Ghusl Ka Bayaan
◆Ghusl Ka Tariqa
※Pehle Ghusl Ki Niyyat Kare
(Jaise Main Ghusl Karti Ho Haiz Ka Badan Ki Napaki Door Hone Ke Liye Aur Badan Ki Pakeezgi Hasil Hone Ke Waste)
※Duno'n Haath Gatto'n Tak 3 Baar Dhoye
※ Phir Istenja Ki Jaga Dhoye (Khwa Najasat Lagi Ho Ya Na Lagi Ho)
※Phir Badan Par Jaha Kahi Najasat Lagi Ho Usko Dhoye,
※Phir Namaaz Jaisa Wazu Kare Magar Pao'n Na Dhoye, Haan Agar Chauki Ya Takhte Ya Patthar Unchi Cheez Par Nahaye To Pao'n Bhi Dhole,
※Phir Badan Par Tel Ki Tarah Paani ChapadLe,
※Phir 3 Baar Dahne(Right) Kandhe Par Paani Bahaye
Phir 3 Baar Baaye'n Kandhe Par Paani Bahaye,
※Phir Sar Par Aur Tamaam Badan Par 3 Baar Paani Bahaye ,
Phir Nahane Ki Jaga Se Alag Hojaye Agar Wazu Karne Main Pao'n Nahi Dhoye The To Ab Dhole Aur Nahane Main Qibla Rukh Na Ho Aur Tamaam Badan Par Haath Phere Aur Maley Aur Nahane Ke Fauran Ba'd Kapde Pahenle.
Aisi Jaga Nahaye Ke Koyi Na Dekhe Aur Agar Ye Na Ho Sake To Naaf Se Ghutne Tak Ke Aaza Ka Satar To Zaruri Hai. Agar Itna Bhi Mumkin Na Hoto Tayamum Kare Aur Nahane Main Kisi Qism Ka Kalaam Na Kare , Na Koyi Dua Padhe. Ba'd Nahane Ke Rumaal Se Badan Ponch Daale To Harj Nahi.
◆Maslah: Aehtiyaat Ki Jaga Nanga Nahane Main Harj Nahi. Aurato'n Ko Bahot Zyada Aehtiyaat Ki Zarurat Hai. Hatta Ke Aurato'n Ko Beth Kar Nahana Behtar Hai. Nahane Ke Ba'd Fauran Kapde PahenLe. Wazu Main Jo Baate'n Sunnat Aur Mustahab Hain Wahi Ghusl Main Bhi Hain Siwa Iske Ke Nanga Nahata Hoto Qibla Ki Taraf Muh Na Kare. Aur Tehband Baandhe Hoto Harj Nahi.
Ye Tariqa Jo Ghusl Ka Bayaan Huwa Us Main 3 Baate'n Farz Hain. Jinke Bagher Ghusl Na Hoga Aur Napaki Na Utregi Aur Baaqi Sunnat -O- Mustahab Hain. In Main Se Kisi Baat Ka Cchodna Na Chahiye Agar Koyi Baat Cchoot Gayi To Bhi Ghusl Hojayega.
◆Faraize Ghusl
Faraize Ghusl 3 Hain:1) Kulli Karna Is Tarah Par Ke Muh Ke Har Purze Goshe Hont Se Halaq Ki Jad Tak Har Jaga Paani Beh Jaye. Masaudhe, Daant Ki Khidkiya'n, Zubaan Ki Har Karwat Main Halaq Ke Kinare Tak Paani Bahe. Roza Na Hoto Gargarah Kare Taake Paani Acchi Tarah Har Jaga Ponche. Daant Main Koyi Cheez Atki Ho (Jaise Gosht Ka Resha Chaliya Ka Chur Paan Ki Patti Waghera) To Jab Tak Zaroor Harj Na Ho Chodarana Zaruri Hai. Be Uske Ghusl Na Hoga Aur Be_Ghusl Namaaz Na Hogi.
2) Naak Main Paani Dalna
Yaani Duno'n Natthno'n Main Jaha Tak Naram Jaga Hai Waha Tak Dhulna Ke Paani Ko Soongh Kar Uppar Chadaye Taake Baal Barabar Jaga Bhi Dhulne Se Reh Na Jaye. Nahi To Ghusl Na Hoga. Agar Bulaaq Nath Keel Ka Suraakh Hoto Us Main Bhi Paani Pohchana Zaruri Hai. Naak Ke Andar Reenth Nakti Sookh Gayi To Uska Chudarana Bhi Farz Hai Aur Naak Ke Baal Dhona Bhi Farz Hai.
3) Pure Badan Par Paani Bahana
Is Tarah Ke Pao'n Ke Talwe Tak Jism Ke Har Purze Har Rongthe Par Paani Bahe. Is Liye Ke Agar Ek Baal Ki Nook Bhi Dhulne Se Reh Gayi To Ghusl Na Hoga.
◆Tambiya: Bahot Log Aisa Karte Hain Ke Najis Tehband Baandh Kar Ghusl Karte Hain Aur Khayaal Karte Hain Ke Nahane Main Sab Paak Hojayega Halanke Aisa Nahi Balke Paani Daal Kar Tehband Aur Badan Par Haath Pherne Se Najasat Aur Phelti Hai Aur Saare Badan Aur Nahane Ke Bartan Tak Ko Najis Kar Deti Hai. Isliye Hamesha Nahane Main Bahot Khayaal Se Pehle Badan Se Aur Us Kapde Se Jis Ko Pehen Kar Nahate Hain Najasat Door KarLe Tab Ghusl Kare Warna Ghusl To Kya Hoga Us Tar Haath Se Jin Cheezo'n Ko Chuyenge Sab Najis Hojayengi. Haan Darya Talaab Main Albatta Aisa Ho Sakta Hai Wo Bhi Jab Ke Najasat Aisi Ho Ke Bila Dhoye Paani Ke Dhakke Se Khud Beh Kar Nikal Jaye Warna Us Main Bhi Dushwaar Hai.
◆Kin Bato'n Se Ghusl Farz Hota Hai
Jin Cheezo'n Se Ghus Farz Hota Hai. Wo 5 Baate'n Hain.1) Mani Ka Apni Jaga Se Shehwat Ke Saath Juda Hokar Azu Se Nikalna.
2) Aehtalaam Yaani Sote Main Mani Ka Nikal Jana
3) Sharmagah Main Hashfa Tak Chala Jana Khwa Shehwat Se Ho Ya Bila Shehwat, Anzaal Ho Ya Na Ho Duno'n Par Ghusl Farz Hai.
4) Haiz Yaani Mahwari Khoon Se Faraghat Paana
5) Nifaas Yaani Baccha Janne Par Jo Khoon Aata Hai Usse Farigh Hona
◆Maslah: Mani Shehwat Ke Saath Apni Jaga Se Juda Na Huwi Balke Boojh Othane Ya Bulandi Se Girne Ki Waja Se Nikli To Ghusl Wajib Nahi Albatta Wazu Jata Rahega.
◆Maslah: Agar Mani Patli Pad Gayi Ke Peshaab Ke Waqt Ya Waisi Hi Kuch Qatre Bila Shehwat Nikal Aaye To Ghusl Wajib Nahi Haan Wazu Toot Jayega.
◆Maslah: Jumu'ah , Eid , Baqra Eid Ke Liye Aur Arfa Ke Din Aur Ahraam Baandhne Ke Waqt Nahana Sunnat Hai.
◆ Be_Ghusl Kya Kaam Kar Sakta Hai Aur Kya Nahi?
Jis Ko Nahane Ki Zarurat Ho Usko Masjid Main Jana , Tawaaf Karna Aur QurAan Majeed Cchoona Agarche Uska Saada Hashiya Ya Jild Hi Kyun Na Ho.(Hidaya AalamGiri)
Be_Cchuye Dekh Kar Ya Zubani Padhna Ya Kisi Aayat Ka Likhna Ya Anghoti Choona Ya Pahenna Jis Par Hurufe MuqattiAat Hon Ye Sab Haraam Hai.
※Maslah: Agar QurAan Shareef Juzdaan Main Ho Ya Rumaal Waghera Kisi Alag Kapde Main Lipta Hoto Uspar Haath Lagane Main Harj Nahi.
(Hidaya -O- Hindiya)
※Maslah: Agar QurAan Shareef Ki Aayaat QurAan Ki Niyyat Se Na Padhi To Harj Nahi Jaise Tabarruk Ke Liye
بسم الله الحمن الرحيم
Padhi Ya Shukr Ke Liye
الحمدللہ رب العالمین
Ya Musibat -O- Pareshani Main
انا الله وانا اليه راجعون
Padhi Ya Sana Ki Niyyat Se Sure Fateha Ya Aayatal Kursi Ya Aisi Hi Koyi Aayat Padhi To Kuch Harj Nahi Jab Ke QurAan Padhne Ki Niyyat Na Ho.
(Hindiya Waghera)
※Maslah: Be_Wazu Ko QurAan Majeed Ya Uski Kisi Aayat Ka Cchoona Haraam Hai. Be_Cchuye Dekh Kar Ya Zubani Padhe To Koyi Harj Nahi.
※Maslah: QurAan Majeed Dekhne Main In Sab Par Kuch Harj Nahi Agarche Harf Par Nazar Pade Aur Alfaaz Samajh Main Aaye Aur Khayaal Main Padhte Jaye.
※Maslah: In Sabko Fiqqah -O- Hadees -O- Tafseer Ki Kitabo'n Ka Cchoona Makruh Hai.
(Ref>> Qanoon-E- Shari'at , H:1 , S: 56&59)