MASA'ILE FIQHIYAH (Zakaat Ka Bayaan)

●●●MASA'ILE FIQHIYAH●●●

Zakaat  Shari'at Main Allah Ke Liye Maal Ke Ek Hissa Ka Jo Shara Ne Muqarrar Kiya He, Musalman Faqeer Ko Maalik Kar Dena He Aur Wo Faqeer Na Haashmi Ho , Na Haashmi Ka Aazaad Karda Gulaam Aur Apna Nafaa Usse Bilkul Juda Kar Le.

(📙Durre Mukhtar)

●Maslah 1: 

Zakaat Farz He. Iska Munkir  Kafir Aur Na Dene Wala Fasiq Aur Qatl KaMustahiq Aur Ada Main Taa'Kheer Karne Wala Gunehgar -o- Mardudush'Shuhadah He

(📙AalamGiri)

●Maslah 2: 

Mubah Kar Dene Se Zakaat Ada Na Hogi. Maslan...Faqeer Ko Ba-Niyat Zakaat Khana Khila Diya. Zakaat Ada Na Huwi Maalik Kar Dena Nahi Paya Gaya Haan Agar Khana De Diya Ke Chahe Khaye Ya Le Jaye To Ada Hogayi. Yu Hi Ba-Niyat Zakaat Faqeer Ko Kapda De Diya Pehna Diya Ada Hogayi.

(📙Durre Mukhtaar)

●Maslah 3: 

Faqeer Ko Ba-Niyat Zakaat Makaan Rehne Ko Diya , Zakaat Ada Na Huwi  Ke Maal Ka Koyi Hissa Use Na Diya Balke Manfa'at ( Nafa , Faida Hasil Hona) Malik Kiya.

(📙Durre Mukhtaar)

● Maslah 4:

 Maalik Karne Main Ye Bhi Zaruri He Ke Aise Ko De Jo Qabza Karna Janta Ho Yaani Aisa Na Ho Ke Phenk De Ya Dhoka Khaye Warna Ada Na Hogi.

Maslan_____ Nihayat Chote Baccha Ya Pagal Ko Dena Aur Agar Bacche Ko Itni Aqal Na Ho To Uski Taraf Se Uska  Baap Jo Faqeer Ho Ya Wasi Ya Jiski Nigrani Main He Qabza Kare.

(📙 Durre Mukhtaar, Rudul Muhtaar)

●Maslah 5: 

Zakaat Wajib Hone Ke Liye Chand Sharte'n Hain..

1 》 Musalmaan Hona. Kafir Par Zakaat Wajib Nahi. Yani Agar Koyi Kafir Musalman Huwa To Use Ye Hukm Nahi Diya Jayega Ke Zaman Kufr Ki Zakaat Ada Kare.

(📙Aamah Kutub)

Ma'AZAllah Koyi Murtad Hogaya To Zamana Islam Main Jo Zakaat Nahi Di Thi Saaqit Hogayi.

(📙 AalamGiri)

●Maslah 6:

  Kafir Darul Harab Main Musalmaan Huwa , Aur Wahi Chand Baras Tak Iqaa'mat Ki Phir Darul Islaam Main Aaya. Agar Saal Ki Zakaat Nahi Di To Unki Zakaat Wajib He AgarChe Kehta Ho Ke Mujhe  Farziyat  Zakaat Ka ILm Nahi Ke Darul Islaam Main Jahal Uzr Nahi.

(📙AalamGiri Wagera)

2 》 Baloog.

3 》Aqal ,  Naa'Balig  Par Zakaat Wajib Nahi Aur Junoon Agar Pure Saal Ko GherLe To Zakaat Wajib Nahi Aur Agar Saal Ke Awwal Aakhir Main Ifaqa (Hosh Main Aana)   Hota He Agarche Baaqi Zamana Junoon Mai Guzarta He To Wajib He,

Aur Junoon Agar Asli Ho Yani Agar Junoon Hi Ki Haa'Lat Main Baloog Huwa To Uska Saal Hosh Aane Se Shuru Hoga. Yuhi Agar Aarzi He Magar Pure Saal Ko Gher Liya To Jab Ifaqa Hoga  Us Waqt Se Saal Ki Ibteda Hogi.

(📙 Joherah, AalamGiri, Rudul Muhtaar)

● Maslah 7: 

Bohare Par Zakaat Wajib Nahi. JabKe Isi Haa'Lat Main Pura Saal Guzre Aur Agar Kabhi Kabhi Use Ifaqa Bhi Hota He To Wajib He. Jis Par Gashi Tauri  Huwi Uspar Zakaat Wajib He Agarche  Gashi Kaamil  Saal Bhar  Tak Ho.

(📙AalamGiri, Rudul Muhtaar)

4 》 Aazaad Hona. Gulaam Par Zakaat Wajib Nahi Agarche Mazoon Ho (Yaani Use Maalik Ne Tijarat Ki Ijazat Di Ho) Ya Makaatib Ya Ummul Wald  Ya Mustas'Aa (Yaani Gulaam Mushtarik Jisko Ek Shareek Ne Aazaad Kar Diya Aur Chunke Wo MaalDaar Nahi He  Is Waja Se Baqi Shariko Ke Hisse Kama Kar Pure Karne Ka Use Hukm Diya Gaya)

(📙AalamGiri Wagera)

●Maslah 8: 

 Mazoon Gulaam Ne Jo Kuch Kamaya He Uski Zakaat Na  Uspar He Na Uske MaaLik Par Haan Jab Maalik Ko De Diya To Ab In Barso Ki Bhi Zakaat Maalik Ada Kare Jab Ke Gulaam Mazoon Deen Main Mustagraq (Duba Huwa) Na Ho Warna Uski Kamayi Par Mutlaqan Zakaat Wajib Nahi Na Maalik Ke Qabza  Karne Ke Pehle Na Ba'd.

(📙Rudul Muhtaar)

●Maslah 9:

Makaatib Ne Jo Kuch Kamaya  Uski Zakaat Wajib Nahi, Na Uspar Na Uske Maalik Par. Jab Maalik Ko Dede Aur Saal Guzar Jaye Ab Ba-Shara'it Zakaat Maalik Par Wajib Hogi Aur Guzishta Barso Ki Wajib Nahi.

(📙 Rudul Muhtaar)

5 》 Maal Baqadr Nisaab Uski  Milk Main Hona Agar Nisaab Se Kam He To Zakaat Wajib Na Huwi.

(📙 Tanweer , AalamGiri)

6 》 Pure Taur Par Uska Maalik Ho Yaani Uspar Qaabiz Bhi Hin.

●Maslah 10:

 Jo Maal Gom Gaya Ya Darya Main Girgaya Ya Kisi Ne Gasab Kar Liya Aur Uske Paas Gasab Ke Gawah Na Hon Ya Jangal Main Dafan Kar Diya Tha Aur Ye Yaad Na Raha Ke  Kaha Dafan Kiya Tha , Ya Anjaan  Ke Paas Amanat Rakhi Thi Aur Ye Yaad Na Raha Ke Wo Kon He Ya Madyoon Ne Deen Se Inkaar Kar Diya Aur Uske Paas Gawah  Nahi Phir  Ye Amwaal Mil Gaye To Jab Tak Na Mile  The Us Zamane Ki Zakaat Wajib Nahi.

(📙Durre Mukhtaar , Rudul Muhtaar)

● Maslah 11:  

Agar Deen Aise Par He  Jo Uska Iqraar Karta He Magar Ada Main Der Karta He  Ya Naa-Daar He Ya Qaazi Ke Yaha Uske Muflis Ka Hukm Ho Chuka He Ya Wo Munkir He Magar Uske Paas Gawah Maujood Hain To Jab Maal Milega  SaalaHaaye Guzishta Ki Bhi Zakaat Wajib He .

(📙Tanweer)

● Maslah 12: 

Charaayi Ka Janwar  Agar Kisi Ne  Gasb (Zabardasti Kisi Ka Haq Ya Maal Cheen Lena) Kiya Agarche Wo Iqraar Karta Ho To Milne Ke Ba'd Bhi Us Zamane Ki Zakaat Wajib Nahi.

(📙Khaaniyah)

● Maslah 13:

 Gasb Kiye Huwe Ki Zakaat  Gaasib( Kisi Ka Haq Marne Wala)  Par Wajib Nahi Ke Ye Uska Maal Hi Nahi Balke Gaasib Par Ye Wajib He Ke Jiska Maal He Use Wapas De Aur Agar Gaasib Ne Us Maal Ko Apne Maal Main Khalt(Milana)  Kar Diya Ke Tameez Na-Mumkin  Ho Aur Uska Apna Maal Baqr Nisaab He To Majmo'a Par Zakaat Wajib He.

(📙Rudul Muhtaar)

● Maslah 14: 

Ek Ne Dusre Ke Maslan Hazaar(1000) Rupe Gasb Kar Liye Phir Wahi Rupe Usse Kisi Aur Ne Gasb Karke Kharch Kar Dale Aur In Duno Gaasibo'n Ke Paas Hazaar Hazaar Rupe Apni Milk Ke Hain To Gaasib Awaal Par  Zakaat Wajib He Dusre Par Nahi.

(📙AalamGiri)

● Maslah 15: 

Shay Marhoon (Girwi Rakha Huwa) Ki Zakaat Na Murtahin(Raahin Rakhne Wala)  Par He Na Raahin(Girwi Rakhne Wala) Par. Murtahin To MaLik Hi Nahi Aur Raahin Ki Milk Taam Nahi Ke Uske Qabz Main Nahi Aur  Ba'd Rahin  Chudane Ke Bhi Un Barso  Ki Zakaat Wajib Nahi Aur Qabza Ke Wagerah)

●Maslah 16:

 Jo Maal Tijarat Ke Liye Kharida Aur Saal Bhar Tak UsPar Qabza Na Kiya To Qabza Ke qabl Mushtari Par Zakaat Wajib Nahi Aur Qabza Ke  Ba'd Us Saal Ki Bhi Zakaat Wajib He.

(📙Durre Mukhtar  ,Rudul Muhtar)

7 》 Nisaab Ka Dain  Se Faarig Hona.

●Maslah 17: 

 Nisaab Ka Maalik He Magar Uspar Dain He Ke Ada Karne Ke Ba'd Nisaab Nahi Rehti To Zakaat Wajib Nahi Khwa Wo Dain  Banda Ka Ho Jaise Qarze ' Zire ' Saman ' Kisi Cheez Ka TaaWaan Ya Allah Azza-o-Jal Ka Deen Ho , Jaise Zakaat , Khiraaj  Maslan Koyi Shakhs Sirf Ek Nisaab Ka Maalik He Aur Du Saal Guzar Gaye Ke Zakaat Nahi Di To Sirf Pehle Saal Ki Zakaat Wajib He Dusre Saal Ki Nahi Ke  Pehle Saal Ki Zakaat Uspar Dain He Uske Nikaalne Ke Ba'd Nisaab Baaqi  Nahi Rehti Lihaza Dusre Saal Ki Zakaat Wajib Nahi.  Yuhi  Agar Teen(3) Saal Guzar Gaye Magar Tisre Main Ek Din Baqi Tha Ke Paanch(5) Dirham Aur Haasil Huwe. Jab Bhi Pehle Hi Saal Ki Zakaat Wajib He  Ke Dusre Aur Tisre Saal Main Zakaat Nikaalne Ke Ba'd Nisaab Baqi Nahi , Haan Jis Din Ke Wo Paanch(5) Dirham Haasil Huwe Us Din Se Ek Saal Tak Agar Nisaab Baqi Reh Jaye To Ab Is Saal Ke Pure Hone Par Zakaat Wajib Hogi. Yuhi Agar Nisaab Ka Maalik Tha Aur Saal Tamaam Par Zakaat Na Di Phir Sare Maal Ko Halaak Kar Diya Phir Aur Maal Hasil Kiya Ke Ye Baqadr  Nisaab He Magar Saal Awwal Ki Zakaat Jo Uske Zimma Deen He Us Main Se Nikaale To Nisaab   Baqi Nahi Rehti To Is Naye Saal Ki Zakaat Wajib Nahi Aur Agar Us Pehle Maal Ko Usne Qasdan Halaak Na Kiya Balke Bila Qasad Halaak Hogaya To Uski Zakaat Jati Rahi  Lihaza Uski Zakaat Deen Nahi , To Is Surath Main Is Naye Saal Ki Zakaat Wajib He.

(📙AalamGiri ,Rudul Muhtaar )

●Maslah 18:

Agar Khud Madyoon Ka Kafeel He, Aur Kafalat Ke Rupe Nikaalne Ke Ba'd Nisaab Baqi Nahi Rehti , Zakaat Wajib Nahi.

Maslan__ Zaid Ke Paas Hazaar Rupe Hain Aur Umro  Ne Kisi Se Hazaar Qarz Liye Aur Zaid Ne Uski Kafalat Ki To Zaid Par Is Surath Main Zakaat Wajib Nahi Ke Zaid Ke Paas Agarche Rupe Hain Magar Umro Ke Qarz Main Mustagraq Hain Ke Qarz Khwa Ko Itkhtiyaar He Zaid Se Mutaleba Karke Aur Rupe Na Milne Par Ye Ikhtiyaar He Ke Zaid Ko Qaid Kara De To Ye Rupe Dain Main Mustagraq Hain Lihaza Zakaat Wajib Nahi Aur Agar Umro Ki Das Shakhso Ne Kafalat Ki Aur Sab Ke Paas Hazar Hazar Rupe Hain Jab Bhi Un Main Kisi Par Zakaat Wajib Nahi Ke Qarz Khwa Har Ek Se Mutaleba Kar Sakta He Aur Ba-Surath Na Milne Ki Jisko Chahe Qaid Kara De. 

(📙Rudul Muhtaar)

●Maslah 19: 

Jo Dain  Mi'Aadi Ho Wo Mazhab Sahi Main Wujoobe Zakaat Ka Mana Nahi.

 (📙Rudul Muhtaar)

Chunke Adatan Dain Mehar Ka Mutaleba Nahi Hota Lihaza Agarche Shuhar Ke Zimma Kitna Hi Dain Maher Ho Jab Wo Maalike Nisaab He Zakaat Wajib He.

(📙AalamGiri)

Khususan Maher Muwakkhir Jo Aam Taur Par Yaha Raa'ij Hai Jiski  Adayegi  Ki Koyi Mi'Aad Mu'Ayyan Nahi Hoti Iske  Mutaleba Ka To Aurat Ko Ikhtiyaar Nahi Jab Tak  Moat Ya Talaaq Waqa Na Ho.

● Maslah 20:

Aurat Ka Nafaqah   Shuhar Par Dain Nahi Qaraar Diya Jayega Jab Tak Qaazi Ne Hukm Na Diya Ho Ya Duno Ne Ba'Ham  Kisi Miqdaar Par Tasfiyah Na Kar Liya Aur Agar Ye Duno Na Hon To Saaqit Hojayega Shuhar Par Uska Dena Wajib Na Hoga Lihaza Mana  Zakaat Nahi.

Aurat Ke Elawa Kisi Rishtedaar Ka Nafaqah  Uswaqt Dain Hain Jab Ek Mahina Se Kam Zamana Guzra Ho, Ya Us RishteDaar Ne Qaazi Ke Hukm Se Qarz Liya Aur Agar Ye Duno Baate Nahi To Saaqit Hai Aur Mana Zakaat Nahi.

(📙AalamGiri, Rudul Muhtaar)

●Maslah 21:

 Jo Deen Asnaye  Saal Main Aariz Huwa Yani Shuru Saal Main Madyoon Na Tha Phir  Madyoon Hogaya , Phir Saal Tamaam Par Elawa Wo Dain Ke Nisaab Ka Maalik Hogaya To Zakaat Wajib Hogayi. Iski Surath Ye Hai Ke Farz Karo  Qarz Khwa Ne Qarz Muaf Kar Diya  To Ab Chunke Uske Zimme Dain Na Raha Aur Saal Bhi Pura Hochuka  He Lihaza Wajib Hai Abhi Zakaat De Ye Nahi Ke Ab Se Ek Saal Guzarne Par Zakaat wajib Hogayi Aur Agar Shuru Saal Se Madyoon Tha Aur Saal Tamaam Par Muaf Kiya To Abhi Zakaat  Wajib Na Hogi Balke Ab Se Saal Guzarne Par. 

(📙Rudul Muhtaar Waghera)

● Maslah 22:

Ek Shakhs Madyoon Hai Aur Chand Nisaab Ka Maalik He Ke Har Ek Se Deen Ada Hojata Hai.

Maslan_____ Uske Paas Rupe, Ashrafiya'n  Bhi Hain , Tijarat Ke Asbaab Bhi , Chadaayi Ke Janwar Bhi , To Rupe , Ashrafiya'n Deen Ke Muqabil Samjhe Aur Aur Cheezo'n Ki Zakaat De.  Aur Agar Rupe Ashrafiya'n Na Hon Aur Chadaayi Ke Janwar Ki Chand Nisaabe'n Hon

Maslan ____ 40- Bakriyaa'n Hain Aur 30-Gaaye Aur 5-Oontt To Jiski Zakaat Main Use Aasaani Ho Uski Zakaat De Aur Dusre Ko Dain Main Samjhe To Us Surath Mazkura Main Agar Bakriyo'n Ya Oonto'n Ki Zakaat Dega To Ek Bakri Deni Hogi Aur Gaay Ki Zakaat Main Saal Bhar Ka Bachda. Aur Zahir He Ke Ek Bakri Dena Bachda Dene Se Aasaan Hai Lihaza Bakri De Sakta Hai Aur Agar Barabar  Hon To Use Ikhtiyaar He. 

Maslan____ 5-Oontt Hai Aur 40-Bakriya'n , Duno Ki Zakaat  Ek Bakri Hai. Use Ikhtiyaar Hai Jise Chahe Dain Ke Liye Samjhe Aur Jise Chahe  Zakaat De Aur Ye Sab Tafseel Us Waqt He Ke Badshah Ki Taraf Se Koyi Zakaat Wasool Karne Wala Aaye Warna Agar Bataure Khud Dena Chahta Hai To Har Surath  Main Ikhtiyaar Hai.

(📙Durre Mukhtaar, Rudul Muhtaar)

●Maslah 23: 

Us Par Hazaar Rupe Qarz Hain Aur Uske Paas Hazaar Rupe Hain Aur Ek Makaan Aur Khidmat Ke Liye  Ek Gulaam To Zakaat Wajib Nahi Agarche Makaan -o-Gulaam Das Hazaar Rupe Ki Qimat Ke Hon  Ke Ye Chize'n Haajate Asliya Se Hain  Aur Jab Rupe Maujood Hain To Qarz Ke Liye Rupe Qaraar Diye Jayege Na Ke Makaan-o-Gulaam.

(📙AalamGiri)

8 》 Nisaab Haajate  Asliya Se Faarig Ho.

●Maslah 24: 

Haajate Asliya Yaani Jiski Taraf Zindagi Basar Karne Main Aadmi Ko Zarurat Hai  Us Main Zakaat Wajib Nahi Jaise Rehne Ka Makaan , Jaade Garmiyo Main Pahenne Ke Kapde, Khaana Daari  Ke Saman  , Sawari Ke Janwar , Khidmat Ke Liye Laundi Gulaam , Aalaate Harb , Pesha Waro'n Ke Auzaar , Ahle ILm Ke Liye Haajat Ki  Kitaabe , Khane Ke Liya  Galla.

( 📙Hidaya AalamGiri  Rudul Muhtaar)

● Maslah 25: 

Aisi Cheez Kharidi Jisse Koyi Kaam Karega Aur Kaam Main Uska Asar Baqi  Rahega Jaise Chamda Pakane Ke Liye Maazo Aur Tel  Wagera Agar Uspar Saal Guzar Gaya To Zakaat Wajib Hai. Yu Hi Rangrez Ne  Ujrat Par Kapda Rangne Ke Liye Kusum, Zaafraan Kharida , To Agar Ba-Qadr Nisaab Hai Aur Saal Guzar Gaya To Zakaat Wajib Hai. Pudiya  Wagera Rang Ka Bhi Yahi Hukm Hai Aur Agar Wo Aisi Cheez He Jiska Asar Baqi Nahi Rahega Jaise Sabun  To Agarche Ba-Qadr Nisaab Ho Aur Saal Guzar Jaye To Zakaat Wajib Nahi.

(📙AalamGiri)

●Maslah 26:

Itr Farosh Ne Itr Bechne Ke Liye Shishiyaa'n Kharide'n , Un Par Zakaat Wajib Hai.

(📙Rudul  Muhtaar)

●Maslah 27: 

Kharch  Ke Liye Rupe Ke Paise  Liye To Ye  Bhi Haa'jate Asliyah Main Hain. Haa'jate Asliyah Main Kharch Karne Ke Rupe Rakhe Hain To Saal Main Jo Kuch Kharch Kiya Gaya Aur Jo Baqi Rahe

Agar Baqadr Nisaab Hain To Unki Zakat Wajib Hai.... Agarche Isi Niyyat Se Rakhe Hain Ke Aainda Haa'Jate Asliyah Hi Main Sarf Honge  Aur Agar Saal Tamaam Ke Waqt Haa'jate Asliyah Main Kharch Karne Ki Zarurat Hai To Zakaat Wajib Nahi.

(📙Rudul Muhtaar)

●Maslah 28: 

Ahle ILm Ke Liye Kitaabe'n Haa'jate Asliyah Se Hain Aur Gair-Ahle Ke Paas Hon Jab Bhi Kitaabo'n Ki Zakaat Wajib Nahi Jabke Tijarat Ke Liye Na Hon.

Farq Itna Hai Ke Ahle ILm Ke Paas Un Kitaabo'n Ke Aelawa Agar Maal Baqadr Nisaab Na Ho To Zakaat Lena Jaa'iz Hai Aur Gair-Ahle Ke Liya Na-Jaa'iz  Jab Ke 200- Diram  Qimat Ki Hon.

Ahle Wo Hai Jise Padhne Padhane Ya Tasheeh  Ke Liye Un Kitaabo'n Ki Zarurat Ho. Kitaab Se Muraad Mazhabi Kitaab Fiqqah -o- Tasfseer -o- Hadees Hai.

Agar Ek Kitaab Ke Chand Nuskhe Hon To Ek Se Zaayid Jitne Nuskhe Hon , Agar 200-Dirham Ki Qimat Ke Hon To Us Ahle Ko Bhi Zakaat Lena Na-Jaa'iz Hai.

Khwa Ek Hi Kitaab Ke Zaayid Nuskhe Is Qimat Ke Hon Ya Muta'addid Kitaabo'n  Ke Zaayid Nuskhe Mil Kar Is Qimat Ke Hon.

(📚Durre Mukhtar , Rudul Muhtaar)

● Maslah 29:

 Haafiz Ke Liye Quraan Majeed Haa'jate Asliyah Se Nahi Aur Gair-Haafiz Ke Liye Ek Se Zyada Haa'Jate Asliyah Ke Aelawa Hai. Yani Agar  Mushaf Shareef 200-Diram Qimat Ka Ho To Zakaat Lena Jaa'iz Nahi.

(📚Joharah  , Rudul Muhtaar)

● Maslah 30:

 Tabeeb Ke Liye Tib Ki Kitaabe'n  Haa'jate Asliyah Main Hain Jabke Muatalla Main Rakhta Hon Ya Use Dekhne Ki Zarurat Pade.

Nahu -o-Sarf -o- Nujoom Aur Diwaan Aur Qisse Kahani Ki Kitaabe'n Haa'jate  Asliyah Main Nahi.

Usool Fiqqah -o- ILm Kalaam -o- AkhLaaq Ki Kitaabe'n Jaise Ahyaa-ul-Uloom -o- Chemiya-E-Sa'Aadat Wagerahma Haa'Jate Asliya Se Hain.

(📙Rudul Muhtaar)

● Maslah 31: 

Kuffaar Aur Bad-Mazhabo'n Ke Rad Aur Ahle Sunnat Ki Taayeed Main Jo Kitaabe'n Hain Wo Haa'jate Asliyah Se Hain. Yuhi Aalim Agar Bad-Mazhab Wagerah Ki Kitaabe'n Isliye Rakhe Ke Unka Radd Karega To Ye Bhi Haa'jate Asliyah Man Hain Aur Gair-Aalim Ko To Unka Dekhna Hi Jaa'iz Nahi.

9 》 Maal Naami Hona Yaani Badhne Wala Khwah Haqiqatan Badhe Ya Hukman Yani Agar Badhana Chahe To Badhaye Yani Uske Ya Iske  Qabza Main Ho. Har Ek Ki 2-Surthe Hain. Wo Isi Liye Paida Hi Kiya Gaya Ho Use Khalqi Kehte Hain 

Jaise__ Sona , Chandi Ke Ye Isi Liye Paida Huwe Hain Ke Inse Cheeze'n Kharidi Jaaye Ya Isliye Makhlooq To Nahi Magar Usse Ye Bhi Haasil Hota He Use Feali Kehte Hain.

Sone,  Chandi Ke Aelawa Wo Sab Cheeze'n Feali Hain Ke Tijarat Se Sab Main Namo Hoga.

 Sone , Chandi Main Mutlaqan Zakaat Wajib Hai JabKe Baqadr Nisaab Hon Agarche Dafan Karke Rakhe Hon , Tijarat Kare Ya Na Kare Aur Inke Aelawa Wo Baqi Cheezo'n Par Zakaat Wajib Hai Ke Tijarat Ki   Niyyat  Ho Ya Charayi Par Chote Janwar -o-Bas. 

Khulasa Ye Ke Zakaat 3-Qism Ke Maal Par Hai.

1) Saman:- Yaani Sona Chandi,

2) Maal Tijarat ,

3) Saaima Yani Charayi Par Chote Janwar.

(📙Aamah Kitaab)

●Maslah 32:  

Niyyat Tijarat Kabhi Saraahatan Hoti Hai.  Kabhi DalaLatan

 Saraahatan Ye Ke Aqad Ke Waqt Hi Niyyat Tijarat KarLi Khwa Wo Aqad  Kharidari Ho Ya Ijara. Saman , Rupeya Ashrafi Ho Ya Asbaab  Main Se Koyi Shay.

DalaLatan Ki Surath Ye He Ke Maal Tijarat Ke Badle Koyi Cheez Kahridi Ya Makaan Jo Tijarat Ke Liye Hai Usko Kisi Asbaab Ke Badle Kiraya Par Diya To Ye Asbaab Aur Wo Kharidi Huwi Cheez Tijarat Ke Liye Hai Agarche Saraahatan Tijarat Ki Niyyat Na Ki. Yuhi Agar Kisi Se Koyi Cheez Tijarat Ke Liye Qarz Li To Ye Bhi Tijarat Ke Liye Hai

Maslan ____ 200-Diram Ka Maalik Hai Aur Man Bhar Geho'n Qarz Liye To Agar Tijarat Ke Liye Nahi Liye To Zakaat Wajib Nahi Ke Geho'n Ke Daam Unhi 200 Se Mujra Kiye Jayege To Nisaab Baqi Na Rahi Aur Agar Tijarat Ke Liye Liye  To Zakaat Wajib Hogi  Ke In Geho'n Ki Qimat 200-Par Izafa Kare Aur Majmo'aa Se Qrz Mujra Kare To 200 Saalim (Mukammal) Rahe To Zakaat Wajib Huwi.

(📚AalamGiri , Durre Mukhtaar, Rudul Muhtaar)

●Maslah 33:

 Jis Aqad Main Tabadila Hi Na Ho Jaise Hiba , Wasiyat , Sadqa Ya Tabadila Ho Magar Maal Se Tabadila Na Ho Jaise Maher , Badal Jama , Badal Atiq In Duno Qism Ke Aqad Ke Zariya Se Agar Kisi Cheez Ka Maalik Huwa To Us Main Niyyat Tijarat Saheeh Nahi Yani Agarche Tijarat Ki Niyyat Kare Zakaat Wajib Nahi.

Yuhi Agar Aisi Cheez Miraas Main Mili To Us Main Bhi Niyyat Tijarat Saheeh Nahi.

(📙AalamGiri) 

●Maslah 34:

Moris ( Wo Shakhs Jisse Wirsa Ya Tarka Mile) Ke Paas Tijarat Ka Maal Tha. Uske Marne Ke Ba'd Wariso'n Ne Tijarat Ki Niyyat Ki Zakaat Wajib Hai. Yuhi Charaayi Ke Janwar Wirasat Main Mile To Zakaat Wajib Hai Charaayi Par Rakhna Chahte Hon Ya Nahi.

(📚AalamGiri , Durre Mukhtaar)

●Maslah 35: 

Niyyat Tijarat Ke Liye Ye Shart Hai Ke Waqt Aqad Niyyat Ho Agarche Dalalatan To Agar Aqad Ke Ba'd Niyyat Ki , Zakaat Wajib Na Huwi. Yuhi Agar Rakhne Ke Liye Koyi Cheez Li Aur Ye Niyyat Ki Ke Nafa Milega To Bech Daluga To Zakaat Wajib Nahi.

(📙Durre Mukhtaar)

●Maslah 36:

Tijarat Ke Liye Gulaam Kharida Tha Phir Khidmat Lene Ki Niyyat Karli Phir Tijarat Ki Niyyat Ki To Tijarat Ka Na Hoga Jab Tak Aisi Cheez Ke Badle Na Beche Jis Main Zakaat Wajib Hoti Hai.

(📚AalamGiri , Durre Mukhtaar) 

●Maslah 37: 

Moti Aur Jawahir Par Zakaat Wajib Nahi Agarche  Hazaro'n Ke Hon , Haan Agar Tijarat Ki Niyyat Se Liye To Wajib Hogi.

(📙Rudul Muhtaar) 

●Maslah 38: 

Zameen Se Jo Paidawaar Huwi Us Main Niyyat Tijarat Se Zakaat Wajib Nahi , Zameen Ushri Ho Ya Kharaaji   Uski Milk Main Ho Ya  Aariyat Ya Kiraya Par Li Ho.

Haan Agar Zameen Kharaaji Ho Aur Aariyat Ya Kiraya Par Li Aur Beej Wo Daale Jo Tijarat Ke Liye  The To Paidawaar Main Tijarat Ki Niyyat Saheeh Hai.

(📙Rudul Muhtaar)

●Maslah 39: 

Mazaarib Maal Mazaribat Se  Jo Kuch Kharide  ,  Agarche Tijarat Ki Niyyat Na Ho Agarche Apne Kharch Karne Ke Liye Kharide Uspar Zakaat Wajib Hai.  Yaha Tak Ke Agar Maal Mazaribat Se Gulaam Kharide  Phir Unke Pahenne Ko Kapda Aur Khaane Ke Liye Galla Waghera Kharida To Ye Sab Kuch Tijarat Hi Ke Liye Hain Aur Sabki Zakaat Wajib.

(📚Durre Mukhtaar , Rudul Muhtaar) 

10 》 Saal Guzarna. Saal Se Muraad Qamri Saal Hai Yani Chaand Ke Mahino Se Bara(12) Mahine. Shuru Saal Aur Aakhri Saal Main Nisaab Kaamil Hai Magar Darmiyaan Main Nisaab Ki Kami Hogayi To Ye Kami Kuch Asar Nahi Rakhti Yani Zakaat Wajib Hai.

(📙AalamGiri)

●Maslah 40:

 Maal Tijarat Ya Sone Chandi Ko Darmiyaan Saal Main Apni Jisn Ya Ghair Jins Se Badal Liya To Uski Waja Se Saal Guzarne Main Nuqsaan Na Aaya

Aur Agar  Charaayi Ke Janwar Badal Liye To Saal Kat  Gaya Yani Ab Saal Us Din Se Shumar Karege Jis Din Badla Hai.

(📙AalamGiri)

●Maslah 41: 

Jo Shakhs Maalike Nisaab Hai , Agar Darmiyaan Saal Main Usne Kuch Aur Maal Usi Jisn Ka Haasil Kiya To Us Naye Maal Ka Juda Saal Nahi Balke Pehle Maal Ka Khatam Saal Iske Liye Bhi Saal Tamaam Hai. Agarche Saal Tamaam Se Ek Hi Minute Pehle Haasil Kiya Ho , Khwa Wo Maal Iske Pehle Maal Se Haasil Huwa Ho Ya Miraas -o- Hiba Ya Aur Kisi Jaa'iz  Zariya Se Mila Ho. Aur Agar Dusri Jins Ka Hai

Maslan ___ Pehle Uske Paas Oont The Aur Ab Bakriyaa'n Mile To Iske Liye Jadeed Saal Shuhar Higa.

(📙Johira)

●Maslah 42: 

Maalike Nisaab Ko Darmiyaan Saal Main Kuch Maal Haasil Huwa Aur Uske Paas Du Nisaabe'n Hain Aur Duno Ka Juda Juda Saal Hai..  To Jo Maal Darmiyaan Saal Main Haasil Huwa Use  Uske Saath Milaye Jiski Zakaat Pehle Wajib Ho 

Maslan___ Uske Paas Ek Hazzar Rupe Hain Aur Saaima Ki Qimat Jiski Zakaat De Chuka Tha Ke Duno Milaaye Nahi Jayenge. Ab Darmiyaan Saal Main Ek Hazaar Rupe Aur Haasil Kiye To Unka Saal Tamaam Us Waqt Hai Jab Un Duno Main Pehle Ka Ho.

(📙Durre Mukhtaar)

●Maslah 43: 

Uske Paas Charaayi Ke Janwar The Aur Saal Tamaam Par Unki Zakaat Di Phir Unhi Rupo'n Se Bech Daala Aur Uske Paas Pehle Se Bhi Baqadr Nisaab Rupe Hain Jinpar Nisf Saal Guzra Hai To Ye Rupe In Rupo'n Ke Saath Nahi Milaye Jayenge Balke Inke Liye Is Waqt Naya Saal Shuru Hoga.

Ye Is Waqt Hai Ke Ye Saman Ke Rupe Baqade Nisaab Hon Warna Bil'ijmaa Unhi Ke Saath Milaaye Yaani Inki Zakaat  Unhi Rupo'n Ke Saath Di Jaye.

(📙Johera)

●Maslah 44:

 Saal Tamaam Se Peshtar Agar Saaimah Ko Rupe Ke Badle Beccha To Ab In Rupo'n Ko Un Rupo'n Ke Saath Milayenge Jo Peshtar Se Uske Paas Baqadr Nisaab Moujood Hain..

Yaani Inke Saal Tamaam Par  Unki Bhi Zakaat Di Jaaye Inke Liye Naya Saal Shuru Na Hoga.

 Yuhi Agar Janwar Ke Badle Becha To Us Janwar Ko Is Janwar Ke Saath Milaye Jo Peshtar Se Uske Paas Hain. Agar Saaimah Ki Zakaat Dedi Phir Use Saaimah Na Rakha Phir Bech Dala To Saman Ko Agle Maal Ke Saath Mila Denge.

(📙AalamGiri)

●Maslah 45:

 Oontt , Gaay , Bakri Main Ek Ko Dusre Ke Badle Saal Tamaam Se Pehle Becha To Abse Unke Liye Naya Saal Shuru Hoga. Yuhi Agar Aur Cheez Ke Badle Ba-Niyyat Tijarat Becha To Abse Ek Saal Guzarne Par Zakaat Wajib Hogi Aur Agar Apni Jins Ke Badle Becha Yaani Oontt Ko Oontt Aur Gaay Ko Gaay Ke Badle Jab Bhi Yahi Hukm Hai Aur Agar Ba'd Saal Tamaam Becha  To Zakaat Wajib Ho Chuki Wo Iske Zimmah Hai.

(📙Johera)

●Maslah 46: 

Darmiyaan Saal Main Saaimah Ko Becha Tha Aur Saal Tamaam Se Pehle Aeb Ki Waja Se Kharidaar Ne Wapas Kar Diya To Agar Qaazi Ke Hukm Se Wapasi Huwi To Nayaal Saal Shuru Na Hoga Warna Ab Se Naya Saal Shuru Kiya Jaye 

Aur Agar Hibah Kar Diya Tha Phir Saal Tamaam Se Pehle Wapas Kar Liya To Naya Saal Liya Jayega Qaazi Ke Fesle Se Wapasi Ho Ya Bataure Khud.

(📙Johera)

●Maslah 47: 

Uske Paas Kharaji  Zameen Thi. Kharaaj Ada Karne Ke Ba'd Bech Daali To Saman Ko Asal Nisaab Ke Saath Mila Dege.

(📙AalamGiri)

●Maslah 48: 

Uske Paas Rupe Hain Jinki Zakaat De Chuka Hai Phir Unse Charaayi Ke Janwar Kharide Aur Uske Yaha Is Jins Ke Janwar Pehle Se Maujood Hain To Unko  Inke Saath Na Milayenge.

(📙AaalamGiri)

●Maslah 49: 

Kisi Ne Use Hazaar Rupe  Bataure Hibah Diye Aur Saal Pura Hone Se Pehle Hazaar Rupe Aur Haasil Kiye Phir Hibah Karne Wale Ne Apne Diye Huwe Rupe Hukme Qaazi Wapas Le Liye To In Jadeed Rupo'n Ki Bhi Uspar Zakaat Wajib Nahi Jab Tak Unpar Saal Na GuzarLe.

(📙AalamGiri)

●Maslah 50: 

Kisi Ke Paas Tijarat Ki Bakriyaa'n Hain Jinki Qimat 200-Diram Hai , Aur Saal Tamaam Se Pehle Ek Bakri Margayi. Saal Pura Hone Se Pehle Usne Uski  Khaal Nikaal Kar Pakali To Zakaat Wajib Hai.

(📙AalamGiri)

Yaani Jab Ke Wo Khaal Nisaab Ko Pura Kare.

●Maslah 51:

 Zakaat Dete Waqt Ya Zakaat Ke Liye Maal Alehdah Karte Waqt Niyyat Zakaat Shart Hai.

 Niyyat Ke  Ye Maani Hain Ke Agar Pocha Jaaye To Bila Ta'Ammul  Bata Sake Ke Zakaat Hai.

(📙AalamGiri)

●Maslah 52: 

 Saal Bhar Tak Khairaat Karta Raha Ab Niyyat Ki Ke Jo Kuch Diya Hai , Zakaat Hai To Ada Na Huwi.

(📙AalamGiri)

●Maslah 53: 

Ek Shakhs Ko Wakeel Banaya , Use Dete Waqt To Niyyat Zakaat Na Ki Magar Jab Wakeel Ne Faqeer Ko Diya Us Waqt Mokkil Ne Niyyat Karli Hogayi.

(📙AalamGiri)

●Maslah 54:

 Dete Waqt Niyyat Nahi Ki Thi Ba'd ko Ki To Agar Wo Maal Faqeer Ke Paas Maujood Hai Yaani Uski  Milk Main Hai To Ye Niyyat Kaafi Hai Warna Nahi.

(📙Durre Mukhtaar)

●Maslah 55: 

Zakaat Dene Ke Liye Wakeel Banana Aur Wakeel Ko Ba-Niyyat Zakaat Maal Diya Magar Wakeel Ne Faqeer Ko Detr Waqt Niyyat Nahi Ki , Ada Hogayi . 

Yuhi Zakaat Ka Maal Zimmi Ko Diya Ke Wo Faqeer Ko Dede Aur Zimmi Ko Dete Waqt  Niyyat Karli Thi To Ye Niyyat Kafi Hai.

(📙Durre Mukhtaat)

●Maslah 56: 

Wakeel Ko Dete Waqt Kaha Nafl  , Sadqa  Ya Kaffara Hai Magar Uske Wakeel Faqeer Ko De , Usne Zakaat Ki Niyyat Ki To Zakaat Hi Hai. Agarche Wakeel Ne Nafl Ya Kaffara Ki Niyyat Se Faqeer Ko Diya Ho.

(📙Durre Mukhtaar) 

●Maslah 57: 

Ek Shakhs Chand Zakaat Dene Walo Ka Wakeel Hai Aur Sabki Zakaat Miladi , To Use Taawaan Dena Padega Aur Jo Kuch Faqiro'n Ko De Chuka Hai Wo Tabarru'a Yaani Na Maliko Se Uska Mu'aawaza Payega Na Faqiro'n se Albatta Agar Faqiro'n Ko Dene Se Pehle Maliko Ne Milane Ki Ijazat De Di To Taawaan Uske Zimme Nahi. 

Yuhi Agar Faqiro'n Ne Bhi Use Zakaat Lene Ka Wakeel Kiya Aur Usne Mila Diya To Taawaan Uspar Nahi Magar Us Waqt Ye Zaroor Hai Ke Agar  Ek Faqeer Ka Wakeel Hai Aur Chand Jaga Se Use Itni Zakaat Mili Ke Majmu'aa Ba'qadr  Nisaab Hai To Ab Jo Jaan Kar Zakaat De Uski Zakaat Ada Na Hogi.

 Ya Chand Faqiro'n Ka Wakeel Hai Aur Zakaat Itni Mili Ke Har Ek  Ka Hissah Nisaab Ki Ba'Qadr Hai.  To Ab  Us Wakeel Ko Zakaat Dena Jaaiz Nahi.

Maslan__  Teen(3) Faqiro'n Ka Wakeel Hai Aur 600-Diram Mile Ke  Har Ek Ka  Hissah 200 Huwa Jo Nisaab Hai.

Aur 600 Se Kam Mila To Kisi Ko Nisaab Ki Qadr Na Mila Aur Agar Har Ek Faqeer  Ne Use Alehdah Alehdah Wakeel Banaya Ya To Majmu'aa Nahi Dekha Jayega Balke Har Ek Ko Jo Mila Hai Wo Dekha Jayega.

Aur Is Surath Main Baghair Faqiro'n Ki Ijazat Ke Milana Jaaiz Nahi Aur Miladega Jab Bhi Zakaat Ada Hojayegi Aur Faqiro'n Ko Taawaan Dega Aur Agar Faqiro'n Ka Wakeel Na Ho To Use De Sakte Hain Agarche Kitni Hi Nisaabe'n Uske Paas Jama Hogaye.

(📙Durre Mukhtaar) 

●Maslah 58: 

Chand Auqaaf Ke Mutawalli Ko Ek Ki Aamadni Dusri Main Milana Jaaiz Nahi. Yuhi Dalaal Ko Zar Saman Ya Mabeea Ka Khalt Jaaiz Nahi. Yuhi Agar Chand Faqiro'n Ke Liye Sawal Kiya To Jo Mila Be Unki Ijazat Ke  Khlat Karna Jaaiz Nahi. Yuhi Aaata  Pisns Wale Ko Ye Jaaiz Nahi Ke Logo'n Ke Geho'n Mila De Magar Jaha Mila Den Par Urf Jaari Ho To Mila Dena Jaaiz Hai Aur In Surto'n Main Taawaan Dega.

(📙Khaaniyah)

●Maslah 59: 

Agar Muwakkilo'n Ne Sarhatan Mila  Ki Ijazat Na Di Magar Urf Aisa Jaari Hogaya Ke Wakeel Mila Diya Karte Hain To Ye Bhi Ijazat Samjhi Jayegi Jabke Mu'wakkil Is Urf Se Waaqif Ho Magar Dalaal Ko Khalt Ki Ijazat Nahi Ke  Is Main Urf Nahi.

(📙Rudul Muhtaar)

●Maslah 60: 

Wakeel Ko Ikhtiyaar Hai Ke Maal E Zakat Apne Ladke Ya Bibi Ko Dede Jab Ke Ye Faqeer Hon Aur Agar Ladka Na-Baligh Hai To Use Dene Ke Liye Khud Us Wakeel Ka Faqeer Hona Bhi Zaruri Hai, Magar Apni Awlaad Ya Bibi Ko Us Waqt De Sakta Hai, Jab Muwakkil Ne Unke Siwa Kisi Khass Shaksh Ko Dene Ke Liya Na Keh Diya Ho Warna Unhe Nahi De Sakta.

(📙Rudul Muhtaar )

●Maslah 61: 

Wakeel Ko Ye Ikhtiyaar NAhi Ke Khud Lele, Haan Agar Zakat Dene Wale Ne Ye Keh Diya Ke Jis Jagah Chaho Sarf Karo To Le Sakta HAi.

(📙Durr E Mukhtaar)

 ●Maslah 62:

 Agar Zakaat DeneWale Ne Use Hukm Nahi Diya, Khud Hi Us Ki Taraf Se Zakat Dedi To Na Huwi Agar Che Ab Usne Jaiz Kar Diya Ho.

(📙Rudul Muhtaar)

● Maslah 63: 

Zakat DeneWale Ne Wakeel Ko Zakat Ka Rupiya Diya Wakeel Ne Use Rakh Liya Aur Apna Rupiya Zakat Me Diya To Jaiz Hai, Agar Ye Niyyat Ho Ke Uske A'waz Muwakkil Ka Rupiya Lelega Aur Agar Wakeel Ne Pehle Us Rupiye Ko Khud Kharch Kar Dala Baad Ko Apna Rupiya Zakat Me Diya To Zakat Ada Na Huwi Balke Ye Tabarr'U Hai Aur Muwakkil Ko Tawaan Dega.

(📚Rudul Muhtaar,Durr E Mukhtaar )

●Maslah 64: 

Zakat Ke Wakeel Ko Ye Ikhtiyaar HAi Ke Bagair Ijazat E Malik Dosre Ko Wakeel Bana De.

(📙Rudul Muhtaar)

●Maslah 65: 

Kisi Ne Ye Kaha Ke Agar My Us Ghar Me JAon To Mujh Per Allah Ke Liye Un Saw(100) Rupiyon Ka Khairaaat Kar Dena Hai Phir Gaya Aur Jate Waqt Ye Niyyat Ki Ke Zakat Me Dedonga To Zakat Me Nahi De Sakta.

(📙Fatwa Ul Hindiya)

 ●Maslah 66: 

Zakat Ka MAal Hath Per Rakha Tha, Fuqra Loot Legaye Ada Ho Gayi Aur Agar Hath Se GirGaya Aur Faqeer Ne Utha Liya Agar Ye Use Pehchanta Hai Aur Razi Hogaya Aur Maal Za'Ya Nahi Huwa To Hogayi.

(📙Fatwa Ul Hindiyah)

● Maslah 67:

 Ameen Ke Pass Se Amanat Za'Ye Hogayi,Usne Malik Ko Dafa'E Khusumat(Adawat/Dushmani) Ke Liye Kuch Rupiye Dediye Aur Dete Waqt Zakat Ki Niyyat Karli Aur Malik Faqeer Bhi Hai Zakat Ada Na Huwi.

(📙Al-Fatwa Ul Hind)

●Maslah 68: 

Maal Ko Ba-Niyyat Zakat Alahdah KarDene Se Bari-uzzimma Na Hoga Jab Tak Faqeeron Ko Na Dede, Yahan Tak Ke Agar Wo Jata Raha To Zakat Saqit Na Huwi Aur Agar Mar Gaya To Usme Wirasat Jari Hogi,.

(📙Rudul Muhtaar)

● Maslah 69:

Saal Pura Hone Per Kul Nisaab Khairat Kardi, Agar Che Zakaat Ki Niyyat Na Ki Balke Nafl Ki Niyyat Ki Ya Kuch Niyyat Ki Ya Kuch Niyyat Na Ki Zakat Ada Ho Gayi Aur Agar Kul Faqeer Ko De Diya Aur Mannat Ya Kisi Aur Wajib Ki Niyyat Ki To Dena Saheeh Hai,Magar Zakat Uske Zimme Hai Saqib Na Huwi Aur Agar Maal Ka Koi Hissa Khairat Kiya To Us Hisse Ki Bhi Zakat Saqit Na Hogi ,Balke Uske Zimma Hai Aur Agar Kul Maal Hilaak Hogaya To Kul Ki Zakat Saqit(Yani Maaf) Hogayi Aur Kuch Hilak Huwa To Jitna Hilak Huwa Uski Saqit Aur Jo Baqi Hai Uski Wajib.Agar Che O Ba-Qadr E Nisaab Na Ho. Hilaak Ke Ye Ma'Ani Hai Ke Bagair Uske F'El Ke Za'E HoGaya.Maslan Chori Hogayi Ya Kisi Ko Qarz Wa Aariyat(Chand Roz Ke Liye Mangi Huwi Cheez) Di Usne Inkaar Kar Diya Aur Gawah Nahi Ya Wo MArGaya Aur Kuch Tarke Me Na Choda Aur Agar Apne F'El Se Hilaak Kiya Maslan Sarf Kar Dala Ya Phenk Diya Ya Ghani Ko Hibah Kar Diya (Yani Ghani Ko Tohfe Me De Diya ).To Zakat Ba Darstoor Wajib Ul Ada Hai.Ek Paisa Bhi Saqit Na Hoga Agar Che Bilkul NaDaar Ho.

(📙Al-Fatwa Ul Hindiyah)

(📚Aalamgeeri,Durr E Mukhtaar )

●Maslah 70:

Faqeer Per Uska Qarz Tha Aur Kul Maaf Kar Diya To Zakat Saqit Hogayi Aur Juz Maaf Kiya To Us Juz Ki Saqit HoGayi Aur Agar Us Surat Me Ye Niyyat Ki Ke Pura Zakat Me Hojaye To Na Hogi Aur Agar Maldaar Per Qarz Tha Aur Kul MAaf KAr Diya To Zakat Saqit Na Huwi Balke Uske Zimme Hai.Faqeer Per Qarz Tha Maaf Kar Diya Aur Ye Niyyat Ki Ke Falan Per Jo Dain Hai Ye Uski Zakat Hai Ada Na Huwi.

(📚Aalamgeeri, Durr E Mukhtaar)

●Maslah 71:

 Kisi Per Uske Rupiye Aate Hain ,Faqeer Se Keh Diya Usse Wusool Karle Aur Niyyat E Zakat Ki Ki Baad Qabza Ada Ho Gayi.Faqeer Per Qarz Hai Us Qarz Ko Apne Maal Ki Zakat Me Dena Chahta Hai Yaani Ye Cahta Hai Ke Maaf Karde Aur Wo Mere Maal Ki Zakat Ho Jaye Ye Nahi Ho Sakta.Albatta Ye HoSakta Hai Ke Use Zakat Ka MAal De Aur Apne Aate Huwe Me Lele,Agar Wo Dene Se Inkaar Kare To Hath Pakad Kar Cheen Sakta HAi Aur Youn Bhi Na Mile To Qazi Ke Pass Muqaddamah Pesh Kare Ke Us Ke Pass Hai Aur Mera Nahi Deta.

(📙Dur E Mukhtaar)

● Maslah: 72: 

Zakat Ka Paisa Murdah Ki Tajheez-O-Takfeen (Yaani Kafan Dafan) Ya Masjid Ki Ta'meer Me Nahi Sarf Kar Sakte Ke Tamleek (Malik Banana) Faqeer Nahi Payi Gayi Aur Un Amwaar Me Sarf KArna Chahen To Uska Tareeqa Ye Hai Ke Faqeer Ko Malik Karden Aur Wo Sarf Kare Aur Sawaab Dono Ko Hoga Balke Hadees Me Aaya, "Agar Saw(100) Hathon Me Sadqa Guzra To Sab Ko Waisa Hi Sawaab Milega Jaisa Dene Wale Ke Liye Aur Us Ke Ajar Me Kuch Kami Na Hogi."

(📙Rudul Muhtaar)

● Maslah 73:

Zakaat Elaaniya Aur Zahir Tour Per Afzal Hai Aur Nafl Sadqa Chupa Kar Dena Afzal .

(📙Fatawa Ul Hindiyah,) .

(📙Aalamgeeri)

Zakat Me Elaan Is Wajah Se Hai Ke Chupa Kar Dene Me Logon Ko Tohmat Aur Bad-Gumani Ka Mo'uqa Milega, Neez Elaan Auron Ke Liye Ba'ais-E Targheeb Hai Ke Usko Dekh KAr Aur Log Bhi Denge Magar Ye Zaroori Hai Ke Riya Na Aane Paye Ke Sawaab Jata Rahega Balke Gunah O Istehqaaq Azaab Hai.

● Maslah 74:

Zakat Dene Me Us Ki Zarurat Nahi Ke Faqeer Ko Zakat Keh Kar De, Balke Sirf Niyyat E Zakat Kafi Hai Yahan Tak Ke Agar Hibah Ya Qarz Keh Kar De Aur Niyyat Zakat Ki Ho Ada Ho Jayegi.

(📙Aalamgeeri)

Younhi Nazriya Hadiyah Ya Paan Khane Ya Bachchon Ke Mithayi Khane Ya Eidi Ke Naam Se Di Ada HoGayi.Baaz Mohtaaj Zarurat Mand Zakat Ka Rupiya Nahi Lena Cahte, Unhe Zakat Keh Kar Diya Jayega To Nahi Lenge Lihaza Zakat Ka Lafz Na Kahen.

●Maslah: 75: 

Zakat Ada Nahi Ki Thi Aur Ab Bimaar Hai To Warison Se Chupa Kar De Aur Agar Na Di Thi Aur Ab Dena Cahta Hai,Magar Maal Nahi Jisse Ada Kare Aur Ye Cahta Hai Ke Qarz Le KAr Ada Kare To Agar Ghalib Guman Qarz Ada Ho Jane Ka HAi To Behtar Ye Hai Ke Qarz Le Kar Ada Kare Warna NAhi Ke Huququl'Ibad Huququllah Se Saqt Tar Hai.

(📙Rudul Muhtaar)

● Maslah 76:

Malik E Nisaab Saal Tamam Se Peshtar Bhi Ada KAr Sakta HAi, Ba-Shart Ye Ke Saal Tamam Per Bhi Us Nisaab Ka Malik Rahe Aur Agar Khatam Saal Per Malik E Nisaab Na Raha Ya Asna E Saal Me Wo Maal E Nisaab Bilkul Hilaak Ho Gaya To Jo Kuch Diya Nafl Hai Aur Jo Shakhs Nisaab Ka Malik Na Ho, Wo Zakat Nahi De Sakta Yaani Aainda Agar Nisaab Ka Malik Hogaya To Jo Kuch Pehle Diya Hai Wo Us Ki Zakat Me Mahsoob Na Hoga.

(📙Al-Fatwa Ul Hind)

● Maslah: 77:

 Malik E Nisaab Agar Peshtar Se Chand Nisabon Ki Zakat Dena Chahe To De Sakta Hai Yaani Shuru Saal Me Ek Nisaab Ka Malik Hai Aur Do Teen Nisabon Ki Zakat Dedi Aur Khatam Saal Per Jitni Nisabon Ki Zakat Di Hai utni Nisabon Ka Malik Ho Gaya To Sab Ki Ada Ho Gayi Aur Saal Tamam Tak Ek Hi Nisaab Ka MAlik Raha, Saal Ke BAad Aur HAsil Kiya To Zakat Usme Mahsoob Na Hogi.

(📙Aalamgeeri)

● Maslah 78: 

Malik E Nisaab Peshtar Se Chand Saal Ki Bhi Zakat De Sakta Hai

(📙Aalamgeeri)

Lihaza Munasib Hai Ke Thoda Thoda Zakat Me Deta Rahe, Qatam Saal Per Hisaab Kare Agar Zakat Puri Ho Gayi Fabiha Aur Kuch Kami Hoto Ab Fouran Dede Taqeer Jaiz Nahi. Ke Na Uski Ijazat Ke Ab Thoda Thoda Ada KAre Balke Jo Kuch Baqi Hai Kul Fouran Ada Kare Aur Ziyadah Dediya HAi To Saal Aainda Me Mujrah KAr De.(Yaani Aainda Saal Me Isko Shumaar KAr Len.)

● Maslah 79: 

Ek Hazaar KA MAlik HAi Do Hazaar Ki Zakat Di Aur Niyyat Ye HAi Ke Saal Tamam Tak Agar Ek Hazaar Ada Ho Gaye To Ye Iski Hai Warna Saal Aainda Me MahSoob Hogi Ye Jaiz Hai.

(📙Aalamgeeri)

 ●Maslah 80:

 Ye Gumaan KArke 500 Rupiye Hain, 500 Ki Zakat Di Phir Maloom Huwa Ke 400 Hi The To Jo Ziyada Diya Hai Saal Aainda Me MAhsoob KAr Sakta Hai.

● Maslah 81: 

Kisi Ke PAss Sona Chandi Dono Hain Aur Saal Tamam Se Pehle Ek Ki Zakat Di To O Dono Ki Zakat Hai Yaani Darmiyaan Saal Me In Me Se Ek Hilaak Ho GAya Agar Che Wahi Jis Ki Niyyat Se Zakat Di Hai To Jo Rah Gaya Hai Uski Zakat Ye HO Gayi , Aur Agar Iske Pass Gaye Bakri Oont Sab Ba Qadr Nisaab HAin Aur Peshtar Se Inme Ek Ki Zakat Di To Jiski Zakat Di Usi Ki Hai Dosre Ki Nahi.Yani Jiski Zakat Di Hai Agar Asna E Saal Me Uski Nisaab Jati Rahi To O Baqiyon Ki Zakat Nahi Qarar Di Jayegi .

(📙Aalamgeeri)

● Maslah 82 :

 Asna E Saal Me JIs Faqeer Ko Zakat Di Thi Qatam Saal Per O MaalDaar Hogaya Ya MAr Gaya Ya Ma'AzAllah Murtad Ho Gaya To Zakat Per Uska Kuch Asar NAhi O Ada Ho Gayi.Jis Shakhs Per Zakat Wajib Hai Agar O MAr Gaya To Saqit Ho Gayi. Yani Uske Maal Se Zakat Dena Zaruri Nahi.. Haan Agar Wasi'At KArgaya To Tahayi Maal Tak Wasi'At Nafiz HAi. Aur Agar Aaqil Baligh Wirsah Ijazat Deden To Kul Maal Se Zakat Ada Ki Jaye.

(📚Aalamgeeri Durr E Mukhtaar)

● Maslah 83: 

Agar Shak Hai Ke Zakat Di Hai Ya Nahi To Ab Dede.

(📙Rudul Muhtaar)

(Bahare Shari'at, Hissa:5 , Safa: 7 to 15)