◆Aurato'n Ki MazaaRaat Par Haaziri◆
◆Sawaal: Aurato'n Ke Liye Qabro'n Ki Ziyarat Karna Auliya-E- Kiraam Ke MazaaRaat Par Haziri Dena Shar'an Kaisa?
Jawaab: ▶ Agarche Ba'z Ulma Ne Aurato'n Ko Chand Sharaa'it Ke Sath Qabro'n Ki Ziyarat Ki Ijazat Di Hai
Lekin Is Bare Main Hamara Maslak Wahi Hai Jo Imame Ahle-Sunnat , Mujaddide Deen-O- Millat AalaHazrat Imam Ahmed Raza Muhaddise Bareillvi RahmatullAhi Ta'Aala Alaih Ka Hai. Aap Ne Is Mauzu Par Ek Mudallil Tehqeeqi Risala
" جمل النور فی نہی النساء عن زیارة القبور"
Tehreer Farmaya Is Risale Se Chand Nikalaat Mulahiza Farmaye.
AalaHazrat Alaihir Rahma Ek Sawaal Ke Jawaab Main Tehreer Farmate Hain, Aurato'n Ke HaaLaat Ko Dekhte Huwe Siwaye Roza-E- Anwar Ki Haaziri Ke Jo Ke Wajib Ya Wajib Ke Qareeb Hai ,
Main Auliya Ke MazaaRaat Ya Digar Quboor Ki Ziyarat Ko Aurato'n Ka Jana Sahabe Ghunyatun Allama Muhaqqiq Ibraheem Halbi Ki Tehqeeq Se Ittefaaq Karte Huwe Hargiz Pasand Nahi Karta, Khususan Is Tufaane Be-Tamizi Raqs -O- Mazameer-O- Surood Main Jo Aaj Kal Jahilo'n Ne Aaraase Taiba Main Barpa Kar Rakha Hai,
Nabi Kareem ﷺ Ne Aurato'n Ko Eidain Ki Sakht TaaKeed Farmayi.
Dusri Hadeese Paak Main Hai , Allah Ki Bandiyo'n Ko Allah Ki Masjido' Main Aane Se Ruko.
(Bukhari)
In Wazeh Ahkaamaat Ke Ba'wajood Hazrat Umar RadiyAllahu Ta'Aala Anhu Ne Aurato'n Ko Masjido'n Main Aane Se Mana Farmaya.
Wo Hazrat Aaisha RadiyAllahu Ta'Aala Anha Ke Paas Shikayat Le Kar Gaye'n To Ummul Momineen Ne Farmaya,
"Agar Nabi Kareem ﷺ Ke Ye HaaLaat Mulahiza Farmate To Zaroor Unhe Masjid Se Mana Farma Dete Jaise Bani Israa'eel Ki Aurate'n Mana Kardi Gaye'n".
(Bukhari , Muslim , Abu_Dawood)
Umdat-ul-Qaari Sharah Bukhari Jild Suwwam Main Allama Badruddeen Aini Likhte Hain ,
Hazrat Ibne Masood RadiyAllahu Ta'Aala Anhu Ka Irshaad Hai , Aurat Sar Ta Pao Chupane Ki Cheez Hai , Wo Apne Ghar Ki Teh Main Sabse Zyada Allah Ta'Aala Ke Qareeb Hoti Hai Aur Jab Wo Bahar Nikalti Hai To Shaytaan Use Dekhta Hai.
Hazrat Ibne Umar RadiyAllahu Ta'Aala Anhuma Jumu'Ah Ke Din Khade Ho Kar Kankariya'n Maar Kar Aurato'n Ko Masjid Se Nikaalte.
Imam Ibraheem Nakh'yee Taa'bayi (Jo Imame Aazam Abu Haneefah RadiyAllahu Anhu Ke Ustaad Ke Ustaad Hain) Apni Aurato'n Ko Jumu'ah -O- Jama'at Main Jane Se Mana Farmate The.
AalaHazrat RadiyAllahu Ta'Aala Anhu Farmate Hain , Jab In Khair Ke Zamano'n Aur In Fuyooz-O- Barkaat Ke Waqto'n Main Aurate'n Masjido'n Main Jaane Aur Jama'at Main Shareek Hone Se Mana Kar Di Gaye'n Halanke Deene Islaam Main Duno'n Ki Shadeed Takeed Hai To Kya Is Buraiyo'n Ke Zamane Main Fuyooz-O- Barkaat Ke Husool Ke Huliye Se Aurato'n Ko Qabro'n Ki Ziyarat Ko Jaane Ki Ijazat Di Jayegi... Jis Ko Shari'at Main Koyi Taakeed Nahi? Aur Khususan Un Melo'n Thelo'n Main Jo Jahla Ne MazaaRaate Karaam Par Nikaal Rakhe Hain , Ye Feal Ki Qadr Shari'ate Mutehharah Ke Khilaaf Hai?
Umadat-ul-Qaari Sharah Bukhari Jild Chaharum Main Imaam Abu Umar Ka Qual Hai Ke Aksar Ulma Ne To Namazo'n Ke Liye Aurato'n Ko Nikalna Makruh Kaha Hai To Qabrastaan Jane Ka Kya Hukm Hoga?
Main To Yahi Samajhta Hon Ke Aurat Se Farz Namaaz Ka Saaqit Hojana , Is Baat Ke Daleel Hai Ke Unhe Iske Aelawa Yani Ziyarate Quboor Se Ruka Jayega.
Umdat-ul-Qaari Hi Main Hai Ke Hamare Logo'n Ne Karahat Ki Daleel Ye Di Hai Ke Aurato'n Ko Nikalne Main Fitna Ka Andesha Hai Aur Ye Nikalna Ek Haraam Ka Sabab Hai Aur Jo Kaam Haraam Tak Ponhchane Wala Ho Wo Haraam Hi Hai. Is Haqeeqat Ke Peshe Nazar Makruh Se Haraam Muraad Hai Kyunke Is Zamane Main Fitna Fasaad Aur Burayiya'n Aam Hai .
Ghuniyatun Ne Naqal Kiya Hai Ke Imaam Qaazi Se Fatwa Pucha Gaya Ke Aurato'n Ko Qabrastaan Jana Jaaiz Hai Ya Nahi??
Farmaya , Aisi Jaga Jaaiz , Na_Jaaiz Nahi Pucho Balke Ye Pucho Ke Us Aurat Par Kitni La'anat Hoti Hai ,
Wo Jab Ghar Se Nikalne Ka Irada Karti Hai Allah Ta'Aala Aur Farishte Uspar La'anat Karte Hain , Wo Jab Bahar Nikalti Hai Use Har Taraf Se Shaytaan Gher Lete Hain , Jab Qabr Tak Pohachti Hai Mayyat Ki Ruh Uspar La'anat Karti Hain , Wo Jab Wapas Aati Hai Allah Ta'Aala Ki La'anat Hoti Hai.
(ماخوذ از جمل النور فی نہی النساء عن زیار ة القبور)
Is Purfitan Daur Main Khwateen Ko Chahiye Ke Wo Buzrugaane Deen Ki Seerat Aur Unki Ta'aleeMaat Par Mabni Kutub Ghar Main Rakhe'n , Khud Bhi Padhe'n Aur Baccho'n Ko Bhi Padhwaye'n Aur Jab Kisi Buzrug Ke Urs Ka Mauqa Aaye To Ghar Hi Main Unke Aesaale Sawaab Ke Liye Mehfil MunAqid Karle'n Jis Main Agar Hosake To Unki Seerat -O- Ta'aleeMaat Bayaan Kare'n Warna Khaane Peene Ki Kisi Cheez Par Fateha Padh Kar Unhe Aesaale Sawaab Kare'n.
Isi Tarah Wo Apne Azeez-O- Aqarib Main Se Kisi Ke Liye Bhi Tilawate QurAan Aur Zikr-O-Azkaar Ke Ba'd Fateha Padh Kar Aesaale Sawaab Kar Sakti Hain.
【Ref: Masaile Khwateen】
By: Sayyed Shah Tarabul Haq Qadri Alaihi Rahma