Haiz-o-Nifaas Main Zikr -o-Durood Ke Ahkaam

on

◆Haiz-O-Nifaas Zikr-o- Durood Ke Ahkaam◆

(Fiqah Hanafi)



Haiz -O-Nifaas Se 8-Cheeze'n Haraam Hojati Hain.

 1. Namaz 
2. Roza 
3. QurAan  Paak Ki Ek  Aayat Padhna
4. QurAan Paak Ko Hath Lagana 
5. Masjid Me Dakhil Hona 
6. Jimaa
7. Tawaaf Karna 
8. Naaf Ke Niche Se Le Kar Ghutno'n Ke Niche Tak Darmiyaan Se  Nafaa Haasil Karna.


◆Sawaal_1) Haiz-O-Nifaas  Wali Aurat Ko QurAan Majeed Padhne Ka Ya Cchoone Ka Kya Hukm Hain?
Jawaab▶ Haiz-O-Nifaas Wali Awrat Ko QurAan Majeed Padhna Dekh Kar Ya Zubani Aur Uska Chhoona Agarche Uski Jild Ya Chuli Ya Haashiya Ko Haath  Ya Ungli Ki Nok Ya Badan Ka Koyi Hissa Lage Ye Sab Haraam Hain.
Kaghaz Ke Parche Par Koyi Surah Ya Aayat Likhi Ho Uska Bhi Chhoona Haraam Hai.
Juzdaan Mein QurAan Majeed Hoto Us Juzdaan Ke Chhoone Mein Harj Nahi.
Is Haalat Mein Kurte Ke Daaman Ya Dupatte Ke Aanchal Se Ya Kisi Aise Kapde Se Jis Ko Pehne Audhe Huwe Hai QurAan Majeed Chhoona Haraam Hai. Gharz Is Haalat Mein QurAan Majeed -O-  Kutube Diniyah Padhne Aur Chhoone Ke Muta'alliq Wahi Ahkaam Hain Jo Is Shakhs Ke Bare Mein Hain Jis Par Nahana Farz Hai.

◆Sawaal_2) Ek MuAllimah  Hon Aur Bachho'n Ko QurAan Majeed Ki Ta'aleem Deti Hon.  To Haalate Haiz-O-Nifaas Main Talibaat Ko Kis Tarah  QurAan Majeed Ki Ta'aleem De'n?
Jawaab▶ MuAllimah Ko Haiz-O-Nifaas Hoto Ek Ek Kalma Saans Tod Tod Kar Padhaye Aur Hijje Karane Main Koyi Harj Nahi.

◆Sawaal_3) Haiz-O-Nifaas Ki Haalat Main Dua-E-Qunoot Padhna Kaisa?
Jawaab▶Dua-E- Qunoot Padhna Is Haalat Main Makruh Hai.
اللھم انا نستعینک  Se بالکفار ملحق Tak Dua-E- Qunoot Hai.

◆Sawaal_4) Haiz-O-Nifaas Ki Haalat Main  Aurate'n Kya Kya Padh Sakti Hai?
Jawaab▶ QurAan Majeed Ke Aelawa Aur Tamaam Azkaar... Kalma , Durood Shareef Waghera Bila Karahat Jaaiz Balke Mustahab Hai Aur In Cheezo'n Ko Wazu Ya Kulli Karke Padhna Behtar Hai Aur Waise Hi Padh Liya Jaye Jab Bhi Harj Nahi Aur Unke Cchoone Main Bhi Harj Nahi.


◆Sawaal_5)  Napaki Ki Haalat Main Aurat Ko   Azaan Ka Jawaab Dena   Kaisa?
Jawaab▶ Aisi Aurat Ko Azaan Ka Jawaab Dena Jaaiz Hai.

◆Sawaal_6) Napaki Ki Haalat Main Aurat Ko Khana Ka'aba Ka Tawaaf Karna Kaisa?
Jawaab▶ Khana Ka'aba Ke Andar Jana Aur Uska Tawaaf Karna Agarche Masjide Haraam Ke Bahar Se Ho Inke Liye Haraam Hai.  

◆Sawaal_7) Haiz-O-Nifaas Ke Haalat Main Namaaz Aur Rozah Ka Kya Hukm Hai?
Jawaab▶Is Haalat Main Rozah Rakhna Aur Namaaz Padhna Haraam Hai.
In Dino'n Main Namaaze'n Muaf Hain Inki Qaza Bhi Nahi Aur Rozo'n Ki Qaza Aur Dino'n Main Rakhna Farz Hai.

◆Sawaal_8) Kya Aurat Napaki Ke Dino'n Main Yaade EeLaahi Kar Sakti Hai? Aur Uska Tariqa Kya Hai.
Jawaab▶ Namaaz Ke Waqt Main Wazu  Karke Itni Der Tak Zikr EeLaahi Durood Shareef Aur Digar Waza'if Padh Liya Kare Jitni Der Tak Namaaz Padha Karti Thi Ke Aadat Rahe.

◆Sawaal_9) Haiz-O-Nifaas Ki Haalat Main Sajda-E-Shukr Aur Sajda-E-Tilawat Ka Kya Hukm Hai?
Jawaab▶ Haiz-O-Nifaas Ki Haalat Main Sajda-E-Shukr -O- Sajda-E-Tilawat Haraam Hai Aur Aayate Sajda Sunne Se Uspar Sajda Wajib Nahi.

◆Sawaal_10) Haiz-O-Nifaas Ki Haalat Main Jima Karna Kaisa?
Jawaab▶HamBistari Yaani Jima Is Haalat Main Haraam Hai. 
Aisi Haalat Main Jima Jaaiz Janna Kufr Hai Aur Haraam Samajh Kar Kar Liya To Sakht Gunehgar Ho  Uspar Tauba Farz Hai Aur Aamad Ke Zamane Main Kiya To Ek Dinaar Aur Qareeb Khatam Ke Kiya To Nisf Dinaar Khairaat Karna Mustahab (Hain).

◆Sawaal_11) Napaki Ki Haalat Main Aurat Ke Sath Khana Ya Sona Kaisa Hai?
Jawaab▶ Apne Saath Khilana Ya Ek Jaga Sona Jaaiz Hai. Agar Saath Sone Main Shehwat Ka Ghalba Aur Apne Ko Qaabu Main Na Rakhne Ka Aehtamaal Hoto Saath Na Soye.

◆Sawaal_12) Haiz -O- Nifaas Wali Aurat Ke Saath Khana Aur Uska Jhota Khana Kaisa?
Jawaab▶ Uske Saath Khilane Ya Uska Jhota Khaane Main Harj Nahi. 
Hindustaan Main Aurate'n Jo Ba'z Jaga Unke Bartan Tak Alag Kar Deti Hain Balke Un Bartano'n Ko Misl Najis Ke Janti Hain Ye Hindo'on Ki Rasme'n Hain Aisi Behuda Rasmo'  Se Aehtiyaat Laazim.

◆Sawaal_13)  Roza Ki Haalat Main Haiz -O- Nifaas  Shuru Huwa To Roza Ka Kya Hukm Hai?
Jawaab▶ Roze Ki Haalat Main Agar Haiz -O-Nifaas Shuru Hogaya To Wo Roza Jata Raha Uski Qaza Rakhe Farz Tha To Qaza Farz Hai Aur Nafil Tha To Qaza Wajib Hai.

 (Ref>>>Bahare Shari'at , J:2 , S:46,47)

◆Sawaal_14) Haiz-o-Nifaas Ki Haalat Main Aise  Kaghaz Ka Othana Kaisa Jispar QurAan Majeed Ki Koyi Aayat Ya  Surath Likhi Gayi Ho?
Jawaab▶ Kaghaz Ke Parche Par Koyi Surah Ya Aayat Likhi Ho Uska Bhi Cchoona Haraam Hai.

 (Ref>>Bahare Shari'at)

Aur Fiqah  Shafa'ee Ke Nazdeek Agar Kaghaz Ke Parche Par Koyi Surat Ya Aayat Likhi Hoto Uska Cchoona Othana Jaaiz Hai.

 (Ref>>Shafayi Baheshti Zewar)


◆Sawaal_15) Haiz-o-Nifaas Ki Haalat Main  Juzdaan Main QurAan Shareef Hoto Kya Hum Hai?
Jawaab▶Juzdaan Main QurAan Majeed Hoto Us Juzdaan Ke Cchoone Main Harj Nahi.

 (Ref>>Bahare Shari'at) 

 Aur Fiqah  Shafa'ee Ke Nazdeek
QurAan Majeed Juzdan Main Ho Ya Rumaal Ya Kapde Ke Zariye Othaya Jaye Kurte Ke Aasteen Dupatta Ka Aanchal In Sabse Cchoona Napaki Ki Haalat Main Haraam Hai.
(Ref>>>Shafayi Baheshti Zewar, S:44)


◆Sawaal_16)  Haalate Haiz-O- Nifaas Main Aurat Mehendi Laga Sakti Hai Ya Nahi?
Jawaab▶ Jee Haan! Laga Sakti Hai, Is Main Koyi Harj Nahi. Haan Iddat Ki Haalat Main Mahendi Lagana Haraam Hai. Agar Mehendi Dawa Ke Taur Par Laga Rahi Hai To Koyi Harj Nahi.

 (Ref>> Muslim Khatoon, Oct:2013)

◆Sawaal_17)_Napaki Ki Haalat Main Daf'ae Saher Ke Liye  QuAan Majeed Ki Koyi Aayat Ya Aayatul Kursi , Chaar Qull Padh Sakti Hai?
Jawaab▶QurAan Majeed Ki Koyi Aayat Agar Dua Ki Niyyat Se Padhe Jaise
Tabarruk Ke Liye 
بسم اللہ الرحمن الرحیم
Padhi. 
 Ya Shukr Ke Mauqa Par 
الحمدللہ رب العلمین
Ya Kisi Musibat Ke Waqt 
انا للہ و انا الیه راجعون 
padhna Jaaiz Hai.
Aur Daf'ae Saher Ke Liye  Sana Ki Niyyat Se Sure Fateha , Ayatal Kursi Chaar Qull Ya Koyi Aayat Padhi To Kuch Harj Nahi Jabke QurAan Padhne Ki Niyyat Na Ho.

 (Ref>>Qanoon-E-Shari'at ,H:1 , S:59)
◆Sawal_18: Kya Napaak Aurat Jaaye Namaz (Musalla) , Tasbeeh Ko Cchu Sakti Hai?
Al-Jawab▶️ Napak Aurat Jaye Namaz Cchu Sakti Hai , Kyunke Haiz-O-Nifaas Ki Najasat Hukmi Hai, Haqiqi Nahi 
Ye Namaz , Roze Ki Adayegi , Masjid Me Dakhila Aur QurAan Majeed Cchune Se Mana Hai.
Ye Najasat Haqiqi Ki Tarah Insan Ko Jald Napaak Nahi Karti Jais Ke, 

 Hazrat Aayesha Siddiqua RadiyAllahu Ta'Aala Anha Se Riwayat Hai Ke, Sarkar ﷺ Ne Mujh Se Farmaya,
Zara Masjid Se Chatayi (Musalla) Uthao Me'n Ne Kaha,
" Me'n To Haaizah Ho " 
Aap ﷺ Ne Farmaya Ke Tumhara Haiz Tumhare Hath Me'n Nahi Hai ".
(Tirmazi)

 Is Hadees Se Ma'aloom Huwa Ke Haiz-O-Nifaas Ki Najasat Hukmi Hai. Haqiqi Nahi Isliye Haizah-O- Nifaas Ka Jhuta Aur Pasina Bhi Paak Hai. 
Hazrat Aayehsa Siddiqua RadiyAllahu Ta'Aala Anha Musalla Laane Se Ruke'n Unko Ye Khayal Aaya Ke Najasat Haqiqi Ki Tarah Haiz Ki Najasat Pure Badan Ko Napak Kar Deti Hai. Is Me'n Hath Bhi Shamil Hai To Napaak Hath Se Musalla Kis Tarah Cchu'we'n? 

 Lihaza Sarkare Madina ﷺ Ne Ta'aleem Farmayi Ke Ye Dekhne Wali Najasat Ki Tarah Badan Me'n Nahi Sarayat karti.  Pas Pata Chala Ke Haaiz-O-Nifaas Wali Aurat Jaye Namaz Aur Tasbeeh Waghairah Ko Cchu Sakti Hai.
(Masnad Imame Aazam)

(Ref:Women Problems)

◆Sawal_19: Kya Haizah Aurat Apne Shauhar Ki Khidmat Kar Sakti Hai?
Al-Jawab▶️ Haizah Aurat Ka Apne Shauhar Ki Khidmat Karna Jaaiz Hai. Chunanche Riwayat Hai Ke Nabi Kareem ﷺ Apna Sar Mubarak Dhulwane Ke Liye Ummul Momineen Hazrat Aayeha Siddiqua RadiyAllahu Ta'Aala Anha Ke Qareeb Karte , Us Waqt Aapke Ghar Me'n Hote'n Nabi Paak ﷺ Muatakaf Hote. Ummul Momineen Hazrat Aayeha Siddiqua RadiyAllahu Ta'Aala Anha Arz Karte'n, "Me'n Haizah Hon Aap ﷺ Farmate: "Haiz Tumhare Hath Me'n To Nahi Hai".

 Saheeh Bukhari Me'n Urwa Se Sawal Kiya Gaya Haiz Wali Aurat Meri Khidmat Kar Sakti Hai Aur Junub Aurat Mujhse Qareeb Ho Sakti Hai. Urwa Ne Jawab Diya Ye Sab Mujh par Aasaan Hain Aur Ye Sab Meri Khidmat Kar Sakti Hain Aur Kisi Par Us Me'n Koyi Harj Nahi. 
Mujhe Ummul Momineen Hazrat Aayeha Siddiqua RadiyAllahu Ne Khabar Di Ke Haiz Ki Halat Me'n RasoolAllah ﷺ Ke Kangha Karte'n Aur Huzoor ﷺ Muatakaf The. Apne Sar Mubarak Ko Unse Qareeb Kar Dete Aur Ye Apne Hujre Me'n Hote'n.

 Abdullah Sa'ad Ki Riwayat Hai , Unho'n Ne Sarkarﷺ Se Pucha Ke Haalate Haiz Me'n Biwi Se Kya Cheez Halaal Hai. Aap ﷺ Ne Farmaya, Izar Se Uppar Tere Liye Halaal Hai.

(Ref: Women Problems)


◆Sawal_20) Haiz Wali Aurat Ke Liye Hajj Ada Karne Ka Kya Hukm Hai?
Al-Jawaab▶️Saheeh Bukhari Me'n Hai Ummul Momineen Hazrat Aayeha Siddiqua RadiyAllahu Ta'Aala Anha Farmati Hain Ham Hajj Ke Liye Nikle, Jab Sarf (Ek Jaga Ka Naam) Me'n Pohnche Mujhe Haiz Aaya To Me'n Ro Rahi Thi To RasoolAllah ﷺ  Mere Paas Tashreef Laye Farmaya Tujhe Kya Huwa? Kya To Haizah Huwi Arz Ki Haan, Farmaya Ye Ek Aisi Cheez Hai Jisko Allah Ta'Aala  Ne Banaat Aadam Par Likh Diya Hai Aelawa Khana-E-Ka'aba Ke Tawaaf Ke "Sab Kuch Ada Kar Jise Hajj Karne  Wala Ada Karta Hai".

 Ma'aloom Huwa Ke Agar Kisi  Aurat Ko Ayyame Hajj Me'n Haiz Hoto Wo Tawaaf Ke Aelawa Tamaam Hajj Ke Arkaan Ada Kar Sakti Hai. Yaani Haram Ke Andar Nahi Jayegi.

Agar Umra Ka Ahraam Baandha Tha Aur Haiz Shuru Hogaya Umra  Ada Karne Ka Mauqa Nahi Mila Aur Hajj Ke Ayyam Shuru Hogaye To Ab Ye Aurat Umra Ka Aehraam Khatam Karke Hajj Ka Ahraam BaandhLe Aur Hajj Ke Af'aal Shuru Karde. Ba'd Me'n Umre Ki Qaza KarLe.

 Jo Haizah Huzoor ﷺ Ke Roza-E-Aqdas Ki Ziyarat Ke Liye Haziri De Uske Liye Durood-O-Salaam Padhna To Jaaiz Hai Lekin Masjide Nabwi ﷺ Me'n Dakhil Na Ho Bahar Se PadhLe.
(Ref: Women Problems)


◆Sawal_21)Haiz Wali Aurat Ke Liye Tawaaf Karna?
Al-Jawaab▶️Chunke Tawaaf Ke Liye Masjid Me'n Jana Padhta Hai Aur Haiz Wali Aurat Ka Masjid Me'n Jana Haraam Hai. Lihaza Agar Kisi Aurat Ko Hajj Ke Ayyam Me'n Haiz Aajaye To Wo Tawaaf Nahi Kar Sakti. Isliye Khana-E-Ka'aba Ke Andar Jana, Uska Tawaaf Karna Haizah Aurat Ke Liye Haraam Hai.
(نورالایضاح)

  1. Hajj Ko Jate Huwe Raste Me'n Haiz Aagaya To Usi Haalat Me'n Ahraam Baandle Aur Mauqa Hoto Ahraam Ke Liye Ghusl Bhi KarLe Us Ghusl Se Aurat Paak Shumar Nahi Hogi Aisi Surat Hazrat Aayeha Siddiqua RadiyAllahuTa'Aala Anha Ko Pesh Aayi Thi.

 2. Isi Tarah Makka Shareef Se Rukhsat Hone Se Pehle Haiz Shuru Hogaya To Ab Tawaafe Wida'a (Yaani Wo Tawaaf Jo Haaji Rukhsat Hote Huwe Karta Hai) Muaf Hogaya Baghair Tawaaf Kiye Hi Chali Aayi. Aisi Surat Hazrat Safiyah RadiyAllahuTa'Aala Anha Ko Pesh Aayi Thi.

 3. Agar Aurat Ko Tawaaf Karte Karte Haiz Aagaya Chahe Tawaaf (Farz Ho, Wjajib Ya Nifl) To Usi Waqt Masjid Se Bahar Aajana Zaruri Hai. Uski Ko Pura Karna Ya Masjid Me'n Thehre Rehna Gunah Hai.

 4. Agar Tawaaf Ke Chaar Ya Isse Zyada Shawt(Chakkar) Hogaye To Wo Tawaaf Ada Hogaya Aur Jitne Chakkar Baaqi Reh Gaye Uska Sadqa De Aur Agar Chaar Chakkar Se Kam Huwe To Wo Tawaaf Ada Nahi Huwa Paak Hone Ke Ba'd Qaza Kare.

 • Note:Sadqa Ye Hai Ke Har Shaut (Chakkar) Ke Badle Me'n Aadha Sa'a Gehu'n Ya Ek Sa'a Jau De. (Sa'a Taqriban 3.50 Kilo Ka Hai).

 5. Agar Pura Ya Aksar Tawaaf Paaki Ki Haalat Me'n Kar Liya Uske Ba'd Haiz Shuru Hogaya Aur Abhi Safa Marwa Ki Sa'ee Baaqi Hai To Usko Haiz Ki Haalat Me'n Ada Kar Sakti Hai Sa'ee Ke Liye Taharat Shart Nahi Is Tawaaf Ke Ba'd Tahiyatut Tawaaf (2 Raka'at) Na Padhe.

 6. Umra Ka Ahraam Bhi Haalate Haiz Me'n Saheeh Hai Albatta Tawaaf Is Haalat Me'n Nahi Kar Sakti Hai Agar Pura Tawaaf Ya Aksar Tawaaf Karne Ke Ba'd Haiz Shuru Huwa To Sa'ee Kar Sakti Hai Aur Tahiyatut Tawaaf Muaf Hojayega.

(Ref: Women Problems)

◆Sawal_21) Haizah Aurat Ko Deeni Kitabe'n Aur Akhbaar Waghairah Cchune Ka Kya Hukm Hai?
Al-Jawaab▶️ Haizah Aurat Deeni Kutub Ya Akhbaar Waghairah Cchu Sakti Hai Aur Padh Sakti Hai. Albatta Unko Padhne Me'n Aehtiyaat Rakhni Chahiye Ke Agar Us kitaab Ya Akhbaar Waghairah Me'n Aine Us Jaga Par Jaha'n QurAan Ki Aayat Ya Tarjuma Likha Huwa Ho Uspar Ya Us Jaga par Hath Ya Ungli Waghairah Nahi Lagni Chahiye, Baaqi Waraq Ke Cchune Me'n Harj Nahi Yahi Aehtiyaat Be-Wazu Shakhs Ko Bhi Karni Chahiye.
(Aamma Kutub)

(Ref: Women Problems)

◆Sawal_22)Haizah Aurat Ke Liye Aetakaaf Ka Kya Hukm Hai?
Al-Jawaab ▶️ Haalate Haiz Me'n Aetakaaf Jaaiz Nahi.
•Agar Paaki Me'n Aetakaaf Shuru Kiya Darmiyan Me'n Haiz Aagaya To Aetakaaf Toot Jayega, Sirf Usi Ek Din Ki Qaza Kare, Jis Din Aetakaaf Tota Hai.


• Albatta Mustahaza (Isteahaza Wali) Ke Liye Aetakaaf Karna Durust Hai Jaisa Ke Hazrat Aayesha Siddiqua RadiyAllahu Ta'Aala Anha Se Riwayat Hai Ke Ummahatul Momineen Me'n Se Ek Ne Aetakaaf Kiya Jab Ke Wo Mustahaza The'n.
(Bukhari)
(Ref: Women Problems)

◆Sawal_23) Haizah Aurat Ke Liye Talaaq -O- Iddat Ka Kya Hukm Hai?
Al-Jawab ▶️ Haiz Wali Aurat Ko Agar Talaaq Pad Jaye To Talaaq Waqe Hojati Hai.
Haiz Wali Aurat Ko Agar Talaaq De Di To Uski Iddat 3-Haiz Hai.

Haalate Haiz Me'n Talaaq Dena Gunah Hai Lekin Talaaq Waqe Hojayegi, Aur Jis Haiz Me'n Talaaq Di Uska Aetabar Nahi Uske Aelawa Wo Teen(3) Haiz Iddat Guzaregi.
(Aalamgiri)
(Ref: WomenProblems)



◆Sawaal_24) Junub Ke Kya Ahkaam Hai?
Jawaab▶ Aise Mard Aur Aurat  Ko Jin Par Ghusl Farz Hogaya "Junub" Kehte Hain Aur Is Napaki Ki Haalat Ko "Janabat" Kehte Hain.
Jununb Khwa Mard Ho Ya Aurat Jab Tak Ghusl Na Kare Wo Masjid Main  Daakhil Nahi Ho Sakta. Na QurAan Shareef Padh Sakta Hai. Na QurAan Main Dekh Kar Tilawat Kar Sakta Hai. Na Zubani Padh Sakta Hai. Na QurAan Majeed Cchoo Sakta Hai. Na Ka'aba Main Daakhil Ho Sakta Hai. Na  Ka'aba Ka Tawaaf Kar Sakta Hai.

 Junub Ko Saath Khilaane Uska Jhoota Khaane. Uske Saath Salaam-O- Musafa Aur MuAniqah Karne Main Koyi Harj Nahi.
(Abu Dawood)

 QurAan Majeed Ke Aelawa Aur Dusre Wazife , Kalama , Durood Shareef Waghera Padhna Junub Ke Liye Bila Karahat Jaaiz Balke Mustahab Hai Jaise Ke Haiz-O-Nifaas  Wali Aurat Ke Liye QurAan Shareef Ke Aelawa Dusre Tamaam Azkaar -O- Wazaif Ko Padhna Jaaiz -O- Durust Balke Mustahab Hai.
(AalamGiri)

 Junub Ko Chahiye Ke Jald Ghusl Kare Kyun Ke RasoolAllah (Sallallahu Ta'Aala Alaihi Wa Sallam) Ne Farmaya Hai Ke Rahmat Ke Farishte Us Ghar Main Nahi Jaate Jis Ghar Main Tasweer Aur Kutta Aur Junub Ho.
(Abu Dawood)

 (Ref>>> Jannati Zewar , S:187, 188)


◆Sawaal_25) Janabat Ki Haalat Main Baal Ya Nakhun Katwana Kaisa?
Jawaab▶ Janabat Ki Haalat Main Na Baal Mundaye Aur Na Nakhun Tarshwaye Ke Ye Makruh Hai.

 (Ref>>>Qanoon-E-Shari'at , H:2 , 335)

 Shafa'eeyah Main Bhi Baal Ya Nakhun Haalate Janabat Main Na Kaatne Ka Hukm Hai.
(Ref>> Shafayi Bahashti Zewar, S:41)



◆Haiz-O-Nifaas Ke Chand Ahkaam◆
(Fiqah Shafa'ee) 


※Namaaz Main Farz -O- Nafil , Sajda-E-Tilawat  Aur Sajda-E-Shukr Ho Sab Haraam Hai.
※QurAan Shareef Cchoona Aur Othana Haraam Hai. QurAan Main Uski Jild , Hatheli , Ghilaaf , Peti Sab Daakhil Hain Cchoone Main Haath Ki Qaid Nahi Balke Badan Ka Har Azu Daakhil Hai.
※Nez QurAan Shareef Ka Tarjuma Farsi Ya Urdu Ya Hindi , Marathi Ya Kisi Aur Zubaan Main Ho Uske Bhi Cchoone Aur Padhne Main QurAan Kaasa Hukm Hai.
※Haan QurAan Ki Tafseer Ka Hukm Alag Hai. Agar Tafseer Ki Miqdaar Yaqeeni Taur Par QurAan Se Zyada Hoto Uska Othana Aur Cchoona Jaaiz Hai.
※ Agar Kaghaz Ke Parche Par Koyi Surat Ya Aayat Likhi Hoto Uska Cchoona Othana Jaaiz Hai.
※QurAan Shareef Ke Kisi Hissa Ko Ta'aweez Ki Tarah Jism Par Pahenna Maqsood Hoto Uspar Moom Chadana Chahiye Bagher Moom Ke Makruh Hai. ※QurAan Majeed Ka Kisi Bartan Par Likh Kar Paani Se Dhokar Shifa Ke Liye Peena Jaaiz Hai.
※Masjid Main Daakhil Hona Haraam. Har Wo Jaga Masjid Kehlayegi Jo Namaaz Ke Liye Waqf Kar Di Jaye. Masjid Se Madaris, Eid_Gah , Khanqah Waghera Kharij Hain. Haiz Wali Ko Masjid Se Guzarna Bhi Jaaiz Nahi.

 (Ref>>> Sunni Baheshti Zewar)



Sawal-o-Jawab Me Masail Hannafiya Ke Hai. Usme Fiqha Shafa'eeya Ke Bhi Masail Ki Nishandahi Ki Gayi Hai 
Aur Shafa'ee Ke Chand Masail Tehreer Kar Diye Hai.
Baqi Duno'n Ke Ahkaam Ek Hi Hai.
Mazeed Ma'alumaat Ke Liye Hannafi Bahen   Bahare Shari'at Dekhe.
Aur Shafa'ee Bahen  Sunni Baheshti Zewar Ka Mutalla Kare.