●••Shafa'ee Maalik Ahmed Imame Haneef••●
●••Chaar Baaghe Imamat Pe Lakho'n Salam••●
◆Imame Aazam Abu Haneefah Nu'amaan Bin Saabit RadiyAllahuAnhu
Hazrat Imame Aazam RadiyAllahuTa'AalaAnhu Ka
Isme Girami : Nu'amaan
Kunniyat : Abu Haneefah
Aur Laqab : Imame Aazam Hai.
Aapka KhaanDaan Ajam Ke MuAzziz Sharfa Se Ta'alluq Rakhta Hai.
Aapki Wiladat Shahar Kufa San Hijri-80 Me'n Huwi.
Aapki Shaane Azmat Ke Liye Sarkare Du Aalam ﷺ Ka Ye Irshaad Kaafi Hai, Farmaya:
"Ambiya Meri Ta'areef Karte Aaye, Me'n Bhi Apne Ek Ummati Ki Ta'areef Karta Hon. (Imame Aazam Ki) , Wo Mere Ummat Ke Chiraagh Hain."
Apka Watan Kufa Us Zamane Me'n Islami Uloom-O-Funoon Ka Zabardast Markaz Tha. Aap Bahot Bade Taajir The, Aapka Sabse Aham Karnamah Fiqh Islami Ki Tadween Hai.
Imam Shafayi RadiyAllahu Ta'Aala Anhu Farmaya Karte The: "Jo Aadmi Fiqh Me'n Maahir Hona Chahe Wo Imame Aazam Ka Mohtaaj Hoga"
Aur Ye Bhi Farmaya Ke: "Me'n Abu Haneefah Se Bada Faqiyah (ILm Fiqh Ka Aalim) Kisi Ko Nahi Janta, Aur Log Fiqh Me'n Abu Haneefah Ke Ayaal Hain.
Jisne Imame Aazam Abu Haneefah Ki Kitaabe'n Nahi Dekhe'n Wo ILm Me'n Maahir Nahi Ho Sakta Aur Na Faqiyah Ho Sakta".
Deen Ki Rah Me'n Aapko Baar-Haa Mushkilaat-O-Masayeb Se Do Chaar Hona Pada. Aur Wo Sabr-O Zabt Ke Sath Tamaam Aazmaisho'n Me'n Pure Utre.
Khalifa-E-Mansoor Abbasi Ne Aehd-E-Qaza Ki Pesh Kash Ki Aapne Iska Ohdah Qubool Karne Se Inkaar Kar Diya, Bil-Aakhir Aapko Zahar De Diya Gaya Jisse Aapka Wisaal San Hijri-150 Me'n Huwa.
Aapko Baghdada Azeemah Me'n Dafn Kiya Gaya, Aapka Mazar Marja'e Khalayiq (Wo Shakhs Ya Wo Jaga Jiski Taraf Zyada Khalqat Ruju Hoti Ho, Saari Khalqat Ka Thikana Ya Markaz) Hai.
