◆Hazrat ALi AsGhar ◆
Abhi Imam Aali Maqam Ali Akbar Ki Laash Mubarak Ko Zameen Per Lita Kar Uthe Hi The Ke Hazrat Imam Ki Behan Hazrat Bibi Zainab Hazrat Imam Ke Sheer-Khwar Bachche Ali Asgar Ko Goad Main Liye Huwe Tashreef Laye'n.
Aur Kehne Lage Ke Bhai Husain !! Ab Hamse Ali Asgar Ki Pyaas Dekhi Nahi Jati. Bhooki Pyaasi Maa'n Ke Sine Main Doodh Khushk Ho Chuka Hai Aur Ye Sheer-Khawar Bachcha Pyaas Se Be-Taab Aur Tishnagi Ki Shiddat Se Tadap Tadap Kar Dam Tod Raha Hai.
Phool Jaisa Haseen -O- Rangeen Chehra Bhook Pyaas Aur Tapish Se Murjha Gaya Hai. Aur Iske Patle Patle GuLabi Rang Ke Hont Jiski Nazakat -O- Rangini Per Gulab Ki Kaliya Qurban Hoti Thi. Pyaas Ki Shiddat Se Kaale Padh Gaye Hain.
Iska Rona Bilakna Aur Tadapna Machalna Dekhne Ki Ab Hamare Andar Taab Nahi Hai. Isliye Bhaijaan Meri Ye Raay Hai Ke Aap Is Nahnhi Si Jaan Ko Maidan Main Le Ja Kar Sitamgaro Ko Dikhayiye.
Shayad In Sang Dilo Ko Is Bachche Ki Pyaas Per Raham Aajaye Aur Wo Chand Ghont Is Bachche Ko Pani Pila De.
Bahen Ke Israr Se Majboor Ho Kar Imam Aali Maqam Apne Noore Nazar Ali Asgar Ko Apni Goad Main Utha kar Siyah Dil Dushmano Ke Samne Tashreef Le Gaye. Ke Ae_Mere Nana Jaan Ka Kalma Padhne Walo Main Apne Tamam ShehzadaGane Ahle_Bait Ko To Tumhari Be-Rahmi Aur Joor -O- Jafa Ki Nazar Kar Chuka Ab Ye Mera Sabse Chota Bachcha Hai. Jo Gulshane Rasool Ka Sabse Nanhna Pouda Hai. Jo Pyaas Ki Shiddat Se Dam Tod Raha Hai. Mera Ye Be-Zuban Bachcha Isne Ab Tak Kisi Se Koyi Sawal Nahi Kiya Hai. Magar Aaj Ye Apne Nanhe Nanhe Haatho Ko Tumhari Taraf Phaila Kar Tum Se Darya -E- Faraat Ke Chand Ghont Paani Talab Kar Raha Hai. Agar Tumhare Baagi Hain To Ham Hain Tumhare Dushman Hain To Ham Hian.
Tum Hame Paani Mat Do. Magar Is Noor Ki Tasweer Aur Husn Ki Murat Ki Pyaas Per Raham Kha'o Aur Khuda Ke Liye Tum Mere Laal Aur Chamane Fatimah Ke Nou-Nihaal Ko Chand Ghont Darya-E- Faraat Ka Paani Pila Do. Main Wada Karta Hon Ke Maidane Mehshar Main Tumhe Apne Nana Jaan Ke Hath Se Bhar Bhar Pet Kousar -O- Salsabeel Ka Jaam Pila Dunga .
Abhi Hazrat Imam Ki Dil Hila Dene Wali Taqreer Jari Hi Thi Ke Hurmila Bin Kaahil Mardood Ne Zaher Ka Bujhaya Huwa Teer Aisa Nishana Baandh Kar Maara Ke Ali Asgar Ke Khush'k Halqoom Ko Chedta Huwa Hazrat Imam Ke Bazu Main Chub Gaya.
Hazrat Imam Ne Teer Kheench Kar Nikala To Khoon Ka Fawwara Ali Asgar Ke Gale Se Ubalne Laga. Pyase Bachche Ne Fouran Hi Dam Tod Diya. Aur Nanhi Si Laash Khoon Main Naha Gayi.
Hazrat Imam Ne Hasrat Bhari Nigah Aasman Ki Taraf Uthayi Aur
♢♢ إِنَّا لِلّهِ وَإِنَّـا إِلَيْهِ رَاجِعون ♢♢
َPadha. Aur Nanhe Shaheed Ki Laash Ko Apne Kaleje Se Chimtaye Aur Chadar Main Chupaye Huwe Aahista Aahista Kheema Ki Taraf Rawana Huwe. Kheema Ke Darwaze Per Hazrat Imam Ki Behan Dousri Parda Nashee'Naane Ahle_Bait Ke Saath Imam Ki Aamad Ka Intezar Kar Rahi Thi. Imam Ko Door Se Aata Dekh Kar Hazrat Bibi Zainab Hazrat Bibi Sakina Se Kehne Lage Ke Beti Sakina !!! Mujhe Aisa Maloom Hota Hai Ke Shayad Ali Asgar Ko Paani Mil Gaya. Aur Pyasa Bachcha Paani Se Sairab Ho Kar Baap Ki Goad Main So Gaya Hai. Kyunke Jab Bachcha Ja Raha Tha To Pyaas Se Tadapta Aur Machalta Huwa Gaya Tha , Lekin Ab Haath Pao Nahi Hilata Aur Bade Sukoon Se Baap Ki Goad Main Sota Chala Aa Raha Hai.
Lekin Hazrat Imam Ne Jab Kheema Main Pahonch Kar Khoon Main Nahayi Huwi Nanhe Shaheed Ki Laash Ko Chadar Main Se Nikala To Ye Manzar Dekh Kar Mustu'Raate Haram Ki Cheekh Nikal Gayi
•● Phire Waha Se Aaye Jo Laashaa Liye Shabbeer
Khadi Thi Devdhi Pe Aur Ro Rahi Thi Sab Dilgeer ●•
•● Qareeb Aake Ye Bole Husain Pur Tanveer
Sidhare Asgare Be-Sher Khaake Halaq Pe Teer ●•
•● Tumhara Maahe Liqa , Khoon Main Bhar Gaya Banu
Tadap Ke God Main Marhom , Mar Gaya Banu ●•
Hazrat Imam Ne Nanhi Si Laash Ko Behan Ki Goad Main Diya , Aur Farmaya Ke Behan Zainab !!!
Sabar Karo Aur Shukr Ada Karo Ke Khuda Ne Hamse Ye Sabse Choti Qurbani Bhi Qubool Farmali. Aur Behan Zainab !!! Khuda Ka Sajda -E- Shukr Ada Karo Ke Mujahidine Karbala Ka Sabse Nanha Sipahi Bhi Apne Khoon Ka Aakhri Qatra Raahe Haq Main Qurbaan Karke Duno Jahan Main Sar Khuru Ho Gaya.
Hazrat Bibi Zainab Ne Ali Asgar Ki Lash Ko Goad Main Liya , Aur Kehne Lage Ke Haye!!! Main Ab Isko Kis Tarah Is Ki Maa'n Ke Pass Lekar Jao'n?? Main To Isko Abhi Abhi Iski Maa'n Se Ye Keh Kar Layi Thi Ke Main Tere Bachche Ko Paani Pilane Ke Liye Le Ja Rahi Hon. Hazrat Zainab Ne Jis Waqt Maa'n Ki Gaod Main Ali Asgar Ki Laash Ko Diya To...
Maa'n Ne Haye Mera Laal !!! Keh Kar Laash Ko Apne Kalije Se Lagaliya. Aur Rote Huwe Kaha Ke Beta !!
Ek Martaba Aur Apni Maa'n Ke Sukhe Huwe Pistan Main Muh Lagalo Kyunke Ab Tumko Apne Sine Se Lagana Mujhe Kabhi Naseeb Nahi Hoga.
Haye Afsoos !!
○● Phool To Do Din Bahare Jaa'n Fiza Dikhla Gaye
Hasrate In Guncho Pe Hai Jo Bin Khile Murjha Gaye ●○
【Ref>>> Haqqani Taqrire'n, S:251 to 253】