Ladkiyo'n Ki Ta'aleem
Apni Ladki Ko Wo ILm-O-Hunar Zaroor Sikha Do, Jiski Usko Jawan Hokar Zarurat Padegi Lihaza Sab Se Pehle Ladki Ko Paaki Paleed Haiz-O-Nifaas Ke Shara'ee Mas'ale, Rozah, Namaz, Zakaat Waghairah Ke Mas'ale Padha Do Yaani QurAan Shareef Aur Diniyaat Ke Risale Padha Do. Phir Kuch Aisi Akhlaaqi Kitabe'n Jis Me'n Shauhar Ke Huqooq Bajalane, Baccho'n Ke Paalne, Saas Nanado'n Se Mail-O-Mohabbat Rakhne Ke Tariqe Sikhaye Gaye Hon Wo Bhi Zaroor Padha Do. Behtar Ye Hai Ke Unko Nabi Kareem Alaihissalam Ki Tareekh Bhi Mutale'ah Karao. Jisse Dunya Me'n Rehne Sehne Ka Dhang Aajaye Iske Ba'd Har Tarah Ka Khaana Pakana Baqadr Zarurat Sina Parona Aur Dusri Zanana Dastkari Aur Suyi Ka Hunar Zaroor Sikhao Kyunke Suyi Wo Cheez Hai Jiski Zarurat Marne Ke Ba'd Bhi Padti Hai Yaani Murdah Sila Huwa Kafan Pahen Kar Qabr Me'n Jata Hai. Suyi Aurato'n Ka Khaas Hunar Hai Ke Agar (Khuda Naa Kare) Kabhi Aurat Par Koyi Musibat Pad Jaye Ya Bewa Hojaye Aur Kisi Majburi Ki Wajah Se Dusra Nikah Naa Kar Sake To Ghar Me'n Aabru Se Beth Kar Apni Dastakariyo'n Se Pet Paal Sake. Aaj Kal Khaana Pakane Aur Sine Parone Ki Bahot Si Kitabe'n Cchap Chuki Hain. Chunanche Dehli Ka Bawarchi Khaana, Khwan Nemat, Khwan Yaghma, Khaana Pakane Ke Hunar Ke Liye Zaroor Padha Do, Balke Unse Har Tarah Ka Khaana Pakwalo.
Dosto! Teen Chizo'n Se Apni Ladkiyo'n Aur Biwiyo'n Ko Bahot Bachao. Ek Novel, Dusre College Aur Scholo'n Ki Ta'aleem, Tisre Thetor Aur Cinema. Ye Teen Chize'n Ladkiyo'n Ke Liye Zehre Qatil Hain. Is Waqt Ladkiyo'n Me'n Jis Qadar Shaukhi, Aazadi Aur Be-Ghairati Hai Wo Sab Inhi Teen Hi Ki Wajah Se Hai Ham Ne Dekha Ke Ladkiyo'n Ke Liye To Pehle Zananah School Khule Aur Un Me'n Pardah Aur Gaadiya'n Bacchiyo'n Ko Laane Aur Le Jaane Ke Liye Rakhi Gaye'n Agarche Un Me'n Kaana Pardah Tha. Magar Khair Kuch Aar Aur Sharam Thi Phir Wo Gaadiya'n Band Huwe'n Aur Sirf Ek Aurat Jisko Mama'n Kehte The Laane Aur Pohchane Ke Liye Reh Gayi. Phir Wo Bhi Kahtam. Sirf Ye Raha Ke Jawan Ladkiya'n Burqah Pahen Kar Aaye'n. Phir Ye Bhi Khatam Huwa. Aazadna Taur Se Aane Jaane Lage'n. Phir Aqal Ke Andho'n Ne Ladkiyo'n Aur Ladko'n Ko Ek Hi Jagah Ta'aleem Shuru Kara Di Aur Sharda Act Jaari Karaya Jiske Maani Ye The Ke 18 Saal Se Pehle Koyi Nikah Naa Kar Sake Phir Ladkiyo'n Aur Ladkiyo'n Ko Cinema Ke Ishqiyah Darame Dikhaye Behudah Novelo'n Ki Rok Thaam Naa Ki Jiska Matlab Saaf Ye Huwa Ke Unke Jazbat Ko Bhadka Gaya Aur Nikah Rok Kar Bhadke Huwe Jazbat Ko Pura Hone Se Rok Diya Gaya Jiska Mansha Sirf Ye Hai Ke Haram Kaari Badhe Kyunke Bhadki Huwi Shehwat Jab Halaal Rasta Naa Payegi To Haraam Ki Taraf Kharch Hogi Aur Aisa Ho Raha Hai. Ab Is Waqt Ye Haaalt Hai Ke Jab Scholo'n, Collego'n Ki Ladkiya'n Subah Shaam Zarq Barq Libaas Me'n Rasto'n Me'n Aapas Me'n Mazaaq Dil Lagi Karti Huwi Zor Se Baate'n Karti Huwi Itr Lagaye, Dupatta Sar Se Utare Huwe Nikalti Hain To Ma'aloom Hota Hai Ke Shayad Hindustan Me'n Paris Aagaya Aur Dard Mand Dil Rakhne Waale Khoon Ke Aansu Rote Hain. Akbar ILa Abadi Ne Khoob Farmaya Hai:
Be-Pardah Mujh Ko Aaye'n Nazar Chand Bebiya'n
Akbar Zamee'n Me'n Ghairate Qaumi Se Gid Gaya !
Pucha Jo Unse Aapka Pardah Kidhar Gaya
Kehne Lage'n Ke Aql Par Mardo'n Ke Pad Gaya
Koshish Karo Ke Tumhari Ladkiya'n Haya_Daar Adab Waali Bane'n, Taake Unki Aulaad Me'n Ausaaf Paaye Jaye'n. Dr. Iqbal Ne Kya Khoob Farmaya:
Be Adab Maa'n Baa Adab Aulaad Jan Sakti Nahi
Ma'dane Zar Ma'dane Faulaad Ban Sakti Nahi
Yaad Rakho Ke Is Zamanah Me'n In Scholo'n Collego'n Ne Qaum Me'n Inqalaab Paida Kar Diya Hai. Aaj Tariqah Ye Hai Ke Agar Kisi Qaum Ka Naqshah Badalna To Us Qaum Ke Baccho'n Ko College Ki Ta'aleem Dilao, Bahot Jald Is Qism Ki Haalat Badal Jayegi. Akbar Ne Khoob Kaha Hai:
Yu'n Qatl Se Baccho'n Ke Wo Badnaam Naa Hota
Afsoos Ke Firon Ko College Ki Naa Sojhi.
Aur Dosto! Ba'z Scholo'n Aur Collego'n Ke Naam Me'n IsLaam Ka Naam Bhi Laga Hota Hai Yaani Unka Naam Islamiyah School, Islamiyah College Is Naam Se Dhoka Naa Khao Islamiyah School, Islamiyah College Naam Rakhna Faqat Muslim Qaum Se IsLaam Ke Naam Par Chandah Wasool Karne Ke Liye Hai Warna Kaam Sab Collego'n Ka Qareeb Qareeb Yaksa'n Hai. Ghazab To Dekho Ke Naam Islamiyah School Aur Ta'ateel Hoti Hai Itwar Ke Din. IsLaam Me'n To Bada Din JumuAh Ka Hai. Har Kaam Angrezi Me'n Waha'n Ke Talba Ke Akhlaaq Aur Aadaat Angrezi. Phir Ye Islamiyah School Kaha'n Raha. Ba'z Scholo'n Ke Naam Bajaye Islamiyah School Momedon School Ya Momedon College Rakh Diye Gaye.
Allah Ta'Aala Ne Ham Musalman Ka Naam Rakha Hai. Muslimeen QurAan Farmata Hai:
ھو سمکم والمسلیمین
Allah Ta'Aala Ne Tumhara Naam Musalman Rakha Magar Isaiyo'n Ki Taraf Se Hamara Naam Momedon Rakha Gaya. Ham Logo'n Ko Wahi Naam Pasand Aaya Jo Ke Isaiyo'n Ne Hamko Diya.
Gharz Ke In Scholo'n Se Apni Ladkiyo'n Ko Bachao Aur Apne Ladko'n Ko Bhi Waha'n Ta'aleem Zaruratan Dilao. Magar Unka Deen-O-Mazhab Sambhal Kar. Isi Tarah Ladkiyo'n Ko Ghar Par Jo Mastaro'n Se Padhwate Hain Ya Isaiyo'n Aurato'n Ya Lediyo'n Se Ta'aleem Dilawate Hain Wo Bhi Sakht Ghalat Karte Hain. Bahot Jagah Dekha Gaya Ke Ladkiya'n Mastaro'n Ke Sath Bhaag Gaye'n. Aur In Aawarah Ustaniyo'n Ke Zari'ah Se Hazarha Fitne Phele. Mujhe Ye Ma'loom Nahi Hota Ke Aakhir Ladkiyo'n Ko Is Qadar Aala Ta'aleem Ki Kya Zarurat Hai Inko To Wo Chize'n Padhao Jisse Unko Kaam Karna Padta Hai Unka Saara Kharcha To Shauharo'n Ke Zimmah Hoga Phir Inko Is Qadar Ta'aleem Se Kya Faidah Hai?
Gharz Ke Apni Aulaad Ko Deen_Daar Aur Hunar Mand Banao Ke Is Me'n Deen-O-Dunya Ki Bhalayi Hai Apni Ladkiyo'n Ko Sirf Khatoone Jannat Fatima TuzZahra RadiyAllahu Ta'Aala Anha Ke Naqshe Qadam Par Chalao. Unki Paak Zindagi Ka Naqshah Wo Hai Jo Dr. Iqbal Ne Is Tarah Bayan Farmaya:
Aa'n Adab Par Darda-E- Sharm-O-Haya
Aasiya Gardaan -O- Lab QurAan Sara
Aatisheen-O-Nooriya'n Farma'n Barash
Gum Raza'ish Dar Raza shauhar Sha
Hath Me'n Chakki Aur Muh Me'n QurAan Dono'n Jahaan Unki Farma_Bardar Aur Wo Khawind Ki Matee.