Roze Ka Bayaan Hadees Shareef Se
● Hadees No.1
Hazrat Abu Hurerah RadiyAllahu Ta'Aala Anhu Ne Kaha Ke
Rasoole Kareem AlaihisSalato Wassalaam Ne Farmaya Ke Jab Mahe Ramzaan Shuru Hota He To Aasmaan Ke Darwaze Khol Diye Jate Hain Aur Ek RiwayatMain He Ke Jannat Ke Darwaze Khol Diye Jate Hain
Aur Dozakh Ke Darwaze Band Kar Diye Jate Hain
Aur Shayateen Zanjiro'n Main Jakad Diye Jate Hain
Aur Ek Riwayat Main He Ke Rahmat Ke Darwaze Khool Diye Jate Hain (Bukhari ,Muslim)
● Hazrat Sheikh Abdul Haq Muhaddis Dehelwi Rahmathullahi Aleh
Is Hadees Ke Tehat Farmate Hain Ke
Tarjuma:- Aasmaan Ke
Darwaze Khol Diye Jane Ka Matlab He Pe Darpe Rahmat Ka Bejhna
Aur Bagher Kisi Rukawat Ke Bargaahe ELaahi Main Aamaal Ka
Pohachna Aur Dua Ka Qubool Hona..
Aur Jannat Ke Darwaze Khol
Diye Jane Ka Mani He Nek Aamaal Ki Taufeeq Aur Husn Qubool
Ata Farmana.. Aur Dozakh Ke Darwaze Band Kiye Jane Ka Matlab
He Rozah Daaro Ke Nufoos Ko Mamnu'aate Shar'yi'yah
Ki Aalodgi Se Paak Karna Aur Gunaho'n Par Obharne Wali Cheezo'n
Se Najaat Pana Aur Dil Se Lazzato'n Ke Husool Ki Khwahishaat Ka
Todna.. Aur Shayateen Ko Zanjiro'n Main Jakad Diye Jane Ka Mani
He Bure KhayaLaat Ke Rasto'n Ka Band Hona.
(📙Ash'Atul Lam'Aat , J-2, S-72)
(📙Anwar-ul-Hadees ,S-271 to 272)
●Hadees No.2
Hazrat Abu Hurerah RadiyAllahuTa'Aala Anhu Ne Kaha Ke RasoolAllah SallAllAhuTa'AalaAlehiWaSaalam Ne Farmaya
Jo Shakhs Imaan Ke Sath Sawab Ki Ummeed Se Roze Rakhega To Uske Agle Gunah Bakhsh Diye JayengeAur Jo Imaan Ke Sath Sawaab Ki Niyat Se Ramzaan Ki Raato'n Main Qayaam Ibadat Karega To Uske Agle Gunah Bakhsh Diye Jayenge
Aur Jo Imaan Ke Sath Sawaab Haasil Karne Ki Garz Se Shabe Qadr Main Qayaam Karega Uske Agle Pichle Gunah Bakhsh Diye Jayenge.
(📚Bukhari , Muslim)
(📓Ref:Anwar-ul-Hadees , S-272)
●Hadees No:3
Hazrat Abu Hurerah RadiyAllahu Ta'Aala Anhu Kehte Hain KeHuzoor Alehissalato WasSalaam Ne Farmaya Ke Jab Mahe Ramzaan Ki Pehli Raat Hoti He To Shaytaan Aur Sarkash Jinn Qaid Kar Liye Jate Hain
Aur Jahannum Ke Darwaze Band Kar Diye Jate Hain (Phir Ramzaan Bhar) Un Main Se Koyi Darwazah Khola Nahi Jata
Aur Jannat Ke Darwaze Khol Diye Jate Hain To Un Main Se Koyi Darwazah Band Nahi Kiya Jata
Aur Munadi Pukarta He Ke Ae__ Khair Ki Talab Karne Wale. Mutawajjah Ho
Aur Ae__Buraayi Ka Iradah Rakhne Wale ! Buraayi Se Baaz Reh.
Aur Allah Bahot Se Logo'n Ko Dozakh Se Azaad Karta He Aur Har Raat Aisa Hota He.
(📚Tirmazi , Ibne Maaja)
(📓Ref: Anwar-ul-Hadees ,S-272 to 273)
●Hadees No:4
Hazrat Abu Hurerah RadiyAllahu Ta'Aala Anhu Kehte Hain KeHuzoor AlehisSalato WasSalaam Ne Farmaya Ke
Ramzaan Aaya Ye Barkat Ka Mahina He Allah Ta'Aala Ne Iske Roze Tum Par Farz Kiye Hain. Is Main Aasmaan Ke Darwaze Khol Diye Jate Hain Aur Dozakh Ke Darwaze Band Kar Diye Jate Hain
Aur Sarkash Shayateen Ko Tauq Pehnaye Jate Hain.
Aur Is Main Ek Raat Aisi He Jo Hazaar Mahino'n Se Afzal He. Jo Iski Barkato'n Se Mehroom Raha Wo Beshak Mehroom He
(📚Ahmad, Nisaayi, Mishkaat)
(📓Ref: Anwar-ul-Hadees,S-273)
●Hadees No:5
Hazrat Salmaan Farsi RadiyAllahu Ta'Aala Anhu Ne Kaha KeHuzoor AlehisSalato WasSalaam Ne Sha'Abaan Ke Aakhir Main Wa'az Farmaya
Ae__Logo'n ! Tumhare Paas Azmat Wala Barkat Wala Mahina Aaya. Wo Mahina Jis Main Ek Raat Hazaar Mahino Se Behtar He Uske Roze Allah Ta'Aala Ne Farz Kiye Aur Uski Raat Main Qayaam Karna (Namaaz Padhna) Ta'Tua Yani Nifl Qaraar Diya He Jo UsMain Neki Ka Koyi Kaam Yani Nifl Ibadat Kare To Aisa He Jaise Aur Mahine Main Farz Ada Kiya.
Aur Jisne Ek Farz Ada Kiya To Aisa He Jaise Aur Dino Main Sattar Farz Ada Kiye Ye Sbr Ka Mahina He Aur Sbr Ka Sawaab Jannat Hai Aur Ye Gham Khwari Ka Mahina He Aur Us Mahina Main Momin Ka Rizq Badhaya Jata Hai Jo Uske Gunaho Ke Liye Magfirat Hai Aur Uski Gardan Dozakh Se Aazaad Kardi Jayegi Aur Usmain Iftaar Karane Wale Ko Waisa Hi Sawaab Milega Jaisa Roza Rakhne Wale Ko Milega Bagher Uske Ke Uske Sawaab Main Kuch Kami Waqa Ho.
Hamne Arz Kiya Yaa Rasool'Allah (صلى الله تعالى عليه وسلم) ! Ham Main Ka Har Shakhs Wo Cheez Nahi Paya Jisse Rozah Iftaar Karaye.
Huzoor (صلى الله تعالى عليه و سلم ) Ne Farmaya Allah Ta'Aala Ye Sawaab Us Shakhs Ko Bhi Dega Jo Ek Ghoont Doodh Ya Ek Khajoor Ya Ek Ghoont Paani Se Iftaar Karaye Aur Jisne RozaDaar Ko Pet Bhar Kar Khilaya Usko Allah Ta'Aala Mere Hauz Se Seraab Karega.
Kabhi Pyasa Na Hoga. Yaha Tak Ke Jannat Main Dakhil Hojayega. Ye Wo Mahina He Ke Iska Ibtedayi Hissa Rahmat Hai Aur Iska Darmiyaani Hissa Magfirat Hai Aur Iska Aakhri Hissa Jahannum Se Aazaadi Hai. Aur Jo Apne Gulaam Par Is Mahine Main Takhfeef Kare Yani Kaam Lene Main Kami KarDe To Allah Ta'Aala Use Bakhsh Dega Aur Jahannum Se Aazaad Farmayega.
(📙Baihaqi)
(📙Ref: Anwar-ul-Hadees ,S-273 to275)
●Hadees No:6
Hazrat Abu Hurerah RadiyAllahu Ta'Aala Anhu Se Riwayat Hai Ke Nabi Kareem AlehisSalaat-o-TasLeem Ne Farmaya Ke Ramzan Ki Akheer Raat Main Is Ummat Ki Magfirat Hoti Hai.Arz Kiya Gaya Ke Wo "SHABE QADAR" Hai?
Farmaya Nahi..
Lekin Kaam Karne Walo Ko Us Waqt Mazduri Puri Di Jati Hai. Jab Wo Kaam Pura Kare.
(📙Ahmad)
(📙Anwar-ul-Hadees , S-275)
●Hadees No:7
Hazrat Abu Hurerah RadiyAllahu Ta'Aala Anhu Ne Kaha Ke Rasoole Kareem AlehisSalaat-O-Tasleem Ne Farmaya Ke Jis Shakhs Ko Rozah Ki Haa'Lat Main Khud Ba-Khud Qay Aajaye Uspar Qaza Wajib Nahi.Aur Jo Qasdan Qay Kare Uspar Qaza Wajib Hai.
(📚 Tirmazi ,AbuDawood)
(📙Ref:Anwar-ul-Hadees ,S-257 to 276)
●Hadees No.8
Hazrat Abu Hurerah RadiyAllahuTa'AalaAnhu Ne Kaha Ke Huzoor AlehisSalaato Wassalam Ne Farmaya Ke Jo Shakhs (Roza Rakh Kar) Buri Baat Kehna Aur Uspar Amal Karna Tark Na Kare To Khuda-E-Ta'Aala Ko Uski Parwah Nahi Ke Usne Khana Peena Cchod Diya Hai.(📙Bukhari)
Is Hadees Ke Tahet Hazrat Shaikh Abdul Haqq Muhaddis Dehelwi RahmaThullahi Alaih Farmate Hain Ke
"Rozah Qubool Na Hoga Isliye Ke Rozah Ke Mashro'a Aur Wajib Karne Ka Maqsad Yahi Bhook Aur Pyaas Nahi Hai Balke Lazzato'n Ki Khwahishaat Ka Todna Aur Khud Garzi Ki Aag Ko Bujhana Maqsoos Hai Taake Nafs Khwahishaat Ki Janib Raagib Hone Ki Bajaye Hukm Elaahi Par Chalne Ke Wala Hojaye.
(📙Ash'atul Lam'aat, J-2, S-85)
(📙Ref:Anwar -ul-Hadees , S-276)
● Hadees No.9
Hazrat Salma Bin Muhabbaq RadiyAllahuTa'AalaAnhu Ne KahaHuzoor AlehisSalato WasSalam Ne Farmaya Ke Jis Shakhs Ke Paas Aisi Sawari Ho Jo Aaram Se Manzil Tak Pohcha De To Usko Chahiye Ke Rozah Rakhe Jaha Bhi Ramzaan Aajaye.
(📙Abu Dawood)
(📙Ref:Anwar-ul-Hadees , S-276)
●Hadees No.10
Hazrat Anis Bin Maalik Ka'Abi RadiyAllahuTa'AalaAnhu Ne Kaha KeRasoole Kareem AlehisSalaat-o-Tasleem Ne Farmaya Ke Allah Ta'Aala Ne (Sharyi) Musafir Se Aadhi Namaaz Muaf Farma Di.
(Yani Musafir 4-Rak'at Wali Farz Namaaz Du Padhe.)
Aur Musafir , Doodh Pilaane Wali Aurat Aur Haamila Se Rozah Muaf Kar Diya.
(Yani In Logo Ko Ijazat Hai Ke Us Waqt Rozah Na Rakhe Ba'd Main Qaza KarLe.
(📚Abu Dawood , Tirmazi)
Hazrat Shaikh Abdul Haqq Muhaddis Dahelwi RahmathullAhi Alaih Is Hadees Ke Tahet Farmate Hain Ke
Doodh Pilaane Wali Aur Haamila Aurat Ko Rozah Na Rakhne Ki Rukhsat Sirf Is Surath Main Hai Ke Baccha Ko Ya Khud Usko Rozah Se Nuqsaan Pohche ( Warna Rukhsat Nahi Hai.
(📙Ash'Atul Lam'Aat , J-2, S-94)
(📙Ref:Anwar-ul-Hadees , S-276 to 277)
●Hadees No.11
Hazrat Abu Ayyub Ansari RadiyAllahuTa'AalaAnhu Ne Kaha Hai KeHuzoor AlehisSalaat WasSallaam Ne Farmaya Ke Jis Ne Ramzaan Ka Rozah Rakha Phir Iske Ba'd 6- Roze Shawwal Ke Rakhe To Usne Goya Hamesha Rozah Rakha.
(📙Muslim)
(📙Ref:Anwar-ul-Hadees , S-277)
●Hadees No.12
Hazrat Abu Qataada RadiyAllahuTa'AalaAnhu Ne Kaha KeRasule Kareem AlehisSalaat Wa Tasleem Ne Farmaya Ke
Mujhe Khuda-E-Ta'Aala Ki Rahmat Se Ummeed Hai Ke Arfa Ke Din Ka Rozah Ek Saal Agle Aur Ek Saal Pichle Ka Gunah Dor Kar Dega.
(📙Muslim)
(📙Ref:Anwar-ul-Hadees S-277)
●Hadees No.13
Hazrat Hafsa RadiyAllahuTa'AalaAnha Ne Farmaya KeChaar(4) Chize'n Hain Jinhe Huzoor AlehisSalaat WasSalaam Nahi Chodte The
1 - Ashura Ka Rozah
2 - Zil-Hajjah Ke Roze (1 se 9 Tak)
3 - Har Mahina Ke Teen(3) Roze
4 - 4_Raka'ten Fajar Ki Farz Se Pehle.
(📙Nisaayi)
(📙Ref:Anwar-ul-Hadees , S-278)
●Hadees No.14
Hazrat Abu Zard RadiyAllahuTa'AalaAnhu Ne Kaha KeRasule Kareem AlehisSalaat WasSalaam Ne Farmaya Ke
Ae Abu Zard ! Jab (Kisi) Mahina Main 3-Din Rozah Rakhna Ho To 13 , 14 Aur 15 Tareekh Ko (Rozah) Rakho.
(📚Tirmazi , Njsaayi)
(📙Ref:Anwar-ul-Hadees , S-278)