◆10vi Moharram Ka Qayamat Numa Din
10wi'n Muharram / San_Hijri:61 Jumu'ah Ka Pur Aashoob Din Aagaya. Aur Duniya Se Safar Karne Wale Ghareebul-Watan Musafiro Ne Apni Zindagi Ki Aakhri Namaze Fajr Ada Karli. Idhar Suraj Tulu Huwa Udhar Ibne Sa’d Ne Apne 22,000 Lashkar Ko In Gharibaane Be-Watan Ka Khoon Bahane Ke Liye Maidan Mein Laakar Jang Ka Naqqara Baja Diya Aur Khud Pehla Teer Chala Kar Jang Ki Ibtida Kar Di Aur Yeh Aelaan Kar Diya Ke..
Aye_Ahle Sham-O-Iraaq! Gawah Rehna Ke Sabse Pehla Teer Mein Ne Hi Jigar Gosha-E- Rasool-O- Farzande Batool Par Chalaya Hai.
Hazrat Imam Yeh Manzar Dekh Kar Ghode Par Sawaar Ho Kar Itmame Hujjat Ke Liye Maidane Kaare_zaar Mein Tashreef Laaye Aur Khoone Naahaq Ka Azaab Suna Kar Aur Apne Hasab-O- Nasab Aur Faza'il Ka Bayan Karke Sitamgaaro'n Ko Zulm Se Baaz Rakhne Ki Koshish Farmayi. Lekin Hazrat Imam Ka Khutba Abhi Tamaam Bhi Nahi Huwa Tha Ke Sitam Shu'aaro'n Ne Shoor-O-Gul Machana Shuru Kar Diya. Aur Kehne Lage Ke Ate_Imam Ham Aap Ke Faza'il Se Achhi Tarha Waqif Hain. Lekin Is Waqt Yeh Mas'alah Zere Bahes Nahi Hai. Is Waqt To Jang Ke Liye Aap Kisi Ko Maidan Mein Bhejiye.
◆Karbala Mein Hussaini Karaa'maat
Zaalimo'n Ka Yeh Gustakhana Jawab Sun Kar Hazrat Imam Apne Kheemah Ki Taraf Rawana Hogaye.
Itne Mein Yazeedi LashKar Ka Ek Be-Baak Maalik Bin Urwah Ghoda Kuda Kar Samne Aagaya. Aur Usne Jab Kheeme Ke Gird Aag Dekhi To Intehayi Be-Adbi Ke Saath Yeh Kaha Ke
Ate_Husain ! Tum Ne Waha Ki Aag Se Pehle Yahi Aag Lagali?
Hazrat Imam Ne Farmaya Ke Aye_Dushmane Khuda... Tu Jhoota Hai. Kya Tera Gumaan Yeh Hai Ke Mein Jahannum Mein Ja'unga?
Imam Ke Jaanisaroun Mein Se Hazrat Muslim Bin Ausaja Ne Intahayi Tesh Mein Aakar Is Bad-Zuban Ke Muh Per Teer Maarne Ki Ijazat Talab Ki. Magar Hazrat Imam Ne Farmaya Ke Nahi... Nahi... ! Hamari Taraf Se Hargiz Koyi Jang Ki Ibtida Naa Kare. Taake Hamare Khoone NaaHaq Ka Poora Poora Wabaal Inhi Zalimo'n Ki Gardan Par Rahe. Lekin Hazrat Imam Ne Majruhe_Dil Se Yeh Dua Mangi Ke KhudaWanda Tu Is Bad-Naseeb Ko Naare_Dozakh Se Pehle Hi Aag Ke Azaab Mein Mubtila Kar. Chunanche Fawran Hi Maalik Bin Urwah Ka Ghoda Phisla Aur Yeh Is Tarha Gira Ke Ghode Ki Rikaab Mein Iska Pao'n Ulaj Gaya Aur Ghoda Isko Ghaseet Te Huwe Khandaq Ki Taraf Le Kar Bhaga. Aur Yeh Khandaq Ki Aag Malein Gir Kar Khaak Ka Dher Ho Gaya.
Isi Tarha Ek Aur Darida Dahan Ne Yeh Keh Diya Ke
"Aye_Husain Tum Ko Rasool-E-Khuda Se Kya Nisbat”?
Is Lafz Se Hazrat Imam Ka Jigar Shaq Ho Gaya Aur Aap Ne Janabe Baari Mein Arz Kiya Ke Elaahi Tu Fawran Is Be-Baak Ko Apne Qahar Mein Giraftaar Kar.
Chunanche Ek Dam Is Khabees Ko Baitul-Khala Ki Haajat Ho Gayi Aur Yeh Nanga Ho Kar Ek Jhadi Mein Qazaaye Haajat Ke Liye Betha. Achanak Ek Siyah Zehrile Bichhu Ne Isko Dang Mara Aur Yeh Dard Se Bil-Bilata Huwa Najast Mein Lat Pat Ho Kar Bhaga Aur Lashkar Ke Saamne Tadap Tadap Kar Zillat-O- Ruswayi Ki Mout Mar Gaya.
Isi Tarha Ek Bad Lagaam Muzni Ne Nihayat Gushtakhi Ke Saath YeH Kaha Ke
"Aye_Husain Dekhlo Darya-E-Faraat Mouje Maar Raha Hai. Magar Tum Ko Usme Se Ek Qatrah Bhi Nahi Milega. Aur Tum Pyase Mar Jaoge"
Hazrat Imam Ne Uske Liye Yeh Dua Farmayi Ke Aye_Allah Isko Pyasa Maar.
Chunanche Ek Dam Muzni Ka Ghoda Bhaag Nikla Aur Yeh Usko Pakadne Ke Liye Dawda To Usper Pyaas Ka Intehayi Ghalba Huwa. Magar Jab Paani Pita Tha To Ek Qatrah Bhi Halaq Se Neeche Nahi Utarta Tha. Yahan Tak Ke Pyaas Ki Shiddat Se Tadap Tadap Kar Mar Gaya.
Chahiye To Ye Tha Ke Imam Aali Maqaam Ki In Imaan Afroz Karamato'n Ko Dekh Kar Zaalimo'n Ke Sine Mein Dil_Laraz Jata. Aur Woh Isse Ibrat Pakad Kar Imam Ke Khoone Naa-Haq Se Baaz Aajate.
Magar Yeh Shararat Ke Mujassame Jin Ke Saro Par Hirse Duniya Ifriyat Ban Kar Musallat Ho Chuki Thi.
In Ibrat Aaamoz Karaamaat Se Koyi Sabaq Naa Le Sake.
Balke Aur Zyada Gustakhi -O- Be-Baaki Ke Shaitane Mujassam Ban Kar Rajaz Gaate Huwe Hathyaar Chamka Chamka Kar Hazrat Imam Se Ladne Ke Liye Maidane Jang Mein Nikal Aaye.
Lekin Hazrat Imam Aur Inke Jaanisaar Saathi Bhi Inki Kasrat Aur Shaytaani Taaqat Se Naa Dare Naa Jhijhke.
Balke Sab Ke Sab Khouf-O-Hiraas Se Be-Niyaaz Ho Kar Jazba-E-Shahadat Se Sar Shaar Aur Khuda Ki Raah Mein Apna Sar Katane Ke Liye Be-Qaraar The.
Chunanche Khandaane Ahle_Bait Ke Jawano'n Aur Haidare Karraar Ke Kachaar Shero'n Ne Intehayi Dileri Ke Saath Aage Badh Kar Istarah Daade Shuja'At Dene Ka Azm Kar Liya Ke..
Ishrate Qatl Gah Ahle Tamanna Mat Pooch
Eide Nazara Hai Shamsheer Ka Uryaa'n Hona
Magar Qurb-O-Jawaar Ke Woh Jaani'Saar Jo Is Hadsa Ki Khabar Paa Kar Hazire Darbaar Hogaye The.
Woh Hazrat Imam Ke Qadmo Per Gir Kar Machal Gaye. Aur Arz Kiya Ke Aye_Ibne Rasool Allah ﷺ ! Yeu Ghair-Mumkin Hai Ke Jab Tak Ham Mein Se Ek Jaani'Saar Bhi Baqi Hai.. Ahle_Baite Nabuwwat Ka Khoon Zameen Par Gir Pade Isliye Pehle Ham Apna Sar Aap Ke Qadmo Par Qurbaan Karenge. Chunanche Yek Ke Baad Digare In Wafa Shu'aaro'n Ne Maidane Jang Mein Nikal Kar Aisi Shuja'at-O-Jaan-Baazi Ka Muzahira Kiya Ke Dushmano'n Ke Dilo Par Apni Bahadduri Ka Sikka Bitha Diya.
Yahan Tak Ke Ladte Ladte Yeh Tamaam Jaani'Saar Raahe Khuda Mein Apni Jaane Qurbaan Karke Shahadat Se Sarfaraz Ho Gaye.
In Wafadaar Jaanisaroun Ke Naam Aur Inki Jaan Baziyou Sar-Faroshiyo'n Ke Tazkire Taareekh Ki Kitabo'n Mein Is Tarha Naqsh-O- Wafa Ban Kar Chamak Rahe Hain Ke Qiyamat Tak Gardishe Lail -O-Nihar Inko Mah'wa Nahi Kar Sakti. Agar In Jaan'Bazo'n Ka Zikr Shuru Kare To Bahot Taweel Hojayegi.
Lekin, Behre Haal Phir Bhi Inme Se Chand Ba-Wafao'n Ka Zikr Karenge.
【Ref>> Baqqani Taqrire'n, S:219 to 222】
( SallallahuTa'AalaAlaihiWaSallam)
(RadiyAllahu Ta'Aala Anhum Ajma'een)