●Sawaal:- Ba'z Logo'n Ka Khayaal Hai Ke" Moujoda Taraqqi Yafta Daur Main Be-Pardagi Hamari Zarurat Ban Chuki Hai , Makhlute Muhafil Main Ladkiyo'n Ko Aara'ish -O-Zinat Ke Sath Lekar Jayege To Unke Liye Rishte Aayege , Waise Bhi Chadar Ya Dupatta Naa Lena Koyi Kufr -O- Islaam Ka Mas'alah To Nahi Hai. QurAan -O- Sunnat Ki Roshni Main Is Khayal Ki Kya Haisiyat Hai?
Jawaab:▶ Sabse Pehle To Ye Jaan Lijiye Ke Shari'ate Mutehhara Ke Kisi Bhi Hukm Ki Tauheen Ya Use Halka Janne Ka Kya Hukm Hai !
Sadrushshariah Likhte Hai, "Kisi Shakhs Ko Shari'at Ka Hukm Bataya Ke Is Mu'aamilah Main Ye Hukm Hai ,
Usne Kaha , Ham Shari'ate Par Amal Nahi Karege , Ham To Rasm Ki Pabandi Karege. Aisa Kehna Ba'z Mashaayikh Ke Nazdeek Kufr Hai".
(Bahar-E- Shari'at, J:1 , H:9, S-132 Ba-Hawala Fatawa AalamGiri)
Ab Sharm-O-Haya Aur Ghairat Ke Muta'alliq QurAan-O-Sunnat Ke Anwaar Mulaheza Farmaiye.....
Irshaade Baari Ta'Aala Huwa,
" Tum Farma'o Mere Rab Ne To Be-Hayaayiyaa'n Haraam Farmayi Jo In Main Khuli Hain Aur Jo Chupi".
(Surah Al-Aaraaf:3 , Kanzul Eemaan)
Habibe Kibriyaa ﷺ Ka Farmane Aalishaan Hai ,
" Ghairat Eemaan Ki Alaamat Hai. Aur Be-Ghairati Nifaaq Ki Nishaani Hai".
(Baihaqi)
Dusri Jaga Irshaad Huwa ,
" Allah Se Zyada Koyi Ghairat-Mand Nahi Isi Liye Usne Zahir-O-Poshida Har Qism Ki Be-Hayaayiyo'n Ko Haraam Farma Diya Hai ".
(Bukhari,Muslim)
Ek Aur Hadeese Paak Main Farmaya Gaya ,
" Eemaan Aur Hayaa Dono'n Saathi Hain
Jab Ek Yaani Hayaa Chali Jaaye To Dusra Yaani Eemaan Bhi Chala Jata Hai.
(Mishkaat)
In Ahadeese Mubaraka Se Ma'aloom Huwa Ke Eemaan Wale Ghairat Mand Hote Hain
Aur Ghairat Ka Taqaaza Ye Hai Ke Zaahir -O- Poshidah Tamaam Be-Hayayiyo'n Se Nafrat Ki Jaye Aur Be-Pardagi To Aisi Khuli Be-Hayaayi Hai Ke Hadeese Paak Main Irshaad Huwa,
" (Bila Uzr) Na-Mehram Ko Dekhne Wale Par Aur Jise Dekha Jaye Uspar Bhi (Jabke Wo Qasdan Khud Ko Dikhaye) Dono'n Par Allah Ki Laa'Nat Hai".
(Mishkaat)
Mufti Khaleel Khaan Qaudri Farmate Hain ,
"Kaha To Shari'ate Mutehhara Ki Ye Taakeed Ke Aurat Halki Khushbo Istemaal Kare Ke Tez Khushbo Se Ghair Mard Uski Janib Mutawajjuh Honge Aur Kaha Bebaki -O- Khud Numayi Ki Ye Numa'ish Ke Aadhe Sar Ke Baal Aur Kalaiyaa'n Aur Kuch Hissa Gale Ya Pindli Ka Khula Rehna To Goya Koyi Aeb Hi Nahi.
Aur zyada Baankpan Huwa, Numa'ish Ka Shouq Badha To Dupatta Dhalka Huwa , Kareeb Ya Jaali Ya Bareek Malmal Ya Nazuk waayil Ya Aur Aise Hi Kapdo'n Ka Libaas , Kurte Qameez , Jampar Faraak Jisse Badan Ki Rangat Chamke Aur Is Haalat Main Inka Ghairo'n Main Jana , Ajnabiyo'n Main Phirna , Ghair Mardo'n Ke Sath Bazaro'n Aur Aam Guzar gaho'n Main Khareed-O-Farokht Karna ; Kaha To Aurato'n Ka Apne Muhalle Ke Masjid Main Ghar Ke Darwaze Par Do Qadam Ke Fasle Par Jana Mamno -O- Na-Jaaiz Aur Kaha Ser Tamashe , Baaje Taash Ki Mehfilo'n Main Majliso'n Main Badhti Huwi Be-Hayaayiyaa'n Aur Parwaan Chadti AawaraGiyaa'n ! Kaha To Hadees Main Ghairo'n Ke Ghar To Ghair'on Ke Ghar , Jaha Na Apna Qaabu Na Apna Guzar , Apne Makano'n Ki Nisbat Aaya Ke Aurato'n Ko Baka Khano'n (Opri Manzil) Par Na Rakho" Ke Na-Mehramo'n Ki Nazare'n In Par Ya Inki Nazre Un Par Padegi , Aur Kaha Cinema , Thetor , Paap Ghar Aur Parko'n Clubo'n Main Uryaniyaa'n Aur Bad-Lihaziyaa'n.
••Khayaali Roshni , Roshan Khayaali Aaj Kal Ki Hai
Dilo'n Se Slb Usne Kar Liya Hai Noore Eemaani••
Hazrat Abu Hurerah (RadyiyAllahuTa'AalaAnhu) Se Riwayat Hai Ke Rasool'Allah ﷺ Ne Farmaya,
"Dozakhiyo'n Main Do(2) Giroh Hain. In Main Ek Un Aurato'n Ka Hai Jo Ba'Zaahir To Kapde Pahenti Hain Magar Haqiqat Main Nangi Hain.
Yaani Is Qadar Bareek Aur Aisi La'Parwahi Se Kapde Pahenti Hain Ke Unka Badan Chamakta Hai Aur Kahi Se Khula Hota Hai.. Kahi Se Chupa Huwa..
Wo Khud Bhi Dusre Mardo'n Ki Taraf Raghbat Karti Hain (Ke Bana'o Singhaar Karke Dusro'n Ka Dil Lubhaati Ya Sar Se Dupatta Utar Dalti Hain Taake Dusre Unka Chehra Dekhe'n) Aur Matak Matak Kar Chalti Hain (Taake Dusro'n Ko Farifatah Apni Taraf Maayil Kare'n) Ye Aurate'n Hargiz Jannat Main Daakhil Na Hongi Aur Jannat Ki Khushbo Bhi Naa Paayegi Halanke Jannat Ki Khushbo Bahot Door Se Ma'loom Hojati Hai Aur Door Door Tak Phelti Hai".
(Mishkaat)
(Sunni Baheshti Zewar , H-2 , S-206 to 207)
Hamare Mu'Aashire Main Aksariyat Aise Logo'n Ki Hai Jo Apni Biwi Ke Kehne Par Khilaafe Shar'aa Kaamo'n Ka Irtekaab Karte Hain Aur Apni Biwi Aur Betiyo'n Ki Be-Pardagi Par Raazi Ho Kar Ghairate Eemaani Se Mehroom Hojate Hain.. Halanke Allah Ta'Aala Ne Mard Ko Aurato'n Par Haakim Bana Kar Fazilat Ata Farmayi Hai..
Ba'z Jaga Ye Bhi Dekha Gaya Hai Ke Biwi Nek Hai Aur Ghairate Eemaani Se Mehroom Shauhar Use Be-Pardagi Par Majbor Karta Hai Aise Shakhs Ko Rahmate Aalam ﷺ Ne Daiyus(Be-Haya) Kaha Aur Farmaya Daiyus Par Jannat Ki Khushbo Haraam Hai.
(Mishkaat)
Akbar ELa Aabadi Ne Khoob Kaha Hai,
• Be-Pardah Jo Kal Nazar Aaye'n Chand Bebiyaa'n
Akbar Zamee'n Main Ghairate Qaumi Se Gid Gaya
Pucha Jo Unse Aapka Pardah Wo Kya Huwa?
Kehne Lagi Ke Aql Pe Mardo'n Ki Pad Gaya•
●Sawal Main Mazkorah Khayal Ke Betiyo'n Ko Zaib-O-Zinat Ke Sath Be-Pardah Rakhne Se Rishte Aate Hain , Shaytaan Ka Dhoka Hai. Agar Mahez Is Qism Ki Nafsaani Khwahishaat Aur Lagu Ta'wilaat Ke Zariye Haraam Ko Halaal Kiya Jane Lage To Phir Shara'Ee Aehkaam Badalne Ka Kabhi Na Khatm Hone Wala Silsilah Jari Hojayega.
Mazeed Ye Ke Jis Shadi Ke Liye Bunyad Haraam Kaam Par Rakhi Ja Rahi Ho Uske Bare Main To Yahi Kaha Ja Sakta Hai Ke:
●JO SHAAKH NAZUK PE AASHIYANA BANEGA NAA-PAIDAAR HOGA !●
Haan Albatta Acche Rishte Ke Liye Shari'ate Mutehhara Ke Mutabiq Zaroor Koshish Karni Chahiye Jo Allah Ta'Aala Ne Muqaddar Kiya Hai Wo Zaroor Milega.
• AalaHazrat Imam Ahmad Raza Muhaddis Bareillvi RadiyAllahu Ta'Aala Anhu Farmate Hain ,
"Dulhan Ko Sajana To Musalmano'n Main Qadeem Se Raa'ij Aur Bahot Si Ahadees Se Sabit Hai Balke Kuwari Ladkiyo'n Ko Zewar-O-Libaas Se Aaraasta Rakhna Ke Unke Liye Rishte Aaye Ye Bhi Sunnat Hai Balke Aurat Ka Qudrat Rakhne Ke Ba'wajood Bilkul Be-Zewar Rehna Makruh Hai Ke Ye Mard Se Mushabahat Hai.
Ummul Momineen Hazrat Aaisha Siddiqua RadiyAllahu Ta'Aala Anha Aurat Ka Be-Zewar Namaz Padhna Makruh Jante'n Aur Farmate'n Ke Kuch Aur Na Mile To Durahi Gale Main BandhLe. Bajne Wala Zewar Aurat Ke Liye Is Halaat Main Jaaiz Hai Ke Na-Mehramo'n Jaise Khala Mamu'n Chacha Phophi Ke Beto'n , Jeth , Dewar , Behnawi Ke Samne Na Aati Ho Aur Na Uske Zewar Ki Jhankaar Na-Mehram Tak Pohche".
(Fatawa Radwiyah)
AalaHazrat Qudda Sirrahu Ne Kuwari Ladkiyo'n Ko Zewar Aur Umda Libaas Se Aaraasta Rakhne Ki Talqeen Isliye Farmayi Ke Khandaan Ki Digar Khwateen Unhe Dekhegi To Apne Ladko'n Ke Liye Rishta Ka Paighaam Degi Ya Digar Milne Walo'n Ko Is Taraf Mayil Karegi Aur Shurfa Ke Haan Isi Tarah Rishte Tay Kiye Jate Hai.
● Ab Raha Ye Sawal Ke Kya Shadi Ke Qabl Ladka Ladki Ko Dekh Sakta Hai??? Is Masle Ki Wazahat Ke Liye QurAan-O-Hadees Se Chand Dalayil Peshe Khidmat Hain.
Irshad Baari Ta'Aala Hai,
"Aurato'n Main Se Jo Pasand Aaye Usse Nikah Karo.
(Surah Al-Nisaa:30)
Is Aayate Kareema Se Irshadatan Dekhne Ki Ijazat Milti Hai Kyunke Pasand Karna Dekhne Par Munhasir Hai. Iski Taayeed Mandarjazail Ahadees Se Bhi Hoti Hai.
• Ek Shakhs Ne Nabi Kareem ﷺ Ki Bargah Main Arz Kiya ,
Yaa RasoolAllah ﷺ ! Main Ek Ansari Aurat Se Shadi Karna Chahta Hon,
Aapne Farmaya ,
"Use DekhLo".
(Muslim)
• Aaqa-O-Maula ﷺ Ka Irshaade Girami Hai, "Jab Tum Main Se Koyi Kisi Aurat Ko Nikah Ka Paighaam Dene Lage To Agar Usko Dekhna Mumkin Hoto Zaroor DekhLe".
(Abu Dwood)
• Ek Sahabi Se Sarkaar Do Aalam ﷺ Ne Farmaya ,
"Tum Jisse Nikah Karna Chahte Ho Use DekhLo, Is Tarah Tumhare Darmiyaan Muhabbat-O-Ulfat Badhegi".
(Tirmazi)
In Ahaadees Se Ma'aloom Huwa Ke Nikah Se Qabl Aurat Ki Deendaari ,Paarsaayi Aur Hasab Nasab Ke Aelawa Surat Ka Bhi Lihaaz Rakhna Chahiye. Aur Iske Liye Aurat Ko Shadi Se Qabl Dekh Lene Main Koyi Harj Nahi. Kyunke Shadi Ke Ba'd Agar Wo Pasand Naa Aayi To Zindagi Talkh Hojayegi. Lihaza Aam Haa'Laat Main Shara'ee Hukm Yahi Hai Ke Na-Mehram Ko Na Dekha Jaye. Lekin Shadi Ke Ba'd Ki Talkhiyo'n Fitnah-O-Fasaad Se Bachne Ke Liye Shari'at Ne Itni Gunja'ish Rakhi Hai Ke Jab Aurat Ki Paarsaayi , DeenDaari Aur Hasab Nasab Ke Mu'ta'alliq Itminaan Hojaye To Aurat Ko Ek Nazar Dekh Liya Jaye Aur Dekhne Main Bhi Aurat Ki Sharm-O-Haya Aur Apne Ghairat -O-Waqaar Ko Malhooze Khaatir Rakha Jaye.
Zamnan Ye Baat Arz Karna Zaruri Hai Ke Ba'z Log Ghurbat Ya Maal Ki Kami Ke Ba'is Shadi Nahi Karte. Ladki Wale MaalDaar Ladka Chahte Hai To Ladke Wale Bhi Zyada Jahez Wali Ladki Talaash Karte Hain.
• Huzoor Akram ﷺ Ka Farmane Aalishaan Hai, "Aurat Se Chaar(4) Cheezo'n Ki Waja Se Nikah Kiya Jata Hai.
Maal -O- Daulat .... Hasab Nasab .... Husn-O-Jamaal Aur DeenDaari.
Tumhe Chahiye Ke DeenDaari Ko Tarjee'a Do".
(Bukhari-O-Muslim)
• Hazrat Abu Bakar Siddeeq RadiyAllahu Ta'Aala Anhu Ka Irshad Hai, "Allah Ta'Aala Ne Tumhe Jo Nikah Ka Hukm Farmaya Hai Uski Itaa'at Karo, Usne Jo Ghani Karne Wada Kiya Hai Pura Farmayega.
Allah Ta'Aala Ne Farmaya, " Agar Wo Faqeer Honge To Allah Unhe Apne Fadl Se Ghani Kardega".
(Surah Al-Noor:33)
(Bahare Shari'at , Hissa-7, Safa-2 , Bahala Ibne Abi Haatim)