Aurato'n Ka Pardah
Aurato'n Ke Liye Pardah Bahot Zaruri Cheez Hai Aur Be_Pardagi Bahot Hi Nuqsaan Dah.
Aye Muslim Qaum! Agar Tu Apni Deeni Aur Dunyawi Taraqqi Chahti Hai To Aurato'n Ko Islami Hukm Ke Mutabiq Parde Me'n Rakho. Ham Iske Muta'alliq Ek Mukhtasar Si Guftagu Karke Parde Ke Aqli Aur Naqli Dala'il Aur Be_Pardah Ke Nuqsan Bayan Karte Hain.
Qudrat Ne Apni Makhlooq Ko Alehdah Alehdah Kaamo'n Ke Liye Banaya Hai Aur Jis Kaam Ke Liye Banaya Hai Uske Mutabiq Uska Mizaaj Banaya. Har Cheez Se Qudrati Kaam Lena Chahiye Jo Khilafe Fitrat Kaam Lega Wo Kharabi Me'n Padega. Iski Senkdo'n Misale'n Hain. Topi Sar Par Rakhne Aur Juta Paao'n Me'n Pahenne Ke Liye Hai Jo Juta Sar_Par Baandhe Aur Topi Paao'n Me'n Laga Le Wo Diwana Hai. Glass Paani Peene Aur Guldaan Thukne Ke Liye Hai, Jo Koyi Guldaan Me'n Paani Piye Aur Glass Me'n Thuke Wo Pura Pagal Hai. Bel Ki Jaga Ghoda Aur Ghoda Ki Jaga Bel Kaam Nahi De Sakta. Isi Tarah Insan Ke Do Giroh Kiye Gaye Hain. Ek Aurat Dusri Mard. Aurat Ko Ghar Me'n Reh Kar Andruni Zindagi Sambhalne Ke Liye Banaya Gaya Hai Aur Mard Ko Bahar Phir Kar Khane Aur Bahar Ki Zaruriyat Ko Pura Karne Ke Liye Banaya.
Misl Mash'hoor Hai Ke 50 Aurato'n Ki Kamayi Me'n Wo Barkat Nahi Jo Ek Mard Ki Kamayi Me'n Hai Aur 50 Mardo'n Se Ghar Me'n Ronaq Nahi Jo Ek Aurat Se Hai Isi Liye Shauhar Ke Zimmah Biwi Ka Saara Kharch Rakha Hai Aur Biwi Ke Zimmah Shauhar Ka Kharcha Nahi, Kyunke Aurat Kamane Ke Liye Bani Hi Nahi. Isliye Aurato'n Ko Wo Chize'n De'n Jisse Usko Majburan Ghar Me'n Bethna Pade Aur Mardo'n Ko Isse Aazad Rakha. Jaise Bacche Janna, Haiz-O-Nifaas Aana, Baccho'n Ko Doodh Pilana Waghairah. Isliye Bachpan Se Hi Ladko'n Ko Bhaag Daur, Uchal Kood Ke Khel Pasand Hain. Jaise Kabadi, Kasrat, Danda Lagana Waghairah Aur Ladkiyo'n Ko Qudrati Taur Par Wo Khel Pasand Hain Jin Me'n Bhaagna Daurna Naa Ho Balke Ek Jaga Betha Rehna Pade Jaise Gudiya Se Khel, Seena Parona, Choti Choti Rotiya Pakana.
Aapne Kisi Choti Bacchi Ko Kabadi Khelte, Danda Lagate Naa Dekha Hoga. Isse Ma'aloom Hota Hai Ke Qudrat Ne Ladko'n Ko Bahar Ke Liye Aur Ladkiyo'n Ko Ghar Ke Andar Ke Liye Paida Kiya Hai. AAb Jo Shakhs Aurato'n Ko Bahar Nikaale Ya Mardo'n Ko Andar Rehne Ka Mashwarah De Wo Aisa Hi Diwana Hai Jaisa Jo Topi Paao'n Me'n Aur Juta Sar_Par Rakhe. Jab Aapne Itna Samajh Liya Ke Mard Aur Aurat Ek Hi Kaam Ke Liye Naa Bane Balke Alehdah Alehdah Kaamo'n Ke Liye To Ab Jo Koyi In Dono'n Fariqo'n Ko Ek Kaam Supurd Karna Chahe Wo Qudrat Ka Muqabla Karta Hai. Isko Kabhi Bhi Kamiyabi Naa Hogi Goya Yu'n Samajho Ke Aurat Aur Mard Zindagi Ki Gaadi Ke Do Pahiyye Hain Andruni Aur Gharelu Dono'n Ek Aurat Aur Mard Bahar Ke Liye Agar Aapne Aurat Aur Mard Dono'n Ko Bahar Nikaal Diya To Goya Aapne Zindagi Ki Gaadi Ka Ek Pahiyya Nikaal Diya To Yaqinan Gaadi Naa Chal Sakegi.
Naqli Dala'il
1___ Sab Musalman Jante Hain Ke Nabi Kareem ﷺ Ki Biwiya'n Musalmano'n Ki Maaye'n Hain, Aisi Maaye'n Ke Tamam Jahaan Ki Maaye'n Unke Qadam-E-Paak Par Qurban. Agar Wo Biwiya'n Musalmano'n Se Pardah Na Karti'n To Zahiran Koyi Harj Nahi Ma'aloom Hota Tha Kyunke Aulaad Se Pardah Kaisa Magar QurAan Kareem Ne Un Paak Biwiyo'n Se Khitab Karke Farmaya:
وقرن فی بیوتکن ولا تبرجن تبرج الخالیة الاولى
Yaani Aye Nabi Ki Biwiyo! Tum Apne Gharo'n Me'n Thehri Raha Karo Aur Be-Pardah Naa Raho Jaise Agli Jahiliyat Ki Be-Pardagi. Is Me'n To Un Biwiyo'n Se Kalaam Tha.
Ab Musalmano'n Se Hukm Ho Raha Hai:
واذا سالتموھن متاعا فاسئلوھن من ورآءحجاب
Yaani Aye Musalmano! Jab Tum Nabi Ki Biwiyo'n Se Koyi Istamal Ki Cheez Mango To Parde Ke Bahar Se Mango.
Dekho Biwiyo'n Ko Udhar Gharo'n Me'n Rok Diya Aur Musalmano'n Ko Bahar Se Koyi Cheez Mangne Ka Ye Tariqah Sikhaya.
2__ Mishkaat Baab-un-Nazar ILal_Makhtuba Me'n Hai Ke Ek Din RasoolAllah ﷺ Apni Do Biwiyo'n Hazrat Umme Salmah Aur Maimunah RadiyAllahu Ta'Aala Anhuma Ke Paas Tashreef Farma The Ke Achanak Hazrat Abdullah Ibne Maktoom RadiyAllahu Ta'Aala Anhu Jo Ke Naabina The Aagaye. Huzoor ﷺ Ne Un Dono'n Biwiyo'n Se Farmaya Ke
احتجبامنه
Unse Pardah Karo. Unhone'n Arz Kiya Ya RasoolAllah ﷺ ! Ye To Naabina Hain, Huzoor ﷺ Ne Farmaya Tum To Naabina Nahi Ho.
Isse Ma'aloom Huwa Ke Sirf Ye Hi Zaruri Nahi Ke Mard Aurat Ko Naa Dekhe Balke Ye Bhi Zaruri Hai Ke Ajnabi Aurat Ghair Mard Ko Naa Dekhe. Dekho Yaha'n Naabina Hain Magar Pardah Ka Hukm Diya Gaya.
3___ Ek Ladayi Me'n Huzoor Anwar ﷺ Tashreef Le Ja Rahe Hain. Aage Aage Hazrat Aanjashah RadiyAllahu Ta'Aala Anhu Kuch Geet Gaate Huwe Ja Rahe Hain. Lashkar Ke Sath Kuch Baa-Pardah Aurate'n Bhi Hain. Hazrat Aanjashah Bahot Khush Aawaz The.
Huzoor ﷺ Ne Irshad Farmaya Aye Aanjashah! Apna Geet Band Karo Kyunke Mere Sath Kacchi Shishiya'n Hain.
(Mishkaat Baab-ul-Bayan Wash'shar)
Is Me'n Aurato'n Ke Dilo'n Ko Kacchi Shishiya'n Farmaya. Jisse Ma'aloom Huwa Ke Pardah Me'n Reh Kar Bhi Aurat Mard Ka Aur Mard Aurat Ka Gaana Naa Sune'n.
4____Huzoor ﷺ Ke Zamanah Me'n Aurato'n Ko Bhi Hukm Tha Ke Namaze Eid Aur Dusri Namazo'n Me'n Haazir Huwa Kare'n Isi Tarah Wa'z Ke Jalso'n Me'n Shirkat Kiya Kare'n Kyunke Islam Bilkul Naya Naya Dunya Me'n Aaya Tha. Agar Huzoor Ke Wa'az Aurate'n Naa Sunte'n To Shri'at Ke Hukm Apne Liye Kaise Ma'aloom Karte'n Magar Phir Bhi Unke Nikalne Me'n Pabandiya'n Laga Di Gayi Thi'n Ke Khushbu Laga Kar Naa Nikle'n, Beech Raasta Kisi Ghair Se Baat Naa Kare'n, Fajar Ki Namaz Is Qadar Andhere Me'n Padhi Jati Thi Ke Aurate'n Padh Kar Nikal Jaye'n Aur Koyi Pehchan Naa Sake. Aurate'n Mardo'n Se Bikul Piche Khadi Hoti Thi'n.
Lekin Hazrat Umar RadiyAllahu Ta'Aala Anhu Ne Apne Khilafat Ke Zamanah Me'n Inko Masjido'n Me'n Aane Aur Eid_Gah Jaane Se Bhi Rok Diya.
Aurato'n Ne Hazrat Aaishah Siddiqua RadiyAllahu Ta'Aala Anha Se Shikayat Ki Ke Hamko Hazrat Umar RadiyAllahu Ta'Aala Anhu Ne Nek Kaamo'n Se Rok Diya.
Hazrat Aaishah RadiyAllahu Ta'Aala Anha Ne Farmaya Ke Agar Huzoor Alaihissalam Bhi Is Zamanah Ko Dekhte To Aurato'n Ko Masjido'n Se Rok Dete. Dekho Shaami Waghairah. Un Ahadees Me'n Ghaur Karo Ke Wo Zamanah Nihayat Khair-O-Barkat Ka, Ye Zamanah Shar-O-Fasaad Ka. Us Waqt Aam Mard Parhezgaar, Ab Nihayat Aazad Aur Fussaaq-O-Fujjar. Us Waqt Aam Aurate'n Paak Daaman,Haya Waali Aur Sharmili, Ab Aurate'n Be-Ghairat, Aazad Aur Be-Sharm. Jab Aam Aurate'n Be-Ghairat, Aazad Aur Be-Sharm. Jab Is Waqt Aurato'n Se Pardah Karaya Gaya To Kya Ye Waqt Us Waqt Se Accha Hai? Ham Ne Mukhtasar Tariqah Se QurAan-O-Hadees Ki Roshni Me'n Pardah Ki Zaruriyat Bayan Ki.
5___ Ab Fiqh Ki Bhi Sair Karte Chaliye. Fuqaha Farmate Hain Ke Aurat Ke Sar Se Nikle Huwe Baal Aur Paao'n Ke Kate Huwe Nakhun Bhi Ghair Mard Naa Dekhe.
(Shaami, Baab Al-Satar)
Aurat Par JumuAh Ki Namaz Farz Nahi. Eid, Baqra_Eid Ki Namaz Wajib Nahi, Kyun? Isliye Ke Ye Namaze'n Jama'at Se Masjido'n Me'n Hi Hoti Hain Aur Aurato'n Ko Bila Zarurat Shara'ee Ghar Se Nikalne Ki Ijazat Nahi. Aurat Par Hajj Ke Liye Safar Karna Us Waqt Farz Nahi Jab Tak Ke Uske Sath Apna Mahram Naa Ho Yaani Baap, Beta Ya Shauhar Waghairah. Aurat Ka Muh Ghair Mard Naa Dekhe.
Hazrat FatimatuzZahra RadiyAllahu Ta'Aala Anha Ne Wasiyat Farmayi Thi Ke Mujhe Raat Me'n Dafan Kiya Jaye, Kyun? Isliye Ke Agar Din Me'n Dafan Kiya Gaya To Kam As Kam Dafan Karne Waalo'n Ko Mere Jism Ka Andazah Hojayega Ye Bhi Manzoor Nahi. Gharz Ke Pardah Ki Wajah Se Shari'at Ne Bahot Se Hukm Aurato'n Se Utha Liye.
Ghaur To Karo Ke Jab Aurato'n Ko Masjid Me'n Jaane Ki Ijazat Nahi, Qabrastan Jaane Ki Ijazat Nahi, Eid_Gaah Me'n Jaakar Eid Padhne Ki Ijazat Nahi To Bazaro'n Collego'n Aur Company Baagho'n Me'n Sair Ke Liye Jaane Ki Ijazat Kyunker Hogi. Kya Bazar College Aur Company Baagh Masjido'n Aur Makka Shareef Se Badh Kar Hain?
Note Zaruri
Jin Ahadees Me'n Aurato'n Ko Bahar Nikalna Aata Hai Wo Ya To Pardah Farz Hone Se Pehle Tha Ya Kisi Zarurat Ki Wajah Se Pardah Ke Sath Tha. Un Ahadees Ko Baghair Soche Samjhe Bojhe Be-Pardagi Ke Liye Aad Banana Mahez NaaDaani Hai. Isi Tarah Us Zamanah Me'n Aurato'n Ka Jihado'n Me'n Shirkat Karna Is Wajah Se Tha Ke Us Waqt Mardo'n Ki Ta'daad Thodi Thi. Ab Bhi Agar Kisi Jaga Musalman Mard Thode Hon Aur Kuffar Zyada Aur Jihaad Farz Ain Hojaye To Aurate'n Jihaad Me'n Zaroor Jaye'n. Un Jihado'n Ko Is Zamanah Ki Be-Hayayi Aad Naa Bana'o. Ab Jihaad Ke Bahana Se Aurato'n Ko Mardo'n Ke Saamne Nanga Period Karaya Jata Hai. Ba'z Dafa Mujahideen Ne Zaruratan Ghode Ke Peshab Piye, Darakhto'n Ke Patte Khaye, Kya Ab Bila Zarurat Ye Kaam Karaye Jayenge. Allah Wo Waqt Naa Laaye Jab Jihaad Me'n Aurato'n Ki Zarurat Pade Yaha'n Tak To Naqli Dala'il Se Ham Ne Pardah Ki Zarurat Saabit Kardi. Ab Aqli Dalile'n Bhi Suniye.
Aqli Dala'il
1__Aurat Ghar Ki Daulat Hai Aur Daulat Chupa Kar Ghar Me'n Rakha Jata Hai Har Ek Ko Dikhane Se Khatrah Hai Ke Chori Karle. Isi Tarah Aurat Ko Chupana Aur Ghairo'n Ko Naa Dikhana Zaruri Hai.
2__Aurat Ghar Me'n Aisi Hai Jaise Chaman Me'n Phool Aur Phool Chaman Me'n Hi Hara Bhara Rehta Hai Agar Tod Kar Bahar Laya Gaya To Murjha Jayega. Isi Tarah Aurat Ka Chaman Uska Ghar Aur Uske Baal Bacche Hain Usko Bila Waja Bahar Naa Laao Warna Murjha Jayegi.
3__Aurat Ka Dil Nihayat Nazuk Hai, Bahot Jald Har Tarah Ka Asar Qubool Kar Leta Hai Isliye Isko Kacchi Shishiya'n Farmaya Gaya. Hamare Yaha'n Bhi Aurat Ko Sinf Nazuk Kehte Hain Aur Nazuk Chizo'n Ko Pattharo'n Se Door Rakhte Hain Ke Toot Naa Jaye'n Ghairo'n Ki Nigaahe'n Is Ke Liye Mazboot Patthar Hai Isliye Usko Ghairo'n Se Bachao.
4__Aurat Apne Shauhar Aur Apne Baap Dada Balke Saare Khandan Ki Izzat Aur Aabru Hai Uski Misaal Sufaid Kapde Ki Si Hai Sufaid Pade Par Ma'muli Saa Daagh Dhabba Door Se Chamakta Hai Aur Ghairo'n Ki Nigaahe'n Uske Liye Ek Bad-Numa Daagh Hai. Isliye Usko In Dhabbo'n Se Door Rakho.
5__Aurat Ki Sabse Badi Ta'areef Ye Hai Ke Uski Nigah Apne Shauhar Ke Siwa Kisi Par Naa Ho. Isliye QurAan Kareem Ne Huro'n Ki Ta'areef Me'n Farmaya. قصرت الطرف
Agar Uski Nigah Me'n Chand Mard Aagaye To Yun Samjho Ke Aurat Apne Johar Kho Chuki Phir Uska Dil Apne Ghar Baar Me'n Naa Lagega Jisse Ye Ghar Aakhir Tabah Ho Jayega.
Aetrazaat
Ba'z Log Parde Ke Mas'alah Par Do Aetraaz Karte Hain. Awwal Ye Ke Aurato'n Ka Gharo'n Me'n Qaid Rakhna Unpar Zulm Hai Jab Ham Bahar Ki Hawa Khate Hain To UnKo Is Nemat Se Kyun Mahroom Rakha Jaye. Dusre Ye Ke Aurat Ko Parde Me'n Rakhne Ki Wajah Se Usko Tibdiq Hojati Hai Isliye Zaruri Hai Ke Unko Bahar Nikala Jaye .
Awwal Sawal Ka Jawab To Ye Hai Ke Ghar Aurat Ke Liye Qaid Khaana Nahi Balke Uska Chaman Hai. Ghar Ke Karobar Aur Apne Baal Baccho'n Ko Dekh Kar Wo Aisi Khush Rehti Hai Jaise Chaman Me'n Bulbul. Ghar Me'n Rakhna Uspar Zulm Nahi Balke Izzat-O-Ismat Ki Hifazat Hai. Usko Qudrat Ne Isliye Banaya Hai.
Bakri Isliye Hai Ke Raat Ko Ghar Me'n Rakhi Jaye Aur Sher Cheeta Aur Muhafiz kutta Isliye Hai Ke Unko Azaad Phiraya Jaye Agar Bakri Ko Aazaad Kiya To Uski Jaan Khatre Me'n Hai Usko Shikari Janwar Phaad Daalenge.
Dusre Aetaraaz Ka Jawab Me'n Kya Du'n. Khud Tajruba De Raha Hai Wo Ye Ke Aurat Ke Liye Pardah Tibdiq Ka Sabab Nahi. Hamari Purani Buzrug Aurate'n Ghar Ke Darwaze Se Bhi Be-Khabar Thi'n Magar Wo Janti Bhi Naa Thi'n Ke Diq Kise Kehte Hain Aur Aajkal Be-Pardagi Me'n Awwal Number Do Sobah Hain Ek Kathiyar_Waad, Dusra Panjab. Magar Allah Ta'Aala Ki Shaan Hai Ke In hi Dono'n Sobo'n Me'n Diq Zyada Hai. U.p Me'n Aam Taur Par Sharifo'n Ki Baho Betiya'n Pardah Nasheen Hain Allah Ta'Aala Ke Fadl Se Un Me'n Diq Bahot Kam Hai Balke Agar Kaha Jaye Ke Diq Hai Hi Nahi To Bhi Be-Jaa Naa Hoga. Janab Agar Pardah Se Diq Paida Hoti Hai To Mardo'n Ko Diq Kyun Hoti Hai.
Dosto! Diq Ki Wajah Kuch Aur Hai. Yaad Rakho! Tandrusti Ke Do Bade Usool Hain. Unki Pabandi Karo, In Shaa Allah Tandrust Rahoge. Awwal Ye Bhi Ke Bhuke Hokar Khao Aur Pet Bhar Kar Naa Khao Balke Roti Se Bhuke Utho Aur Dusre Ye Ke Thak Kar So'o. Pehle Aurate'n Chaai Ko Janti Bhi Naa Thi'n Ghar Me'n Mehnat Mushaqqat Ke Kaam Karti Thi'n. Chakki Peesna, Ghalla Saaf Karna, Khoob Pasina Aata Tha. Bhook Khul Kar Lagti Thi Aur Raat Ko Chaar Paayi Par Khoob Behoosh Ki Nind Aati Thi Isliye Tandrust Rehti Thi. Aaj Ham Dekhte Hain Ke Pardah Waali Aurate'n Hashshaash Bashshaash Ma'loom Hoti Hain. Unke Chehre Taro Taaza Hote Hain Magar Aawarah Aur Be-Pardah Aurate'n Aisi Ma'loom Hoti Hain Jaise Ke Is Phool Ko Lu Lag Gayi Hai.
Dosto! Ye Sab Bahana Hain. Zaruri Hai Ke Makaan Khule Hawadaar, Saaf Hon Apne Makano'n Ke Sihan Bade Bade Aur Khule Huwe Hawa Daar Rakho Aur Aurato'n Baccho'n Ko Chaai Aur Dusri Khushk Chizo'n Se Bachao Aur Doodh, Ghee Waghairah Ka Istamal Rakho. Aurato'n Ko Aaram Talab Naa Bana'o.