Qurbani Ke Ahkaam -O- Masayil
◆QURBANI KE FAZAIL QUR'AAN MAJEED SE
Allah Ta'Aala Ne Hazrat Ibraheem Alaihissalam Aur Hazrat Ismail Alaihissalam Ke Waqi'ah Qurbani Ko Apne Kalame Paak Me'n Is Andaaz Se Bayaan Farmaya Hai.
ILaahi Mujhe Laayiq Aulaad De,
To Hamne Use Khush Khabri Sunayi Ek Aqal'Mand Ladke Ki,
Phir Jab Wo Uske Sath Kaam Ke Qabil Hogaya, Kaha Aye Mere Bete Me'n Ne Khwab Dekha. Me'n Tujhe Zibah Karta Hun. Ab To Dekh Teri Kya Ray Hai. Kaha Aye Mere Baap Kijiye Jis Baat Ka Aapko Hukm Hota Hai, Khuda Ne Chaha To Qareeb Hai Ke Aap Mujhe Sabir Payege, To Jab Un Dono'n Ne Hamare Hukm Par Gardan Rakhi Aur Baap Ne Bete Ko Maathe Ke Bal Litaya Us Waqt Ka Haal Na Pucch Aur Hamne Use Nida Farmayi Ke Aye Ibraheem Beshak Tune Khwab Sach Kar Dikhaya Ham Aisa Hi Sila Dete Hain Neko'n Ko, Beshak Ye Roshan Jaanch Thi,
Aur Hamne Ek Bada Zabiha Uske Fidya Me'n De Kar Use Bachaliya Aur Ham Ne Pichlo'n Me'n Uski Taareef Baqi Rakhi
Salaam Ho Ibraheem Par.
(Sure Al-Saaffaat , Ayat:100 to 109 , Kanzul Eemaan)
◆QURBANI KE FAZA'YIL AHADEESE MUBARAKA SE
Hazrat Zaid Bin Arqam RadiyAllahu Ta'Aala Anhu Ne Farmaya Huzoor Alaihissalato Wassalam Ke Sahaba Ne Arz Kiya Ke Yaa RasoolAllah ﷺ !
Ye Qurbaniya'n Kya Hain..??
Aapn Ne Farmaya Ye Tumhare Baap Hazrat Ibraheem Alaihissalam Ki Sunnat Hain.
Sahaba Ne Arz Kiya... Yaa RasoolAllah !
Kya Isse Hamko Sawaab Milega..??
Farmaya Har Baal Ke Badle Ek Neki Hai..
Arz Kiya Aur Oon Yaa RasoolAllah ﷺ !
To Aapne Farmaya Ke Oon Ke Har Baal Me'n Bhi Ek Neki Milegi.
(Ahmad , Ibne Maaja)
Hazrat Aayeshah RadiyAllahu Ta'Aala Anha Ne Kaha Ke Rasule Kareem Alaihissalato Wassalam Ne Farmaya Ke
Qurbaani Ke Ayyam Me'n Ibne Aadam Ka Koyi Amal Khuda-E-Ta'Aala Ke Nazdeek Khoon Bahane (Yaani Qurbani Karne) Se Zyada Pyara Nahi.
Aur Wo Janwar Qayamat Ke Din Apne Singo'n Baalo'n Khuro'n Ke Sath Aayega Aur Qurbani Ka Khoon Zameen Par Girne Se Qabl Khuda-E- Ta'Aala Ke Nazdeek Maqame Qubool Me'n Pahoch Jata Hai.
(Tirmazi , Ibne Maaja)
Hazrat Hansh RadiyAllahu Ta'Aala Anhu Ne Farmaya Ke Me'n Ne Hazrat Ali Karamallahu Wajahu Ko Do(2) Dumbe Zibah Karte Huwe Dekha Me'n Ne Pucha Ye Kya Hai..?
Unhone'n Farmaya Ke Huzoor Alaihissalato Wassalam Ne Mujhe Wasiyat Farmayi Hai Ke Me'n Huzoor Ki Janib Se Qurbani Kiya Karu'n To Me'n (Dusra Dumba Huzoor Ki Janib Se) Qurbaani Kar Raha Hun.
(Abu Dawood)
Hazrat Abu Hurairah RadiyAllahu Ta'Aala Anhu Ne Kaha Ke Huzoor Alaihissalato Wasalam Ne Farmaya Ke Jis Me'n Us'at Ho Aur Qurbani Naa Kare To Wo Hamari Eid'Gah Ke Qareeb Hargiz Naa Aaye.
(Ibne Maja)
Hazrat Umme Salmah RadiyAllahu Ta'Aala Anha Se Riwayat Hai Ke Nabi Kareem Alaihissalat Wa Tasleem Ne Farmaya Ke Jab Tum Baqra'Eid Ka Chand Dekho Aur Tum Me'n Ka Koyi Qurbani Karna Chahe To Usko Chahiye Ke Baal Mundwane, Tarshawane Aur Nakhun Katwane Se Ruka Rahe.
(Muslim)
(Ref>> Anwarul Hadees, S-361/362)
◆QURBANI KA WUJOOB
Qurbani : Ye Ek Maali Ibadat Hai Jo Har Ghani Par Wajib Hai Khaas Janwar Ko Khaas Din Me'n Allah Ke Liye Sawab Ki Niyyat Se Zibah Karna Qurbani Hai.
Musalman , Muqeem , Malike Nisaab , Aazaad Par Qurbani Wajib Hai.
Jis Tarah Qurbani Mard Par Wajib Hai Isi Tarah Aurat Par Bhi Wajib Hai.
(Durre Mukhtar)
Mas'alah: Musafir Par Qurbani Nahi Lekin Agar Nafil Ke Taur Par Kare To Kar Sakta Hai. Sawab Payega.
(Durre Mukhtar)
Malike Nisaab Hone Se Muraad Itna Maal Hona Ke Jitna Maal Hone Se Sadqah Fitr Wajib Hota Hai. Yani Haa'jate Asliyah Ke Aelawa 200-Dirham (Sadhe 52 Taula Chandi) Ya 20-Dinar (Sadhe 7 Taula Sona) Ka Maalik Ho.
(Durre Mukhtar -O- AalamGiri)
Jo Shakhs 200-Dirham Ya 20-Dinar Ka Malik Ho Ya Haajate Asliyah Ke Aelawa Kisi Aisi Cheez Ka Malik Ho Jiski Qimat 200-Dirham Ho To Wo Ghani Hai Us Par Qurbani Wajib Hai.
(Aalamgiri)
Agar Musafir MaalDaar Ho Aur Kisi Jagah 15-Din Qayaam Ki Niyyat Kare, Ya 12wi'n Tareekh Ko Suraj Ghuroob Hone Se Pehle Ghar Pohach Jaye, Ya Kisi NaDaar Aadmi Ke Pass12wi'n Tareekh Ko Ghuroob Shams Se Pehle Itna Maal Aajaye Ke Sahibe Nisaab Hojaye To In Tamam Surtho'n Me'n Us Par Qurbani Wajib Hojati Hai.
Hamare Haan Aam Taur Par Dekha Gaya Hai Ke KhanDaan Ya Ghar Ke Bade Ki Taraf Se Ya Ba'z Log Ghar Ke Har Fard Ki Taraf Se Qurbani Karte Hai.
Shara'ee Ta'alimaat Ye Hain Ke Jo Shakhs Nisaab Ka Malik Hai , Qurbani Usi Par Wajib Hai. Is Liye Apni Wajib Qurbani Karne Ba'd Agar Mazeed Iste'taa'at Hai To Ghar Ke Jis Fard Ki Taraf Se Chahe Nafli Qurbani KarLe Jab Tak Sahebe Nisaab Hai Har Saal Qurbani Karna Wajib Hai.
◆ QURBANI KA WAQT
Hazrat Jundab Bin Sufyan RadiyAllahu Ta'Aala Anhu Se Riwayat Hai Ke Hamne RasoolAllah ﷺ Ke Sath Qurbani Ki. Kuch Logo Ne Namaz Se Pehle Hi Qurbaniya'n Karli. Huzoor ﷺ Ne Jab Unko Dekha To Farmaya Jisne Namaz Se Pehle Qurbani Karli Usko Dubara Qurbani Dena Hogi.
(Nisaayi, Al-Sunan)
10wi'n Zul_Hijjah Ki Subah Sadiq Se 12wi'n Ke Ghuroob Aaftaab Tak Hai. Yaani 3-Din Aur 2-Raate'n Lekin 10wi'n Sab Me'n Afzal Hai Phir 11wi'n Phir 12wi'n.
Mas'alah: Shahar Me'n Qurbani Ki Jaye To Shart Ye Hai Ke Namaze Eid Ke Ba'd Ho Aur Dihaat Me'n Chunke Namaze Eid Nahi Isliye Subah Sadiq Se Ho Sakti Hai.
Mas'alah: Qurbani Ke Waqt Me'n Qurbani Hi Karni Laazim Hai Itni Qimat Ya Itni Qimat Ka Janwar Sadqah Karne Se Wajib Ada Na Hoga.
(AalamGir)
Mas'alah: Qurbani Ke Din Guzar Jane Ke Ba'd Qurbani Faut Hogi Ab Nahi Hosakti
Lihaza Agar Koyi Janwar Qurbani Ke Liye Khareed Rakha Hai To Usko Sadqah Kare Warna Ek Bakri Ki Qimat Sadqah Kare.
(Durre Mukhtar)
◆ QURBANI KA TARIQAH
Qurbani Ke Janwar Ko Zibah Se Pehle Chaara Paani Dede Pehle Se Cchuri Tez KarLe Lekin Janwar Ke Samne Nahi
Janwar Ko Baaye Pehlu Par Is Tarah Litaye Ke Qiblah Ki Taraf Uska Muh Ho Aur Zibah Karne Wala Apna Dahna Paao'n Uske Pehlu Par Rakh Kar Tez Cchuri Se Jald Zibah Karde Aur Zibah Se Pehle Ye Dua PadhLe:
انی وجهت وجهي للذى فطر السموات والارض حنيفا وما انا من المشركين ان صلاتى ونسكي ومحياى ومماتى لله رب العالمين○ لا شريك له وبذلك امرت وانا من المسلمين اللهم لك ومنك بسم الله الله اكبر.
Dua Khatam Karte Hi Cchuri Chala De Qurbani Apni Taraf Se Hoto Zibah Ke Ba'd Ye Padhe:
اللهم تقبل منى كما تقبلت من خليلك ابراهيم عليه السلام و حبيبك محمد صلى الله عليه و سلم.
Zibah Main Charo'n Rage'n Kaate'n Ya Kam Se Kam Teen(3) Isse Zyada Na Kaate'n Ke Churi Mohra Tak Pohach Jaye Ke Ye Be-Wajah Ki Takleef Hai Thanda Hone Par Paao'n Kaate'n Khaal Utare'n Agar Dusre Ki Taraf Se Zibah Kiya Hai To
منی
Ki Jaga
من فلا ں
Kahe. (Yaani Uska Naam Le)
Aur Agar Mushtarik Janwar Ho Jaise Gaay , Oont , Bhains To Falaa'n Ki Jaga Sab Shariko'n Ka Naam Le.
Mas'alah: Agar Dusre Se Zibah Karaye To Behtar Hai Ke Khud Bhi Hazir Rahe.
◆QURBANI KA JANWAR
Kin Janwaro'n Ki Qurbani Ho Sakti Hai :
Qurbani Ka Janwar... Oont , Gaay , Bhains , Bakri , Bhed Nar -O- Maadah. Khasi, Ghair-Khasi Sab Ki Qurbani Ho Sakti Hai.
(AalamGiri)
Mas'alah: Wehshi Janwar Jaise Hiran , Neel-Gaay , Bara-Singha Waghera Ki Qurbani Nahi Ho Sakti.
(AalamgGiri)
Mas'alah: Dumba Bhed Hi Main Dakhil Hai.
Masa'lah: Onnt_______ 5 - Saal
Gaay , Bhains_________ 2 - Saal
Bhed , Bakri___________1 - Saal
Ki Ho Ya Zyada Ki Isse Kam Ki Na-Jaaiz Hai.
Haan Agar Dumba Ya Bhed Ka Cheh(6) Maha Ka Baccha Itna Bada Hoke Door Se Dekhne Me'n Saal Bhar Ka Ma'aloom Hota Ho To Uski Qurbani Jaaiz Hai.
(Durre Mukhtar)
Mas'alah: Qurbani Ka Janwar Mota Taaza Aur Accha Hona Chahiye Aibi Naa Hona Chahiye Agar Thoda Sa Aeb Hoto Qurbani Hojayegi Magar Markruh Hogi Aur Agar Zyada Aeb Hai To Hogi Hi Nahi.
(Durre Mukhtar -O- AalamGiri)
Mas'alah: Munda Jiske Paidaishi Seeng Naa Hon Jaaiz Hai. Albatta Agar Seeng The Aur Toot Gaye Aur Meng (Goda) Tak Toot Gaye To Jaaiz Nahi Isse Kam Tota Hai To Jaaiz Hai.
(AalamGiri)
Mas'alah: Andha, Langda, Kaana, Behad Dubla, Kaan Kata, Dum Kata, Be-Daant Ka, Than Kata, Than Sokha, Naak Kata, Paidaishi Be-Kaan Ka Biamr, Khansa (Jiske Duno'n Nishaniya'n Hon), Jalala ( Jo Sirf Ghaleez Khata Ho) In Sab Ki Qurbani Jaaiz Nahi.
(Durre Mukhtar -O- Bahar)
Mas'alah: Bimari Agar Khafeef Hai Aur Langda Pan Halka Hai Ke Chal Phir Leta Hai Qurban'Gah Tak Ja Sakta Hai. Ya Kaan Naak Dum Tehayi Se Zyada Nahi Kate To Jaaiz Hai.
(Durre Mukhtar , Hidaya , AalamGiri)
Mas'alah: Qurbani Karte Waqt Janwar Uchla Quda Aur Usse Aebi Hogaya To Harj Nahi.
(Durre Mukhtar , Rudul Muhtar)
Masa'lah: Qurbani Ki Aur Peth Me'n Zinda Baccha Hai To Use Bhi Zibah Karde Aur Kaam Me'n La Sakta Hai Aur Mara Hoto Phenk De.
(Bahare Shari'at)
Mas'alah: Khareed Ne Ke Ba'd Qurbani Se Pehle Janwar Ne Baccha De Diya To Use Bhi Zibah Kar Dale Aur Agar Bech Diya To Uski Qimat Ko Sadqah Kare Aur Agar Ayyame Qurbani Me'n Zibah Naa Kiya To Zinda Sadqah Karde.
(AalamGiri-O-Bahar)
Mas'alah: Agar Janwar Sahi Saalim Kharida Tha Phir Us Me'n Koyi Aeb Mane'a Qurbani Paida Hogaya To Agar Khareed Ne Wala Gani Sahabe Nisaab Nahi Hai To Uske Liye Isi Aeb'Daar Janwar Ki Qurbani Jaaiz Hai. Aur Agar Ye Shakhs Ghani Sahabe Nisaab Hai To Us Par Laazim Hai Ke Us Janwar Ke Badle Dusre Janwar Ki Qurbani Kare
(Durre Mukhtar Waghera)
Faidah: Hamare Aaqa-O-Maula Hazrat Ahmad Mujtaba Muhammad Mustafa (Sallallahu Ta'Aala Alaihi Wa Sallam) Ke Karame Ameem Ko Dekho Ke Khud Us Ummate Marhumah Ki Taraf Se Qurbani Ki Aur Us Mauqa Par Bhi Ummat Ka Khayaal Farmaya
Lijaza Jis Musalman Se Ho Sake Wo Hazrat Ke Naam Ki Qurbani Kare To Kaisi Khush Naseebi Hai.
(Bahare Shari'at)
◆QURBANI MAIN SHIRKAT KE MASA'IL
Mas'alah: Jab Qurbani Ki Sharte'n Payi Jaye (Jinka Pehle Post Main Bayan Huwa) To Ek Bakri Ya Bheed Ka Zibah Karna Ya Oont , Gaay , Bhains Ka Saatwa'n (7wa) Hissah Wajib Hai. Isse Kam Nahi Ho sakta.
Yaha Tak Ke Agar Kisi Shareek Ka Hissah Saatwe'n (7we) Se Kam Hai To Kisi Ki Qurbani Sahi Na Hogi.
Haan Saat(7) Se Kam Shareek Hon Aur Hisse Bhi Kam-o-Besh Hon Lekin Kisi Ka Hissah Saatwe'n (7we) Se Kam Na Ho To Jaaiz Hai.
Mas'alah: Qurbani Ke Sab Shariko'n Ki Niyyat Taqarrub (Yaani Sawaab Pana) Hona Chahiye Khaali Ghosht Haasil Karna Na Ho
Lihaza Aqeeqah Karne Waala Shareek Ho Sakta Hai (Ke Aqeeqah Bhi Taqarrub Ki Ek Surath Hai.
(Durre Mukhtaar)
◆QURBANI KE GOSHT AUR KHAAL KE MASA'YIL
Agar Janwar Mushtarik Hai To Gosht Taul Kar Taqseem Kiya Jaye Utkal Se Na Baate'n Ke Agar Kisi Ko Zyada Pohach Gaya To Dusre Ke Mu'af Karne Se Bhi Jaaiz Na Hoga Ke Haq Sharaa Hai.
(Rudul Muhtar -O- Bahar)
Phir Apne Hisse Ke Teen(3) Hisse Karke Ek Hissah Faqiro'n Ko Dede'n Aur Ek Hissah Dosto'n Ko Aur Azeezo'n Ko De. Aur Ek Hissah Apne Ghar Walo'n Ke Liye Rakhe Khud Bhi Khaye Baal Baccho'n Ko Bhi Khilaye Agar Ghar Wale Zyada Hoto Kul Ghar Ke Sarf Me'n La-Sakta Hai. Aur Kul Sadqah Bhi Kar Sakta Hai Agarche Ek Hissah Apne Liye Behtar Hai.
Mas'alah: Agar Mayyat Ki Taraf Se Qurbani Ki To Uske Gosht Ka Bhi Yahi Hukm Hai. Albatta Agar Mayyat Ne Kaha Tha Ke Meri Taraf Se Qurbai Kar Dena To Is Surath Me'n Kul Gosht Sadqa Karde.
Mas'alah: Qurbani Agar Mayyat Ki Hai To Uska Gosht Na Khud Kha Sakta Hai Na Ghani Ko Khila Sakta Hai Balke Usko Sadqa Kar Dena Wajib Hai.
Mas'alah: Qurbani Agar Minnat Ki Hai To Uska Gosht Naa Khud Khaa Sakta Hai Naa Aghniyaar Ko Khila Sakta Hai Balke Usko Sadqah Kar Dena Wajib Hai Wo Minnat Manne Waala Faqeer Ho Ya Ghani Dono'n Ka Ek Hi Hukm Hai Ke Khud Nahi Khaa Sakta Naa Ghani Ko Khila Sakta Hai.
(Bahare Shari'at)
Masa'lah: Qurbani Karne Wala Baqra-Eid Ke Din Sab Se Pehle Qurbani Ka Gosht Khaye Ye Mustahab Hai.
(Behrul Raa'yiq)
Mas'alah: Qurbani Ka Gosht Kafir Ko Na De (Ke Yaha'n Ke Kuffar Harbi Hai).
Masa'lah: Chamda , Jhoul , Rassi , Haar , Sab Sadqah Karde Chamde Ko Khud Apne Kaam Me'n Bhi La-Sakta Hai.
Maslan______ Doul Ja-Namaz Bichona Waghairah Bana Sakta Hai Lekin Bech Kar Qimat Apne Kaam Me'n Lana Jaaiz Nahi Agar Bech Diya To Us Qimat Ko Sadqah Karna Wajib Hai.
(Durre Mukhtar -O-Rudul Muhtar)
Mas'alah: Aaj Kal Aksar Log Khaal Dini Madrasa Me'n Diya Karte Hai Ye Jaaiz Hai Agar Madrasa Me'n Dene Ki Niyyat Se Khaal Bech Kar Qiamat Madrasa Me'n Dede'n To Ye Bhi Jaaiz Hai.
(AalamGiri-O-Bahar)
Masa'lah: Qurbani Ka Gosht Ya Chamda Qasaab Ya Zibah Karne Wale Ko Mazduri Me'n Nahi De Sakta Haan Agar Dosto'n Ki Tarah Hadyatan Hissah Diya To De Sakta Hai Jabke Use Ujrat Me'n Shumar Na Kare.
(Hidaya Waghera)
Masa'lah: Ba'z Jaga Qurbani Ka Chamda Masjid Ke Imam Ko Dete Hai Agar Tankhwa Me'n Naa Diya Jaye Balke Bataure Madad Ke De'n To Harj Nahi.
(Bahar Waghera)
(Ref>>> Qanoon-E-Shari'at)
Note:- Shari't Ke Mutabiq Zibah Kiye Huwe Halaal Janwar Ke Mandarjazail Aaza Khane Mana Hain.
Dum Masfookh (Zibah Ke Waqt Behne Wala Khoon) ,
Zakar (Nar Janwar Ka Aala-E- Tanasul) ,
Gaay , Bakri Ke Peshaab Ki Jaga (Farj) ,
Khasitain (Kapure)
Masana , Dubar (Janwar Ke Pakhane Ki Jaga),
Haraam Magraz, Ojhdi Aur Aante'n In Me'n Dume Masfooh Haraam Qatayi Aur Qurbani Makruhe Tehreemi Hai.
( Hawala: Bahare Shari'at -O- Qanoon-E- Shari'at -O- Anwarul Hadees)