Miraas
Islami Qanoon Me'n Musalmano'n Ki Saari Aulaad Yaani Ladke Ladkiya'n Apne Maa'n Baap Ke Marne Ke Ba'd Uske Maal Se Miraas Lete Hain. Ladke Ko Ladki Se Dugna Hissah Milta Hai Magar Hindu'o'n Aarmiyo'n Ke Darham Me'n Ladki Baap Ke Maal Se Mehroom Hoti Hain Aur Sab Maal Ladka Hi Leta Hai Yeh Saaf Zulm Hai. Jab Dono'n Ek Hi Baap Ki Aulaad Hain To Ek Ko Miraas Dena Ek Ko Naa Dena Iske Kya Maani? Lekin Kaathiya Waad Aur Punjab Ke Musalmano'n Ne Apne Liye Yeh Hinduwani Qanoon Qubool Kiya Hai Aur Hukumat Ko Likh Kar De Diya Ke Hamko Hinduwani Qanoon Manzoor Hai. Jiske Maani Yeh Huwe Ke Ham Zindagi Me'n To Musalman Hain Aur Marne Ke Ba'd Na'uzubillah Hindu.
Yaad Rakho! Qayamat Me'n Iska Jawab Dena Padega. Agar Islam Ke Is Qanoon Se Narazi Hai To Kufr Hai Aur Agar Isko Haq Jaan Kar Ispar Amal Naa Kiya To Haq Talfi Aur Zulm Hai.
Tum Ladke Ko Kya Bakhsh Dete Hain Aur Ladkiya'n Kya Chheen Leti Hain? Jab Tum Mar Hi Gaye To Ab Tumhara Maal Koyi Bhi Le Tumko Kya? Tum Bete Ki Mohabbat Me'n Apni Aakhirat Kyun Tabah Karte Ho? Tumhara Yeh Khayal Bhi Ghalat Hai Ke Ladki Tumhara Maal Barbad Kar Degi. Ham Ne To Yeh Dekha Hai Ke Apne Baap Ki Cheez Ka Dard Jitna Ladki Ko Hota Hai Itna Ladke Ko Nahi Hota. Ek Jagah Ladko'n Ne Baap Ka Makaan Farokht Kiya, Ladke To Khushi Se Farokht Kar Rahe The Magar Ladki Bohat Roti Chillati Thi Ke Yeh Mere Mare Baap Ki Nishani Hai Isko Dekh Kar Apne Baap Ki Khidmat Me'n Apna Hissah Farokht Naa Karungi Uske Rone Se Dekhne Waale Bhi Rone Lage Aur Budhape Me'n Jitni Maa'n Baap Ki Khidmat Ladki Karti Hai Itni Khidmat Ladka Nahi Karta. Phir Is Ghareeb Ko Kyun Mehroom Karte Ho? Ladke To Marne Ke Ba'd Qabar Par Fatehah Ko Bhi Nahi Aate.
Lihaza Zaruri Hai Ke Ladki Aur Ladke Ko Pura Hissah Do. Kaathiya-waad Me'n Ek Qaum Hai Aagha Khwani Khwaja. Agar Unke Do Bete Honto Ek Ka Naam Qasim Bhai Aur Dusre Ka Naam Raam Laal Ya Molji Kehte Hain Ke Agar Qayamat Ke Din Musalmabo'n Ki Bakhshish Huwi To Qasim Bhai Bakhshwa Lega Aur Agar Hindu'o'n Ki Najaat Huwi To Raam Laal Hath Pakdega.
Kya Yeh Hi Hamne Bhi Samajh Rakha Hai Ke Zindagi Me'n Islami Kaam Kare'n Aur Miraas Me'n Hindu'o'n Ke Qanoon Ikhtiyar Kare'n Taake Dono'n Khush Rahe'n.
Agar Musalmano'n Ko Yahi Fikr Hai ke Hamari Aulaad Hamara Maal Barbad Karegi To Chahiye Ke Apni Jayedaad, Makanaat, Dukaane'n Waghairah Apni Aulaad Par Waqf Kar De'n Iska Faidah Yeh Hota Hai Ke Hamare Ba'd Hamari Aulaad, Hamari Jayedaad Aur Makanaat Se Har Tarah Nafa'a Uthaye Aur Is Me'n Rahe Iska Kiraya Khaye Aur Hissah Rasad Kiraya Ka Aapas Me'n Taqseem Kare Magar Isko Rahan (Girwi) Naa Kar Sake, Isko Bech Naa Sake. Isse In-Shaa-Allah Tumhari Jayedaad Aur Maknaat Mahfooz Hojayenge. Kisi Ke Hath Farokht Naa Hosakenge Aur Tamam Gunah Se Bhi Bach Jayege. Agar Musalman Is Qanoon Par Amal Karte To Aaj Unki Jayedaade'n Hindu'o'n Ke Paas Naa Pohach Jaate'n. Waqfe Alal-Aulaad Karne Ka Tariqah Kisi Aalim Se Pooch Lena Chahiye Aur Miraas Ke Liye Ham(Musannif) Ne Ek Kitab Urdu Zuban Me'n Likh Di Hai Jiska Naam Hai علم المیراث Iska Mutale'aah Karo.