◆HAZRAT ALI AKBAR RadiyAllahu Ta'Aala Anhu◆
Ab Imam Ke Samne Aap Ke Noore Nazar Hazrat Ali Akbar Haazir Hain. Aur Maidane Jang Ki Ijazat Talab Kar Rahe Hain.
Allahu Akbar..!!!
Ajeeb Waqt Hai Ke Chahita Beta Shafiqe Baap Se Sar Katane Ki Ijazat Talab Kar Raha Hai..
•● Agar Tu Sahebe Aulaad Hoga
Tujhe Aulad Ka Gham Yaad Hoga ●•
Dar Haqiqat Hazrat Imam Ke Liye Bade Imtehan Ka Waqt Tha. 18_Baras Ka Jawan Beta Budhape Ka Sahara Peeri Ka Aasa. Ijazat De To Kis Qalb-O- Jigar Se ????
Aur Nahi Ijazat Dete To Gulshane Risalat Ka Gul Shaadaab Rang -O- Gham Se Kamhlaya Jata Hai. Kyunke Is Aarzu Mand Shaha'Dat Ko Shouqe Jihaad Main Is Qadar Warafta Bana Diya Tha. Ke Agar Hazrat Imam Inko Maidane Jang Main Jane Se Rok Dete To Sad'maat Se Inke Sine Main Shisha-E- Dil Paash Paash Hojata. Chaar -O- Naachaar Hazrat Imam Ko Ijazat Deni Hi Padhi...
Hazrat Ali Akbar Ka Laqab "Shabi-E- Payamber" Hai. Yaani Inki Shakal -O- Surat Chehre Ka Naqsh Hubahu Jamaale Mustafa ﷺ Ka Aaina Tha. Hazraat Sahaba -E- Keraam رضی اللہ تعالی عنھم Ko Jab Deedare Muhammadi Ka Shouq Be-Taab Karta Tha To Door Door Se Safar Karke Madine Munawwara Aate The. Aur Ali Akbar Ke Chehre Anwar Ka Jamaal Dekhkar Inke Dilo Ko Tasalli Hasil Ho Jati Thi...
Ye Noor Ka Paikar Aur Tanveere Mustafa Ka Murq'Qa Jiske Jamale Surat Per Hazaro Ronayiya Tasadduq Aur Jis Ke Qadmo Per Noujawani Ki Lakho Bahare'n Qurbaan Ho Rahi The. Jis Waqt Maidane Jang Ka Irada Karke Rawana Hone Lage To Hazrat Imam Kheema Ke Andaar Tashreef Le Gaye. Aur Tabarrukaat Ka Sandooq Khool Kar Behtareen Tabarrukaat Jo Mahfooz The Nikaal Kar Laaye.
Aur Uruse Shaha'Dat Ki Goad Main Qiyamat Tak Sone Wale Dulha Ko In Muqaddas Tabarrukaat Se Aarasta Farma Diya Aur Apne Shehzaada Ali Akbar Ko Is Shaan Se Maidan Main Bheja Ke..
●• Quba -E- Rahmate Aalam Pehnayi Jisme Athar Per
Shahe Khaibar Ke Patke Se Kamar Baandhi Gayi Kas Kar •●
●• Sare Anwar Pe Rakha Khud, Apni Zarrah Pehnayi
Badhayi Joshane -O- Chaar Aaina Se Shaane Ronayi •●
●• Saja -E- Dast -O- Bazu -O- Neza -O- Shamsheer -O- Khanjar Se
Dua Mangi Utha Kar Daste Rahmat Rabbe Akbar Se •●
●• ELaahi Ye Mera LaKhte Jigar Hai Raahate Jaa'n Hai
Ye Teri Rah Main 100 Jaa'n Se Ab Hone Ko Qurbaan Hai •●
●• Khudawande Jahaa'n !!! Maqbool Farma Meri Qurbani
Ata Kar Sabr Isko Jab Ho Isper Teer Baaraani •●
●• Duaa-E- De Kaha Noore Nazar !! Jao Khuda Hafiz
Raahe Haq Main Adu Se Jang Farma'o !! Khuda Hafiz •●
Gharz Muqaddas Baap Ki Pyari Pyari Duaa'O Se Daa'man Bhar Kar Ye Asadullahi Sher Maidan Main Aaya. Aur Zulfiqare Haidari Chamka Ker Mujahidana Lahje Main Rijz Ka Ye Sher Padha...
●• Ana Aliyubni Husainubni Ali
Nahnu Ahlal Baiti Aula Bin'Nabi •●
Yani Giroh Ashqiya !! Tum Muje Jaan Lo Aur Pehchan Lo Ke Mera Naam Ali Akbar Hai. Aur Main Imam Hussain Ka Beta Hon Aur Imam Hussain Faatehe Khaibar Ali Haidar Ke Noore Nazar Hain.. Aur Yaad RakhLo Ke Ham "Ahle_Bait" Hain.
Aur Sunlo Ke Khuda Ke Is Aasmaan Neeche Aur Khuda Ke Is Zameen Ke Uper Khuda Ke Nabi Ka Ham Se Zyada Qaribi Rishtedaar Koyi Nahi Hai.
Shehzaade Ne Jis Waqt Ye Rijz Padhi ...To App Ki Mujahidana Haibat Se Registane Karbala Ka Zarra Zarra Kaanp Utha. Aur Kore Batin Yazeediyo Ko Jab Shabihe Payember Ali Akbar Ke Chehre Anwar Per Jamale Mustafa Ki Tajalliya Nazar Padhe To Wo Mehwe Hairat Ban Kar Ibne Sa'ad Se Puchne Lage. Ke Ye Koun Sawaar Aagaya???Ke Jiske Husn -O- Jamal Ki Tajalliya Nigaho Ko Khira Kar Rahi Hain.
Ibne Sa'ad Ne Kaha Ke Ye Imam Husain Ke Farzand Hain. Jo Jamale Surat Main Ham Shakle Mustafa Aur Jamale Seerat Warise Ali Murtada Hain..
Ye Sun Kar Yazeedi Fouj Main Ek Sannata Cha Gaya. Aur Unke Zameer Ki Aawaz Ne Unhi Jinjhoda Ke .
Allahu Akbar !! Tanweere Mustafa Ki Noorani Tasweer Per Koun Talwar Uthane Ki Jurraat Kar Sakta Hai?? Lekin Yazeed Paleed Ke In'Aam -O- Ikraam Ki Tama Ka Bhoot Unke Saro'n Per Sawaar Tha Aur Duniya Ki Hirs Ne Inhi Is Qadar Andha Bana Diya Tha Ke Wo Ahle_Bait Ki Qadar -O- Manzilat Aur Apne Kartoot Ki Shaa'mat -O- Nahusat Ko Jante Huwe Bhi Apni Shaqawat Se Baaz Nahi Aaye..
Aur Aale_Rasool Ke Khoon -E- Naahaq Ka Na Mitne Wala Dhabba Apni Peshaniyo Per Laga Kar Dono Jahaa'n Ki Rusiyahi Main Giraftar Aur Qehre Qahhar -O- Ghazbe Jabbar Ke Sazawar Bane!!!
Behre Kaif Ali Akbar Ne Aada Ki Safo Ki Saamne Khade Ho Kar Ek Nara Mara Aur Farmaya Ke Ae_Sitamgaaro !!! Agar Tumhe Aale_Rasool Ke Khoon Ki Pyaas Hai To Tumme Jo Sabse Zyada Bahaddur Ho , Usko Maidan Main Bhejo , Aur Tum Ko Zoore Baazu -E- Haidar Dekhna Hoto. Mere Samne Aao...... Seahzaade Aali Waqar Ki Mujahidana Lalkar Sun Kar Lashkare Ashraar Saham Gaya. Aur Kisi Main Bhi Ye Himmat -O- Jurraat Nahi Huwi Ke Zulfiqare Haidari Ka Saamna Karta Jab Baar Baar Ki Lalkar Ke Bawajood Koyi Khoonkhwar Aage Nahi Bada. To Aapne Fouran Hi Ghoda Khuda Kar Dushmno Ki Safo'n Per Hamla Kar Diya.. Aur Jis Taraf Rukh Kiya Sitamgaaro Ka Aahani Lashkar Kaayi Ki Tarah Phatta Chala Gaya. Ek Ek Waar Main Kayi Kayi Dev-Paikar Khoon Khwaro Ko Khere Aur Kakdi Ki Tarah Kaat Kar Dal Diya. Kabhi Lashkar Ke Maimana Per Qehre ELaahi Ki Bijli Girayi To Khouf -O- Hiraas Se Dila'Waro Ka Lashkar Zer -O- Zabar Ho Gaya.
Aur Kabhi Palat Kar Fouj Ke Muyassara Per Uqaab Ki Tarah Jhapte To Bahaduro Ki Safo Ko Darham Barham Kar Dala. Aur Kabhi Qalbe Lashkar Main Ghota Laga Kar Neza Ki Zarb Aur Talwar Ki Maar Ka Johar Dikhaya To Gardan Kasho Ke Sar_Mosame Khiza'n Ke Patto Ki Tarah Jhad Kar Girne Lage.
Har Taraf Ek Shor Barpa Ho Gaya... Aur Bade Bade Sorma'O Ke Ausaan Khata Aur Bade Bade Jang'Jo Bahaduro Ki Himmate Shikista Aur Housle Past Ho Gaye. Shere-Haq Ka Hamla Na Tha. Balke Qehre ELaahi Ka Ek Azaabe Azeem Tha. Jo Unke Saro Per Barqe Khaa'Tif Ban Kar Musallat Ho Gaya Tha. Har Taraf Kushto Ke Pushte Laga Diye. Aur Karbala Ki Zameen Ko Zalimo Ke Khoon Se Rangeen Bana Dala.
Lekin Teez Dhoop Tapta Huwa Registaan Jhulsa Dene Wali Garam Garam Lu Ke Thapede Main Doud Dhoop Aur Hamlo Ki Shiddat Ne Is Mujahide Jaa'n_Baaz Ko Pyaas Se Beqaraar Kar Diya. Chunancha Aap Palat Kar Hazrat Imam Ki Khidmat Main Aaye. Aur Meharbaan Baap Ko Apni Khushk Zuban Dikhakar Arz Kiya Ke
Abba Jaan Pyaas Ka Ghalba Hai Magar Yaha'n Paani Kaha Tha?? Jo Is Tishnaye Shaha'Dat Ko Sairab Kiya Jata...
Shafeeq Baap Ne Apni Angashtari Inaayat Farmayi Aur Kaha Ke Beta !! Isko Muh Main Rakh Lo. Muqaddas Baap Ki Mushaffiqana Tasalli Se Kuch Taskeen Huwi To Phir Razmgah Ka Rukh Kiya. Aur Farmaya Ke Ae _Girohe Ashraar !! Jis Ke Sar Per Mout Sawaar Ho Wo Mere Saamne Aaye Aur Zulfiqar Ka Maza Chakle. Aapne Kayi Baar Lalkar Kar Mubariz Talab Farmaya. Magar Kisi Bahaddur Ka Qadam Aage Nahi Bada. Aur Aisa Maloom Hota Tha Ke Bhooke Sher Ke Samne Bakriyo'n Ka Ek Galla Hai Jo Jaan Ke Khouf Se Dam Ba Khud Aur Larza Bar'andam Hai.
Ye Manzar Dekh Kar Ibne Sa'ad Ne Tariq Pehalwan Se Kaha. Ae_Tariq !! Bade Sharam Ki Baat Hai Ke Ek Akela Hashmi Noujawaan Maidan Main Tum Hazaro Ko Lalkar Raha Hai.. Magar Tumme Koyi Bhi Aisa Ghairatmand Nahi Hai. Jo Iska Muqabla Kare... Ae_Tariq !! Agar Tu Aage Badh Kar Is Noujawan Ka Sar Kaatle To Main Wada Karta Hon Ke Tujhe Abdullah Bin Ziyaad Se Mosal Ki Governari Ka Parwana Dila Dunga.. Duniya Ka Kutta Tariq Governari Ke Lalach Main Farzande Rasool Ka Khoon Bahane Ke Liye Doudh Pada.. Aur Neza Taan Kar Hazrat Ali Akbar Per Qatilana Hamla Kar Diya.. Magar Asadullahi Shuja'At Ke Waris Ne Kamaale Hunar Mandi Se Dushman Ke Waar Ko Rad Kar Diya.. Aur Khud Aage Badh Kar Tariq Ke Sine Main Aisa Neza Mara Ke Uski Peet Se Paar Hogaya. Aur Ladh-Khada Kar Ghode Se Gira.. Aur Girte Hi Margaya..
Aur Shehzaade Ne Apne Ghode Ki Taap Se Iski Lash Ko Rond Kar Uski HaddiyoKo Bhi Chakna Choor Kar Diya. Tariq Ke Bete Umru Bin Tariq Ne Apne Baap Ko Is Zillat Ke Saath Qatal Hote Dekha To Isper Khoon Sawaar Ho Goya. Aur Wo Gusse Main Aag Bagola Ho Kar Jhillaya Huwa Aage Badha. Aur Majnuno Ki Tarah Hazrat Ali Akbar Per Hamla Karne Laga. Magar Aapne Ek Hi Neza Ki Maar Se Usko Bhi Iske Baap Ke Pass Pahoncha Diya.. Tariq Ka Dosra Beta Talha Bin Tariq Baap Aur Bhai Ke Inteqam Lene Ke Liye Shola Jawala Ki Tarah Uchalta Kudta Talwar Lekar Ghode Per Sawaar Huwa Aur Hazrat Ali Akbar Per Chadh Daudha Magar Aapne Uska Patka Pakadh Kar Aisa Jhatka Diya Ke Ghode Se Girne Laga. Phir Aapne Usko Is Zoor Se Zameen Per Patka Ke Iska Dam Nikal Gaya. Aur Hazrat Ali Akbar Ki Haibate Haidari Se Yazeedi Lashkar Main Zalzala Aagaya.. Ibne Sa'ad Ne Gusse Main Aakar Misra Bin Ghalib Ko Hamla Ka Hukm De Diya. Chunancha Wo Nihayat Hi Mutakabbirana Andaz Main Neza Hilata Huwa Aap Ki Taraf Badha Aur Jaise Hi Usne Neza Tana Aapne Neza Per Aisi Talwar Mari Ke Uska Neza Qalam Hogaya. Aur Phir Iske Sar Per Talwar Ka Aisa War Kiya Ke Uska Sar Do Tukde Ho Kar Zameen Per Gir Padha. Ibne Sa'ad Ne Jab Ye Dekha Ke Ab Kisi Bahaddur Main Is Shere Haq Ke Muqabla Ki Taab -O- Himmat Nahi Hai To Usne Ek Bahaddur Pahelwan Ko Hukm Diya Ke Wo Ek Hazaar Sawaro Ko Saath Le Kar Pehle Inka Muhasira Kare..
Phir Door Se Teero Ki Barish Ki Jaye . Aur Jab Ye Shere Khuda Ka Sher Zakhmi Ho Kar Muzmahil Ho Jaye To Isko Nezo Se Ched Kar Talwar Se Qatal Kar Diya Jaye.
Chunancha Sitamshu'Aro'n Ne Yek'Baargi Charo Taraf Se Ghera'Daal Kar Teero Ki Barish Shuru Kar Di. Yaha'n Tak Ke Zakhmo Se Chakna Choor Ho Kar Chamane Fatima Ka Ghuncha-E- Hussain Apne Khoon Main Naha Kar Rangeen Ho Gaya..
Aur Ibne Numair Ne Aap Ke Sina-E- Anwar Per Aisa Neza Mara Ke Aap Ghode Ki Zain Se Zameen Per Tashreef Laye..
Aur Shafeeq Baap Ko Pukara Ke Abba Jaan !! Apne Noore Nazar Ko Sambhaliye Shehzaade Ki Pukar Per Hazrat Imam Be-Taabaana Ghoda Doudha Kar Maidan Main Pahonche Aur Aap Ko Utha Kar Kheema Me Laaye.. Aur Shabiya Payambar Ke Chehre Anwar Se Khoon Aalood Ghubar Apne Damane Athar Se Saaf Karne Lage. Itne Main Ali Akbar Ne Aankhe Khol Di Aur Aakhri Baar Hazrat Imam Ka Deedar Karke Hamesha Ke Liye Aankhe'n Band Kar Liye. Aur Bahishte Baree'n Ko Rawana Ho Gaye..
♢♢ إِنَّا لِلّهِ وَإِنَّـا إِلَيْهِ رَاجِعونَ ♢♢
Hazrat Imam Ne Baa-Dida-E- Tar Lakhte Jigar Ki Lash Ko Farshe Zameen Per Lita Kar Zabane Haal Se Ye Farmaya...
•● Jab Khaak Per Lita Chuke Laashe Pisar Imam
Taa'Der Roye Phir Ye Zameen Se Kiya Kalam ●•
•● Main Ibne Bu-Turaab Hon Mazloom -O- Tishna Kaam
Aur Hai Ye Mera Lakhte Jigar Badre Lalafaam ●•
•● Eeza Na Dijiyo Ke Mera Gule Zaar Hai
Barchi Ke Phal Se Iska Kaleja Figaar Hai ●•
•● Hasrat Zadah Jaha'n Se Utha Hai Ye Meh-Jabeen
Sun Sun Ke Iska Waqi'A Royege Momineen ●•
•● Tegho Se Paash Paash Hai Sab Jism Naaz'neen
Rakh Isko Ahtiyaat Se Daman Main Ae_Zameen ●•
•● 18 Saal Ki Hai Ye Doulat Husain Ki
Ab Hai Tere Supurd Amanat Husain Ki ●•
【Ref>>> Haqqani Taqrire'n, S:245 to 250】