◆Hur Aur Ek Hazar Sawaar
To Nagahan Yeh Nazar Aaya Ke Kufa Ka Ek Mashoor Bahaddur Aur Jangujo Sheh Sawaar Hur Bin Yazeed Riyaahi Ek Hazaar Sawaroun Ke Lashkar Ke Saath Aap Ka Rasta Rok Kar Khada Huwa Hai. Hur ne Hazrat Imam Ko Salam Kiya Aur Yeh Arz Kiya Ke Aye_Farzande Rasool ! Mujhe Kufa Ke Yazeedi Governer Ubaidullah Bin Ziyaad Ne Aap ki Giraftari ke Liye Bheja Hai. Aur Saath Hi Saath Usne Yeh Mazarat Bhi Pesh Ki Ke Khuda Gawah Hai Ke Mein Baa-Dil Nakhwasta Aaya Hun. Aur Mujhe Aap ki Muqaddas Janab Mein Baal Barabar Jurraat-O-Gustakhi Bhi Intahayi Nagawar Hai. Lekin Mein Us Zalim Ke Hukm Se Majboor Aur Laachar Hun. Hazrat Imam Ne Farmaya Ke Aye_Hur Mein Is Shaher Mein Khud Ba-Khud Nahi Aaya Hun. Balke Ahle_Kufa Ne Mujhe 150 Khutoot Likh Kar Bulaya Hai. Aur Yeh Khutoot Aksar Unhi Logo'n Ke Dastakhat Aur Mohar Se Likhe Gaye Hain Jo Is Waqt Tumhare Is Lashkar Mein Meri Giraftari Ke Liye Aaye Hain. Hur Ne Qasam Kha Kar Kaha Ke WAllah ! Mujhe Ko Iska Kuch Bhi ILm Nahi Hai Ke Aapke Paas Kab Khutoot Bheje Gaye Aur Kin Kin Logo'n Ne Khutoot Bheje? Aur Mein Naa Aap Ko Chhod Sakta Hun Aur Naa Wapas Louta Sakta Hun .Yeh Sun Kar Hazrat Imam Ne Khutoot Ka Thaila Ulat Diya Aur Farmaya Ke Dekhlo Yeh Kutoot Ka Ambaar Hai Inko Padhlo. Inki Mohre'n Dekhlo ! Phir Aap Ne Naam Lele Kar Pukara Ke Aye_Sheesh Bin Rabi’e, Aue_Qais Bin Ash’as, Aye_Zaid Bin Haaris Sach Sach Bolo ! Kya Tum Logo'n Ne Arziyan Likh Likh Kar Aur Qasme'n De De Kar Mujhe Nahi Bulaya Hai?? Imam Ki Pukar Sunkar Yeh Sab Be-Haya Aur Naa-Bakar Sharam Se Gardane Jhukayen Khade Rahe Aur Kisi Ne Koyi Jawab Nahi Diya.
Iske Ba'd Hazrat Imam Ne Itmame Hujjat Ke Liye Yeh Bhi Farmaya Ke Behre Haal Aye_Kufiyoun Agar Tum Log Apne Ahad Par Qayim Hoto Mein Tumhare Shaher Mein Qadam Rakho'n Warna Mein Iske Liye Bhi Tayyar Hun Ke Meiin Yahi Se Apne Watan Ko Wapas Chala Jaun.
Abhi Hur Se Hazrat Imam Ki Guftagi Jari Hi Thi Ke Ek Dam Nihayat Hi Tezi ke Sath Ek Saandni Sawaar Aaya Aur Ubaidullah Bin Ziyaad Ka Yeh Khat Hur Ko Diya Ke Jis Maqaam Par Tumhe Mera Yeh Khat Mile Tum Hazrat Imam Ko Usi Maqaam Par RokLo Naa Unhe'n Kufa Shahar Mein Dakhil Hone Do Naa Watan Wapas Loutne Do. Khat Padh Kar Hur Ne Arz Kiya Ke Aye_Ibne RasoolAllah! Dekh Lijiye Aap Ko Giraftaar Karne Ke Liye Ubaidullah Bin Ziyaad Ka Kis Qadar Israar Hai? Isliye Ab Mein Bilkul Hi Majboor-O-Laachaar Hun Ke Mein Aap Ko Kisi Tarha Chhod Nahi Sakta. Hur Ne Yeh Kaha Lekin Shiddate Gham Se Uski Aankho'n Mein Aansu Aagaye Aur Aawaz BharAane Lagi.
Isme Koyi Shuba Nahi Hai Ke Hur Ke Dil Mein Ahle_Bait Ki Be-Panah Azmat Thi. Chunanche, Woh Namazo'n Mein Barabar Hazrat Imam Hi Ki Iqteda Karta Raha . Lekin Woh Ibne Ziyaad Bad-Nihaad Ke Zulm-O-Istibdaad Se Laachaar Aur Majboor Tha. Aur Usko Yeh Bhi Dar Tha Ke Agar Baal BaraBar Bhi Woh Hazrat Imam Ke Saath Koyi RiAa'yat Karta To Ek Hazar Lashkar Ki Moujoodgi Mein Yeh Raaz Poshida Nahi Reh Sakta Tha. Aur Agar Ibne Ziyaad Ko Pata Chal Jata To Woh Hur Aur Uske Poore Khaandaan Ke Tukde Tukde Kar Dalta. Isi Khouf Se Hur Apni Baat Per Ada Raha. Yaha'n Tak Ke Jigar Gosha-E-Rasool Farzande Batool Ko Kufa Ki Rah Se Hatt Kar Karbala Ki Us Be-Aab-O-Giyah SarZameen Mein Utarna Pada. Jahan Sar Chupane Ko Darakht Ka Ek Patta Aur Pyaas Bujhane Ko Pani Ka Ek Qatra Bhi Moujood Nahi Tha.
【Ref:Haqqani Taqrire'n】
( SallallahuAlaihiWaSallam)
(RadiyAllahu Ta'Aala Anhum Ajma'een)