Hazrat Imam Aali Maqaam ki Shahadat

    ◆Hazrat Imam Aali Maqaam           RadiyAllahuTa'AalaAnhu Ki                                   Shahadat◆

•● Saa'ate Aah -O- Baka -O- Beqarari Aagayi

Sayyade Mazloom Ki Ran Main Sawari Aagayi •●

•● Sath Wale Bhai Bete Ho Chuke Hain Sab Shaheed

Ab Imam Bekas -O- Tanha Ki Bari Aagayi •●

Ab Ye Waqt Aagaya Hai Ke Tamam Ahbaab Aur Jawanaane Ahle_Bait Shaheed Ho Chuke Hain. Sirf Hazrat Imam Aali Maqaam Aur Inke Ek Farzand Imam Zainul Aabideen Baqi Reh Gaye Hain. Jo Bistare Bimari Per Intehayi Za'af -O- Naqahat Ki Halat Main Padhe Huwe Hain.

Jab Hazrat Imam Ne Tanha Maidane Jang Main Jane Ka Azm Farmaya. To Hazrat Zainul Aabideen Apni Bimari Aur Naa'tawani Ke Bawajood Mujahidana Azm Ke Saath Haath Main  Neza Liye Huwe Aaye. Aur Arz Kiya Ke Abba Jaan !! Pehle Mujhe Sar Katane Ki Ijazat Dijiye, Ye Nahi Ho Sakta Ke Mere Hote Huwe Aap Shaheed Ho Jaye'n.

Hazrat Imam Ne Farmaya Ke Beta !!! Main Tumhe Hargiz Kabhi Maidane Jang Ki Ijazat Nahi De Sakta. Kyunke Tumhare Siwa Ab Ahle_Bait Ki In Masturaat Ka Koyi Mehram Baqi Nahi Reh Gaya Hai. In Bekasaane Ghareebul Watan Ko Watan Tak Koun Pohchayega Aur Inki Nighe Daasht Aur Khabar Giri Koun Karega???  Mere Jaddo Pidar Ki Jo Amanate Mere Paas Hain wo Kisko Supurd Ki Jayengi !! Meri Nasal Aur Husaini Sayyado Ka Silsila Kisse Chalega???

Mere Baad Mera Janasheen Tumhare Siwa Ab Koun Hoga?? Beta Zainul Aabideen !! Ye Sari Ummeede Tumhari Zaat Se Wabasta Hain. Lihaza. Ae_Jaane Pidar !! Tum Hargiz Hargiz Maidane Jang Ka Qasad Na Karo Aur Dekho Za'af -o- Naa'tawani Se Tumhare Qadam Dag-Maga Rahe Hain. Lihaza Tum Bistar Per Let Jao. Phir Hazrat Imam Ne Hazrat Zainul Aabideen Ko Bahot Si Wasiyate Farmaye. Aur Apne Seene Ke Baatini Uloom -O- Israar Se Unhe Sarfaraz -O- Faizyaab Farma Kar Apna Janasheen Banaya. Aur Khud Is Shaan Se Maidan Ka Qasd Farmaya Ke Misri Qubah Zebtan Farmayi Aur Aur Taburrukat Main Se Huzoor Rahmate Aalamﷺ  Ka Muqaddas Amamah Sar Per Baandha Aur Hazrat Sayyadush_Shohda Hamza رضی اللہ تعالی عنه  Ki Dhaal Pusht Per Rakhi, Aur Haidare Karraar Ki Talwar Zulfiqar Ka Gale Main  Haar Pehna Aur Tamam Ahle_Khileema Ko Sabr Aur Shukr Ki Wasiyat Farma Kar Aur Sab Ko Apna Aakhri Deedar Dikha Kar Ghode Per Sawar Ho Gaye.

Allahu Akbar!! Ahle_Kheema Ne Is Hosh-Ruba Manzar Ko Kin Aankho Se Dekha Hoga?? Naaz Ke Paale Bachcho'n Ke Saro Se Shafaqqat -E- Padari Ka Saya Uth Raha Hai. Aur Muqaddas Biwiyo Ka Suhaag Ruksat Ho Raha Hai. Gharibul Watan Bekas Musafiro Ka Qafila Hasrat Bhari Nigaho Se Apne Meere Kaarwa Ke Chehre Ka Aakhri Nazara Kar Raha Hai. Parda Nasheenaane Haram Khouf -O- Hiraas Aur Hasrat -O- Yaas Ki Khamoosh Tasweere Bani Huwi Khadi Hain. Aur Sab Ki Aankho Se Ashke Gham Ke Moti Tapak Tapak Kar Inke Qadmo Per Qurban Ho Rahe Hain.

Hazrat Imam Ne Sab Ko Khuda Ke Supurd Kiya Aur Maidane Jang Ki Taraf Rawana Ho Gaye. Kayi Din Bhook Pyaas Se Muzmahil Aur Bhaiyo , Beto, Bhatijo Ke Gham Se Nidhaal Hain. Aur Samne Hazaarha Khoon Ke Pyase Khoon Khwaro Ka Lashkar Samandar Ki Tarah Moujen Maar Raha Hai. Magar Husain Bin Ali Jin Ki Rago Ke Andar Khoon Ke Qatre Qatre Main Rasoole Khuda Ka Khoon ShaMil Tha. In Masa'ib -O- Aalaam Ke Hujoom Main Bhi Sabr -O- Tahammul Aur Azm -O- Isteqamat Ka Pahad Ban Kar Khoon-Khwar Ash'raar Ke Muqabil Mujahidana Shaan -O- Shoukat Ke Sath Khade Ho Gaye Aur Pehle Apni Pur Jalaal Aawaz Aur Mujahidana Lahje Main Ek Walwala Angez Rijz Padhi Jis Ke Chand Ash'ar Aap Bhi PadhLijiye.

(Tarjuma)

Hazrat Imam Ne Farmaya Ke Mere Baap Suraj Hain

Aur Meri Maa'n Chaand,

Aur Main Sitara Hon Aur In Duno Chand -o- Suraj Ka Beta Hon

Tamam MaKhLooq Main Kiska Nana Mere Nana Ke Misl Hai??

Aur Tamam Jin -O- Ins Main Koun Hai Jis Ki Maa'n  Meri Jaisi Ho,

Fatimah Zahra Meri Maa'n Hain, Aur Mere Baap Dul-Dul Sawaar

Aur Ek Kaman Se 2 Teer Chalane Wale Hain.

Mere Baap Ne Badre Waahid Aur Hunain Ki Ladayiyo Main Bade Bade Dilawaro Ko Shikast Dedi Hai.

Phir Aap Ne Ek Fasih-o-Baleegh Khutba Padha Jisme Apne Fazail Aur Apni Be-Gunahi Ko Aaftab -E-Nisfun Nihar Se Zyada Roshan -O- Aashkar Kar Diya. Chunancha Aap Ke Kalmat Tayyibaat Ko Sun Kar Yazeedi Lashkar Ke Bahot Se Log Mutassir Ho Kar Zaar-Zaar Rone Lage.  Lekin Shimar Waghaira Khabsa Ne Ye Dekh Kar Ke Hazrat Imam Ki Taqreer Se Logo Ke Quloob Mutassir Ho Rahe Hain Aur Hazrat  Imam Ki Haqqaniyat Aur Aap Ki Be-Gunahi Aur Mazlumiyat Ka Aaftab Tulu Ho Kar Logo Ke Dilo Main Ek Noorani Inqalaab Paida Kar Dega  To In Logo Ne Ek Dam Shor -O- Ghul Machana Shuru Kar Diya Ke Aap Ya To Yazeed Ki Bait Ki Jiye Ya Phir Jang Ke Liye Tayyar Ho Jayiye Iske Siwa Ham Khuch Sunne Ke Liye Tayyar Nahi Hain Hazrat Imam Ne Farmaya Ke Koor Baatino !! Mujhe Ma'aloom Hai Ke Tumhare Dilo Per Baatini Shaqawat Ki Mohar Lag Chuki Hai Lekin Mera Ye Khutba Sirf Itmame Hujjat Ke Liye Tha Taake Qiyamat Ke Din Tum Ye Na Keh Sako Ke Hamne Haq Aur Imame Bar Haq Ko Pehchana Nahi Tha Isliye La-ILmi Main Hamne Ahle_Bait Ka Khoon Bahaya Tha.

AlhamdulillAh !!! Ke Main Tumhara Ye Uzr Khatam Kar Chuka Ab Raha Yazeed Ki Bait Ka Sawal??? To Ye Mujh Se Kabhi Hargiz Nahi Ho Sakta Ke Main Batil Ke Samne Sar Jhukao'n  Aur Apna Paak Haath Yazeed Paleed Ke Na-Paak Haath Per Rakh Kar Bait Karo.

Lihaza Ab Tum Apna Irada Pura Kar Lo Aur Jisko Mere Muqabla Ke Liye Bhejna Chahte Ho Usko Mere Samne Bhej Do.  Ibne Sa'ad Ne Sabse Pehle Tameem La'eem Ko Jo Mulke Shaam Ka Ek Naam'war Sardar Tha Jang Ke Liye Bheja  Aur wo Behaya Yazeed Ke In'aam -O- Ikram Ke Lalach Main Ibne RasoolAllah ﷺ  Ka Sar Katne Ke Liye Nihayat Ghuroor Ke Sath Talwaar Chamkata Huwa Aaya Magar Abhi Waar Ke Liye Uska Hatah Utha Hi Tha Ke Hazrat Imam Ne Zulfiqar Ka Aisa Bharpoor Haath Maara Ke Tameem Ka Sar Kat Kar Gend Ki Tarah Door Ja Kar Gira. Phir "Yazeed Abtahi" Jiski Dila'wari Ki Iraaq -O- Misra Balke Sham -O- Rome Tak Main Dhoom Machi Huwi Thi  Nihayat Mutakabbirana Andaaz Main  Shaitani Chaal Chalta Huwa Hamla Ke Liye Badha Aur Ek Dam Achanak Hazrat Imam Per Talwar Chala Di Magar Aap Ne Uske Waar Se Bach Kar Uski Kamar Per Aisi Talwar Maari Ke wo Kakdi Ki Tarah Kat Kar 2 Tukde Ho Gaya Phir Ibne Sa'ad Ka Hukm Pa Kar Ek Teesra Sarkash Pehalwan Nara Maarte Aur Shoor Machate Huwe Aage Badha  Aur Badhe Ghamand Se Kehne Laga Ke Hussain Bin Ali !! Ab Hoshiyar Ho Jao Mai  Wo Jangjo Dila'war Hon Ke Pure Sham -O- Iraaq Main Mere Shuja'at Ka Danka Baj Raha Hai Ye Keh Kar Wo Mast Haathi Ki Tarah Jhoomta Huwa Aage Badha Aur Fouje Sharar Ko Yaqeen Ho Gaya Ke Ye Zaroor Imam Ka Kaam Tamam Kar Dega Imam Ne Uski Gustakhana Chaal Dekhi To Daantt Kar Farmaya Ke Ae_Shami Ga'nwar Ke Bete Tu Kiske Samne Itni Denge Maar Raha Hai?? Kya Tu Mujhe Pehchanta Nahi?? Hosh Ki Dawa Kar Idhar Udhar Mat Dekh Samne Nazar Kar Tere Muqabla Fatihe Khaibar Ali Haidar Ki Shuja'at Ka Waaris Shere Nar Khada Hai. Shami Pehalwan Ye Sun Kar Aur Zyada Taish Main Bhar Gaya Aur Cheekh Kar Bola Ke Husain !! Sambhalna Main Wo Shamsheer Marta Hon Ke Agar Pahad Per Maro To Pahad Surma Ban Jaye. Ye Kaha Aur Imam Per Talwar Chala Di Magar Imam Ne Iska Waar Khali De Kar Uski Kamar Per Zulfiqar Ka Ek Jinchatula Haath Maara To Aisa Ma'aloom Huwa Ke Ek Kheera Tha Jo Kat Kar 2 Tukde Ho Gaya Aur Is Zarbe Haidari Ki Haibat Se Zameen -E- Karbala Ka Zarra Zarra Dahel Gaya Aur Qudrat Pukar Uthi Ke..

•● Shaahe Mardaa'n Shere Yazdaa'n Quwwat-e-Parwardigar

Laa'Fatah ELLa Ali La Saifa ELLa Zulfiqaar ●•

Phir To Hazrate Imam Qehre ELaahi Ki Bijli Ban Kar Lashkare Ashraar Per Toot Pade Aur Jo Samne Aaya Ek Hi Waar Main Uska Kaam Tamam Kar Diya. Kisi Ko Neze Ki Ani Per Utha Kar Is Zoor Se Zameen Per Patka Ke Uski Haddiya Bhi Chakna Choor Ho Gayi Kisi Ko Uska Patka Pakadh Kar Jhatka Diya To Usko Ghode Se Zameen Per Patka Aur Us Per Ghoda Doudha Kar Ghode Ki Tap Se Usko Rond Kar Pamaal Kar Dala. Kisi Ki Pusht Per Talwar Maari To Wo 2 Tukdhe Ho Kar Ghode Se Gir Padha Kisi Ke Sar Par Zulfiqar Ka Waar Kiya To Khud Wo Maghfar Ke Purze Purze Udha Diye. Kisi Ki Gardan Par Shamshire Haidari Chalayi To Uska Sar Kat Kar Door Tak Ladakta Chala Gaya. Gharz Reteli Zameen Ko Dushmano Ke Khoon Se Rangeen Bana Dala Aur Registaane Karbala Main  Bahadduro Ke Saro Ko Khet Bo Diya Aur Aap Ki Haibat -O- Shuja'at Ka Dushmano Ke Dilo Per Aisa Sikka Betha Ke Yazeedi Lashkar Main Bhagdhar Mach Gayi Ibne Sa'ad Ne Jab Apne Lashkariyo Main Hol Aur Sari Fouj Ko Danowa-Dol Hote Dekha to Usne Ye Samajh Liya Ke Dast-Ba-Dast Ki Jang Main To Hamari Sari Fouj Bhi Is Haidari Shere Haq Ka Muqabla Nahi Kar Sakegi. Isliye Usne Muhasira Karke Hamla Karne Ka Mansuba Banaya. Chunancha Har Char Taraf Se Fouje Ashraar Ne Yalghar Karke Hazrat Imam Ko Gher Liya Phir Door Se Teer Andazi Ki Barish Shuru Kar Di. Yaha'n Takke Ek Zahar Main  Bujhaya Huwa Teer Hazrat Imam Ki Us Muqaddas Peshani Per Laga Jisko Hazaro'n Baar Mehbube Parwar Digar Ne Mohabbat -O-Pyar Se Chuma Tha. Teer Lagte Hi Khoon Ka Fawwara Chehra-E- Anwar Per Baha Nikla Aur Aap Ghash Kha kar Ghode Ki Zain Se Zameen Per Utar Pade. Phir Zaalimo Ne Neza -O- Shamsheer Ki Maar Se Is Qadar Zakhmi Kar Diya Ke Noorani Paikare Khoon Main Naha Gaya. Aur Aap Bahattar(72) Zakhm Kha Kar Zameen Per Beth Gaye. Aur Shaitan Sifat Sinaan Ne Seena -E- Aqdas Per Neza Mara Aur Aap Jab Sajde Main Gir Pade To Shimar Mardood Ne Talwar Mari Aur Aap Shaheed Ho Gaye...

♢♢ إِنَّا لِلّهِ وَإِنَّـا إِلَيْهِ رَاجِعونَ ♢♢

Ek Riwayat Main  Ye Bhi Aaya Hai Ke Das Sawaar Aap Ke Qatl Ke Liye Aage Badhe Magar Jo Samne Aata Khouf -O- Sharam Se Peeche Lout Jata. Lekin Shimar, Sinaan, Khouli, Shabal Ye Charo Khabsa Aap Ke Samne Aaye  Aur Shimar Mardood Aap Ke Sina-E- Aqdas Per Sawar Ho Gaya. Hazrat Imam Ne Farmaya Ke !!! Ae_Sitamgaaro !!! Aaj Jumu'ah Ka Din Hai Aur Suraj Dhal Gaya Hai. Ye wo Waqt Hai Ke Mere Nana Jaan Ki Ummat Ke Khutba Ya To Mimbaro Per Mere Nana Jaan Ka Khutba Padh Rahe Honge. Ya Namaze Jumu'ah Ada Kar Rahe Honge.

Afsoos !! Is Waqt Husain Bin Ali Aisi  Bekasi -O- Be-Basi Ke Aalam Main Hai Ke Namaze Jumu'ah Ada Nahi Kar Saka.

Lekin Ae_Shimar Tu Zara Der Ke Liye Mere Sine Se Hatt Ja Taake Main Jis Haal Main Bhi Hon Khuda Ka Farz Ada Karlo. Chunancha Hazrat Imam Ne Tayyamum Farma kar Namaz Shuru Kardi.

Qirat Bhi Padhli, Ruku Bhi Kar Liya, Sajda Bhi Kar Liya Magar Ye Sajda Imam Ki Namaz Ka To Pehla Hi Sajda Tha Magar Imam Aali Maqam Ki Zindagi Ka Yahi Aakhri Sajda Tha. Abhi Aapne Sajde Se Sar Nahi Uthaya Tha Ke Sinaan Ne Neza Mara Aur Shimar Ne Talwaar Chala Di Aur Aap Shaheed Ho Gaye.

Phir Khouli Ne Ya Shabal Ne Aage Badh Kar Sare Aqdas Ko Tane Mubarak Se Juda Kar Diya  Aur Hazrat  Imam Ka wo Muqaddas Khoon Jiske Ek Ek Qatra Ki Qeemat  Zameen -O- Aasman Aur Is Jaha'n Ka Sara Saamaan Bhi Nahi Ho Sakta. 

Yazeedi Sitamgaaro Ne 10_Moharram / Hijri:61 Jumu'ah h Ke Din Karbala Main Intehayi Be-Dardi Ke Saath Baha Diya.

Lekin Musalmano !!!! Karbala Ki Zameen Ka Zarra Zarra Qiyamat Tak Ye Pukarta Aur Aelaan Karta Rahega Ke...

•● Jo Zere Khanjar Qaatil Ada Namaz Kare

Namaz Aise Namazi Pe Kyun Na Naaz Kare ●•

Aaj Hazrat Imamgo Hamari Nazro Ke Samne Nahi Rahe Magar Unke Muqaddas Khoon Ka Qatra Qatra Qayamat Tak Aane Waali Musalman Naslo Ko Karbala Ki Zameen Se Ye Walwala Angez Aur Rangeen Paigham Deen Deta Rahega...Ke....

•● Khoo'n Main Nahao , Zakhm Saho, Sar Fida Karo,

Jab Waqt Aaye Deen Pe Yun Haq Ada Karo ●•

Marna To Sab Ko Hai. Magar Jigar Gosha-E- Rasool -O- Farzande Batoool Ne Sajde Main Sar Kata Kar Apne Nana Jaan Ki Ummat Ko

وَتَوَاصَوْا بِالْحَقِّ وَتَوَاصَوْا بِالصَّبْرِ ○

Ki Amli Tafseer Aur

وَلاَ تَمُوتُنَّ إِلاَّ وَأَنتُم مُّسْلِمُون○

َKa Ye Darse Hayaat Diya  Ke Muslamano Maro To Is Shan Se Maro Ke..

•● Halaq Per Tegh Chale, Sine Pe Jallaad Rahe,

Labpe Ho Naam Tera, Dil Main Teri Yaad Rahe ●•

Afsoos !!!

Ta'reekhe Islam Main  Ye Kaisa Khoon Rulane Wala Saaneha Hai ??

 Ke RasoolAllah ﷺ Ka Kalma Padhne Walo Hi Ne Ibne RasoolAllah ﷺ Ke Jism -E- Athar Per 72_Zakhm Laga Kar Unka Sar Kaat Liya   Aur Gulshane Rasool Ko Taakht -o- Taaraaj Karke Khanaye Ahle_Bait Ke Us Roshan Chiragh Ko Bhuja Diya Jisse Tamam  Duniya -E- Islam Main Hidayat Ki Roshni Thi.

Aah...Aah..!!! Is Sadma Jaan-Ka Se Dil Ghayal Qalb Majruh Jism Larza Bar'andam Aur Aankhe Ashkhbaar Hain.

Afsoos !!!! Sad Hazaar Afsoos !!

•● Ye Inayato Ki Jaza Mili, Ye Hidayato Ka Sila Mila

Jo Charagh Noor -E- Nabi Ka Tha , Use Karbala Main Bujha Diya ●•

•● Ye Husain Tera Hi Kaam Tha Ke Sab Apne Laal Fida Kiye

Tujhe In Sitaro Ne Doob Kar Shabe Gham Ka Chand Bana Diya ●•

•● Jo Husain Kheeme Main  Jayenge, Waha Jake Kisko Dikhayege

Jise Maa'n Ki Goad Se Laaye The, Use Zere Khaak Sula Diya ●•

•● Ye Sanan -O- Teer Ki Dawate, Ye Ali Ke Laal Ki Himmate,

Kabhi Noujawan Ka Jigar Diya, Kabhi Be-Zaban Ka Gala Diya ●•

•● Chaman Aap Apna Luta Gaye, Ke Bahare Deene Khuda Rahe,

Na Jama Jo Range Bahar Se, To Lahu Bhi Apna Mila Diya ●•

اَلصَّلواةُ  وَالسَّلاَمُ  عَلَيك يَا رَسُولَ اللهِ وَ عَلىٰ اٰلِکَ  وَاَصحَابِکَ یَاحَبِیبَ اللہ ﷺ.

【Ref>>> Haqqani Taqrire'n, S:253 to 260】