Skip to main content
◆WAHAB BIN ABDULLAH ◆
Isi Tarha Hazrat Wahab Bin Abdullah Kalbi Ki Mujahidana Sarfaroshi Ki Daastaan Bhi Qayamat Tak Faramosh Nahi Ki Ja Sakti. Ye Qabila Bani Kalb Ke Bahot Hi Haseen Aur Khubsurat Noujawan The.
Aur Inki Shadi Ko Abhi Sirf 17 Roz Hi Huwe The. Inki Maa'n Ne Kaha Beta Aaj Mere Rasool ﷺ Ka Pyara Nawasa Aur Hazrat Khaatune Jannat Bibi Fatima Ka Noore Nazar Be-Yaar-O- Madadgaar Dushmano Ke Narghe Main Giraftaar Ranj-O-Gham Ka Shikaar Hain..
Ae_Beta! Isliye Meri Tamanna Hai Ke Tera Wo Khoon Jo Mere Doodh Se Bana Hai Aaj Iska Ek Ek Qatra Raahe Haq Main Baha Kar ,Tu Apni Jaan Ahle_Bait Per Qurbaan Karke Meri Maghfirat Ka Samaan Kar De.
Chunancha Wahab Bin Abdullah Apni Walida Aur Apni Nayi Naweli Dulhan Ko Sath Le Kar Karbala Main Aaye.
Aur Hazrat Imam Se Ijazat Le Kar Ghode Per Sawaar Huwe Aur Koondti Huwi Bijli Ki Tarha Maidane Jang Main Pahoch Gaye. Aur Mujahidana Lehje Main Jhoom Jhoom Kar Rajz Ka Ye Sher Padhne Lage..
حسین امیر و نعمہ الامیر
لہ لمعتہ کالسراج المنیر
Yani Ae_Yazeediyo Sunlo!!..... Mera Aelaan Hai Ke Yazeed "Ameerul Momineen" Nahi Hai.
Balke "Ameerul Momineen" Husain Hain. Aur Wo Behtareen "Ameerul Momineen" Hain.
Inki Chamak Damak Roshan Chiragh Ki Tarha Munawwar Hai.
Yazeedi Fouj Ke Bade Bade Soarma Aur Jangjo Bahaddur Aap Ke Muqabla Ke Liye Aaye. Magar Jo Bhi Samne Aaya Aapne Talwar Se Uska Sar Udha Diya. Aur Bahot Se Zalimo'n Ko Mout Ke Ghaat Utar Kar Apni Maa'n Aur Biwi Ke Paas Aaye. Ye Dono Janaab Wahab Bin Abdullah Ka Mujahidana Jaan'Baaziyo Ka Nazara Dekh Dekh Kar Khush Ho Rahi The. Aap Ne Arz Kiya Ke Ae_Meri Muqaddas Maa'n ! Ab To Aap Mujh Se Khush Ho Gaye??
Maa'n Ne Dil Khol Kar Duaaye Diye... Kaha Ke Beta! Mai Tujh Se Khush To Ho Gayi.
Lekin Mere Laal Meri Khushi Ki Meraj To Jab Hogi Ke Maidane Jang Main Dushmano'n Ki Zarb Se Tera Jism Chalni Hojaye. Aur Tu Surkh Posh Dulha Ban Kar Uruse Shahadat Ki Aagosh Main Jannati Mehmaan Aur Mere Liye Rasoole Arbi ﷺ Ki Shafa'at Ka Samaan Ban Jaye.
Phir Wahab Bin Abdullah Ne Apni Roti Huwi Nayi Naweli Dulhan Ke Sar Per Haath Rakh Kar Tasalli Di. Itne Main Dushman Ki Safo Main Se Mohkam Bin Tufail Ek Naami Girami Shaami Pehelwaan Mast Haathi Ki Tarha Jhoomta Huwa Nikla. Wahab Bin Abdullah Ko Jang Ki Dawat Dene Laga.
Hazrat Wahab Uski Aawaz Sun Kar Fouran Ghode Per Sawaar Ho Gaye Aur Apni Muqaddas Maa'n Aur Pyari Dulhan Ko Aakhri Salaam Karke Shere-Nar Ki Tarha Maidane Jang Ki Taraf Badhe Aur Mohkam Bin Tufail Ke Muqabla Ke Liye Tayyar Ho Gaye. Mohkam Bin Tufail Apne Intehayi Ghuroor Ke Nashe Main Sar_Shaar Tha. Itrata Huwa Aage Badha Aur Intehayi La-Parwahi Ke Saath Janab Wahab Per Talwaar Ka War Kiya. Magar Janab Wahab Ne Intehayi Phurti Aur Chaabuk Dasti Ke Saath Usko Neza Maar Kar Ani Per Utha Liya Aur Is Zoor Se Zameen Per Patka Ke Uski Haddiya Chakna Choor Ho Gaye.
Ye Dekh Kar Ishqiya-E- Lashkar Per Aisi Haibat Aur Sara-Seemgi Cha Gayi Ke Yazeedi Lashkar Ka Dil Hil Gaya.
Chunancha Hazrat Wahab Neza Hila Hila Kar Baar Baar Yazeedi Soarmao'n Ko Lalkaarte Aur Jang Ki Dawat Dete The.
Magar In Buz_Dilo'n Main Se Kisi Ki Taab Aur Himmat Nahi Padhti Thi. Aap Ke Muqabla Ke Liye Maidaan Main Nikalta. Idhar Jaanab Wahab Shouqe Shahadat Main Is Qadar Wa-Rafta Ho Rahe The Ke Dam Bhar Ke Liye Qaraar Nahi Tha. Jab Aap Ne Dekha Ke Koyi Bhi Mere Muqabla Ke Liye Maidaan Main Nahi Nikalta To Aap Khud Hi Dushmano'n Ko Lalkaarte Huwe Bhuke Shair Ki Tarha Dushmano'n Per Hamla Awar Hogaye. Aur Is Zoor Ka Mujahidana Hamla Kiya Ke Dushmano'n Ki Safo'n Ko Darham€Barham Karte Huwe Qalbe Lashkar Tak Pahoch Gaye Aur Apne Neze Ki Maar Se Bade Bade Bahadduro'n Ko Ched Kar Chalni Bana Dala. Yahan Tak Ke Aap Ka Neza Toot Gaya.
Phir Aap Ne Biphar Kar Miyaan Se Talwar Nikali Aur Apni Shamsheer Aab-Daar Ki Maar Se Bahot Se Zalimo'n Ko Kheere Aur Kakdi Ki Tarah Kaat Kar Rakh Diya. Aap Joshe Jihaad Main Intehayi Jaan-Bazi Ke Saath Talwaar Chala Rahe The. Ke Achanak Kisi Khabees Ne Nishana Baandh Kar Aap Ke Ghode Ki Peshani Per Aisa Teer Mara Ke Ghoda Nidhal Ho Kar Zameen Per Gir Pada Aur Aap Piyada_Paa Ho Gaye. Itne Main Ibne Sa'ad Ne Apne Lashkar Ko Hukm Diya Ke Iska Muhasira Karlo.
Chunancha Har Taraf Se Ashqiyane Dhawa Karke Is Bahaddur Mujahid Ko Gher Liya Aur Charo Taraf Se Is Qadar Teer Barsaye Aur Is Tarah Neza -O-Talwaar Se Lagataar Hamla Karne Lage. Aap Laachaar Ho Kar Zameen Per JalwaGar Huwe. Aur Ek Shaqi Ne Aage Badh Kar Aap Ka Sar Kaat Liya
Aur Hazrat Imam Ke Saamne Phenk Diya. Wahab Ki Maa'n Ne Doudh Kar Apne Bete Ke Sar Ko Apni Goud Main Utha Liya Aur Intehayi Pyaar-O- Mohabbat Ke Saath Pashani Ko Choom Kar Apne Kaleje Se Laga Liya. Shaire Dil Maa'n Baar Baar Apne Mujahid Aur Shaheed Bete Ke Sar Ko Boosa Deti Thi Aur Kehti Thi Ke ..
Ae_Mere Supoot Bete.. Ae_Mere Bahaddur Bete.. Khuda Gawah Hai Ke Aaj Tune Mere Doodh Ka Haq Ada Kar Diya. Ae_Beta Tujhe Mubarak Ho. Khuda Aleem Hai Ke Aaj Teri Maa'n Tujh Se Khush Ho Gayi.
Phir Maa'n Ne Apne Bete Ka Sar Dulhan Ki Goud Main Rakh Diya! Aur Kaha Ke Beti Tujhe Mubarak Ho Ke Jab Maidane Mehshar Main Khuda Ka Munadi Tujhe Ek Shaheed Ki Bewa Keh Kar Pukarega. To Us Waqt Tera Sar Fakhra' Se Ooncha Ho Jayega Ke Tu Is Mujahide Jaan'Baaz Ki Refeeqe Zindagi Hai.
Jo Tere Bistare Urusi Se Oth Kar Aaya Aur Khuda Ki Raah Main Apna Khoon Ka Aakhri Qatra Baha Kar Aur Apne Khoon Main Naha Kar Surkh Posh Dulha Ban Kar Shahadat Ki Dulhan Se Ham-Aaghosh Ho Gaya.
Dulhan Ne Walihana Josh -O- Mohabbat Ke Saath Apne Sartaaj Ke Sar Ko Apne Seene Se Chimta Liya.
Magar Uske Gore Gore Gaal Aur Kale Kale Haseen Baal Ko Khaak-O- Khoon Main Lat-Pat Dekh Kar Uska Kaleja Phat Gaya. Shiddate Gham Se Uska Haal Is Qadar Nidhal Ho Gaya Ke Garam Garam Aansu Ki Dhaar Uske Rukhsaar Per Behne Lagi Aur Ba-Wajood Zabt Ke Ek Cheekh Nikal Gayi Aur Zabane Haal Se Usne Shohar Ke Kate Huwe Sar Se Ye Kaha Ke...
رفتی و مرا خبر نہ کردی
بر بیکسئ ما نظر نہ کردی
Phir Ek Sard AaH Ke Saath Iska Tau'ire Ruh Parwaaz Karke Apne Dulha Ke Sath Ham-Aaghosh Ho Gaya.
إِنَّا لِلّهِ وَإِنَّـا إِلَيْهِ رَاجِعونَ.
【Ref>>> Haqqani Taqri'ren, S:224 to 227】