◆Hazrath Qasim رضى الله تعالى عنه◆
Aapne Janab Qasim Bin Hasan Ka Naam Nami Suna Hoga. Ye Ahle_Bait Ke Bahot Se Jawano Ki Shahadat Ke Ba'd Hazrat Imam Se Jang Ki Ijazat Talab Karne Ke Liye Harzir Huwe Hain. Ye Hazrat Imam Ke Haqiqi Bhatije Yani Hazrat Hasan Mujtaba رضى الله تعالى عنه Ke Farzande Anjuman Aur Hazrat Imam Aali Maqaam Ki Dukhtare Nek Akthar Bibi Sakina Se Inki Nisbat Bhi Tay Ho Chuki Hai.
Chota Sa Qad Noujawani Ka Aalam Sabza Aaghaaz Ek Paikare Husn -O- Jamal Hai. Jo Hazrat Imam Se Gardan Katane Ki Ijazat Talab Kar Raha Hai. Imam Aali Maqaam Ne Mohabbat Bhari Nazro Se Bhatije Aur Hone Wale Damaad Ko Ek Nigah Bhar Kar Dekha. Qalb Main Ek Thes Lagi Aur Dil Ke Jazbaat Ansu Ban Kar Palko Per Namudaar Ho Gaye.
Farmaya Ke Beta Qasim Tum Mere Marhoom Bhai Ki Nishani Aur Yaadgaar Ho. Bhai Marhoom Mujhe Daghe Mufaraqat De Gaye. Ab Unki Yaad Aane Per Tumhi Ko Dekh Kar Main Tasalli Hasil Karta Hon. Bhala Mujhe Kab Aur Kis Tarah Gawara Ho Sakta Hai?? Ke Tum Mere Saamne Khak -O- Khoon Main Tadapte Huwe Gala Katao. Aur Main Dekhta Rahon. Beta !!! Main Is Sadmaye Jaankah Ko Bardasht Karne Ki Taab-O-Taaqat Nahi Rakhta. Isliye Main Tumhe Jang Main Jane Ki Ijazat Nahi De Sakta.
Lekin Janaab Qasim Ki Beqarari Aur Girya -O- Zari Dekh Kar Aur Unke Israr Se Majboor Ho Kar Bil-Aakhir Hazrat Imam Ne Unhe Maidane Jang Main Jaane Ki Ijazat Dedi. Hazrat Qaasim Shouq-E-Shahadat Main Is Qadar Warafta The Ke Ijazat Paate Hi Khushi Se Uchal Pade Aur Jaldi Jaldi Jangi Libas Pehan Kar Aur Hatyaro Se Musallah Ho Kar Pehle Kheeme Main Tashreef Le Gaye. Aur Sab Ahle-Kheema Ko Aakhri Salam Karke. Hazrat Imam Ki Khidmat Main Hazir Ho Gaye. Mamta Ki Mari Maa'n Jaan Chidakne Wali Phupi Aur Dulhan Banne Ki Aas Lagane Wali Mangetar Bibi Sakina Ne Duniya Se Safar Karne Wale Musafir Ka Akhri Didar Kiya Aur Josh -E- Gham Se Sab Ki Aankhe Askh Baar Ho Gaye. Ke Ab Chand Minto Main Ye Noor Ki Tasweer Khak -O- Khoon Main Mil Jane Wali Hai.
Jab Imam Aali Maqaam Ko Aakhri Salaam Karke Rawana Hone Lage To Hazrat Imam Ne Aage Badh Kar Nihayat Garam Joshi Ke Saath Bhatije Ko Apne Sine Se Laga Liya Aur Duwaye De Kar Widah Farmaya. Janab Qaasim Hazrat Imam Se Rukhsat Ho Kar Joshe Jihad Main Bhare Huwe Ghoda Douda Kar AshQiya Ki Safo Ke Samne Pahoch Gaye Aur Rijz Ke Chand Ash'aar Padh Kar Farmaya Ke
Ae_Yazidiyo !!!! Ab Jis Ke Sar Per Mout Sawaar Ho Wo Mere Samne Aaye
Aur Meri Shamshire Aabdaar Ki Asadullahi Maar Se Apne Khoon Main Nahaye.
Shehzaade Ki Is Haashmi Lalkar Se Girohe Ashqiya Per Aisi Haibat Sawaar Ho Gayi Ke Bawajood Baar Baar Ki Pukar Aur Lalkar Ke Kisi Main Ye Jurraat -O- Himmat Nahi Huwi, Ke Aap Ke Saamne Aata.
Ibne Sa'ad Ne Jab Ye Dekha Ke Yazeedi Lashkar Main Se Koyi Bhi Hazrat Qaasim Ke Muqabla Ke Liye Nahi Nikalta. To Usne Az'raq Shami Sipah-Salar Ko Pukara , Jo Yazeed Ki Taraf Se Salana 10,000 Dinaar Tankhwa Paata Tha.
Jab Az'Raq Shami Ibne Sa'ad Ke Pass Pahoncha..To Ibne Sa'ad Ne Kaha Ke ..
Ae_Az'Raq !!! Dekh Ye Badi Der Se Ye Noujawan Muqabla Ki Dawat De Raha Hai. Magar Hamare Lashkar Main Se Kisi Ki Bhi Ye Jurraat Nahi Hoti Ke Iske Challenge Ka Jawab De Sake. Isliye Ab Main Tujh Ko Hukm Deta Hon Ke To 1,000 Sawaar Le Kar Iske Muqabla Ke Liye Maidan Main Nikal Padh. Az'Raq Ne Ghazabnaak Ho Kar Kaha.
Ae_Ibne Sa'ad !! Tujhe Sharam Nahi Aati?? Ke Tu Mujh Jaise Naamigirami Pehalwan Ko Jiski Haibat Se Misr -O- Shaam Ki Zameen Dahal Rahi Ho, Ek Aise Kamseen Ladke Se Ladhne Ke Liye Bhej Raha Hai. Jiske Muh Se Maa'n Ki Dudh Ki Boo Aarahi Hai.
Ae_Ibne Sa'ad !!! Saara Misr -O- Shaam Jaanta Hai Ke Main Akela Ek Hazar Bahaduraane Naamdar Ka Muqabla Karta Hon. Ke Aaj Main Ek Bachche Ke Muqabla Main Jaa Kar Apni Naak Kata Do??
Agar Mene Is Bachche Ko Qatal Kar Diya .. Jab Bhi Main Badnaam Ho Jaonga..
Ke Mene Ek Bachche Se Jang Ki.. Khuda Ki Qasam !! Agar Tu Mere Jism Ke Purze Purze Udha Dega Jab Bhi Main Ek Bachche Ke Khoon Se Apni Talwar Ko Aaluda Nahi Karoga..
Ibne Sa'ad Ne Kaha... Ke Ae_Az'Raq ! Are Tu Kis Ghamand Main Hai??? Tu Inki Kamsini Aur Nazuk Badni Ko Mat Dekh. Afsoos!! Tu Inhe Pehchanta Nahi Ke Ye Koun Hain???
Are Ye Sher Dil Hazrat Imam Hasan Mujtaba Ke Farzande Arjuman Aur Fateh Khaibar Ali Haidar Ke Pote Hain.
Khuda Ki Qasam Agar Ye Bhooke Pyase Na Hote To. Ye Akele Hi Qehre Elaahi Ki Bijli Ban Kar Hamare Pure Lashkar Ke Hurmaane Zindagi Ko Khaakstar Bana Dalte.
Jab Ibne Sa'ad Ne Lagatar Israr Se Az'Raq Shaami Ko Majboor Kar Diya To Usne Kahe Ke.
Ae_Ibne Sa'ad !! Khwah Kuch Bhi Hojaye Magar Main Is Bachche Se To Nahi Ladunga. Lekin Teri Khwahish Hai To Is Jang Main Mere 4 Farzand Moujood Hain. Jo Shuja'At -O- Dilawari Main Shohraa -E- Aafaaq Hain. Main Inme Se Ek Ko Bhej Deta Hon.. Wo Chand Minto Main Iska Sar Kaat Kar Le Aayega.
Chunanche Az'Raq Ka Ek Beta Saba Raftar Ghode Per Sawaar Ho Kar Apni Qeemti Talwaar Chamkata Huwa Aur Badal Ki Tarah Garjta Aur Durrata Huwa Maidan Main Nikla. Hazrat Qaasim Ne Isko Aata Dekh Kar Nihayat Be-Khoufi Ke Saath Ye Farmaya Ke Afsoos!!
Tere Baap Ko Tujh Per Raham Nahi Aaya??? Ke Tujh Ko Meri Talwaar Ka Luqma Banne Ke Liye Miadan Main Bhej Diya??? Achcha Aage Badh .. Chunancha Jaise Hi Wo Hamle Ke Liye Aage Badha Hazrat Qaasim Ne Apna Khanjar Uske Shikam Main Bhonk Diya Aur Wo Is Zakhm Ki Taab Na La Kar Ghode Ki Zain Se Zameen Per Gir Padha.
Phir Aapne Nihayat Hi Furti Aur Chabuk Dasti Ke Saath Jhapat Kar Uski Talwar Cheen Li Aur Uske Lambe Lambe Balo Ko Pakad Kar Jo Ghoda Doudhaya To Wo GhaseetTe GhaeetTe Mar Gaya.
Phir Aapne Uski Lash Ko Ghode Ki Tapo'n Se Rond Kar Uske Haddiyo Ko Bhi Chakna Choor Kar Diya.
Az'Raq Ka Dosra Beta Apne Bhai Ko Is Tarah Qatal Hota Dekh Kar Aape Se Baher Ho Gaya Aur Diwanawaar Aage Badh Kar Ek Dam Janaab Qaasim Per Qatilana Hamla Kar Diya.
Hazrat Qaasim Ne Mudh Kar Aisa Panitra Badla Ke Dushman Ka Waar Khali Gaya. Aur Aapne Palat Kar Uske Pehlu Main Aisa Neza Mara Ke Idhar Se Udhar Paar Ho Gaya Aur Wo Wahi Ghode Se Gir Kar Zameen Per Dher Hogaya.
Phir Az'Raq Ka Teesra Beta Hamla Ke Liye Jhapta.. To Aapne Isko Bhi Ek Neza Maar Kar Halaak Kar Diya.
Ab Az'Raq Ka Coutha Beta Apne 3no Bhaiyo Ka Inteqam Lene Ke Liye Pagalo Ki Tarah Talwar Ghumata Huwa Doudh Pada. Aur Muh Main Jhaag Bhar Kar Galiya Dene Laga.
Hazrat Qaasim Ne Farmaya Ke
Bad-Lagaam !! Hosh Main Aa.. Aurato'n Ki Tarah Galiya Aur Kosne Dena Mardo Ki Shan Nahi Hai. Agar Jurraat Hai To Aage Badh Kar Hamla Kar. Wo Kehne Laga Ke Qaasim!!
Tumne Mere Teen(3) Bhaiyo Ko Qatal Kar Diya. Khuda Ki Qasam Jab Tak Main Tumhe Qatal Karke Apne Bhai Ka Badla Na Lunga Mujhe Qaraar Naseeb Nahi Ho Sakta.
Hazrat Qaasim Ne Has Kar Farmaya...Ke Mat Ghabra Main Tujhe Qaraar Dene Aur Tujh Ko Tere Bhaiyo Ke Paas Pahoncha Dene Ke Liye Tayyar Hon...
Ye Kaha Aur Talwar Ka Ek Aisa Bhar Poor Jancha'Tula Haath Mara To Maghroor Ka Sidha Haath Kat Kar Door Ja Pada Aur Wo Jaan Bacha Kar Bhag Nilkla. Aapne Lalkaarte Huwe Iska Ta'Aqqub Farmaya..
Magar Wo Apni Lashkar Main Jaa Ghusa. Aur Zakhm Ki Taab Na La Kar Ghode Se Gir Pada Aur Mar Gaya..
Az'Raq Apne 4 Honihaar Aur Mashoor Shah_Sawar Beto Ko Is Tarha Zillat Ke Sath Qatal Hota Dekh Kar Ghaiz -O- Ghazab Main Apne Hosh -O- Hawas Kho Betha. Aur Muh Main Jhaag Bhar Ker Gusse Main Daant Pieste Huwe Aur Jhillahat Mai Dadhi Ke Baal Nounchte Huwe Ghoda Khuda Kar Maidan Main Nikal Pada. Aur Kehne Laga Ke Bachche !! Tum Ne Bacho'n Ko To Maar Liya , Lekin Ab Tujh Ko Mujh Se Paalaa Pada Hai. Sambhal Ja !! Ke Ab Teri Zindagi Se Sirf Chand Hi Lam'Haat Baaqi Rah Gaye Hain.
Janaab Qaasim Ne Hiqarat Ke Saath Usko Jawab Diya Ke Az'Raq !! Zara Hosh Ki Dawa Kar, Tu Shamiyo Ke Liye Taa'Qat Ka Pahad Hoga. Abhi Tak Tune Hashmi Kachhaar Ke Shero Ko Nahi Dekha Hai. Hamari Rago'n Main Haidare Karraar Ka Khoon Hai. Hamari Nigahe Qa'Har -O- Jalaal Ke Samne Tu Ek Makkhi Aur Machhar Se Zyada Haisiyat Nahi Rakhta.
Az'Raq Ye Khoon Khola Dene Wala Tana Sun Kar Aur Bhi Aag Babagule Ho Gaya. Aur Neza Baazi Shuru Kardi. Lekin, Jab Ye Dekha Ke Barabar Ki Chote Hain. To Ghazab Naak Ho Kar Talwaar Nikal Li. Hazrat Qaasim Ne Bhi Talwaar Khenchli Aur Aage Badhe To Az'Raq Ne Aankhe Phad Kar Gour Se Dekha Aur Hairan Ho Kar Pucha Ke Qaasim !!
Ye Talwaar To Mere Ladke Ki Hai. Ye Tumhare Haath Kaha'n Se Aagayi ???
Hazrat Qaasim Ne Has Kar Farmaya ..Haan Tera Beta Apni Yaadgaar Ke Tour Per.. Ye Talwaar Mujhe Isliye De Gaya Hai Taake Isi Se Main Tujhe Mout Ka Zayeqa Chakha Kar Tujhe Tere Beto Ke Paas Pahoncha Do. Az'Raq Ye Sun Kar Farte Ghazab Se Biphar Gaya Aur Jo Hi Hamle Ke Liye Talwaar Uthayi Hazrat Qaasim Ne Farmaya Ke Az'Raq !! Sambhal Ham Tujhe Bada Tajruba Kaar Shah-Sawar Samajhte The. Magar Tum To Bilkul Hi Anaadi Nikle. Tum Ko Apni Ghode Ke Peti Ka Bhi Dhyan Nahi Ke Wo Dhili Ho Chuki Hai. Az'Raq Jaldi Se Jhuk Kar Ghode Ke Tang Ko Dekhne Laga Itne Main Hazrat Qaasim Ne Uski Kamar Per Talwaar Ka Aisa Bhar Poor Haath Mara Ke Wo Do Tukde Ho Gaya Aur Aap Uchal Kar Uske Ghode Per Sawar Ho Gaye..
Aur Hazrat Imam Ki Khidmat Main Haazir Ho Kar Arz Karne Lage Ke
ChachaJaan _______ Pyaas ____ Pyaas.!!!!
Imam Tishnakaam Ne Farmaya Ke Noore Nazar!! Zara Der Aur Sabar Karo Anqareeb Tum Nana-Jaan Ke Muqaddas Hatho'n Se Jaame Kousar Pi Kar Sairab Ho Jaoge!!
ChachaJaan Ka Farman Sun Kar Hazrat Qaasim Phir Maidan Ki Taraf Palat Pade.. Aur Ye Dekha Ke Ibne Sa'ad Qalbe Lashkar Main Khada Ho Kar Yazeedi Foujo Ki Kamaan Kar Raha Hai.
Aapne Socha Ke Kyun Na Isi Khabees Ko Qatal Karke Surkhuru Ho Jao. Chunancha Barqe Khaatif Ki Tarha Ghoda Chamka Kar Qalbe Lashkar Main Pahonch Gaye.. Magar Dushmano Ne Har Taraf Se Aap Ko Gher Liya.. Aur Charo'n Taraf Se Aap Per Neza -O- Talwaar Ki BoChaar Shuru Kardi. Yahan Tak Ke 27_Zakhm Kha Kar Aap Nidhaal Ho Gaye Aur Ghode Se Gir Pade.
Shees Bin Sa'ad Manhoos Ne Aap Ke Sina Per Ek Neza Mara Us Waqt Aapne Farmaya:
Ae_ChahaJaan !!! Meri Khabar Giri Farmayiye Hazrat Imam Bhatije Ki Dardnaak Pukaar Sun Kar Doudh Pade Aur Dekha Ke Paikare Noor Khoon Main Tadap Tadap Kar Dam Tod Raha Hai.
Imam Ne Muqadas Laash Ko Intehayi Mohabbat Se Goad Main Rakh Liya Aur Chehra-E- Pur-Noor Se Khaak -O- Khoon Ke Dhabbo Ko Saaf Karne Lage Itne Main Qaasim Jaan-Baaz Ne Ankhen Khool Di. Aur Apna Sar Imam Ki Aaghooshe Rahmat Main Dekh Kar Farte Musarrat Se Muskuraye. Aur Ek Dam Apni Naqde Jaan Khallaqe Har Do Jaha'n Ke Naam Per Qurbaan Kar Ke Darul Jina'n Ke Mehmaan Ban Gaye.
انا للہ و انا الیہ راجعون.
Isi Tarah Hazrat Qaasim Ke 3no Bhai Abdullah Bin Hasan Aur Umar Bin Hasan Aur Abu-Bakr Bin Hasan Bhi Intehayi Jaan-Baazi Ke Sath Dushmano'n Se Jang Karte Huwe Shaha'Dat Se Sarfaraz Ho Gaye.
【Ref>>> Haqqani Taqrire'n, S:234 to 239】