◆Musafah-O-Mu'aniqa ◆
◆ Hadees Shareef Me Hai Ke Jab Do Musalmaan Milen Aur Musafaha Karen Aur Allah Ki Hamd Karen Aur Astaghfaar Karen To Dono Ki Maghfirat Ho Jayegi.
(Abu Dawood , Jild Sani ,Safa:361 )
◆ Masala: Musafah Sunnat Hai aur Us Ka Suboot Mutawatir Hadeeson Se Hai Aur AaHadees Me Iski Bahot Badi Fazeelat Aayi Hai.Ek Hadees me Hai Ke Jisne Apne Musalmaan Bhai Se Musafah Kiya Aur Hath Ko Hilaya.To Us Ke Tamam Gunah Gir Jayenge.Jitni BAar Mulaqaat Ho Har Baar Musafaha Karna Mustahab Hai Mutlaqan Musafah Ka Jaiz Hona Ye Batata Hai Ke Namaz e Fajr Wa Namaaz e Asr Ke BAad Jo Aksar Jagah Musafah Karne Ka Musalmano me Riwaj Hai Ye Bhi Jaiz Hai.Aur Fiqh Ki Baaz Kitabon Me Jo Is ko Biddat Kaha Gaya HAi Us Se Muraad Biddat e Hasanah Hai Aur Har Biddate Hasana Jaiz Hi Huwa Karti hai.
(Bahare Shari'at, Jild:16 ,Safa:98... Bahawala- Durre Mukhtar o Rudul Muhtar, Jild:5 , S:244)
Aur Jis Tarha Namaz e Fajr Aur Asr ke Baad Musafaha Jaiz Hai Dosri Namazon Ke Baad Bhi Musafah Karna Jaiz Hai kyunke Jab Asl Musafah Karna Jaiz Hai To Jis Waqt Bhi Musafah Kiya Jaye Jaiz Hi Rahega Jab Tak Shari'at-e-Mutaharah Se Us Ki Mumani'at Sabit Na Ho Jaye Aur Zahir Hai Ke Panchon(5) Namazon ke Baad Musafaha Karne Ki Koi Mumani'at Shari'at Ki Taraf Se Sabit Nahi Hai Lihaza Panchon Namazon Ke BAad Musafah Jaiz Hai.
(Bahar e Shari'at jild 16 Safa 98)
◆ Masala: Musafah Ka Ek Tareeqah Wo Hai Jo Bukhari Shareef Me Hazrath Abdullah Bin Sau'd RadiAllahuTa'alaAnhu Se Marwi Hai Ke.. Rasool e Aqdas SallallahuTa'laAlaihiWaSallam Ka Mubarak Hath Inke Dono Hathon Ke Darmiyan Me Tha.Yaani Har ek Ka Ek Hath Dosre Ke Dono Hathon Ke Darmiyan Me Ho !
※Dosra Tariqa Jis Ko Baaz Fiqha ne Bayan Kiya Hai Aur Usko Bhi Hadees Se Sabit Batate Hain Wo Ye Hai Ke Har Ek Apna Dahna Hath Dosre Ke Dahne Se,Aur Bayan Hath Bayen Hath Se Milayen.Aur Angothe Ko Dabae Ke Angothe Me Ek Rag Hai Ke Us Ke Pakadne Se Muhabbat Paida Hoti Hai.(Bahar e Shari'at jild 16 Safa 98)
◆ Masla: Wahabi Gair Muqallid Dono Hathon Se Musafaha Karne ko Na-Jaiz Aur Khilaf-e-Sunnat Batate Hain Aur Sirf Ek Hath Se Musafaha Karte Hain .Ye In Logon Ki Jahalat Hai Hazrath Shaikh Abdul Haq Muhaddis Dehlvi RahmatullahiAlai Saaf Saaf Tehreer Farmaya Hai Ke
"Mulaqaat Ke Waqt Musafah Karna Sunnat Hai Aur Donon Hathon Se Musafah Karna Chahiye"(Ash'atul Lam'Aat Tarjuma Mishkaat J:4 S:20)
"Mulaqaat Ke Waqt Musafah Karna Sunnat Hai Aur Donon Hathon Se Musafah Karna Chahiye"(Ash'atul Lam'Aat Tarjuma Mishkaat J:4 S:20)
◆ Masala: Mu'aniqah Karna Bhi Sunnat Hai Kyunke Hadees Se Sabit Hai Ke RasoolAllah SallallahuTa'alaAlaihiWaSallam Ne Mu'aniqah Farmaya Hai.(Abu Dawood jild:2 Safa:361)
◆ Masala: Baad Namaaz-e-Eidain Musalmano(n) Me Mu'aniqah Ka Riwaj Hai Aur Ye Bhi izhare Khushi Ka Ek Tariqa Hai.Ye Mu'aniqah Bhi Jaiz Hai Ba-Shart Ye Ke Fitnah Ka Khouf Aur Shohwat Ka Andesha Na Ho.(Bahar-e-Shari'at )
◆ Hazrath Abu Bakr Siddiq RadiAllahuTa'alaAnhu Ne Huzoor Aqdas SallallahuTa'alaAlaihiWaSallam Ki Dono Aankhon Ke Darmiyaan Ko Boosa Diya Aur Hazraat Sahaba Wa Tabi'een RadiAllahuTa'alaAnhum Ajmaeen Se Bhi Bosa Dena Sabit Hai.(Abu Dawood Jild:2 Safa;362)
◆ Masala: Aalime Deen Aur Badsha e Aadil Ke Hath Ko Bosa Dena Jaiz Hai Balke In Logon Ke Qadam Ko Choomna Bhi Jaiz Hai.Balke Agar Kisi Aalim-e -Deen Se Log Ye Khwahish Zahir Karen Ke Aap Apna Hath Ya Qadam Mujhe Dijiye Ke My Bosah Doon.To Logon Ki Khwahish Ke Mutabiq Wo Aalim Apna Hath Paon Bosah Ke Liye Logon Ki Taraf Badha Sakta Hai.
(Bahare Shari'at Jild:16 Safa:99 Bahawala Durre Mukhtar Jild:5 Safa:245)
【Ref>>Jannati Zewar, Safa: 321 to 323】