◆Hazrat Muslim ki Rawangi
Chunanche Imam Aali Maqam Ne Apne Chacha Zaat Bhai Hazrat Muslim Bin Aqeel Ko Kufa Bheja Aur Ahle_Kufa Ke Naam Yeh Farmaan Wala Shaan Tehreer Farmaya KE Aye Ahle_Kufa Mein Tumhare Be-Panah Israr Se Mutassir Ho Kar Hazrat Muslim Bin Aqeel Ko Apna Naayib Bana Kar Rawana Karta Hun. Agar Tum Logo'n Ne Apne Qoul Per Saabit Qadam Reh Kar Inke Haath Per Bait KarLi Aur Inhone Mujh Ko Tumhari Wafadari -O-Jaanisari Ki Itla Dedi To Fauran Hi Mein Bhi Kufe Ka Azme Safar Kar Lunga. Chunanche Hazrat Muslim Apne Do Bachhe Ko Muhammad Aur Ibraheem Ko Apne Hamrah Le Kar Kufa Rawana Ho Gaye Aur Kufa Pahoch Kar Mukhtaar Bin Ubaid Ke Makan Par Qiyaam Farmaya Aur Isme Shubah Nahi Ke Kufiyoun Ne Aap Ka Bahot Hi Shaandaar Isteqbaal Kiya Aur Be-Panah Jazba-E-Aqidat Aur Joshe Muhabbat Ka Izhaar Kiya Yaha'n Tak Ke 40,000 kufiyoun Ne Aap Ke Daste Haq Parast Per Bait KarLi Aur In Logo'n Ka Josh-O-Kharoosh Ka Yeh Aalam Tha Ke Aisa Ma'loom Hota Tha Ke Yeh Lashkar Sailab Ki Tarha Badh Kar Yazeedi Saltanat Ko Ghaarat-O-Barbaad Kar Dega, Aur Yazeed Ko Jaan Bachane Ke Liye Koyi Raah Naa Milegi. Chunanche, Hazrat Muslim Bin Aaqeel Ne Kufa Aur Ahle_Iraq Ki Aqidat-O-Bait Se Mutma'een Ho Kar Imam Aali Maqam Ki Khidmat Mein Yeh A'ariza Likh Kar Bhej Diya Ke 40,000 Ke Lashkare Jarraar Ne Mere Hath Par Bai't Karke Aap Ki Jaanisari-O-Wafadari Ka Ahad Kar Liya Hai. Lihaza Jald Az Jald Aap Kufa Tashreef Le Aaye'n. Taake Jald Se Jald Khuda Ke Bando'n Ko Zaalim Yazeed Ke Shar Se Najaat Dilayi Jaye. Aur Aapki Khilafate Haqqa Ka Parcham Sar Buland Karke Khuda Ki Zameen Ko Adl-O-Insaaf Se Bhar Diya Jaye.
Kufe Ke Governer Hazrat Noumaan Bin Basheer Sahabi رضى الله تعالى عنه Bawajood Yeh Ke Yazeed Ke Governer The Magar Chunke, Ahle_Bait Ke Muhib The. Isliye Unhone Mamuli Taur Per Ahle_Kufa Ko Hazrat Muslim Ki Bait Se Mana Karke Zaabta Ki Kaarwayi Puri Kar Di. Aur Is Mu'aamila Mein Kisi Qisam Ki Dast Andazi Nahi Farmayi. Aur Is Tarha Khamoosh Ho Kar Bethe Rahe Ke Yazeed Ko Bhi In Waqi'aat Ki Itla Nahi Di. Magar Yazeed Ke Khaas Jasoos Muslim Bin Yazeed Hazarmi Aur Ammara Bin Waleed Bin Uqba Ne Yazeed Ko Yeh Itla Kardi Ke Muslim Bin Aqeel Kufa Tashreef Laaye Hain. Aur Hazaro'n Aadmi Inke Haath Per Imam e Husain رضى الله تعالى عنه Ki Bait Kar Chuke Hain. Lekin, Kufe Ke Governer Noumaan Bin Basheer Ne Koyi Kaarwayi Inke Khilaaf Nahi Ki Hai. Yazeed Yeh Khat Padh Kar Ghaiz-O-Ghazab Mein Jal Bhun Gaya Aur Fauran Kufe Ke Governer Numaan Bin Basheer Ki Maazuli Ka Farmaan Likha Aur Basra Ke Governer Ubaidullah Bin Ziyaad Ko Kufe Ka Governer Bana Kar Bhej Diya. Ubaidullah Bin Ziyaad Intahayi Zaalim Aur Bala Ka Farebi-O-Makkar Tha. Isne Apni Fouj Ko To Qaadsiya Mein Chhoda.Aur Khud Hijazi Libaas Pehan Kar Chand Aadmiyoun Ke Hamrah Khamoshi Ke
Saath Raat Ki Tareeki Mein Kufa Pohcha. Aur Apne Darul Imarat (Government House) Mein Dakhil Ho Gaya. Aur Raat Bhar Yazeed Ke Guruo'n Se Puri Report Sun Kar subah Ko Ibne Ziyaad Ne Kufe Ke Tamam Rusa Aur Amayedeen Ko Intahayi Fareb Aur Chalaki Se Qil'ah Ke Andar Bula Kar Qil'ah Ka Phatak Band Kar Liya.
Aur Unhe'n Hukumat Ka Farmaan Padh Kar Sunaya Aur Khoob Khoob Daraya Dhamkaya. Phir Usne Mohammad Bin Ashas Ko Fouj Ke Ek Dasta Le Sath Hazrat Muslim Bin Aqeel Ki Giraftari Ke Liye Bheja. Us waqt Hazrat Muslim Haani Bin Urwah Ke Makan Per Tashreef Farma The .Muhammad Bin Aashas Ne Haani Bin Urwah Ko Fauran Giraftaar Karke Qil'ah Mein Bhej Diya. Is waqt Hazrat Muslim Bin Aqeel Ne Apne Mutawassileen Ko Pukara To Dam Zaadan Mein 40,000 Ka Lashkar Aap Ke Samne Haazir Ho Gaya. Aur Ibne Ziyaad Ke Qil'ah Ka Muhasira Kar Liya. Is Waqt Josh-O-khuroosh Ka Yeh Aalam Tha Ke Agar Hazrat Muslim Bin Aqeel Hamle Ka Hukm Farma Dete To Chand Minto'n Mein Qil'ah Fatah Hojata Aur Ibne Ziyaad Giraftaar Ho Kar Paa Ba-zanjeer Aap Ka Qaidi Ban Jata Aur Yahi Lashkar Tufaan Ki Tarha Badh Kar Yazeed Ke Takht-O-Taaj Ko Bhi Apne Qadmo'n Ka Foot Ball Bana Kar Yazeedi Saltanat Ka Naam-O-Nishan Mita Deta Magar!! Sachhi Baat Aur Waqa'ee Haqiqat To Yahi Hai Ke...
LAAKH TADBEER KARE BANDA TO KYA HOTA HAI
WAHI HOTA HAI JO MANZOORE KHUDA HOTA HAI
Hazrat Muslim Bin Aqeel Ne Qil'ah Ka Muhasira To Kar Liya Magar Lashkar Ko Hamle Ka Hukm Nahi Diya Aur Ek Raham Dil Aur Aadil Baadshah Ki Tarha Aap Musalahat Ki Guftagu Ka Intezaar Farmane Lage. Ibne Ziyaad Jo Intihayi Makkar-O-Ayyar Tha Usne Is Waqfe Se Poora Faida Utha Liya. Chunanche, Itni Der Mein Usne Kufe Ke Rusa Aur Amayedeen Ko Majboor Kar Diya Ke Wo Qil'ah Ke Faseel Per Chadh Kar Apne Azeezo'n Aur Zere Asar Logo'n Ko Hazrat Muslim Bin Aqeel Ki Nusrat-O-Himayat Se Alehda Kar Den. Yeh Rusa Aur Amayad Pehle Hi Se Qil'ah Ke Andar Qaid The. Ibne Ziyaad Ne In Logo'n Ko Yeh Dhamki Di Ke Agar Tum Logo'n Ne Muslim Bin Aqeel Ki Jama'at Ko Na Muntashar Kiya To Mein Tum logo'n Ko Is Qil'ah Ke Andar Intehayi Be-Dardi Ke Saath Zibah Kar Dalunga Aur Phir Yazeed Shamiyoun Ka Lashkare Jarrar Bhej Kar Tumhare Bachhe Bacjhe Ko Qatl Aur Tumhari Bastiyoun Ko Taakht-O-Taaraaj Dalega.