◆ Hazrat Fatima TuzZahra RadiyAllahu Ta'Aala Anha Ka Bachpan Shareef:
Aap RadiyAllahu Ta'Aala Anha Ka Bachpan Shareef Aur Zindagi Ka Har Lamha Nihayat Paakeezah Tha Aur Aisa Kyunker Na Hoga Jabke Huzoor Rahmate Aalamﷺ Aur Hazrat Sayyedah Khadijat-ul-Kubra RadiyAllahu Ta'Aala Anha Ki Aaghooshe Rahmat Aapki Tarbiyat Gah Thi. Aur Aap Din Raat Hzuoor ﷺ Aur Hazrat Khadijat-ul- Kubra RadiyAllahu Ta'Aala Anha Ki Zabane Paake Se Paakeezah Aqwaal Aur Khuda Shanaasi Ke Tazkire Sunte'n Aur Unke Muqaddas Af'aal , Aamaal Ka Mushahidah Karte'n.
◆Aapki Walidah Ka Wisaal:
Aap RadiyAllahu Ta'Aala Anha Ki Umar Shareef Abhi Nau(9) Baras Hi Thi Ke Aap RadiyAllahu Ta'Aala Anha Ki Walidah Majidah Hazrat Khadijat-ul- Kubra RadiyAllahu Ta'Aala Anha Aapki Behtareen Tarbiyat Farma Kar Intaqaal Farma Gaye'n. Unki Wafaat Ka Sadma Sabse Zyada Aapko Aur Huzoorﷺ Ko Tha.