◆HAZRAT HUR KI JAAN_BAAZI◆
Karbala Ke In Jaanisarane Ahle_Bait Main Jinhone Duniya Ki Doulat-O-Izzat Ko Thokar Maar Kar Apni Azeez Jaano Ko Hazrat Imam Ke Qadmo'n Per Qurbaan Karke Duno Jahan Main Sarkhuruyi Haasil Ki. Unme Hur Bin Yazeed Riyahi Ka Naam Naami Bhi Qiyamat Tak Faramoosh Nahi Kiya Ja Sakta.
Hur Yazeedi Lashkar Main Ek Daste Ke Sipah_Salaar Ki Haisiyat Se Khade The. Magar Jis Waqt Ibne Sa'ad Ne Apne Lashkaro'n Ko Hazrat Imam Ki Taraf Yalghar Ka Hukm Diya To Ek Dam Hur Ke Chehre Par Intehayi Pareshani Aur Be-Qarari Ke Aasaar Namudar Hogaye. Chehra Zard Ho Gaya. Aur Khouf-O- Hiraas Se Qadam Dag Magane Lage.
Hazrat Hur Ke Bhai Janaab Mus'Ab Bin Yazeed Ne Jab Bhai Ka Ye Haal Dekha To Hairaan Ho Kar Kaha Ke Bhai Jaan....
Aap To Maidane KaareZaar Ke Bahot Purane Tajrube-Kaar Sheh_Sawaar Hain. Maidane Jang Aap Ke Liye Koyi Nayi Cheez Nahi. Aap Ne To Isse Pehle Bade Bade Khooni Manazir Dekhe'n Hain. Magar Aaj Aap Ka Kya Haal Hai??
Ke Aap Per Is Qadar Weh'shat-O-Dehshat Sawaar Hai Ke Aap Intehayi Pareshan-O- Be-Qarar Nazar Aa Rahe Hain.
Hur Ne Kaha Mere Pyare Bhai... Main Wo Bahaddur Nahi Ke Maidane Jang Dekh Kar Ghabrajao ,Main To Zarb-O- Harb Ko Baccho Ka Khel SamajhTa Hon.
Lekin Aaj Ki Jang Khuda Gawah Hai Ke Ye Allah-O-Rasool Se Jang Aur Apni Aaqibat Se Ladayi Hai. Is Liye Is Jang Ke Tasawwur Hi Se Mere Seene Me Dil Larz Raha Hai. Aur Mere Jism Ka Rongta Rongta Larza Bar'Andaam Ho Raha Hai. Bhai Mus'Ab -Main Ye Dekh Raha Hon Ke Ek Taraf Jannat Ke Khushrang Phool Khile Huwe Hain Aur Ek Taraf Aatishe Jahannam Shola-Zan Hai Aur Main Is Waqt Jannat-O-Jahannam Ke Darmiyaan Main Khada Hon.
Hazrat Hur Ne Bhai Ko Ye Jawab Dekar Ibne Sa'ad Ko Pukara___ Aur Kaha Ke Kya Waqa'Ee Tu Ibne RasoolAllah ﷺ Ko Qatal Kar Dalega???
Ibne Sa'ad Ne Kaha___ Haan Beshak - Sirf Imam Hussain Hi Ko Nahi Balke Main To Gulshane Nabuwwat Ke Ek Ek Phool Ko Masal Dalonga Aur Ahle_Bait Ke Ek Ek Bachche Ko Zabah Karke Dam Lunga. Hazrat Hur Ne Kaha Ke Kya Tujhe Hazrat Imam Ki Pesh Ki Huwi Musa'Lahat Ke Sharte Manzoor Nahi???
Ibne Sa'ad Ne Jhillakar Kaha Ke Bilkul Nahi. Ab To Hazrat Imam Se Jang Ke Siwa Khuch Kehna Hi Nahi Hai. Ibne Sa'ad Ka Ye Shararat Aamez Jawab Sun Kar Hazrat Hur Ke Dil Main Ekdam Haqqaniyat Ke Sekhdo'n Chiragh Roshan Ho Gaye Aur Aap Ne Tadap Kar Farmaya: Ke Ae_Mardood Tu Kal Qiyamat Ke Din Khuda Ke Saamne Kya Jawab Dega???
Aur Rasoole Khuda Ko Kya Muh Dikhayega??
Khuda Ki Qasam! Agar Mere Jism Ke Tukde Tukde Kar Diye Jaye'n Jab Bhi Mai Ibne RasoolAllah ﷺ Aur Noor-E-Chasme Haidare Karraar Per Talwar Nahi Utha Sakta..
Hur Ne Ye Kaha Aur Ek Dam Ghoda Kuda Kar Hazrat Imam Ki Khidmat Main Hazir Ho Gaya. Aur Qadam Boos Ho Kar Arz Karne Laga Ke Ae_Jigar Gosha-E-Rasool-O- Farzande Batool! Main Wahi Rusiyah Hon Jisne Aap Ka Rasta Roka Tha. Magar Khuda Ki Qasam Mujhe Ye Weham Bhi Nahi Tha Ke Yaha'n Tak Noubat Pohchegi. Aur Ye Badbakht Ashqiya Aap Ka Sar Kaatne Ke Liye Tayyar Ho Jayenge.
Lekin Behre Haal Main Ab Taa'yib Ho Kar Baargaahe Aali Main Haazir Ho Gaya Hon.. Lillah...Huzoor Wala Mere Jurmo Ko Apne Damane Afu-O-Karam Main Chupa Kar Ab Mujhe Ahle_Bait Per Jaan Qurbaan Karne Ki Ijazat Marhamat Farmaye'n.
Hazrat Imam Ne Hur Ko Apne Qadmo'n Se Otha Kar Seene Se Laga Liya Aur Ye Basharat Di Ke Main Ne Teri Khata Muaf Kar Di Aur Meri Dua Hai Ke Khudawande Sattar-O-Ghaffar Bhi Teri Touba Ko Qubool Farmaye.
Hur Hazrat Imam Ki Zaaban Se Ye Muzdah Jaan-Fiza Sun Kar Baagh Baagh Hogaya Aur Jang Ki Ijazat Paa Kar Maidane Jang Ki Taraf Rawana Huwe.Aur Ghoda Chamka Kar Bijli Ki Tarah Dushmanaane Ahle_Bait Ki Safo'n Per Qahre Elaahi Ban Kar Jhapta. Hur Ke Bhai Mus'Ab Ne Ye Dekha Ke Mera Bhai Nyamate-Daarain Se Sarfaraz Aur Doulat-E-Konain Se Mala Maal Hogaya. To Iske Dil Main Bhi Haqqaniyat Ka Wal Wala Aur Haq Shanasi Wa Haq Parasti Ka Jazba-O- Joosh Paida Ho Gaya. Aur Wo Bhi Ghoda Doudha Kar Bhai Ki Taraf Badha
Yazeediyo Ne Ye Samjha Ke Bhai Se Ladhne Ke Liye Jaa Raha Hai. Lekin Unki Hairat Ki Koyi Intehayi Na Rahi Jab Unhone Ye Dekha Ke Mus'Ab Janaab Hur Se Ye Kehne Laga Ke Mere Bhai ! Khuda Tera Bhala Kare Ke To Mere Liye Khizre Raah Ban Gaya Aur Tune Bahot Badi Hilakat Se Mujhe Najaat Dilayi. Mere Bhai! Main Abhi Tere Saath Ahle_Bait Ki Azmat Per Apni Jaan Qurbaan Karke Duno Jahan Ki Saltanat Izzat Ka Sultaan Banne Ki Tammanna Rakhta Hon. Hur Ne Khush Ho Kar Apne Bhai Mus'Ab Ko Gale Se Laga Liya Aur Duno Bhai Yazeedi Lashkar Ke Saamne Seena Tan Ke Joshe Jihaad Main Bhare Huwe Khade Ho Gaye Aur Pehle Hur Ne Maidan Me Main Nikal Kar Rajz Ka Ye Sher Padha...
●° Me Hur Hon Aur Main Mehmaan Nawaaz Hon
Me Talwar Se Tumhari Gardane Odha Dunga°●
Ibne Sa'ad Apne Lashkar Ke Ek Sipah Salar Yani Hur Ki Sherana Garajdaar Aawaz Sun Kar Ghabra Gaya Aur Usne Bahot Kuch Soch Bichar Kar Ek Bahot Hi Naami Pehalwan Yani Shaitan Sifat Safwan Ko Bheja. Ke Hur Ko Samjha Bujha Kar Mere Paas Le Aa... Aur Agar Wo Na Mane To Uska Sar Kaat Le.
Chunancha Safwan Chala Aur Hur Ke Paas Aa Kar Kehne Laga... Ke Ae_Hur ! Ham Teri Aqal -O- DaaNaayi Per Naaz Karte The.
Magar Aaj Ham Teri Naadaani Per Matam Karte Hain. Ke Tune Is Lashkare-Jarrar Se Nikal Kar Aur Yazeed Ke Gira Qadar , In'Aam-O-Ikram Ko Thukra Kar Un Chand Be-Kas Musafiro'n Ka Saath Diya Hai. Jinke Taushe Dano'n Main Roti Ka Ek Tukda Aur Jin Ki Mashko'n Main Paani Ka Ek Qatra Bhi Nahi Hai... Afsoos !!
Teri Aqal Kaha'n Maari Gayi??? Hur Ne Tadap Kar Jawab Diya Ke Mardod !! Mai Naadaani Nahi Kar Raha Hon.Balke Tum Log Apni Himaqat-O-Naadaani Ka Matam Karo. Ke Tum Logo Ne Taahir Ko Chod Kar Najis Ko Qubool Kiya Aur Duniya -E- Faani Ke Chand Dirham-O-Dinaar Ke Badle Aalame Baaqi Ki Anmol Aur Laa'Zawaal Nemato'n Ko Bech Dala..
Ae_Zalimo !!! Tum Main Se Koun Nahi Jaanta Ke Rahmate Aalamﷺ
Ne Hazrat Imam Hussain Ko Apna Phool Farmaya Hai. Magar Tum Log Gulshane Risalat Ke Is Phool Ko Masal Kar Paamaal Karne Ke Liye Tayyar Ho Gaye Ho.
Lekin Yaad Rakho Ke Jab Tak Mere Jism Main Khoon Ka Ek Qatra Bhi Baaqi Hai Main Gulshane Nabuwwat Ke Is Phool Per Aanch Nahi Aane Dunga. Main Yazeed Ke In'Aam-O- Ikram Ke Khazano'n Ko Thokar Maarta Hon Mujhe To Nalaine Mustafa Ko Apne Sar Ka Taaj Banane Ki Tamanna Hai. Tum Darya-E- Faraat Ke Paani Per Naaz Karte Ho. Magar Main Saaqi-E- Kousar Ke Muqaddas Hatho Se Kousar-O-Salsabeel Ka Jaam Pine Ka Ummeed Waar Hon.
"Safwan" Ne Bahot Kuch Charb Zabani Se Kaam Liya Magar Usne Jab Dekh Liya Ke Harzat Hur Ka Sina Ahle_Bait Ki Muhabbat Ka Safeena Ban Chuka Hai Aur Koyi Hirs Aur Lalach Iske Qadam Ko Jaadahe-Mustaqeem Se Bargashta Nahi Kar Sakti. To Usne Dhoke Se Janab Hur Ke Sine Per Ek Teer Maar Diya Janab Hur Teer Kha Kar Zakhmi Sher Ki Tarah Safwan Per Neze Se Hamla Aawar Huwe Aur Neza Ka Ek Aisa Bhar Pur Haath Iske Sine Main Mara Ke Sine Ko Chedhta Huwa Pusht Ke Paar Hogaya Aur Isko Ghode Ke Zain Se Neze Per Utha Kar Is Zoor Se Zameen Per Patka Ke Uski Gardan Toot Gayi Aur Wo Fouran Hi Margaya. Safwan Ke 3_Bhai Jo Bhaot Hi Naamwar Jangjo The , Apne Bhai Ko Yun Qatal Hota Dekh Kar Aapese Baher Ho Gaye Aur Pehle 2_Bahi Hur Ke Muqabale Per Aaye Aur Duno Ne Hur Per Ba Ek Waqt Hamla Kar Diya Magar Hur Ne Shamshire Aabdaar Ki Mujahidana Maar Se Duno Ka Sar Udha Diya. 3sra Bhai Bhag Nikla Lekin Hur Ne Ghoda Chamka Kar Uska Ta'aaqub Kiya Aur Bhagte Huwe Uski Peet Main Aisa Neza Mara Ke Sine Se Paar Ho Gaya Aur Wo Gashq Kha Kar Ghode Se Gir Pada Aur Hur Ne Shamsheer Ki Ek Zarb Se Uska Bhi Kaam Tamam Kar Diya. Safwan Aur Uske 3no Bhayiyo Ko Qatal Karke Janab Hur Hazrat Imam Ki Khidmat Main Haazir Ho Kar Arz Karne Lage Ke Ae_Ibne RasoolAllah ﷺ !!! Kya Aap Mujh Se Razi Hogaye??
Hazrat Imam Ne Farmaya Ke ...
نعم انت حر
Haan Beshak MainTujh Se Khush Hon Aur Tujhe Ye Khushkhabri Deta Hon Ke Tu Jahannam Se Aazad Hai. Janab Hur Ye Basharat Sun Kar Farte Musarrat Se Jhoom Uthe Aur Phir Maidan Main Aakar Intehayi Jaan Baazi Se Ladhne Lage Aur Bahot Se Zalimo'n Ko Qatal Karke Phir Imam Ke Saamne Aaye Aur Sukhi Zuban Dikha Kar Arz Karne Lage Ke Ae_Imam !! Ab Tishna Kami Had Se Badh Chuki Hai Aur Pyaas Ki Shiddat Na Qabile Bardasht Ho Chuki Hai. Imam Aali Maqam Ne Farmaya Ke Hur Mere Azeez Hur Zara Der Aur Sabar Karo Aur Raahe Haq Main Apna Sar Kata Kar Huzoor Saqi -E- Kousar Ke Muqaddas Haatho Se Jaame Kousar Pi Kar Sairab Ho Jao.
Hur Ye Khush Khabri Sun Kar Phir Maidane Jang Main Jaame Shahadat Ki Tamanna Main Sar Faroshana Jang Karne Lage Aur Lashkar-E-A'ada Per Aap Ki Shuja'At Ka Aisa Sikka Baith Gaya Ke Bade Bade Bahduro Ke Qadam Okhad Gaye. Lekin Ibne Sa'ad Ne Jab Apne Lashkariyo Ko Danta Ke Tum Log Ek Sipahi Ko Qatal Nahi Kar Sakte??
To Bahot Se Saffako Ne Aap Ka Muhasira Kar Liya Aur Aap Per Is Qadar Teer Barsane Lage Ke Aap Ka Ghoda Zakhmo Se Choor Ho Kar Zameen Per Gir Pada Aur Aap Paidal Ho Kar Ek Jame Ghafeer Se Tanha Ladhne Lage. Charo'n Taraf Se Teero Ke Minah Baras Raha Hai Aur Bahot Se Piyadah Aur Sawar Neza -O- Talwar Se Aap Per Waar Kar Rahe Hain. Magar Aap Azm-O- Isteqamat Ka Kohe Giraa'n Baar Bane Huwe Maidan Main Date Rahe. Yaha'n Tak Ke Ek Saffak Zalim Ne Aap Per Aisa Neza Chalaya Ke Aap Uske Kaari Zakhm Ki Taab Na La Sake Aur Ek Janisaar Wafadar Ki Tarha Daa'De Shuja'At De Kar Jigar Gosha-E-Rasool-O- Farzande Batool Ki Nusrat-O-Himayat Main Apni Jaan Qurban Karke Shahadat Se Sarfaraz Ho Gaye.
Imam Aali Maqam Hur Ko Maidane Jang Se Otha Kar Laaye Aur Apne Zaanu-E-Aqdas Per Unka Sar Rakh Kar Apne Damane At'har Se Unke Cehre Ke Gird-O- Ghubbaar Ko Saaf Karne Lage. Hur Main Abhi Zara Si Jaan Baqi Thi Aankhen Kholdi Aur Jab Ye Dekha Ke Mera Sar Farzande Rasool Ki Good Main Hai. To Apne Muqaddar Ki Khush-Bakhti Per Naaz Karte Huwe Firduose Baree'n Ko Rawan Ho Gaye...
إِنَّا لِلّهِ وَإِنَّـا إِلَيْهِ رَاجِعونَ.
Hazrath Imam Hur Ki Jaanisari -O- Wafadari Ko Yaad Karke Rote The Aur Yun Farmate Jate The....
●•• Hur Bin Yazeed Riyahi Bahot Hi Achcha Hur Hai,
Jo Nezo'n Ke Jamghate Main Bhi Sabir Raha ••●
●••Aur Hur Kitna Achcha Hai Ke Usne Husain Ko Pukara
Aur Subh Ke Waqt Usne Apni Jaan Ki Sakhawat Kardi••●
Hur Ki Shahadat Ke Ba'd Mus'Ab Aur Hur Ke Farzand Ali Bin Hur Aur Hur Ke Gulam Namra Ye 3no Bhi Intahayi Jaan_Baazi Ke Saath Yazidi Lashkar Se Ladte Huwe Jaame Shaha'dat Se Seraab Hogaye.
Algharaz Isi Tarha Ahle_Bait Ke Tamam Rufaqa -O- Jaanisaraan Noubat-Ba-Noubat Midane Jang Main Daade Shuja'At Dekar Apni Jaane Qurbaan Kar Chuke Aur 50 Se Zyada Jaanisaraane Ahle_Bait Shaheed Ho Chuke. Ab Sirf Khaandaane Ahle_Bait Baaqi Reh Gaye Hain Aur Dushmanaane Khoo'n_Khwar Unhi Ke Khoon Ke Pyase Hain Aur Jawanaane Ahle_Bait Bhi Go-Mutthi Bhar Hain. Magar Yazeediyo Ke Lashkare-Jarrar Ke Saamne Azm-O-Isteqamat Na-Qabile Taskheer Pahad Ban Kar Date Huwe Hain. Har Jawan Shouqe Shahadat Main Imam Ki Nusrat -O- Himayat Ke Liye Parwanawar Nisaar Hone Per Tayyar Hai. Na Kisi Ka Housla Past Hai. Na Koi Jang Se Faraar Ka Khawstgaar Hai. Har Ek Ki Yahi Tamanna Aur Har Ek Ka Yahi Israar Tha Ke Pehle Jaanisaari Ka Inko Mouqa Diya Jaye..
Chunanche Isme Koyi Shubah Nahi Ke Ahle_Bait -E- Nabuwwat Ke Noujawano'n Ne Khake Karbala Ke Safhath Per Apne Khoon Se Shuja'At -O- Jaanisaari Ke Jo Nuqoosh Banaye Hain. Qiyamat Tak Gardishe Lail-O-Nihar Unko Mita Nahi Sakti. KhaandaAne Asadullah Ghalib Ke Sherane Haq Main Apne Mujahidana Hamlo Se Karbala Ki Zameen Ko Zer -O- Zabar Kar Diya Aur Unki Asadullahi Talwaro Ki Zarb Se Bade Bade Bahadduron Ke Sino Main Dil Larazne Lage...
Hashmi Jawano Ne Karbala Ki Tish-Na-Zameen Ko Dushmano Ke Khoon Se Seraab Kar Diya. Inki Teghe Be-Niyam Dushmano Ke Liye Mout Ka Paigham Aur Inka Neza-O-Sanaan Zaalimo'n Ke Haq Main Qaza Ka Farman The. Jidhar Rukh Karte Dushmno Ki Safe Darham Barham Ho Jate Aur Ye Qalbe Lashkar Tak Pahoch Kar Istarah Dushmno Ka Qatle Aam Karte The Ke Goya Sawaar Maqtalo Ke Samandar Main Tair Raha Hai. Isi Tarah Har Hashmi Jawaan Apni Jaan-Bazi Aur Shuja'At Ke Johar Dikha Kar Aur Senkhdo'n Bad-Batino'n Ko Mout Ke Ghaat Utar Kar Imam Aali Maqam Per Apni Jaan Qurbaan Kar Ke Shaheed Hota Raha. Yazeedi Ye Samajhte Rahe Ke Hamne Inhe Maar Dala Aur Ye Log Mar Gaye. Lekin Zameene Karbala Ka Zarra Zarra Aur Saari Khudayi Pukar Rahi Thi Aur Khud Khuda Ye Aelaan Farmata Raha Hai Ke...
Yani Kabhi Koyi Apne Dil Main Ye Khayal Bhi Na Laye Ke Ye Log Mar Gaye..
Ye Murda Nahi Hain...
Balke Ye Log "Zinda" Hain.
SubhanAllah
Sarkar Aalahazrat رضى الله تعالى عنه Kya Khoob Farmaya Hain
●••Tu Zinda Hai WAllah
Tu Zinda Hai WAllah
Mere Chasme Aalam Se
Chup Jaane Wale ••●
Yun To Khaandaane Ahle_Bait Ke Har Ek Jawaan Ne Is Haq -O- Batil Ke Azeem Mu'arrika Main Intehayi Jazbaye Imaani Wa Joshe Islaami Ke Saath Apni Qeemti Jaan Ko Qurbaan Karke Duno Jahan Ki Sarkhuruyi Haasil Ki Aur Aisi Sarfuroshi Wa Jaan-Baazi Ke Saath Dushmanaane Deen Ka Muqabla Kiya Ke Karbala Ki Zameen Per Zarra Zarra Tehseen -O- Aafreen Ka Nara Buland Karne Laga.
Magar Is Waqt Chand Shohda -E- Ahle_Bait Ki Shahadato Ke Tafsili Manazir Ki Bhi Chand Jhalkiyan Apke Samne Likh Dete Hain...Take Aap Bhi Isko Padh Kar Apni Islami Rago'n Ke Qatrate Khoon MainJazba -E- Imaani Ki Hararat Mehsoos Karne Lage.
【Ref>>> Haqqani Taqrire'n, S:227 to 234】