◆Karbala Jaane Wale Ahle_Bait
IS safar Mein Hazrat Imam e Husain رضى الله تعالى عنه Ke 3_Farzand Hamrah The. Hazrat Ali Au'sat Jinka Laqab Zainul Aabideen Hai, Yeh Hazrat Sahar Banu Ke Batan Se The. Inki Umr Is Waqt 22_Saal Ki Thi Aur Bimar The Imam Aali Maqaam Ke Doosre Sahebzaade Ali Akbar Jo Umme Laila Binte Abi Marra Ke Shikam Se The Inki Umr 18 Baras Ki Thi. Yeh Karbala Mein Shaheed Huwe. Imam Aali Maqaam Ke Teesre Farzand Ali Asgar Jinki Walida Bani Quza Mein Se The Yeh Sheer-Khwar Bachhe The. Hazrat Imam Ki Ek Sahebzaadi Hazrat Sakina Bhi Sath The'n Jin Ki Umr 7 Baras Ki Thi Aur Inki Walida Ka Naam Rubaab Binte Umarul Qais Tha.
Hazrat Imam Ki Do Biwiya'n Saath Thi'n, Ek Hazrat Sahar Banu Doosri Hazrat Ali Asgar Ki Walida Inke Elawa Hazrat Imam e Hasan Bin Ali رضى الله تعالى عنه Ke 4_Noujawaan Farzand Hazrat Qaasim Bin Hasan, Hazrat Abdullah Bin Hasan, Hazrat Umar Bin Hasan, Hazrat Abu Bakar Bin Hasan Bhi Imam Aali Maqaam Ke Hamrah The Aur Yeh Sab Karbala Mein Shaheed Huwe. Aur Hazrat Maula-E-Kaainaat Ali Murtuza رضى الله تعالى عنه Ke 5_Farzand Hazrat Abbas Bin Ali, Hazrat Usman Bin Ali, Hazrat Abdullah Bin Ali, Hazrat Muhammad Bin Ali, Hazrat Ja'afar Bin Ali Bhi Hamrah The Aur Sab Jaame Shahadat Se Seraab Huwe Aur Hazrat Aqeel Bin Abi Taulib Ki Aulaad Mein Hazrat Muslim Bin Aqeel To Apne Do Farzando'n Muhammad Aur Ibraheem Ke Sath Kufa Hi Mein Shaheed Ho Chuke The. Lekin 3_Farzand Hazrat Abdullah Bin Aqeel Hazrat Abdur Rehmaan Bin Aqeel, Hazrat Ja'afar Bin Aqeel Bhi Hamrah The.
Hazrath Muslim Bin Aqeel Karbala Mein Haazir Ho Kar Shaheed Huwe. Isi Tarha Hazrath Imam ke 2_Bhaanje Hazrat Muhammad Bin Abdullah Aur Hazrat Aoun Bin Abdullah Jo Imam Aali Maqaam Ki Haqiqi Behan Hazrath Zainab Binte Ali ke Sahebzadegaan Hain Karbala Mein Yeh Dono'n Bhi Shahadat Se Sarfaraz Huwe. Auratoun Mein Se Hazrath Imam Ki Behan Hazrat Zainab Aur Doosre Shohda-E-Ahle_Bait Ki Biwiya'n Bhi Hamrah Then. Ahle_Bait Mein Se 17 Hazraath Imam Aali Maqaam Ke Saath Rutba-E-Shahadat Se Musharraf Huwe Aur Hazrat Imam Zainul Aabideen Bimar Aur Doosre Kam Umr Shehzadegaane Maslan…Umar Bin Hasan Aur Muhammad Bin Umar Bin Ali Qaidi Banaye Gaye.
【Sawaneh Karbala】
Hazrat Imam Aali Maqaam Bahot Tezi Ke Sath Safar Farma Rahe The Jab Aap Ek Mash'hoor Manzil "Zaate Arq” Per Pohche To "Basheer Bin Ghalib Asdi” Se Mulaqaat Huwi Jo Kufa Se Makkah Mukarramaj Ja Rahe The. Hazrat Imam Ne Unse Kufa Ka Haal Daryaft Farmaya To Unhone Jawab Diya Ke Ahle_Kufa Ke Dil To Aap Ke Saath Hain Magar Unki Talware Bani Ummaiya Ke Sath Hain. Aur Khuda Jo Chahta Hai Karta Hai Aur Aage Badhe To Mash'hoor Shayir “Farzdaq” Se Mulaqaat Huwi Usne Bhi Yahi Jawab Diya.
BehreHaal Hazrat Imam Ne Apna Safar Jari Rakha. Yaha'n Tak Ke "Batnur Rutma“ Ke Maqaam Per Ubaidullah Bin Matee Se Mulaqaat Huwi Yeh Ahle_Bait Ke Bahot Hi Janisaar Aur Shaidayi The. Unhone Hazrat Imam ko Intehayi Israar Ke Sath Is Safar Se Mana Kiya Aur Arz Kiya Ke Aap Ahle_Kufa Per Hargiz Hargiz Aetamaad Naa Farmaye. Kufa Mein Abtak Yazeed Ka Governer Moujood Hai Aur Waha'n Aap Ka Tashreef Lejana Khatra Se Khali Nahi Hai. Magar Imam Aali Maqaam Ne Inko Bhi Wahi Jawab Diya Jo Makkah Mukarramah Mein Hazraate Sahaba-E-Kiraam Ko Diya Tha. Aur Yeh Farma Kar Aap Aage Badh Gaye. Hame Wahi Musibat Pohach Sakti Hai Jo Allah Ta'Ala Ne Hamare Liye Muqaddar Farmadi Hai.
【Haqqani Taqriren, S:204 to 209】