◆Hazrat Fatima TuzZahra RadiyAllahu Ta'Aala Anhu Ka Nikah:
Mash'hoor Riwayat Ke Mutabiq 18_Saal Aur Ba'z Riwayato Ke Mutabiq Saadhe 15_Saal Ki Umar San Hijri/2 Main Inka Nikah Shere Khuda Ali Murtada RadiyAllahu Ta'Aala Anhu Ke Sath Huwa.
Hazrat Ali RadiyAllahu Ta'Aala Anhu Ki Umar Us Waqt Chaubees(24) Saal Ke Qareeb Thi. Nikah Ke Ba'd Aap ﷺ Ne Paani Dam Karke Duno'n Par Uske Cheente Maare Aur Farmaya , Main Tumhe Aur Tumhari Aulaado Shaytaan Mardood Se Allah Ki Panah Main Deta Hon.
Imaam Nisaayi Ki Riwayat Hai Ke Pehle Hazrat Abu BaKar Siddeeq Aur Phir Hazrat Umar RadiyAllahu Ta'Aala Anhuma Ne Hazrat Fatima Zahra RadiyAllahu Ta'Aala Anha Se Nikah Karne Ke Baare Main Paighaam Bheja Magar Huzoor ﷺ Ne Manzoor Nahi Farmaya. Phir Hazrat Ali Karmallahu Ta'Aala Wajhul Kareem Ne Payaam Bheja To Huzoor ﷺ Ne Unka Nikah Hazrat Ali Se Kara Diya.
【Mishkaat Shareef , S-565】
Maher Ke Jis Par Aqad Aqdas Huwa Chaar Sau (400) Misqaal Chandi Thi Yani Pure Ek Sau Saath (160) Rupeye Bhar.
【Fatawa Radwiah , J:5 , S:325】
◆Hazrat Fatima Zahra RadiyAllahu Ta'Aala Anha Ka Jahez:
Shahanshahe Konaain ﷺ Ne Apni Pyari Aur Ladli Beti Ko Jo Jahez Diya Wo Baan Ki Ek Chaar Paayi Thi Aur Chamde Ka Ek Gada Jis Main Ruyi Ki Jaga Par Khajoor Ke Patte Bhare Huwe The Aur Ek Chaaghal , Ek Mushk , Du Chakkiya'n Aur Mitti Ke Du Ghade.
【Seerul Sahabiyaat】
Abtak Hazrat Ali RadiyAllahu Ta'Aala Anhu Huzoor ﷺ Ke Paas Rehte The Shadi Ke Ba'd Alag Ghar Ki Zarurat Huwi To Hazrat Haarsa Bin Nu'maan Ansari RadiyAllahu Ta'Aala Anhu Ne Apna Ek Makaan Unko De Diya.
Hazrat Fatima RadiyAllahu Ta'Aala Anha Us Naye Ghar Main Gaye To Huzoor ﷺ Unke Yaha Tashreef Le Gaye. Darwaza Par Khade Hokar Ijazat Talab Ki Phir Andar Gaye. Ek Bartan Main Paani Mangwa Kar Duno'n Hath Usme Dala Aur Wo Paani Hazrat Ali Ke Sinah Aur Bazo Par Chidka. Phir Hazrat Fatima Zahra RadiyAllahu Ta'Aala Anha Ko Bula Kar Unpar Bhi Chidka Aur Farmaya Ke Mere KhaanDaan Main Jo Shakhs Sab Se Behtar Hai Main Ne Uske Sath Tumhara Nikah Kiya Hai.
【Zarqani】