Hamare Ba'z Dosto'n Ki Farma'ish Thi Ke Kitab Ke Aakhir Me'n Faidah Mand Wazife Aur Aamaal Rozana Padhne Ke Bhi Aur Mutabarrik Tarikho'n Aur Badi Raato'n Ke Bhi Bayan Kar Dijiye Jaye'n Kyunke Log Inse Be-Khabar Hain. Musalmano'n Ke Faide Ke Liye Woh Aamaal Jo Ke Bifadlihi Ta'Aala 100% Kamiyab Hain Aur Jiski Mujhko Mere Wali-E-Nemat, Murshide Barhaq Hazrat Sadrul Afazil Maulana Mohammed Na'eemuddeen Saheb Qiblah Damat Barkatuhumil Qudsiyah Ki Taraf Se Ijazat Hai Khaas Le-wajhillah Batata Hun Aur Sunni Musalmano'n Ko Inki Ijazat Deta Hun.
◆Zaruri Note: Har Amal Ki Kamiyabi Ki Do Sharte'n Hain.
Awwal: Aamil Ka Saheeh-ul-Aqeedah Sunni Hona Aur Har BadMazhab Khususan Devbandi Aur Wahabi Ki Sohbat Se Bachna. Dusre Shara'ee Ahkaam Namaz, Roze Ka Sakhti Se Paband Hona. Mareez Agar Dawa Kare Magar Parhez Naa Kare To Dawa Faidah Nahi Pohchati. Isi Tarah Agar In Mazkurah Aamaal Ka Karne Waala Yeh Do Parhez Na Karega To Kamiyab Na Hoga. Do Tarah Ke Wazife Bayan Karta Hun Ek To Rozana Ya Kisi Khaas Mauqa Par Padhne Ke, Dusre Khaas Raato'n Aur Mutabarrik Tarikho'n Me'n Padhne Ke Liye.
Subh-O-Shaam
Namaze Fajar Aur Namaze Maghrib Ke Ba'd Har Roz Teen Baar Yeh Dua Padhe Awwal-O-Aakhir 3-3-Baar Durood Shareef Aur Yeh Dua Padhe "A'uzu Bi-Kalimaatil Laahit Taammaati Min Sharri Maa Khalaq"
Phir Yeh Padhe "Salamun Ala Nuhin Fil-Aalameen" In Shaa Allah Zehrile Janwaro'n Saanp Bichhu Waghairah Se Mahfooz Rahega. Nihayat Mujarrab Hai.
Rozana Subah
Fajar Ki Sunnate Apne Ghar Padhe Aur Sunnato'n Ke Ba'd Awwal Aakhir Durood Shareef 3-3 Baar Darmiyan Me'n 70 Baar "Astaghfirullaha Rabbi Min Kulli Zambiw Wa-Atubu ELaih" Padhe Ghar Me'n Bohat Barkat Rahegi Aur Sab Ghar Waalo'n Me'n Ittefaqi Bifadlihi Ta'Ala Hoga. Magar Shart Yeh Hai Ke Mard Sunnate Fajar Ke Ba'd Farz Masjid Me'n Jama'at Ke Sath Padhe.
Khaana Khaane Ke Waqt
"Bismillahil Lazi Laa Ya Durru Ma'As'mihi Shay-un Fil-Ardi Wala Fis-Samaa'e Wahu-was-Sami'ul Aleem" Jab Khaana Samne Aaye Tab Yeh Padh Kar Khaye. Rab Ne Chaha To Woh Khaana Nuqsaan Naa Kare. Dawa Par Bhi Yahi Dua Padh Leni Chahiye.
Dushmano'n Ke Shar Se Bachne Ke Liye
Rozana Subah-O-Shaam Awwal-O-Aakhir Durood Shareef Padh Kar Teen Baar Yeh Dua Padhe "Bismillahi Khairil Asmaa'e Bismillahil Lazi Laa-Ya Durru Ma'Asmihi Shay-un Fil Ardi Wala Fis-Samaa'e" In Shaa Allah Dushmano'n Ke Shar Se Mahfoz Rahega.
Safar Ko Jaate Waqt
Jab Ghar Se Safar Ke Liye Nikle To Agar Karahat Ka Waqt Naa Ho (Nafl Ki Karahat Ka Waqt Fajar Aur Asar Ke Ba'd Aur Dophaher Me'n Hai) To 2-Raka'at Nafl Namaz Safar Ki Niyyat Se Padhle. Har Raka'at Me'n 3-3 Baar Surah IkhLaas Padhe Aur Ba'd Ko Yeh Dua Padhe "Innal Lazi Farada Alaykal QurAana Lawaadduka ILaa Ma'Aad" Rab Ne Chaha To Ba-Khairiyat Ghar Wapas Aayega Aur Sab Ko Khairiyat Se Paayega Aur Agar Us Waqt Nafl Makruh Hoto Bhi Muhallah Ki Masjid Me'n Jaye Aur Aur Yeh Dua Padhe.
Sawari Par Sawar Hote Waqt
Agar Ghoda, Taanga, Rail, Moter Waghairah Khushki Ki Sawari Par Sawar Hoto Yeh Padh Kar Bethe
"Subha-Nallazi Sakkhara Lana Haaza Wama Kunna Lahu Muqrineen Wa Inna ILa Rabbina Lamun Qaliboon"
In shaa Allah Us Sawari Me'n Koyi Takleef Naa Pohchegi. Har Musibat Se Mahfooz Rahega Aur Darya Ki Sawari Yaani Kashti Jahaaz Waghairah Me'n Bethte Waqt Yeh Dua Padhle
" Bismillahi Majriha Wa Mursaha Inna Rabbi Laghafoorur RaHeem"
In Shaa Allah Doobne Se Bachega.
Raat Ko Sote Waqt
Agar Sote Waqt Aayatal Kursi Padhle To Raat Bhar Woh Makaan Chori, Aag Aur Naagahni Aafaat Se Mahfooz Rahega Aur Padhne Waala Bad-Khwabi Aur Jinnat Ke Khalal Se Bacha Rahega. Har Namaz Ke Ba'd Aayatal Kursi Padhne Se In Shaa Allah Khatema Bil-Khair Hoga. Jo Shakhs Sote Waqt Paancho'n Kalmah Aur Surah Kafiroon Ek Daf'ah Padh Kar Soya Kare To In Shaa Allah Marte Waqt Kalmah Naseeb Hoga Magar Chahiye Ke Iske Ba'd Koyi Dunyawi Baat Naa Kare Agar Baat Karni Pad Jaye To Dubara Isko(Surah Kafiroon) Padhle.
Har Namaz Ke Bad
"Laqad Jaa A-Kum Rasulum" Aakhri Ruku (Surah Taubah Ki 128 Aur 129 Aayat) Tak Padh Liya Jaye To Ghaib Se Rozi Milegi Aur Bohat Barkat Hogi.
Musibat Zadah Ko Dekh Kar
Bimar (Bukhar, Sardi-O-Kharish Ke Siwa) Qarazdaar Ya Aur Kisi Musibat Zadah Ko Dekh Kar Yeh Dua Padhni Chahiye
"Alhamdulillahil Lazi Aafaani Mimmab Talaaka Bihi Wafad Dalani Alaa Kasirim Mimman Khalaqa Tafdila"
In Shaa Allah Woh Musibat Apne Ko Kabhi Naa Ayegi. Nihayat Mujarrab Hai.