◆Hazrat Imam Ki Isteqaamat
Algaraz, Doosri Muharram Se 10wi'n Muharram Tak Isi Tarha AhleBait Ka Yeh Mazloom Qaafila Karbala Mein Muqeem Raha. Aur Rozana Ibne Ziyaad Ka Qaasid Yahi Paigham Laata Raha Ke Aye__Imam Agar Aap Apna Paak Haath Yazeed Ke Na-Paak Hath Par Rakh Kar Uski Bait Farmale To Yeh 22,000 Ka Lashkar Jo Aap Ke Khoon Ka Pyasa Khada Hai. Aapke Qadam Dho Dho Kar Piyega. Aur Yazeed Aap Ki Muqaddas Jutiyo Ko Apna Taaj Bana Kar Apne Khazano'n Ki Kunjiya Aap Ke Qadmo Mein Daal Dega.
Aap Ko Izzat Aur Dawlat Milegi. Kisi Saube Ki Governari Aur Hukumat Bhi Milegi. Aur Aye_Imam Agar Aap Ne Yazeed Ki Bait Nahi Ki To Aap Aur Aap Ke AhleBait Ke Muqaddas Khoon Se Karbala Ki Zameen Rangeen Bana Di Jayegi. Aap Ke Nanhe Nanhe Bachhe Qatal Kar Diye Jayenge Aur Aap Ki Goud Ke Paale Nou'Nahalo'n Ko Aap Ki Nazro Ke Samne Zibah Kar Diya Jayega Aur Phir In Shaheedo'n Ki Laasho'n Par Ghode Dawda Kar Inki Haddiyo Ko Chakna Choor Kar Diya Jayega. Aur Inke Saro Ko Nezo Par Chadha Kar Kufa Aur Dimishq Ke Bazaro'n Mein Phiraya Jayega. Aur Inki Laashe Karbala Ki Zameen Mein Be-Gour-O-Kafan Padi Rahengi. Kufa Ke Gunde Aap Ke Kheeme Ko Loot Kar Jala Denge. Aur AhleBait Ki Shehzadiyo'n Aur Hazrat Fatima Zahra رضى الله تعالى عنها Un Effate Ma'Aab Betiyo'n Ko Jinhe Aaftab-O-Mehtaab Ki Nigahe Bhi Aehteraam Ke Sabab Achhi Tarha Nahi Dekh Sakti Thi. Be-Parda Oonto Par Bitha Kar Karbala Se Kufa Aur Kufa Se Dimishq Tak Chalne Ki Majboor Kiya Jayega.
Algaraz, Hazrat Imam Ko Is Qadar Lalach Di Gayi Aur Hirs-O-Tama Ke Aise Aise Sunehre Aur Dilkash Mana'zir Imam Ke Samne Pesh Kiye Gaye Ke Agar Himalaya Bhi Hota To Uske Paye Isteqamat Mein Lagzish Aajati. Aur Is Qadar Daraya Gaya Aur Aisi Aisi Khouf Naak Dhamkiyo Se Ma'Roob Kiya Gaya . Ke Agar Rustum Bhi Hota To Uske Housle Past Hojate Aur Woh Maare Dehshat Ke In Zalimo'n Ke Samne Sare-Niyaz Jhuka Deta. Magar Farzande Fatima TuzZahra Jin Ke Khoon Ke Qatre Qatre Mein Rasool e Khuda Ka Khoon Shamil Tha. Wo In Aafat-O-Masa'ib Ke Hujoom Mein Bhi Azm-O-Isteqalaal Ka Pahad Ban Kar Khade Rahe Aur Nuqsaan Maal-O-Jaan Ke Bade Bade Tufaan Mein Bhi Unke Paye Isteqamat Ko Lagshish-O- Jumbish Nahi Huwi. Aur Aap Hamesha Yahi Jawab Dete Rahe Ke. Aye_Kufiyo Aur Yazidiyo'n, Mein Is Waqt Ek Aise Do-Raahe Par Khada Huwa Hun Jaha'n Se Do-Raste Nikalte Hain.
Ek Rasta To Yeh Hai Ke Mein Yazeed Ki Bait Karlu To Yeh Sahi Hai Ke Mujhe Izzat-O-Dawlat Aur Kisi Saube Ki Governari Zaroor Milegi Aur Yazeed Mera Mamnune Ahsaan Ho Kar Mujh Per Jaan-O-Maal Se Qurbaan Ho Jayega. Lekin Iska Anjaam Yeh Hoga Ke Mera Paak Haath Yazeed Ke Napaak Haath Par Pahunchte Hi Deene Muhammadi Ka Parcham Sarango Ho Jayega. Aur Islam Ka Woh Darakht Jisko Mere Nana Jaan Ne Sahaba Ke Khoon Se Seench Seench Kar Hara Bhara Kiya Hai Ek Dam Uski Shaakhe Aur Tehniya Be Deeno Ki Baad Sar Sar Se Taakh-O-Taaraaj Ho Jayengi. Aur Azmate Islam Fana Aur Shawkate Deen Mit Jayegi.
Aur Doosra Rasta Yeh Hai Ke Mein Yazeed Ki Bait Nwa Karo To Yeh Bilkul Sahi Hai Ke Mein Aur Mere AhleBait Intehayi Be-Dardi Ke Saath Qatl Kar Diye Jayenge. Aur Phir In Shaheedo'n Ki Muqaddas Lasho'n Ko Ghodo Ki Taapo'n Se Rond Kar Inke Saro Ko Nezo Par Chadha Kar Kucha -O-Bazar Mein Gasht Karaya Jayega. Aur AhleBaite Athaar Ko Be-Panah Ma'saa'ib Aur Nuqsaane Jaan-O- Maal Se Do-Chaar Hona Padega.
Lekin Iska Natija Yeh Hoga Ke, Perchame Islam Ki Azmat Ka Nishan Buland Se Buland Tar Hojayega.
Aur Shohda-E- Karbala Ke Khoon Se Sairaab Ho Kar Islam Ka Hara Bhara Darakht Is Qadar Sar-Sabz Shaadaab Ho Jayega Ke Qiyamat Tak ILhaad-O- Be-Deeni Ki Koyi Khizaa Is Mosame Bahaar Ko Nigah Utha Kar Dekhne Ki Bhi Jurraat Naa Kar Sakegi.
Lihaza Aye_Yazidiyo'n
Mera Aakhri Faisla Yahi Hai Ke Ham Khud 72_Zakhm Kha Kar Ghode Ki Zain Se Zameen Par Gir Padenge. Magar Ham Kisi Haal Mein Bhi Islam Ke Parchame Azmat Ko Sarangu Nahi Hone Denge.
Ham Khud Kat Jayenge Magar, Ham Qur'Aan Ka Ek Lafz Bhi Kaatne Nahi Denge.
Ham Khud Mit Jayenge ,Magar Farmane Mustafa ﷺ Ka Ek Zer-O-Zabar Bhi Mitne Nahi Denge Aur Aakhri Dam Tak Hamara Yahi Naara-O- Aelaan Rahega Ke
JO JAAN MAANGO TO JAAN DENGE,
JO MAAL MANGO TO MAAL DENGE,
MAGAR NA HOGA YE HAMSE HARGIZ
NABI KA JAH -O-JALAL DENGE
Chunanche Karbala Ka Zarra Zarra Gawa Hai Ke Fatima Ke Laal Ne Duniya Ki Dawlat-O-Hukumat Par Thokar Maar Kar Raah-e-Haq Mein Aane Wali Tamam Musibato Ka Khush Dili Ki Sath Khaire Maqdam Kiya. Aur Apna Gala Katana Aur Ghar Lutana Gawara Kar Liya. Magar Yazeed Paleed Ki Bait Karke Islaam Ke Damane Taqaddus Ko Dagh_Daar Karna Manzoor Nahi Farmaya...
SUBHAN-ALLAH
GHAR LUTANA SAR KATANA KOYI TUJH SE SEEKHLE
JAAN E AALAM HO FIDA AYE KHAANDAANE AHLE_BAIT
Isme Koyi Shuba Nahi Ke Hazrat Imam Ne Is Jang Ko Taalne Ki Intehayi Jad-O-Jihad Farmayi, Lekin, Jafakaar-O-Sitamgaar Qaum Ne Masa'Lihat Ki Koyi Baat Hi Manzoor Nahi Ki. Aur Hazrat Imam Ko Yaqeen Ho Gaya Ke Ab Is Jang Ko Dafa Karne Ka Koyi Tareeqa Baqi Hi Nahi Reh Gaya. Kyunke Yeh Log Naa Shehre Kufa Mein Dakhil Hone Dete Hain. Naa Yazeed Ke Pass Le Jane Per RazaMand Hote Hai,
Naa Watan Jaane Dete Hain,
Naa Mulk Chodne Per Inko Tasalli Hoti Hai
Is Waqt Majburan Hazrat Imam Ne Apne Kheeme Ke Gird Khandaq Khoodne Ka Hukm Diya.
Chunanche, Khandaq Khodi Gayi Aur Sirf Ek Rasta Rakha Gaya Jaha'n Se Nikal Kar Dushmano'n Se Muqabla Kiya Jaye Aur Khandaq Mein Aag Jala Di Gayi Taake
Ahle-Kheema Dushmano'n Ki Yalghaar Se Mehfooz Rahe'n.
【Ref>>Haqqani Taqrire'n , S:216 to 219】
( SallallahuTa'AalaAlaihiWaSallam)
(RadiyAllahu Ta'Aala Anhum Ajma'een)