◆Jahannam Main Aurato'n Ki Kasrat Kyun?◆
🔸Sawaal: Kaha Jata Hai Ke Ahle_Jahannam Main Zyada Tar Aurate'n Hongi. Kya Ye Saheeh Hai To Iski Kya WajuHaat Hain?
Jawaab▶ Bukhari -O- Muslim Main Hai Ke Aaqa ﷺ Ka Aurato'n Ke Paas Se Guzar Huwa To Aap ﷺ Ne Farmaya , Aey_Aurato'n ! Tum Sadqa Kiya Karo, Main Ne Jahnnam Main Aksar Aurato'n Ko Dekha Hai.Arz Ki Gayi , Iski Kya Waja Hai?
Aap ﷺ Ne Farmaya , Tum La'anat Zyada Karti Ho , Apne Shuhar Ki Neamato'n Ki Naa-Shukri Karti Ho , Main Ne Tum Se Zyada Kisi Ko Nahi Dekha Jo Khud To Aqal -O- Deen Main Naa'qis Ho Lekin Bade Bade Aqalmando'n Ki Aqal Ko Naakaarah Karde.
Arz Ki Gayi , Hamare Aqal -O- Deen Main Kya Kami Hai?
Farmaya , Kya Aurato'n Ki Gawahi Mardo'n Ki Gawahi Ke Nisf Ke Barabar Nahi ?
Arz Ki Gayi , Haan.
Irshaad Huwa , Ye Unki Aqal Ki Kami Hai.
Phir Farmaya , Aurat Ko Jab Haiz Aaye To Wo Namaaz Nahi Padhti Aur Rozah Nahi Rakhti , Kya Aisa Nahi Hai?
Arz Ki Gayi , Haan Aisa Hi Hai.
Farmaya, Ye Unke Deen Ki Kami Hai.
Aaqa-O- Maula ﷺ Ka Ek Aur Irshaad Hai, Main Ne Jahannam Main Aurato'n Ko Zyada Dekha Hai.
Sahaba Kiraam Ne Arz Ki ,
Yaa RasoolAllah ﷺ ! Iski Waja Kya Hai?
Farmaya Unki Naa-Shukri Ke Baa'is.
Arz Ki Gayi , Kya Wo Allah Ta'Aala Ki Naa-Shukri Karti Hain?
Aaqa Kareem ﷺ Ne Farmaya , Wo Shohar Ki Naa-Shukri Karti Hain Aur Uske AhsaaNaat Ka Inkaar Karti Hain ; Agar Tum Aurat Par Taweel Arsa Ahsaan Karte Raho Phir Use Tumhari Taraf Se Ma'muli Farq Nazar Aaye To Kehti Hai, Main Ne Tum Se Aaj Tak Koyi Bhalayi Nahi Dekhi.
(Bukhari)
In Ahaadeese Mubaraka Se Ma'aloom Huwa Ke Jahannam Main Zyada Tar Aurate'n Hongi Aur Unke Jahannam Main Jaane Ki Du Badi Wajuhaat Huzoor ﷺ Ne Bayaan Farmaye'n.
Awwal Ye Ke Wo Kasrat Se La'an Ta'an Karti Hain
Aur Duwwam Ye Ke Wo Apne Shoharo'n Ki Naa-Shukri Karti Hain.
Ye Bhi Ma'aloom Huwa Ke Aurato'n Ko In Buraiyo'n Se Bachne Ke Aelawa Kasrat Se Sadqa Karna Chahiye Kyunke Nabi Kareem ﷺ Ka Irshaad Hai, " Sadqa Allah Ta'Aala Ke Ghazab Ko Bujhata Hai Aur Buri Maut Ko Door Karta Hain".
(Tirmazi)
Ek Aur Hadeese Paak Main Hai, "Aag Se Bacho Agarche Khajoor Ka Kuch Hissa Hi Sadqa Do".
(Bukhari)
Ye Masla Bhi Zahen Nasheen Rahe Ke Aurat Apne Shohar Ki Ijazat Ke Baghair Uske Maal Se Itna Sadqa De Sakti Hai Jitna Dene Se Shohar Naaraaz Nahi Hota. Is Sadqa Ka Sawaab Duno'n Ko Barabar Hoga Aur Ek Ke Sawaab Se Dusre Ke Sawaab Main Koyi Kami Na Hogi.
Awwal Zikr Hadeese Mubaraka Main Ek Aur Haqeeqat Bayaan Huwi Hai Wo Ye Ke Aurate'n Khud To Aqal -O- Deen Main Naa_qis Hain Lekin Bade Bade Aqalmando'n Ki Aqal Par Parde Daal Deti Hain. Iski Kayi Misaale'n MuAashre Main Dekhi Jaa Sakti Hain ; Aurato'n Ka Ban Sanwar Kar Be_Parda Bahar Nikalna , Baazaaro'n Main Naa_Mehramo'n Ke Darmiyaan Ghoomna Phirna , Mardo'n Ki Musha'bahat Ikhtiyaar Karna Waghera.
Aise Sab Kaam Aksar Aurat Us Waqt Karti Hai Jab Wo Apne Ghar Ke Mardo'n Ki Aqal Ko NaaKaara Bana Deti Hai.
Parde Ke Muta'Alliq Zaruri Masail -O- Ahkaam Pichle Post Main Bayaan Kiye Ja Chuke Hai.
Aaqa -O- Maula ﷺ Ne Aurato'n Ki Musha'bahat Karne Wale Mardo'n Aur Mardo'n Ki Musha'bahat Karne Wali Aurato'n Par La'anat Farmayi.
(Bukhari)
Ye Musha'bahat Libaas Main Ho Ya Zeb-O-Zeenat Main Ya Aadaat -O- Atwaar Main , Kisi Surat Main Bhi Jaaiz Nahi.
Sayyede Aalam ﷺ Ne Un Mardo'n Par La'anat Farmayi Jo Aurato'n Ka Libaas Pahente Hain Aur Un Aurato'n Par La'anat Farmayi Jo Mardana Libaas Pahenti Hain.
(Abu Dawood)
Ek Aur Hadeese Paak Main Irshaad Huwa , Allah Ta'Aala Ki La'anat Ho Un Aurato'n Par Jo Apne Jisme Par Rang Bharwati Hain Aur Jo Rang Bharti Hain , Aur Jo Chehre Se Baal Nauchti Hain Aur Jo Baal Nauchwati Hain , Aur Unpar Bhi Jo Apne Daanto'n Ke Darmiyaan Husn Ke Liye Kushaadgi Banati Hain Kyunke Wo Allah Ta'Aala Ki Takhleeq Ko Badalne Wali Hain.
(Muslim)
Uppar Ki Post Main Hadeese Paak Main Baal Nauchne Ka Zikr Abro'on Ya Chehre Se Muta'alliq Hai Albatta Daadhi Ya Muncho'n Ki Jaga Ke Baal Aurat Ko Nauchna Jaaiz Hai.
Ek Aur Haraam Feal Jis Main Aurate'n Kasrat Se Mubtela Hain Wo Mayyat Par Nauha Bain Karna Hai.
Sadrushshariah Alehi Rahma Likhte Hai, Nauha Yaani Mayyat Ke Ausaaf Mubaligha Ke Saath Bayaan Kar Ke Aawaaz Se Rona (Aur Chilla Na) Jise Bain Kehte Hain, Bil_ijma'a Haraam Hai. Garebaan Phaadna , Muh Nauchna, Baal Kholna, Sar Par Khaakh Daalna, Seena Peetna , Raan Par Haath Maarna Ye Sab Jahiliyat Ke Kaam Hain Aur Haraam Hain. Aawaaz Se Rona Mana Hai. Aur Aawaaz Buland Na Ho To Iski Muma'ni'at Nahi.
(Bahare Shari'at , H:4 , S:136)
Aaqa ﷺ Ne Farmaya, Jo Apna Muh Peete, Garebaan Phaade Aur Jahiliyat Ka Pukaarna Pukaare Yaani Nauha Kare Wo Ham Main Se Nahi.
(Bukhari, Muslim)
Noore Mujassam ﷺ Ka Irshaad Hai, Jo Sar Mundwaye Aur Cheenkhe Chillaye Yaani Nauha-O-Bain Kare Aur Kapde Phaade, Main Usse Bezaar Hon.
(Aizan)
Rasoole Mu'Azzam ﷺ Ne Nauha Karne Aur Sunne Wali Aurato'n Par La'anat Farmayi.
(Abu Dawood)
Bukhari-O-Muslim Main Hai Ke Nabi Kareem ﷺ Ne Farmaya, Aankh Ke Aanso Aur Dil Ke Gham Ke Sabab Allah Ta'Aala Azaab Nahi Farmata , Phir Zabaan Ki Taraf Ishara Karke Farmaya , Lekin Iske Sabab Azaab Ya Raham Farmata Hai Aur Ghar Walo'n Ke Rone Ki Waja Se Mayyat Par Azaab Hota Hai Yaani Jabke Usne Rone Ki Wasiyat Ki Ho Ya Waha'n Rone Ka Riwaaj Ho Aur Usne Mana Na Kiya Ho.
WAllaha Ta'Aala Aalam.
Ya Ye Muraad Hai Ke Inke Rone Se Use Takleef Hoti Hai Ke Dusri Hadees Main Aaya,
Aey_Aallah Ke Bando'n ! Apne Murde Ko Takleef Na Do, Jab Tum Rone Lagte Ho Wo Bhi Rota Hai.
(Bahare Shari'at, H:4 , S:137)
Rahmate Aalam ﷺ Ne Sadma Ke Waqt Sabar Karne Ki Be_had Talqeen Farmayi.
Hadeese Paak Main Hai Ke Allah Ta'Aala Farmata Hai, Aey Aadam Ki Aulaad ! Agar Tu Shuru Sadma Ke Waqt Sabar Kare Aur Sawaab Ka Taalib Hoto Main Tere Liye Jannat Ke Siwa Kisi Sawaab Par Raazi Nahi.
(Ibne Maaja)
Ek Aur Hadees Shareef Main Aurato'n Ko Sabar Ke Badle Main Jannat Ki Basharat Di Gayi. Aaqa-O- Maula ﷺ Ne Farmaya, Tum Se Jis Aurat Ke Teen Bacche Fout Hojaye'n Wo Use Dozakh Se Bachale'n Ge.
Ek Aurat Boli , Jiske 2 Bacche Fout Hojaye'n ?
Farmaya, Du Bacche Bhi Aag Se Bacha Lenge'n.
(Bukhari)
Dusri Riwayat Main Hai, Jiska Ek Baccha Fout Hojaye Wo Bhi Apne Maa'n Baap Ko Aag Se Bacha Lega.
(Ahmed Tirmazi , Ibne Maaja)
Masnad Ahmed Ki Riwayat Main Ye Bhi Hai Ke Kaccha Baccha Bhi Apni Maa'n Ko Jannat Main Le Jayega. Ba_Shart Ye Ke Wo Sabar Kare.
【Ref: Masaile Khwateen】
Musannif: Sayyed Shah Turab-ul- Haq Qadri Alehi Rahma