jiski Biwi Bacche Usse Raazi Hon.
Khayal Rakho Ke Tumhari Biwi Ne Sirf Tumhari Waja Se Apne Mayke Ko Chhoda Balke Ba'z Surato' n Me'n Des Chhod Kar Tumhare Sath Pardesi Bani Agar Tum Bhi Usko Aankhe'n Dikhao To Wo Kis Ki Hokar Rahe. Tumhare Zimme Maa'n Baap, Bhai Bahen, Biwi Bacche Sab Ke Haq Hain, Kisi Ke Haq Ke Ada Karne Me'n Ghaflat Na Karo Aur Koshish Karo Ke Dunya Se Bando'n Ke Haq Ka Boojh Apne Par Na Le Jao. Khuda Ke To Ham Sab Gunehgaar Hain Magar Makhlooq Ke Gunehgaar Na Bane'n. Haq Ta'Aala Mere In Tote Phote Lafzo'n Me'n Taseer De Aur Musalmano'n Ke Gharo'n Me'n Ittafaaq Paida Farma De Aur Jo Koyi Is Risale Se Faida Uthaye Wo Mujh Faqeer Ke Liye Dua-E-Maghfirat Aur Husne Khatima Kare.
Du Baate'n Aur Bhi Yaad Rakho. Ek To Ye Ke Jaisa Tum Apne Maa'n Baap Se Sulook Karoge, Waisa Hi Tumhri Aulaad Tumhare Sath Sulook Karegi Jaisa Ke Tum Dusre Ki Aulaad Ke Sath Sulook Karoge, Waisa Hi Dusre Tumhari Aulaad Se Sulook Karenge Yaani Agar Tum Apne Saas Sasur Ko Galiya'n Doge Tumhare Damaad Tumko Denge.
Dusre Ye Ke Hadees Shareef Me'n Hai Qarabat_Daaro'n Se Sulook Karne Se Umar Aur Maal Badhte Hain. Musalmano'n Ko Chahiye Ke Nabi Kareem ﷺ Ki Zindagi Paak Ma'aloom Karne Ke Liye Huzoor Paak ﷺ Ki Sawaneh Umriya'n Padhe'n Jinse Pata Lagega Ke Ahle_Qarabat Ke Sath Kaisa Bartao Karna Chahiye.