◆Hazrat Imam رضى الله تعالى عنه Karbala Mein
Ye Ajeeb Ittefaaq Samjhiye Jis Din Hazrat Muslim Kufa Mein Shaheed Hote Hain Usi Din Hazrat Imam e Husain رضى الله تعالى عنهم Makkah Mukarramah Ko Rawana Hote Hain..
【Khake Karbala】
2_Muharram 61_Hijri Ki Tareekh Islami Tareekh Mein Woh Naa-Qabile Faramoosh Tareekh He. Isi Tareekh Mein Ibne Rasool'Allahﷺ Ne Apne Ahle_Bait Ke Ek Mukhtasar Se Qafile Ke Sath Karbala Mein Nuzool Farmaya. Hazrat Imam Ne Is Maqaam Ka Naam Daryaft Farmaya To Ma'loom Huwa Ke Is Maidan Ka Naam "Karbala" Hai. Karbala Ka Naam Sunte Hi Hazrat Imam Ka Matha Thanka. Kyunke Bachpan Hi Se Aap Ki Shahadat Ki Shohrat Thi Aur Hazrat Imam Ko Khoob Ma'loom Tha Ke Karbala Ka Maidan Hi Wo Khouf_Naak Baya-Baan Hai. Jaha'n AhleBaite Nabuwwat Ka Muqaddas Khoon Nihayat Be-dardi Ke Saath Bahaya Jayega. Aur Is Baya_Baan Ka Raaz Shohda-E-Ahle_Bait Ke Khoon Se Rangeen-O- Lala_Zaar Banaya Jayega.
Abhi Hazrate Imam Karbala Ke Maidan Mein Itminaan Se Bethe Bhi Naa Paaye The Aur Aap Ka Saara Samaan Yuhi Be-Tarteeb Idhar Udhar Pada Huwa Tha Ke Ek Dam Kufa Se Ubaidullah Bin Ziyaad Ka Qaasid Yeh Khat Le Kar Pohanchta Hai Ke Aap Yazeed Ki Bait Kijiye Ya Jang Ke Liye Tayyar Hojayiye. Hazrat Imam Ne Yeg Khat Padh Kar Haqaarat Ke Saath Zameen Par Dal Diya Aur Farmaya Ke Mere Paas Is Khat Ka Koyi Jawab Nahi Hai.
Kya Sitam??? Ke 150 Khutoot Bhej Kar Aap Ko Bulaya To Isliye Gaya Hai Ke Ahle_Kufa-O-Iraq Aap Ke Daste Haq Parast Par Bait Karenge. Lekin Jab Woh Mu'Azziz Mehman Safar Ki Mushaqqate'n Bardaasht Karke Tashreef Laate Hain To Unka Haqqe Mehmani Is Tarha Ada Kiya Jata Hai Ke Zaher Mein Bojhaye Huwe Neze Aur Chamakti Huwi Barhana Talware'n Dikha Kar Unhi Yazeed Paleed Jaise Aibe_Mujassam Ki Bait Par Majboor Kiya Ja Raha Hai. Jis Ki Bait Kisi Tarha Imam Ke Liye Jaiz Hi Nahi Thi.
ALLAHU AKBAR .....In Kufiyaane Pur-Daga Aur Dushmanaane Be-Haya Ko Zara Bhi Ghairat Nahi Aayi Ke Jis Mehmaane Mukarram Ko Hazaro'n Tamannao'n Aur ILtijao Ke Sath Bulaya Hai. Iske Sath Kya Sulook Kar Rahe Hain???
Musalmano'n Ghaliban Duniya Mein Aise Azeem'ush'Shaan Mehmaan Ke Sath Itne Bade Zulm-O-Udwaan Ka Badtareen Sulook Naa Kabhi Huwa Hai Na Aainda Kabhi Hoga. Jo Fatimah Ke Laal Aur Ali Ke Nau-Nihaal Ke Sath Kufiyaane Bad-Khisal Ne Rawa Rakha. Hazrat Imam Ko In Ghaddaroun Ki Bad-Ahdi Per Intehayi Hairat Thi. Isiliye Aapne Farmaya Ke Mere Paas Is Khat Ka Koyi Jawab Nahi Hai.
Ibne Ziyaad Hazrat Imam Ka Jawab Sun Kar Aur Zyada Aatish-E-Ghaiz-O-Ghazab Mein Jal Kar Kabaab Hogaya Aur Intehayi Taish Mein Aa Kar LashKaro'n Ko Tayyari Ka Hukm Dediya.
Aur Umar Bin Sa’Ad Ko Is Lashkar e Jarrar Ka Sipah Salaar Bana Kar Zameene Karbala Ki Taraf March Karne Ka Farmaan Jari Kar Diya.