Shab-E-Qadr

Sab-E-Qadr:

Shab-E-Qadr Ki Ek  Badi Fazilat Ye Hai Ke Is Ke Muta'alliq QurAane Kareem Me'n Puri Surat  Naazil Huwi Hai.

Irshaad Baari Ta'Aala Huwa: 

Tarjumah: "Beshak Ham Ne Use (QurAan Ko) Shab-E-Qadr Me'n Utara, Aur Tum Ne Kya Jaana  Kya Hai Shabe Qadr,  Shab-E-Qadr Hazaar Mahino Se Behtar (Hai), Is Me'n Farishte Aur Jibra'eel Utarte Hain Apne Rab Ke Hukm Se Har Kaam Ke Liye, Wo Salamati Hai Subha Chamakne Tak.

(Surah Al-Qadr :Tarjuma:Kanzul Eemaan) 

Is Surat Se Ma'loom Huwa Ke Shab-E-Qadr Aisi Baa-Barkat Aur Azmat -o- Buzrugi Waali Raat Hain: 

1) Jo Hazaar Mahino'n Se Behtar Hai. 

2) Isi Raat Me'n QurAane Hakeem Lauhe Mahfooz Se Aasmaane Dunya Par NaaZil Huwa.

3) Isi Raat Me'n Farishte Aur Jibra'eel Alaihissalaam Zameen Par Utarte Hain.

4) Isi Raat Me'n Subha Tulu Hone Tak Khair -o- Barkat Naazil Hoti Hai Aur Ye Raat Salamati Hi Salamati Hai.

Shab-E-Qadr Milne Ka Sabab

Imaam Maalik RadiyAllahu Ta'Aala Anhu Farmate Hain Ke Huzoor ﷺ  Ne Jab Pehli Ummato'n Ke Logo'n Ki Umro'n Par Tawajjuh Farmayi To Aapko Apni Ummat Ke Logo'n Ki Umre'n Kam Ma'loom Huwe'n. Aapne Ye Khayaal Farmaya Ke Jab Guzishta Logo'n  Ke Muqable Me'n Inki Umre'n Kam Hain To Inki Nekiyaa'n Bhi Kam Rahengi Ispar Allah Ta'Aala Ne Aapko Shab-E-Qadr Ata Farmayi Jo Hazaar Mahino'n Se Behtar Hai.

(Mauta Imaam Maalik, Safha:260)

Hazrat Mujaahid RadiyAllahu Ta'Aala Anhu Farmate Hain Ke Nabi Kareem ﷺ  Ne Bani IsRaa'eel Ke Ek Nek Shakhs Ka Zikr Farmaya  Jisne Ek Hazaar Mah Tak Raahe Khuda Me'n Jihaad  Ke Liye Hathyaar Uthaaye Rakhe. Sahaba Kiraam  Ko  Uspar Ta'Ajjub Huwa To Allah Ta'Aala Ne Ye Surat (Surah Al-Qadr) Naazil Farmayi. Aur Ek Raat Shab-E-Qadr Ki Ibadat Ko Us Muhaajid Ki Hazaar Mahino'n Ki Ibadat Se Behtar Qaraar Diya.

(Sunan Al-Kubra Baihaqi, Jild:4 Safha:306)

(Tafseer Ibne Jareer)

LaiLatul Qadr Ki Wajah Tasmiyah:

Is Muqaddas Aur Mubarak Raat Ka Naam "Lai-Latul Qadr" Rakhe Jaane Ki Chand Hikmate'n Peshe Khidmat Hain:

1) Qadr Ke Ek Maani Martabe Ke Hain Is Bina Par Ye Kaha Ja Sakta Hai Ke Is Raat Ki Azmat -o- Buzrugi Aur Aalaa Martabe Ki Waja Se Iska Naam "Lailatul Qadr" Yaani Martabe Waali  Raat Rakha Gaya Hai. Is Raat Me'n Ibadat Ka Martaba Bhi Bahot Aalaa Hai. Jo Koyi Is Raat Me'n Ibadat Karta Hai Wo BaarGaahe ELaahi Me'n Qadr -O- Manzilat  Waala Hojata Hai. Aur Is Raat Ki Ibadat Ka Martaba Ye Hai Ke Wo Hazaar Mahino'n Se Behtar Hai.  Ek Aur Hikmat Lailatul Qadr Ki Ye Hai Ke Is Raat Me'n Azmat -O- Buland Martaba Waali Kitaab Naazil Huwi Hain. Kitaab Aur Wahi Le Kar Aane Waale Farishte Jibra'eel Alaihissalaam  Buland Martabe Waale Hain. Aur Ye AzeemushShaan Kitaab QurAane Hakeem Jis Mahbube Rasool ﷺ  Par Naazil Huwi  Wo Bhi Badi Azmat  Aur Buland Martabe Waale Hain. Surat-ul-Qadr Me'n  Is Lafz "Qadr" Ki Teen(3) Martaba Aane Me'n Shayad Yahi Hikmat Hai. 

2) "Qadr" Ke Ek Maani Taqdeer Ke Bhi Hain Aur Chunke Is Raat Me'n Bando'n Ki Taqdeer Ka Wo Hissah Jo Is Ramadan Se Agle Ramadan Tak Pesh Aane Waala Hota Hai Wo Muta'Alliqah Farishto'n Ko Sonp Diya Jata Hai. Is Liye Bhi Is Raat Ko Shabe Qadr Kehte Hain.

Nuzule QurAan: 

Allah Ta'Aala Ne Fazilate Shab-E-Qadr Ki Badi Wajah Ye  Bayaan Farmayi Hai Ke Ye Nuzule QurAan Ki Raat Hai. Surah Al-Dukhaan Me'n  Irshaad Baari Ta'Aala Hai:  QurAane Kareem Ko Mubarak Raat Me'n Naazil Kiya. Is Mubarak Raat Se B'az Mufassirine Kiraam Ne "Shab-E-BaRaat"  Muraad Li Hai.  Jaisa Ke Pehle Mazkoor Huwa Aur Ye Bhi Mash'hoor Hai Ke QurAane Hakeem Teyees(23)  Baras  Ki Muddat Me'n Ba-Tadreej Naazil Huwa. Nez Iska Nuzool Rabi-ul-Awwal Me'n Shuru Huwa. 

Shah Abdul Azeez Mohaddis Dehlawi RahmathullAhi Ta'Aala Alaih Ne In Aqwaal Me'n  Khoob Tatbeeq Ki Hai  Wo Farmate Hain, "Shab-E-Qadr Me'n QurAane Kareem Lauhe Mahfooz Se YakBaargi Aasmaane Dunya Par Bait-ul-Izzat Me'n Naazil Huwa. Jab Ke Iske Nuzool Ka Andazah Lauhe Mahfooz Ke Nigehbano'n Ko Iska Nuskha Naqal Karke Aasmaane Dunya Par Pohchane Ka Hukm Isi Saal Ki "Shab-E-BaRaat" Me'n Huwa.

Goya QurAane Hakeem Ka Nuzule Haqiqi "Maahe Ramadan Me'n Shab-E-Qadr" Ko Huwa Aur Nuzule Taqdiri Isse Pehle "Shab-E-BaRaat" Me'n Huwa. Aur Sina-E-Mustafa ﷺ Par Nuzule QurAan Ka Aagaaz Rabi-ul-Awwal Me'n Peer Ke Din Huwa Aur Teyees(23) Saal Me'n Mukammal Huwa.

(Tafsire Azizi, Para:30, Safha:438)

Hazaar Mahino'n Se Behtar

Shab-E-Qadr Ki Dusri Wajah  Fazilat Ye Hai Ke Is Raat Ki Ibadat Ka Sawaab Ek Hazaar Mahino'n Ki Ibadat Se Behtar Hai. Ye Nukta Qaabile Tawajjuh Hai Ke Shab-E-Qadr Ko Hazaar Mahino'n Se Behtar Farmaya Gaya. Magar Ye  Nahi Bataya Gaya Ke Hazaar Maah Se Kitne Darje Zaayid Behtar Hai, Das(10)Darjah,  Sau(100) Darjah Ya Hazar(1000) Darjah Ya Isse Bhi Zyada.

Ek Qaul Ye Bhi Hai Ke "Alfi Shahr" Se Murad Hazar(1000) Ka Mu'ayyan Adad Nahi Hai. Balke Mafhoom Ye Hai Ke Shab-E-Qadr  Zamane Se Afzal Hai Yaani Zyada Se Zyada Tum(Zamanah)  Jitni Muddat Ka Tasawwur Kar Sakte Ho Shab-E-Qadr Usse Bhi Afzal Aur Behtar Hai.

Dusra Nukta Ye Hai Ke Ek Hazar(1000) Mahino'n  Ke 83-Saal Aur Chaar(4) Maah Bante Hain Pas Agar Koyi Shakhs 83-Saal Aur Chaar(4) Maah Tak Din Raat Musalsal IkhLaas Ke Sath Allah Ta'Aala Ki Ibaaldat Kare To Bhi Ek Shab-E-Qadr Ki Ibadat Itni Taweel Muddat Ki Ibadat Se Afzal -O- Behtar Hai. Jabke Is Taweel Muddat Me'n  Koyi Shab-E-Qadr Naa Ho. Isi Tarah Yu'n Bhi Kaha Ja Sakta Hai Ke Agar Koyi Shakhs Shab-E-Qadr Me'n Ibadat Kare To Goya Usne 83-Saal Aur Chaar(4) Maah  Allah Ta'Ala Ki Ibadat Me'n Guzaar Diye. Balke Use Isse Bhi Behtar Ajr Milega Is Par Bas Nahi !  Agar Talab Sacchi Hoto Har Saal Shab-E-Qadr Naseeb Ho Sakti Hai Goya Zara Si Mehnat Aur Lagan Se Kayi Hazaar Mahino'n Se Zyada Ajr-o-Sawaab Haasil Kiya Ja Sakta Hain.

Nuzule Malayikah:

Noore Mujassam Rahmate Aalam ﷺ Ne Farmaya Jab Shab-E-Qadr Hoti Hai To Hazrat Jibra'eel Alaihissalam Farishto'n  Ke Jhurmut  Me'n Zameen Par Utarte Hain Aur Us Shakhs Ke Liye Dua-E- Rahmat Karte Hain,  Jo Khada Ya Betha Allah Ta'Aala Ki Ibadat Kar Raha Ho.

(Mishkaat, Jild:1, Safha:457)

(Shuabul Eemaan Baihaqi, Jild:3, Safha:343)

Dusri Riwayat Me'n Ye Bhi Hai Ke Hazrat Jibra'eel Alaihissalam Aur Farishte Is Shab Me'n Ibadat Karne Waalo'n Se Musafah Karte Hain! Aur Unki Duao'n Par Aameen Kehte Hain Yaha'n Tak Ke Subah Hojati Hai.

(Fazail-ul-Auqaat Baihaqi,Jild:3, Safha:343)

Ulma Farmate Hain Ke Shab-E-Qadr Me'n Ibadat Karne Waalo'n Se Jab Hazrat Jibra'eel Alaihissalam Aur Farishte Salam -O- Musafah Karte Hain To Uski Nishaani Ye Hoti Hai Ke Badan Ke Rongte Khade Hojate  Hain, Dil Khashiyate ILaahi Se Larazne Lagta Hai Aur Uspar Riqqat Taari Hojati Hai  Aur Aankho'n Se Aansu Jari Hojate Hain.

Imam Raazi Rahmathullahi  Alaih Ne Tafsire Kabeer Me'n Farishto'n Ke Zameen Par Utarne Ki Muta'addid Wajuh Tehreer Farmayi Hain Jin Me'n Se Chand Sutoor Mulahizah Hon: 

1) Jab Allah Ta'Aala Ne Farmaya Tha Ke Me'n Zameen Me'n Apna Khalifa Banane Waala Hu'n To Farishto'n Ne Kaha Tha  Ke  Ye Makhlooq Zameen Me'n Fasaad Phailayegi  Aur Khoon Rezi Karegi. Allah Ta'Aala Insaan Ki Izzat -O- Azmat Wazeh Karne Ke Liye Farishto'n Ko Naazil Farmata Hai Ke Jaao'n Aur Dekho Jinke Muta'alliq Tum Ne Kaha Tha, Wo Kya Kar Rahe Hain. Dekh Lo Mere Bande Is Raat Me'n Bistar -O- Aaram Ko Cchod Kar Meri Khaatir Ibadat Me'n Mashgool Hain Aur Mujhe Raazi Karne Ke Liye Aansu Bahate  Dua-E- Maang Rahe Hain. Halanke Shab-E-Bedari Inke Liye Farz Ya Wajib Nahi Balke Sunnate Mokidah Bhi Nahi Sirf Mere Mahbube Rasool ﷺ Ki Targeeb Dene Par Ye Apni Nind -O- Aaram Qurbaan Karke Saari Raat Ke Qayaam Par  Musta'id Hain. Phir Farishte Naazil Hote Hain Momin Ki Azmat Ko Salam Karte Hain.

2) Allah Ta'Aala Ne Momino'n  Se Wada Farmaya Hai Ke Jannat Me'n Inke Paas Farishte  Aayenge Aur Unhe'n Salam Karege Shab-E-Qadr Me'n Farishto'n Ko Naazil Farmane Ki Ek Wajah Ye Bhi Hai Ke Rab Ta'Aala Goya Batana Chahta Hai Ke 

Aye Mere Bando! Agar Tum Dunya Me'n Meri Ibadat Me'n Mashgool Rahe To Tumhare Paas Rahmat Ke Farishte Aayenge Aur Tumhari Ziyarat Karege Tumhe'n Salam Karenge.

3) Allah Ta'Aala Ne Shab-E-Qadr Ki Fazilat -O- Barkat Ahle_Zameen Ke Liye Rakhi Jo Yaha'n Rab Ta'Aala Ki Ibadat Kare'n, Chunanche Farishte Isi Liye Zameen Par Aate Hain Taake Wo Bhi Yaha'n Aakar Allah Ta'Aala Ki Ibadat Kare Aur Shab-E-Qadr Ki Kaseer Ajr -O- Sawaab Ke Mustahiq Hojaye'n. Iski Misaal Aisi Hai Jaise Koyi Shakhs Makkah Mukarramah Is Niyyat Se Jaye Ke Waha'n Ibadat Ka Ajr -O- Sawaab Zyada Milta Hai Isi Tarah Farishte Shab-E-Qadr Me'n Zameen Par Utarte Hain.

4) Insan Ki Fitrat Hai Ke Jab Akabire Ulma Aur Aabid-O-Zaahid Log Maujood Honto Wo Khalwat Ke Muqable Me'n Behtar Tariqe Se Ibadat Aur Ita'ate ILaahi Me'n Mashgool Hojate Hain. Isliye Allah Ta'Aala Muqarrab Farishto'n Ko Naazil Farmata Hai. Taake Inki Maujoodgi Ka Ahsaas Karke Ham Zyada Acche Tariqe Se Ibadat Kare.

5) Farishto'n Ke Salam Ko Ma'muli Nahi Samajhna Chahiye. Unka Salam Salamati Ka Zaamin Hota Hai. Chand Farishto'n Ne Aakar Hazrat Ibraheem Alaihissalam Ko Salam Kiya To Unpar Namrood Ki Aag Gulzaar Hogayi.  Shab-E-Qadr Me'n Ibadat Karne Waalo'n Par Jab Be-Shumar Farishte Aakar Salam Karte Hai To Fir Jahannam Ki Aag Inpar Amn-O-Salamati Ka Gulzaar Kyun Na Banayegi.

Ta'ayyune Shab-E-Qadr:

Shab-E-Qadr Ki Ta'ayyun Me'n Aaima-E-Deen Ke Mukhtaleef Aqwaal Paaye Jate Hain:

Jaleelul Qadr Taba'yee Imame Aazam Abu Haneefah RadiyAllahu Ta'Aala Anhu Ka Qaul Ye Hai Ke Shab-E-Qadr Tamam Saal Me'n Kisi Bhi Raat Ko Ho Sakti Hai. Sahaba Kiraam Me'n Se Hazrat AbdullAh Bin Masood RadiyAllahu Ta'Aala Anhu Ka Yahi Qaul Hai. Imame Aazam Ka Dusra Qaul Ye Hai Ke Ye Ramadan Ki 27wi'n Shab Hai.

Imaam  Abu Yusuf Aur Imam Muhammed RahmahumullAh Ka Qaul Ye Hai Ke Shab-E-Qadr Ramadan Ki Kisi Muta'ayyan Raat Me'n Hoti Hai. Ulma-E-Shafa'iyah Ka Qaul Hai Ke Iska 21wi'n Shab Me'n Hona Aqrab Hai. Imam Maalik Aur Imam Ahmed Bin Hambal RahmahumullAh Ke Nazdeek Ye Ramadan Ke Aakhri Ashre Ke Taaq Raato'n Me'n Hoti Hai Kisi Saal Kisi Raat Me'n Aur Kisi Saal Kisi Dusri Raat Me'n.

Sheikh Muhiyuddeen Ibne Arbi RahmatullAhi Alaih Farmate Hain Ke, Mere Nazdeek Inka Qaul Zyada Saheeh Hai Jo Kehte Hain Ke Ye Tamaam Saal Me'n Kisi Bhi Raat Ko Ho Sakti Hai Kyunke Me'n Ne Shab-E-Qadr Ko Do(2) Martaba Sha'aban Men Paya Hai Ek Baar 15/Sha'aban Ko Aur Dusri Baar 19/Sha'aban Ko Aur Do(2) Martaba Ramadan Ke Darmiyaani Ashre Me'n 13 Aur 18 Ramadan Ko Aur Ramadan Ke Aakhri Ashre Ki Har Taaq Raat Me'n Ise Paya Hai Isliye Ye Pure Saal Me'n Kisi Bhi Raat Ko Ho Sakti Hai Albatta Maahe Ramadan Me'n Ye Ba-kasrat Aati Hai.

Shah Wali Allah Mohaddis Dahelwi AlaihirRahmah In Aqwaal Me'n Tatbeeq Dete Huwe Kehte Hain Ke Shab-E-Qadr Saal Me'n Do(2) Martaba Hoti Hai Ek Wo Jis Me'n Ahkaame ILaahi Naazil Hote Hain Aur Isi Raat Me'n QurAane Kareem Lauhe Mahfooz Se Utara Gaya. Ye Raat Saal Bhar Me'n Kisi Bhi Shab Ho Sakti Hai Lekin Jis Saal QurAane Kareem Naazil Huwa, Us Saal Ye Raat Ramadan-ul-Mubarak Me'n Thi Aur Aksar Ramadan-ul-Mubarak Me'n Hi Hoti Hai. Dusri Shab-E-Qadr Wo Hai Jis Me'n Malayekah Ba-Kasrat Zameen Par Utarte Hain. Ruhaniyat Urooj Par Hoti Hai Ibadat Aur Dua-E- Qubool Hoti Hain Ye Har Ramadan Ke Aakhri Ashre Ki Taaq Raato'n Me'n Hoti Hai Aur Badalti Rehti Hai Ab Chand Ahadise Mubarkah Mulahezah Farmaiye....

1) Hazrat Aaisha Siddiqua RadiyAllahu Ta'Aala Anha Farmati Hain Ke Aaqa-O-Maula ﷺ Ka Farmane Aali Shaan Hai "Shab-E-Qadr Ramadan Ke Aakhri Ashre Ke Taaq Raato'n Me'n Talaash Karo.

(Bukhari, Mishkaat , Jild:1, Safha:450)

2) Hazrat Ubadah Bin SaaMat RadiyAllahu Ta'Aala Anhu Se Riwayat Hai Ke Sarkare Do Aalam ﷺ Ne Farmaya Shab-E-Qadr  Ramadan Ke Aakhri Ashre Ki Taaq Rato'n Yaani 21, 23, 25, 27, 29 We'n Raat Main Hai. Jo Sawaab Ki Niyyat Se Is Raat Me'n Ibadat Karta Hai Allah Ta'Aala Uske Saabiqa  Gunha Bakhsh Deta Hai Isi Raat Ki Alamato'n Me'n Se Ye Hai Ke Ye Raat Khuli Huwi Aur Chamakdaar Hai. Saaf Shaffaaf Goya Anwaar Ki Kasrat Ke Baa'is Chaand Khula Huwa Hai. Ye Zyada Garam Naa Thandi Balke Mutadil. Is Raat Me'n Subah Tak Aasmaan Ke Sitare Shayateen Ko Nahi Maare Jate Iski Nishaniyo'n Me'n Se Ye Bhi Hai Ke Iske Ba'd Ki Subah Ko Suraj Baghair Shu'Aa Ke Tulu Hota Hai. Bilkul Hamwaar Tikyah Ke Tarah Jaisa Ke 14wi'n Ka Chaand KyunKe Shaytaan Ke Liye Rawa Nahi Ke Wo Is Din Suraj Ke Sath Nikle.

(Masnade Ahmed, Jild:5, Safha:324 )

(Majma-ul-Zawayid, Jild:3, Safha:175)

3) Hazrat Ibne Abbaas RadiyAllahu Ta'Aala Anhuma Se Marwi Hai Ke Aaqa-E- Do Jaha'n ﷺ Ne Farmaya Ke, Shab-E-Qadr Ko Aakhri Ashre Me'n 25 Wi'n, 27Wi'n Aur 29Wi'n Raato'n Me'n Talaash Karo.

(Bukhari, Mishkaat, Jild:1  S:450)

27 Wi'n Shab:

Kaseer Ulma Ke Nazdeek 27wi'n Shab, Shab-E-Qadr Hoti Hai. Imame Aazam Abu Haneefah RadiyAllahu Ta'Aala Anhu Se Yahi Marwi Hai.

(Khazain-ul-Irfan)

27wi'n Shab Ke Lailatul Qadr Hone Ki Tayeed Me'n Mandarjah Zail Ahadeese Mubarakah Mulahezah Farmaye'n:

1- Hazrat Ma'wiayh RadiyAllahu Ta'Aala Anhu Se Riwayat Hai Ke Aaqa-O-Maula ﷺ Ne Farmaya Ke, Shab-E-Qadr Ramadan Ki 27wi'n Shab Hai. Imam Baihaqi Ne Farmaya Is Hadees Ki Sanad Saheeh Hai.

(Sunan Abu Dawood , Jild:1, Safha:197)

(Saheeh Ibne Habbaan, Jild:8, Safha:437)

(Sunan Al-Kubra Baihaqi, Jild:4, Safha:312)

2-Hazrat Zar Bin Hubaish RadiyAllahu Ta'Aala Anhu Farmate Hain Ke Me'n Ne Hazrat Ubay Bin Ka'ab RadiyAllahu Ta'Aala Anhu Se Pucha Ke Aap Ke Bhai Abdullah Bin Masood RadiyAllahu Ta'Aala Anhu Ka Irshad Hai Ke Jo Saal Bhar Shab Bedari Kare Wo Shab-E-Qadr Paa Lega. Aap Kya Kehte Hai? Aapne Farmaya Allah Ta'Aala Unpr Raham Farmaye Unhone'n Ye Isliye Kaha Ke Log Ek Hi Raat Par Qana'at Naa KarLe'n Haalanke Wo Jaante The Ke Shab-E-Qadr Ramadan-ul-Mubarak  Ke Aakhri Ashre Me'n Hai Aur Wo 27wi'n Shab Hai Phir Aap Ne Qasam Kha Kar Farmaya" Shab-E-Qadr 27 W'in Raat Hai. 

(Saheeh Muslim, Mishkaat: Jild:1, Safha:451)

4 - Hazrat Abdullah Bin Abbaas RadiyAllahu Ta'Aala Anhuma Farmate Hain, Ek Baar Hazrat Umar RadiyAllahu Ta'Aala Anhu Ne Sahaba Kiraam Alaihimur Ridwaan Se Shab-E-Qadr Ke Muta'alliq Pucha To Sab Ne Mukhtalif Jawab Diye. Me'n Ne Arz Ki Ye Aakhri Ashre Ki 27wi'n Raat Yaani 27wi'n Shab Hai Kyunke Allah Ta'Aala Ka Pasand_Didah Adad Saat(7) Hai. Allah Ta'Aala Ne Saat Aasmaan Paida Farmaye Aur Saat Zamine'n Banaye'n. Insan Ki Takhleeq Saat Darjaat Me'n Farmayi Aur Saat Chize'n Bataure Uski Ghiza Ke Paida Farmaye'n. Hazrat Umar RadiyAllahu Ta'Aala Anhu Ne Farmaya Mera Bhi Yahi Khayal Hai Ke 27wi'n Shab Lailatul Qadr Hai.

(Shuab-ul-Eemaan Baihaqi, Jild:3, Safha:330)

5 - Dusri Riwayat Me'n Aapse Ye Bhi Qaul Hai, Allah Ta'Aala Ne Surah Fateha Ata Farmayi Jiski Saat(7) Aayate'n Hain Aur Jin Aurato'n Se Nikah Haram Hai Wo Bhi Saat Hain. QurAan Me'n Miraas Me'n Saat Logo'n Ke Hisse Bayan Farmaye. Safa Marwah Ke Chakkar Bhi Saat Hain Aur Tawaaf Ke Chakkar Bhi Saat Hain.

6 - Hazrat Abdullah Bin Abbaas RadiyAllahu Ta'Aala Anhuma Se Ye Bhi Riwayat Hai, Lailatul Qadr Me'n Kul Nau(9) Huroof Hain Aur Ye  Surah Al-Qadr Me'n Teen(3) Martabah Aaya Hai 9 Ko 3 Se Zarb(×) De'n To 27 Aata Hai. Isse Ma'loom Hota Hai Lailat-ul-Qadr 27 Wi'n Raat Hai.

(Tafsire Kabeer)

7 - Hazrat Usmaan Abul Aas RadiyAllahu Ta'Aala Anhu Ka Ek Ghulam Behri Jahaz Ka Mallah Raha Tha Wo Unse Kehne Laga Ek Cheez Mere Tajrube Me'n Bahot Ajeeb Hai Wo Ye Ke Saal Me'n Ek Raat Samandar Ka Khaara Paani Meetha Hojata Hai. Aapne Farmaya Ke Jab Wo Raat Aaye To Mujhe Zaroor Batana. Ramadan Ki 27wi'n Shab Ko Usne Kaha Ke Ye Wahi Raat Hai.

(Tafsire Kabeer, Tafsire Azizi)

8 - Jalilul Qadr Taba'ee Hazrat Ubadah Bin Abi Lababah RahmatullAhi Ta'Aala Alaih Farmate Hain, Me'n Ne Ramadan-ul-Mubarak Ki 27wi'n Shab Ko Samandar Ka Paani Chakha To Wo Nihayat Meetha Tha. Hazrat Yahyah Bin Abi Muyasrah RahmatullAhi Ta'Aala Alaih Kehte Hain, Me'n Ne 27wi'n Shab Me'n Khaana-E-Ka'abah Ka Tawaaf Kiya To Me'n Ne Dekha Ke Farishte Fiza Me'n BaitullAh Ka Tawaaf Kar Rahe Hain.

(Shuabul Eemaan Baihaqi, Jild:3, Safha:332)

Ghause Aazam Sayyadina Abdul Qadir Jeelani Qudda Sirrahu Bhi Isi Khayal Ke Qaayil The, 27wi'n Shab Ko Shab-E-Qadr Hoti Hai.

Sheikh Abdul Haq Mohaddis Dehlawi RahmatullAhi Alaih Farmate Hain, Ba'z Ulma-O-Fuqaha Ke Nazdeek Ramadan Ki 27wi'n Shab Me'n QurAane Majeed Khatam Karna Mustahasan Hai Taake Shab-E-Qadr Ki Barkate'n Bhi Haasil Hojaye'n Kyunke Aksar Mohaddiseen Ne Ahadees Bayan Ki Hain Ke 27wi'n Shab Me'n Shab-E-Qadr Hai.

Is Tamam Guftagu Ka Khulasa Ye Hai Awwal To Hamari Koshish Honi Chahiye Ke Ham Maahe Ramadan Ki Tamam Raato'n Ke Aakhri Hissah Me'n Zauq-O-Shauq Ke Sath Allah Ta'Aala Ki Ibadat Kare'n Aur Khoob Duae'n Maange'n. Kam Az Kam Namaze Tahajjud Pura Maah Zaroor Ada Kare'n. Phir Koshish Karke Aakhri Ashrah Ki Tamam Raato'n Ko Ibadate ILaahi Me'n Guzare'n Aur Shab-E-Qadr Ko Talaash Kare'n Warna Kam Az Kam 27wi'n Shab Ko To Zaroor Tamam Raat Raza-E-ILaahi Ke Liye Ibadat -O- Dua Me'n Masroof Rahe'n. Rab Ta'Aala Ham Sabko Shab-E-Qadr Ki Barkate'n Naseeb Farmaye...Aameen

Shab-E-Qadr Makhfi Kyun?

Log Aksar Ye Suwal Puchte Hain Ke Shab-E-Qadr Ko Makhfi Rakhne Me'n Kya Hikmate'n Hain? Jawab Ye Hai Ke Asal Hikmate'n To Allah Ta'Aala Aur Uska Rasool ﷺ Hi Behtar Jaante Hain. Ye Wo Jawab Hai Jo Sahaba Kiraam Alaihimur Ridwaan Baargahe Nabwi Me'n Us Waqt Diya Karte The Jab Unhe'n Kisi Suwal Ke Jawab Ka Qata'ee ILm Naa Hota. Wo Farmate, Allahu-O-Rasooluhu Aalam.

(Bukhari, Muslim, Mishkaat Kitabul Eemaan)

Ghaib Batane Waale Aaqa-O-Maula ﷺ Ke Ruhaani Fuyooz-O-Barkaat Se Iktisabe Faiz Karte Huwe Ulma-E-Karaam Ne Shab-E-Qadr Ke Makhfi Hone Ke Ba'z Hikmate'n Bayan Farmayi Hain, Jo Darj Zail Hain.

1 - Agar Shab-E-Qadr Ko Zahir Kar Diya Jata To Kota Himmat Log Isi Raat Ki Ibadat Par Iktifa Kar Lete Aur Digar Raato'n Me'n Ibadat Ka Aehtamaam Naa Karte. Ab Log Aakhri Ashre Ki Paanch(5) Raato'n Me'n Ibadat Ki Sa'aadat Haasil Kar Lete Hain.

2 - Shab-E-Qadr Zahir Kar Dene Ki Surat Me'n Agar Kisi Se Ye Shab Choot Jaati To Use Bahot Zyada Huzn-O-Malaal Hota Aur Digar Raato'n Me'n Wo Dil Jam'ee Se Ibadat Naa Kar Paata. Ab Ramadan Ki Paanch(5) Raato'n Me'n Se Do(2) Teen(3) Raate'n Aksar Logo'n Ko Naseeb Ho Hi Jati Hain.

3 - Agar Shab-E-Qadr Ko Zahir Kar Diya Jata To Jis Tarah Is Raat Me'n Ibadat Ka Sawaab Hazaar Maah Ki Ibadat Se Zyada Hai Is Tarah Is Raat Me'n Gunah Bhi Hazaar Darjah Zyada Hota. Lihaza Allah Ta'Aala Ne Is Raat Ko Makhfi Rakha Taake Jo Is Shab Me'n Ibadat Kare'n Wo Hazaar Maah Ki Ibadat Se Zyada Ajr-O-Sawaab Paaye'n Aur Jo  Apni Jahalat-O-Kam Nasibi Se Is Shab Me'n Bhi Gunah Se Baaz Naa Aaye'n To Unhe'n Shab-E-Qadar Ki Tauheen Karne Ka Gunah Naa Ho. 

4 - Jaisa Ke Nuzule Malayikah Ki Hikmato'n Me'n Zikr Kar Liya Gaya Hai Ke Allah Ta'Aala Farishto'n Ko Momin Ki Azmate Batane Ke Liye Zameen Par Nazil Farmata Hai Aur Apne Ibadat Guzaar Bando'n Par Fakhr Karta Hai. Shab-E-Qadr Zahir Naa Karne Ki Surat Me'n Fakhr Karne Ka Zyada Mauqa Hai Ke Aye Malayikah! Dekho Mere Bande Ma'loom Naa Hone Ke Bawajood Mahez Aehtamaal Ki Bina Par Ibadat-O-Ita'at Me'n Itni Mehnat-O-Sa'ee Kar Rahe Hain. Agar Unhe'n Bata Diya Jata Ke Yahi Shab-E-Qadr Hai To Phir Unki Ibadat-O-Niyaz Mandi Ka Kya Haal Hota.

5 - Shab-E-Qadr Ka Makhfi Rakhna Isi Tarah Samajh Lijiye Jaise Maut Ka Waqt Naa Batana. Kyunke Agar Maut Ka Waqt Bata Diya Jata To Log Saari Umar Nafsani Khwahishaat Ki Perwi Me'n Gunah Karte Aur Maut Se Aine Pehle Taubah Kar Lete. Isliye Maut Ka Waqt Makhfi Rakha Gaya Taake Insan Har Lamha Maut Ka Khauf Kare Aur Har Waqt Gunaho'n Se Door Aur Neki Me'n Masroof Rahe. Isi Tarah Aakhri Ashre Ki Har Taaq Raat Me'n Bando'n Ko Yahi Soch Kar Ibadat Karni Chahiye Ke Shayad Yahi Shab-E-Qadr Ho. Is Tarah Shab-E-Qadr Ki Justaju Me'n Barkat Waali Paanch(5) Raate'n Ibadate ILaahi Me'n Guzaarne Ki Sa'adat Naseeb Hoti Hai.

Allah Ta'Aala Ne Be-Shumar Hikmato'n Aur Maslahato'n Ke Baa'is Bahot Si Aham Chizo'n Ko Makhfi Rakha Hai. Imam Raazi RahmatullAhi Ta'Aala Alaih Tafsire Kabeer Me'n Farmate Hain, Allah Ta'Aala Ne Apni Raza Mandi Ko Ibadat-O-Ita'at Me'n Makhfi Rakha Hai Taake Log Tamam Umoor Me'n Allah Ta'Aala Ki Ita'at Kare'n.

1 - Usne Apne Ghussah Ko Gunaho'n Me'n Makhfi Rakha Taake Log Har Qism Ke Gunaho'n Se Bache'n.

2 -Apne Auliya Ko Momino'n Me'n Makhfi Rakha Taake Log Sab Eeman Waalo'n Ki Ta'azeem Kare'n.

3 - Dua Ki Qubuliyat Ko Makhfi Rakha Taake Log Kasrat Ke Sath Duae'n Maanga Kare'n.

4 - Isme Aazam Ko Makhfi Rakha Taake Log Allah Ta'Aala Ke Har Naame Mubarak Ki Ta'azeem Kare'n.

5 - Salatul  Wusta (Darmiyani Namaz) Ko Makhfi Rakha Taake Log Sab Namazo'n Ki Hifazat Kare'n.

6 - Maut Ke Waqt Ko Makhfi Rakha Taake Log Har Waqt Khuda Se Darte Rahe'n.

7 - Taubah Ki Qubuliyat Ko Makhfi Rakha Taake Log Jis Tarah Mumkin Hoto Taubah Karte Rahe'n.

8 - Aise Hi Shab-E-Qadr Ko Makhfi Rakha Taake Log Ramadan Ki Tamam Raato'n Ki Ta'azeem Kare'n.

Shab-E-Qadr Ki Ahmiyat:

Shab-E-Qadr Itni Zyada Khair-O-Barkat Waali Raat Hai Ki Ghaib Batane Waale Aaqa-O-Maula ﷺ Ne Irshaad Farmaya, Maahe Ramadan Me'n Ek Raat Aisi Hai Jo Hazaar Mahino'n Se Afzal Hai. Jo Is Raat Se Mehroom Raha, Wo Saari Khair Se Mehroom Raha. 

(Sunan Nisayi, Mishkaat, Jild:1, Safha:426)

Mazkurah Hadeese Paak Hazrat Abu Hurairah RadiyAllahuTa'Aala Anhu Se Marwi Hai, Jab Ki Hazrat Anas RadiyAllahu Ta'Aala Anhu Se Riwayat Hai Ki Noore Mujassam ﷺ Ne Farmaya Is Maah Me'n Ek Aisi Raat Hai Jo Hazaar Mahino'n Se Behtar Hai. Jo Is Raat Se Mehroom Raha Wo Saari Bhalayi Se Mehroom Raha Aur Jo Iski Bhalayi Se Mehroom Raha Wo Bilkul Hi Mehroom Aur Kam Naseeb Hai.

(Sunan Ibne Maja, Mishkaat, Jild:1, Safha:427)

Nabi Kareem ﷺ Ka Ye Irshad Hai, Jo Shab-E-Qadr Me'n Eemaan-O-Ikhlaas Ke Sath Ibadat Karta Hai, Uske Tamam Pichle Gunah Bakhsh Diye Jaate Hain.

(Bukhari, Muslim, Mishkaat, Jild:1, Safha:225)

Ba'z Ahadees-E-Mubarakah Se Mafhoom Nikalta Hai Ke Jo Shakhs Maahe Ramadan Me'n Maghrib Aur Isha Ki Namaze'n Jama'at ke Sath Ada Karta Rahe To Use Shab-E-Qadr Ki Kuch Barkate'n Zaroor Naseeb Hoti Hain.

Hazrat Anas RadiyAllahu Ta'Aala Anhu Se Riwayat Hai Ki Sarkare Do Aalam ﷺ Ne Farmaya, Jis Ne Ramdan Ke Pure Mahine Me'n Maghrib Aur Isha Ki Namaze'n Jama'at Ke Sath Ada Ki Usne Shab-E-Qadr Ka Kisi Qadar Hissah Paa Liya.

(Shuabul Eemaan Baihaqi, Jild:3, Safha:340)

Hazrat Abu Hurairah RadiyAllahu Ta'Aala Anhu Se Riwayat Hai Ke Aaqa-O-Maula ﷺ Ne Farmaya, Jis Ne Pure Maahe Ramadan Me'n Isha Ki Namaz Jama'at Ke Sath Padhi Goya Usne Shab-E-Qadr Ko Paa Liya.

In Ahadees-E-Mubarkah Se Ma'loom Huwa Ke Shab-E-Qadr Ki Barkato'n Se Faizyaab Hone Ke Liye Kam Az Kam Ye Aehtimam Zaroor Kiya Jaaye Ke Maahe Ramadan Me'n In Tamam Namazo'n Aur Khususan Maghrib Aur Isha Ki Namaze Zaroor Bil Zaroor Jama'at Ke Sath Padhe Aur Is Aehtimam Ke Aelawa Aakhri Ashrah Ki Taaq Raato'n Shab-E-Qadr Ki Justju Bhi Zaroor Kare'n.

Ham sabke Aaqa-O-Maula ﷺ Ka Maahe Ramadan Me'n Ye Ma'mool Tha Ki Jab Ramadan Ka Aakhri Ashrah Aata To Aap Ibadat Me'n Is Qadar Mushaqqat Farmate Jo Digar Ayyam Me'n Naa Karte The. Huzoor Akram ﷺ Aakhri Ashre Ki Tamam Raato'n Me'n Naa Sirf Shab Bedari Karte Balke Apne Ghar Waalo'n Ko Bhi Jagate The.

(Bukhari, Muslim, Mishkaat, Jild:1, Safha:451)

Ghaur Farmaiye Jab Allah Ta'Aala Ke Mehboob Rasool ﷺ Aakhri Ashre Me'n Ibadat Me'n Mushaqqate Uthate The Jin Ke Sadqe Tufail Ham Gunahgaro'n Ki Bakhshish Honi Hai, To Ham Aur Aap Aakhri Ashre Me'n Allah Ki Raza Ke Liye Apne Aaqa-O-Maula ﷺ Ki Sunnat Kyun Naa Apnaye. AalaHazrat Imam Ahmed Raza Mohaddis Bareilwi RahmatullAhi Ta'Aala Alaih Farmate Hain:

Wo To Nihayat Sasta Sauda Bech Rahe Hain Jannat Ka

Ham Muflis Kya Mol Chunkaye'n Apna Haath Hi Khaali Hai

(BaHawalah: Mubarak Raate'n, Musannif: Hazrat Allamah Sayyed Shah Turab-ul-Haq Qadri RahmatullAhi Ta'Aala Alaih)

SHABE QADR KE NAWAFIL