◆Hazrat Imam Husain رضى الله تعالى عنه Kufa Rawana Huwe
Hazrat Muslim Ka Khath Mulahiza Farmane Ke Ba'd Kufiyoun Ki Dawat Qubool Farma Lene Mein Tashweesh-O-Tarad'dud Ki Koyi Baat Hi Na Thi Aur 40,000 Insano'n Ke Halqaye Iraadat Mein Dakhil Hojane Aur Bait Kar Lene Ke Ba'd Kisi Qism Ke Khouf-O-Hiraas Ka Koyi Sawal Hi Nahi Tha. Aur Kufe Ke "Shi'Aane Ali” Ke Uzra Aur Bewafayi Ka Ba'zahir Koyi Shuba Tak Naa Tha. Isliye Hazrat Imam ne Safare Kufa Ka Azm Farmaliya Aur 3_Zul Hijjah/ San Hijri:60 Ko Apne Ahlo_Ayaal Aur Azizoun Aur Rafiqo'n Aur Ghulamo'n Ko Saath Le Kar Kul 82 Aadmiyoun Ke Qafila Saalaar Ban Kar Aap Makkah Mukarramah se kufe ke Liye Rawana Hogaye. Is Muqaddas Qafile Mein 70 Ya 72 Sawaar Aur Baaqi Piyada'pa The.
Isme Koyi Shubah Nahi Ke Hazrat Muslim Ke Khath Se Poora Poora Itminaan Ho Chuka Tha Magar Phir Bhi Aakabire Sahaba Aap Ko Israar Ke Sath Is Safar Se Rok Rahe The Khususan Hazrat Abdullah Bin Abbas,Hazrat Abdullah Bin Umar, Hazrat Jabir, Hazrat Abu Sa'eed Khudri, Hazrat Abu Wafid Leshi, To Aap Ko Is Safar Se Rokne Ke Liye Intahayi Israare Baleegh Kar Rahe The Aur Yeh Sab Ke Sab Aakhir Tak Yahi Koshish Karte Rahe Ke Aap Kufa Tashreef Naa Lejayen. Lekin Hazrat Imam Aali Maqaam In Mukhlis Sahaba Ki Istid'aa Qubool Farmane Se Majboor The. Kyunke Aap Ko Yeh Khayaal Tha Ke 40,000 Aqidat Mando'n Ki Mukhlisana ILtijao'n Ko Jo Deen Ki Himayat-O-Paas-Dari Ke Jazbaat Se Bhari Huwi Hain. Thukra Dena Ahle_Baite Nabuwat Ke Buland Akhlaaq Ke Shayaane Shaan Nahi Hai. Phir Hazrat Muslim Bin Aqeel Ke Dawat Name Ko Rad Karna Aur Unki Pur_Khuloos Istid'aa Ko Be-ILtifaati Ki Nazar Se Dekhna Kabhi Hargiz Hargiz Imam Aali Maqaam Ko Gawara Nahi Ho Sakta Tha. Isliye Hazrat Imam Ne Hazraate Sahaba-E-Kiram Ki Istid'aa Ko Qubool Farmane Se Mazarat Farma Di Aur Sahaba-e-Kiram Ne Rote Huwe Aap Ko Rukhsat Farmaya. Haqiqat Yeh Hai Ke Sahaba-E-Kiram Ko Kufiyoun Ki Bad-Aehdi Ka Tajruba Tha. Isliye Woh Unki Taraf Se Hargiz Mutma'in Naa The Aur Hazrat Abdullah Bin Abbas رضى الله تعالى عنه Ne To Yaha'n Tak Farmaya Ke Aye_Imam Agar Aap Kisi Ki Baat Nahi Mante Aur Kufe Ke Safar Par Aap Ko Israar Hi Hai To Kam Se Kam Meri Itni Hi Arz Daasht Qubool Farma Lijiye Ke Auratoun Aur Bachhon Ko Hamrah Naa Le Jayiye. Magar Aap Is Par Bhi Raazi Nahi Huwe Asal Baat To Yeh Hai Ke Taqdeer Ka Likha Huwa Mitne Wala Nahi. Bohat Hi Sach Kaha Hai Kisi Shayir Ne Ke....
Chaak Ko Taqdeer Ke Mumkin Nahi Karna Rafu
Sozne Tadbeere Saari Umr Go Seeti Rahe
Imam Aali Maqam Ki Taqdeer Mein To Ghurbat-O-Musafirat Aur Intehayi Bekasi Ke Aalam Mein Maidane Karbala Ke Andar Shahadat Likhi Huwi Thi Isliye Bhala Aap Kufa Kyun Naa Tashreef Le Jate??? Aap Ko To Shahadat Ki Kashish Kheenche Liye Ja Rahi Thi Aur Hazrat Imam Ka Is Waqt Wahi Haal Tha Jo Kisi Ne Kaha Hai Ke....
Do Qadam Bhi Nahi Chalne Ki Hai Taa'qat Mujh Mein
Ishq Kheenche Liye Jata Hai Mein Kya Jata Hun
Behrehaal, Hazrat Imam Apne 82 Insano'n ke Mukhtasar Qafile Ke Saath Kufa Rawana Hogaye. Is Muqaddas Qafile Mein Ahle_Baite Nabuwwat Ke Koun Koun Sehzaade The?? Ke Inki Fehrist Bhi Aap Ko Bayan Kar Du'n Taake Aap Ko Ma'aloom Hojaye Ke Khaandaane Nabuwwat Ke Kaise Kaise Roshan Sitare Karbala Ki Zameen Mein Ghuroob Huwe Aur Kaise Kaise Anmol LaaL-O-Gohar is Dashte Karbala Mein Madfoon Huwe.
( SallallahuAlaihiWaSallam)
(RadiyAllahu Ta'Aala Anhum Ajma'een)
【Ref>> Haqqani Taqrire'n, S:205 to 207】