Topic-1 : Aqaa'id -O- Eemaniyaat
◆ Sawal No.1) Eemaan Kise Kehte Hain?
Jawab ▶️ Allah Ta'Aala Ki Wahdaniyat (Wahid Hona , Ek Hona) Aur Sayyidina Muhammed Mustafa ﷺ Ki Risalat Ka Zaban Se Iqraar Aur Dil Se Tasdeeq Karna Eemaan Kehlata Hai. Nez Ye Bhi Zaruri Hai Ke Nabi Kareem ﷺ Ki Batayi Huwi Tamam Baato'n Ki Tasdeeq Ki Jaye.
◆Sawal No.2) Kufr Kise Kehte Hain?
Jawab▶️ IsLami Aqaa'id Ke KhiLaaf Koyi Aqeedah Rakhna , Ya IsLam Ki Kisi Mash'hoor Ma'loom Baat Ka Inkaar Karna Us Me'n Shak Karna..
Jaise__Namaz , Rozah , Zakaat , Hajj Ko Farz Na Janna , Ya QurAan Ko Allah Ta'Aala Ka Kalaam Na Samajhna , Ya Jannat , Dozakh , Farishte , Qayamat Waghairah Par Yaqeen Na Rakhna , Ya Kisi Nabi Ya Farishte Ki Tauheen Karna Ya Kisi Sunnat Ko Halka Janna , Ya Kisi Shara'ee Hukm Ka Mazaaq Udana , Ya Mazaaq Me'n Koyi Kufriyah Jumla Bolna , Ye Sab Baate'n Kufr Hain.
◆Sawal No.3) Aqida-E-Tauheed Se Kya Muraad Hai?
Jawab▶️ Allah Ta'Aala Ek Hai, Be-Niyaaz Hai, Wajibul Wajood Hai Yaani Allah Ta'Aala Hamesha Se Hai Aur Hamesha Rahega. Wo Sabka Khaaliq -O- Maalik Aur Raaziq Hai. Uska Koyi Shareek Nahi. Zindagi , Maut , Izzat , Zillat Sab Uske Ikhtiyaar Me'n Hai. Wo Jo Chahe Jaisa Chahe Kare, Use Koyi Rok Nahi Sakta. Wo Na Kisi Ka Baap Hai Na Kisi Ka Beta. Sab Uske Mohtaaj Hain Wo Kisi Ka Mohtaaj Nahi. Wo Aalimul_Gheb (Gheb Ka Janne Wala) Hai Aur Har Aeb Se Paak Hai.
◆Sawal No.4) Shirk Kise Kehte Hain?
Jawab▶️ Allah Ke Siwa Kisi Aur Ko Khuda Janna , Ya Ibadat Ke Laayiq Samajhna Shirk Hai Nez Allah Ta'Aala Ki Sifaat Ko Bi'ainihi Kisi Ghair Ke Liye Manna Yaani Kisi Makhlooq Ki Kisi Sifat Ko Qadeem Aur Mustaqil BizZaat Manna Shirk Hai.
◆Sawal No.5) QurAan Kareem Me'n Rab Ta'Aala Ki Ba'z Sifaat Bando'n Ke Liye Bayan Huwi Hain , Aisi Chand Sifaat Ka Hawala Dijiye.
Jawab ▶️ Surah Al-Dahr, Aayat:2 Me'n Insaan Ko "Samee'a -O- Baseer Kaha Gaya Hai....
Surah Al-Baqarah, Aayat:143, Me'n Huzoor Akram ﷺ Ko "Shaheed" Aur Surah Al-Taubah, Aayat:128 Me'n "Raoof-O-Raheem" Farmaya Gaya....
Surah Al-Tahreem, Aayat:4 Me'n Farishto'n Aur Sauleh Momino'n Ko Madad_Gaar Hona Bayan Farmaya...
Isi Tarah Hayaat, ILm, Kalaam, Madad, Iradah Waghairah Mutaddid Sifaat Bando'n Ke Liye Bayan Huwi Hain.
◆Sawal No.6) Allah Ta'Aala Ki In Sifaat Ka Bando'n Ke Liye Manna Shirk Kyun Nahi?
Jawab ▶️ Kyun Ke Allah Ta'Aala Ki Ye Sifaat Kisi Ki Di Huwi Nahi Balke Khud Se Hain Yaani Zaati Hain Nez AzLi, Abdi, La-Mahdood Aur Shaane Khaliqiyat Ke Layiq Hain..
Jabke Makhlooq Ko Ye Sifaat Allah Ta'Aala Ne Ata Farmayi Hain Nez Ye Sifaat , Aarzi , Mahdood Aur Shaane Makhluqiyat Ke Layiq Hain.
◆Sawal No.7) Aayatul Kursi Me'n Jo Allah Ta'Aala Ki Sifaat Bayan Huwe'n, Wo Bataye'n?
Jawab ▶️ Irshaad Huwa, "Allah Hai Jiske Siwa Koyi Ma'abood Nahi, Wo Aap Zindah Aur Auro'n Ka Qayim Rakhne Wala Hai, Use Na Oongh Aaye Na Nind, Usi Ka Hai Jo Kuch Aasmano'n Me'n Hai Aur Jo Kuch Zameen Me'n, Wo Kon Hai Jo Uske Haan Sifarish Kare Be Uske Hukm Ke, Janta Hai Jo Kuch Unke Aage Hai Aur Jo Kuch Unke Peeche, Aur Wo Nahi Paate Uske ILm Me'n Se Magar Jitna Wo Chahe, Uski Kursi men Samaye Huwe Hain Aasman Aur Zameen, Aur Use Bhari Nahi Unki Nigehbani, Aur Wahi Hai Buland Badayi Wala".
(Surah Al-Baqarah:225 , Kanzul Eemaan)
◆Sawal No.8 )Surah Ikhlaas Ka Tarjumah Bayan Kijiye?
Jawab ▶️ Irshad Bari Ta'Aala Huwa, "Tum Farmao Wo Allah Hai Wo Ek Hai, Allah Be-Niyaaz Hai, Na Uski Koyi Aulaad Hai Aur Na Wo Kisi Se Paida Huwa, Aur Na Uske Jod Ka Koyi".
(Kanzul Eemaan Az-Muhjaddid-O-Millat AalaHazrat Imam Ahmed Raza Khan Bareillvi RadiyAllahuTa'AalaAnhu)
◆Sawal No.9) Allah Ta'Aala Har Shay Par Qadir Hai Magar Koyi "Mahaal" Allah Ta'Aala Ki Qudrat Me'n Dakhil Nahi? Wazahat Kare'n?
Jawab ▶️ Mahaal Use Kehte Hain Jo Maujood Na Ho Sake.
Maslan___ Dusra Khuda Hona Mahaal Yaani Na-Mumkin Hai To Agar Ye Zere Qudrat Hoto Maujood Hosakega Aur Mahaal Na Rahega Jabke Usko Mahaal Na Manna Wehdaniyate EeLahi Ka Inkar Hai, Isi Tarah Allah Azza-o-Jal Ka Fana Hona Mahaal Hai Agar Fana Hone Par Qudrat MaanLi Jaye To Ye Mumkin Hoga Aur Jiska Fana Hona Mumkin Ho Wo Khuda Nahi Hosakta, Pas Saabit Huwa ke Mahaal-O-NaMumkin Par Allah Ta'Aala Ki Qudrat Manna Allah Ta'Aala Hi Ka Inkar Karna Hai.
◆Sawal No.10)Acchayi Aur Burayi Ki Nisbat Kis Ki Taraf Karni Chahiye?
Jawab ▶️ Bure Kaam Ki Nisbat Allah Ta'Aala Ki Taraf Karna Be-Adbi Hai Isliye Hukm Huwa, "Tujhe Jo Bhalayi Ponhche Allah Ki Taraf Se Hai Aur Jo Burayi Ponhche Wo Teri Apni Taraf Se Hai".
Surah Al-Nisa:79)
Pas Bura Kaam Karke Taqdeer Ya Allah Ta'Aala Ki Taraf Mansoob Karna Bahot Buri Baat Hai Isliye Acche Kaam Ko Allah Ta'Aala Ke Fadl-O-Karam Ki Taraf Mansoob Karna Chahiye Aur Bure Kaam Ko Shamate Nafs Samajhna Chahiye.
◆Sawal No.11) Allah Ta'Aala Ke Raaziq Hone Par QurAan -O- Hadees Se Dalayil Dijiye?
Jawab▶️ Beshak Allah Ta'Aala Har Makhlooq Ko Rizq Deta Hai Hatta Ke Kisi Kone Me'n Jaala Bana Kar Bethi Huwi Makdi Ke Rizq Ko Par Laga Kar Udata Hai Aur Uske Paas Ponhcha Deta Hai.
◆Hadees Shareef Me'n Hai, " Beshak Bande Ka Rizq Usko Aise Talaash Karta Hai Jaise Use Maut Dhoondti Hai" Yaani Jab Maut Ka Bar_Waqt Aana Yaqini Hai To Rizq Ka Milna Bhi Yaqini Hai.
◆QurAan Majeed Me'n Hai, "Allah Ta'Aala Jiska Rizq Chahe Waseea Farmata Hai Aur Jiska Rizq Chahe Tang Kar Deta Hai.
◆Sawal No.12) Rab Ta'Aala Jism Se Paak Hai. QurAan -O-Hadees Me'n Jaha'n Yad , wajhu Waghairah Alfaaz Aaye , Unka Kya Mafhoom Hai?
Jawab ▶️ Aise Alfaaz Jo Ba-Zahir Jism Par Dalalat Karte Hain Jaise__Yad, Wajhu, Istawa Waghairah, Inke Zahiri Ma'ani Lena Gumrahi -O- Bad-Mazhabi Hai. Aise Mutshaba Alfaaz Ki Taweel Ki Jati Hai.. Kyunke Inke Zahiri Ma'ani Rab Ta'Aala Ke Haq Me'n Mahaal Hai.
Misaal Ke Taur Par Yad Ki Taweel Qudrat Se Wajhu Ki Zaat Se Aur Istawa Ki Ghalba -O-Tawajjuh Se Ki Jati Hai Balke Aehtiyaat Ye Hai Ke Hamara Aqeedah Ye Hona Chahiye Ke Yad Haq Hai, Istawa Haq Hai Magar Uska Yad Makhlooq Kaa sa Yad Nahi Aur Uska Istawa Makhlooq Kaa Sa Istawa Nahi.
◆Sawal No.13) Aqeeda-E-Taqdeer Kya Hai?
Jawab ▶️ Allah Ta'Aala Ne Apne AzLi ILme Ghaib Ke Mutabiq, Jaisa Hone Wala Tha Aur Jaisa Karne Wala Tha Usne Likh Liya. Yu'n Samajh Lijiye Ke Jaisa Ham Apne Irade Aur Ikhtiyar Se Karne Wale The Waisa Usne Likh Diya Yaani Uske Likh Dene Se Kisi Ko Majboor Nahi Kar Diya Warna Jaza-O-Saza Ka Falsafah Be-Ma'ani Hokar Reh Jata, Yahi Aqeeda-E-Taqdeer Hai.
◆Sawal No.14) Hazrat Isa Alaihissalam Ne Farmaya, "Me'n Murdo'n Ko Zinda Karta Hon Bi-iznillah" Is Aayat Se Kya Natijah Akhaz Hota Hai?
Jawab ▶️ Is Irshad Se Ma'aloom Huwa Ke Allah Ta'Aala Ke Diye Huwe Ikhtiyar Se Uske Mahboob Bande Murde Zinda Kar Sakte Hain. Isliye Mahbubane Khuda Ki Taaqat -O- Qudrat Manna Shirk Nahi Balke Aine Tauheed Hai.
◆Sawal No.15) Isti'aanat Ki Kitni Qisme'n Hain?
Jawab ▶️ Isti'aanat Ki Do(2) Qisme'n Hain.
1)Haqiqi Aur
2)Mazaji
◆Sawal No.16) Isti'aanat Haqiqi Ki Wazahat Karen.
Jawab ▶️ Isti'aanat Haqiqi Ye Hai Ke Kisi Qadir Bizzaat, Maalik Mustaqil Aur Haqiqi Madad-Gaar Samajh Kar Usse Madad Mangi Jaye Yaani Uske Bare Me'n Ye Aqeedah Ho Ke Wo Ata-E-ILahi Ke Baghair Khud Apni Zaat Se Madad Karne Ki Qudrat Rakhta Hai. Ghaire Khuda Ke Liye Aisa Aqeedah Rakhna Shirk Hai Aur Koyi Musalman Bhi Ambiya-E-Kiraam Alaihimussaalam Aur Auliya-E-Ezaam Ke Bare Me'n Aisa Aqeedah Nahi Rakhta.
◆Sawal No.17) Isti'aanat Mazaji Ki Wazahat Kare'n.
Jawab ▶️ Isti'aanat Mazaji Ye Hai Ke Kisi Makhlooq Ko Allah Ta'Aala Ki Madad Ka Mazhar, Husule Faiz Ka Zari'ah Aur Qaza-E-Haajaat Ka Wasilah Jaan Kar Usse Madad Mangi Jaye Aur Ye QurAan -o- Hadees Se Saabit Hai.
◆Sawal No.18) Mahbubane Khuda Se Madad Mangna Jaaiz Hai. QurAan Se Dalayil Dijiye.
Jawab ▶️ Hazrat Musa Alaihissalam Ne Apne Bhai Ko Madad_Gaar Banane Ki Dua Ki Jo Qubool Huwi.
(Surah Twaha:36)
Hazrat Isa Alaihissalam Ne Hawariyo'n Se Madad Mangi.
(Surah Aale-Imran:52)
Nek Kamo'n Me'n Musalmano'n Ko Madad-Gaar Banne Ka Hukm Diya Gaya.
(Surah Al-Maidah:2)
Eemaan Walo'n Ko Sabr Aur Namaz Se Madad Mangne Ka Hukm Diya Gaya Hai.
(Surah Al-Baqarah:153)
◆Sawal No.19) Sawleheen Aur Farishto'n Ke Madadgaar Hone Par Aayat Bataye?
Jawab▶️
فان اللہ ھو مولاہ و جبریل و صالح المومنین والملئکته بعد ذلک ظھیر○
Beshak Allah Ta'Aala Unka Madagaar Hai Aur Jibra'eel Aur Nek Eemaan Wale, Aur Uske Ba'd Farishte Madadgaar Hain.
(Surah Al-Tehreem:4)
◆Sawal No.20) Allah Ta'Aala Aur Rasool ﷺ Ke Madadgaar Hone Par Aayat Bataiye?
Jawab ▶️ "Beshak Tumhare Madad-Gaar To Sirf Allah Ta'Aala Aur Uska Rasool ﷺ Aur Eemaan Wale Hai. Jo Namaz Qayim Karte Hain Aur Zakaat Dete Hain Aur Allah Ta'Aala Ke Huzoor Jhuke Huwe Hain".
(Surah Al-Maidah:55)
◆Sawal No.21) Kya Eid-E-Milaad-un-Nabi ﷺ Aur Auliya-E-Kiram Ka Urs ManaNa Shirk Hai?
Jawab ▶️Hargiz Nahi Kyunke Eid-E-Milaad Huzoor ﷺ Ki Paida'ish Ki Khushi Me'n Manayi Jati Hai Jabke Rab Ta'Aala Paida Hone Se Paak Hai. Isi Tarah Buzrugane Deen Ke Wisaal Ke Din Ko Urs Manaya Jata Hai Jabke Rab Ta'Aala Faut Hone Se Paak Hai. Goya Eide Milaad Aur Urs Manane Se Shirk Ki Nafi Hoti Hai. Ise Shirk Kehna Jahalat -O-Himaqat Hai.
◆Sawal No.22) Nabi Kise Kehte Hain?
Jawab ▶️ Nabi Us Aala -O-Arfaa Shaan Wale Bashar Ko Kehte Hain Jis Par Allah Ta'Aala Ne Wahi Naazil Ki Ho Aur Uski Tayeed Muajizaat Se Farmayi Ho. Ye Allah Ta'Aala Ka Mahboob -O- Muqarrab Bandah Hota Hai.
◆Sawal No.23) Har Nabi Paida'ishi Nabi Hota Hai, Daleel Dijiye?
Jawab ▶️ Har Nabi Paida'ishi Nabi Hota Hai.. Albatta Nabuwat Ka Aelaan Wo Allah Ta'Aala Ke Hukm Se Karta Hai.
Hazrat Isa Alaihissalam Ne Chand Yaum Ki Umar Me'n Irshad Farmaya, "Me'n Allah Ka Banda Hon , Usne Mujhe Kitaab Di Aur Mujhe Nabi Banaya".
(Surah Maryam:30)
◆Sawal No.24) Aqeeda-E-Ismate Ambiya Se Kya Murad Hai?
Jawab ▶️ Tamam Ambiya-E-Kiraam Gunaho'n Aur Khata'o'n Se Ma'asoom Hote Hain. Ismate Ambiya Ke Maani Ye Hain Ke Ambiya-E-Kiraam Ke Liye Allah Ta'Aala Ki Taraf Se Hifazat Ka Wada Hai Isliye Unse Gunah Hona Shar'an Naa-Mumkin Hai.
◆Sawal No.25) Ambiya-E-Kiraam Barkato'n Wale Hote Hain, QurAan Se Daleel Dijiye?
Jawab ▶️ Ambiya-E-Kiraam Alaihimussaalam Barkat-O-Rahmat Wale Hote Hain. Hazrat Isa Alaihissalam Ka Irshad Hai, "Aur Usne (Yaani Rab Ta'Aala Ne) Mujhe Baa-Barkat Kiya, Me'n Kahi'n Bhi Hon".
(Surah Maryam:31)
Hazrat Musa-O-Haroon Alaihimussalam Ke Tabarrukaat Wale Sandooq Ki Barkat Se Bani Isra'eel Ko Kafiro'n Par Fateh Milti Aur Unki Haajate'n Puri Hoti'n.
(Surah Al-Baqarah:248)
◆Sawal No.26) Ambiya-E-Kiraam Ko Apni Misl Bashar Samajhna QurAane Kareem Ne Kin Logo Ka Tariqah Bataya?
Jawab ▶️
Ambiya-E-Kiraam Ko Apni Misl Bashar Samajhna Gumrahi Hai QurAane Hakeem Ne Kafiro'n Ka Tariqah Bayaan Kiya Hai Ke Wo Nabiyo'n Ko Mahez Apni Hi Misl Bashar Kehte The.
(Surah Al-Mominoon:23,24 ; Surah Yaseen:15)
◆Sawal No.27) Ambiya-E-Kiraam Ki Sama'at(Sunne Ki Quwwat) -O- Basarat(Dekhne Ki Quwwat) Aam Insano'n Jaisi Nahi Hoti, QurAan Se Daleel Dijiye?
Jawab ▶️ QurAane Kareem Me'n Hai Ke Hazrat sulemaan Alaihissalam Ne Kayi Meel Door Se Chuyunti Ki Baat Sunli Jab Usne Dusri Chuyuntiyo'n Se Kaha Ke Apne Gharo'n Me'n Chali Jao, Kahi'n Tumhe' Sulemaan Aur Unke Lashkar Be-Khabri Me'n Kuchal Na Daale'n To Hazrat Sulema Alaihissalam Uski Baat Sun Kar Muskura Diye.
(Surah Al-Namal:19)
Hazrat Ibraheem Alaihissalam Ne Farsh Se Arsh Tak Saari Kaayenaat DekhLi.
(Surah Al-Anaam:75)
◆Sawal No.28) Ambiya-E-Kiraam Ki Qudrat -o- Taaqat Aam Insano'n Jaisi Nahi Hoti, QurAan Se Daleel Dijiye?
Jawab ▶️ Hazrat Isa Alaihissalam Farmate Hain, "Me'n Tumhare Liye Mitti Se Parind Ki Si Murat Banata Hon Phir Us Me'n Phoonk Marta Hon To Wo Fauran Parind Hojati Hai Allah Ke Hukm Se Aur Me'n Shifa Deta Hon Maadar Zaad Andhe Aur Sufaid Daagh Wale Ko Aur Me'n Murde Jilata Hon Allah Ke Hukm Se Aur Tumhe'n Btata Hon Jo Tum Khate Ho Aur Jo Apne Gharo'n Me'n Jama Karke Rakhte Ho"
(Surah Aale Imraan:49, Kanzul Eemaan)
◆Sawal No.29) Hayate Ambiya-E-Kiraam Ke Muta'alliq Ahle_Sunnat Ka Aqeeda Bayan Kijiye?
Jawab ▶️ Ambiya-E-Kiraam Apni Apni Qabro'n Me'n Isi Tarah Haqiqi Taur Par Zinda Hain Jaise Duniya Me'n The. Wo Khate Peete Hain, Jaha'n Chahte Hain Aate Jaate Hain Aur Tasarruf Farmate Hain. Allah Ta'Aala Ke Farman Ke Mutabiq Unpar Ek Aan Ke Liye Maut Taari Huwi Phir Wo Zinda Kar Diye Gaye.
◆Sawal No.30) Aqeeda Hayate Ambiya Par QurAan Se Daleel Dijiye?
Jawab ▶️ "Aur Jo Allah Ki Rah Me'n Maare Gaye Hargiz Unhe'n Murda Khayal Na Karna Balke Wo Apne Rab Ke Paas Zinda Hain Aur Rozi Paate Hain".
(Surah Aale-Imran:169)
Is Bare Me'n Kisi Ko Ikhtilaaf Nahi Ke Ambiya-E-Kiraam Tamam Logo'n Se Afzal Hain. Pas Jab Shaheed Zinda Hain To Ambiya-E-Kiraam Yaqinan Zinda Hain.
Allama Suyuti Alaihir Rahmah Farmate Hain Tamam Ambiya-E-Kiraam Nabuwat Ke Sath Wasfe Shahadat Ke Bhi Jame Hain.
(انباء الاذکیاء)
◆Sawal No.31) Makhlooq Me'n Sab Se Afzal Log Kon Hain Aur Sab Se Afzal Hasti Kon Hai?
Jawab ▶️ Tamam Makhlooq Me'n Ambiya-E-Kiraam Alaihimussaalam Afzal Hain Aur Saare Ambiya-O-Rusul Me'n Hamare Aaqa-O-Maula Hazrat Mohammed ﷺ Sab Se Afzal Hain.
◆Sawal No.32) Huzoor ﷺ Ne "انما انا بشر مثلکم " Kin Logo'n Se Farmaya Tha?
Jawab ▶️ Aapne Ye Baat Un Kafiro'n Se Farmayi Thi Jo Kehte The Ke Hamare Dil Ghilaaf Me'n Hain Us Baat Se Jiski Taraf Tum Hame'n Bulate Ho Aur Hamare Kano'n Me'n Ruyi Hai Aur Hamare Aur Tumhare Darmiyan Parda Hai.
(Surah Haameem Al-Sajdah:5)
◆Sawal No.33) Huzoorﷺ Ne "ایکم مثلی" Kin Logo'n Se Farmaya Tha?
Jawab ▶️ Huzoor ﷺ Ne Apne Sahaba Se Farmaya Tha, ایکم مثلی. "Tum Me'n Kon Meri Misl Hai? Beshak Me'n Is Haal Me'n Raat Guzarta Hon Ke Mera Rab Mujhe Khilata Hai Aur Pilata Hai".
(Bukhari , Muslim)
◆Sawal No.34) Allah Ta'Aala Ne Huzoor ﷺ Ka Noor Kab Takhleeq Farmaya? Hadees Bataye'n.
Jawab ▶️ Huzoor ﷺ Ne Farmaya, Allah Ta'Aala Ne Kaayenaat Ki Takhleeq Se Qabl Tumhare Nabi Ke Noor Ko Apne Noor Ke Faiz Se Paida Farmaya.
(Musannif AbdurRazzaaq , Muhahibul Ladunniyah)
◆Sawal No.35) Huzoor ﷺ Mansabe Nabuwat Par Kab Faaiz Huwe? Hadees Shareef Bayan Kare'n.
Jawab ▶️ Huzoor ﷺ Ne Farmaya, "Me'n Us Waqt Bhi Nabi Tha Jab Hazrat Aadam Alaihissalam Ruh Aur Jism Ke Darmiyan The".
(Tirmazi)
◆Sawal No.36) Huzoor ﷺ Ki Ta'azeem -O- Tauqeer Ka Hukm QurAane Kareem Ki Kis Aayat Me'n Hai?
Jawab ▶️ "Aye Logo'n ! Tum Allah Aur Uske Rasool Par Eemaan Laao Aur Rasool Ki Ta'azeem-O-Tauqeer Karo Aur Subah-O-Shaam Allah Ki Paaki Bolo".
(Surah Al-Fatah:9, Kanzul Eemaan)
◆Sawal No.37) Is Aayate Karimah Se Kya Aqeeda Sabit Hota Hai?
Jawab ▶️ Is Aayat Me'n Sabse Pehle Eemaan Ka Zikr Hai Phir Habeeb ﷺ Ki Ta'azeem -O- Tauqeer Ka Aur Phir Ibadat Ka,
Ma'aloom Huwa Ke Eemaan Ke Baghair Ta'azeem Ka Faidah Nahi, Aur Jab Tak Nabi Kareem ﷺ Ki Sacchi Ta'azeem Na Ho, Saari Ibdat Bekaar Hai.
◆Sawal No.38) Sahaba Kiraam Huzoor ﷺ Ki Ta'azeem Kis Tarah Karte The? Hadees Bataye'n.
Jawab ▶️ Sahaba Kiraam Aapke Thook Mubarak, Baal Mubarak Aur Wazu Ka Musta'mal Paani Zameen Par Na Girne Dete, Lu'Aabe Dahan Aur Aaza-E-Wazu Ka Dhowan Apne Chehro'n Par Mal Lete Aur Baal Mubarak Husule Barkat Ke Liye Mahfooz Kar Lete.
(Bukhari -O- Muslim)
◆ Sawal No.39) "Aye Eemaan Walo'n ! Ra'eena Na Kaho Balke UnzurNa Kaha Karo" Is Aayat Se Kya Aqeedah Wazeh Hota Hai?
Jawab ▶️ Aisa Zo Maani Lafz Kehna Bhi Gustakhi Aur Tauheen Hai Jiska Ek Mafhoom Gustakhi Ka Huwa Aur Khwa Wo Lafz Tauheen Ki Niyyat Se Na Kaha Jaye.
IsLiye Eemaan Walo'n Ke Liye Ra'eena Kehna Haraam Hogaya Agarche Wo Buri Niyyat Se Nahi Kehte The.
◆ Sawal No.40) Huzoor ﷺ Ki Mohabbat Har Shay Se Zaayid Hona Farz Hai. Aayat Ka Tarjumah Bataye'n.
Jawab ▶️ Rab Ta'Aala Farmata Hai, "Aye Nabi ﷺ ! Tum Farmao Ke Aye Logo! Agar Tumhare Baap, Tumhare Bete, Tumhare Bhai, Tumhare Biwiya'n, Tumhara Kumba, Tumhari Kamayi Ke Maal Aur Wo Tijarat Jiske Nuqasan Ka Tumhe'n Andesha Hai Aur Tumhari Pasand Ke Makaan,
In Me'n Koyi Cheez Bhi Agar Tum Ko Allah Aur Uske Rasool ﷺ Aur Uski Rah Me'n Koshish Karne Se Zyada Mahboob Hai To Intazar Rakho Yaha'n Tak Ke Allah Apna Azaab Utare Aur Allah Be-Hukmo'n Ko Rah Nahi Deta".
(Sure Tauba:24)
◆ Sawal No.41) Huzoor ﷺ Ki Mohabbat Har Shay Se Zaayid Hona Farz Hai. Hadees Shareef Bataye'n?
Jawab ▶️ Hamare Aaqa-O-Maula ﷺ Farmate Hain, "Tum Me'n Se Koyi Momin Na Hoga Jab Tak Me'n Use Uske Maa'n Baap, Aulaad Aur Sab Insano'n Se Zyada Pyara Na Hojao'n".
(Bukhari, Muslim)
◆ Sawal No.42) Nabi Ki Zindagi Ba'd Wisaal Shohda Ki Zindagi Se Afzal Hai, Daleel Dijiye.
Jawab ▶️ Ambiya-E-Kiraam Alaihimussalam Digar Tamam Makhlooq Se Afzal Hain Lihaza Unki Zindagi Shohda Ki Zindagi Se Yaqinan Bahot Aala -O- Arfaa Hai. Shaheed Ka Tadka Taqseem Hota Hai Aur Uski Biwi Iddat Ke Ba'd Nikah Kar Sakti Hai. Jabke Ambiya-E-Kiraam Ke Muta'alliq Ye Duno'n Baate'n Jaaiz Nahi.
Irshad Baari Ta'Aala Hai,
"Unke Ba'd Unki Biwiyo'n Se Nikah Na Karo".
(Al-Ahzaab:153)
◆ Sawal No.43) Huzoor ﷺ Wisaal Ke Ba'd Bhi Hamare Durood Sunte Hain. Do Hadeese Sunaye'n.
Jawab ▶️ Huzoor ﷺ Ne Farmaya, JumuAh Ke Din Mujh Par Zyada Durood Padha Karo Kyunke Is Din Farishte Haazir Hote Hain. Koyi Banda Jaha'n Bhi Durood Padhta Hai Uski Aawaz Mujh Tak Pohanch Jati Hai.
Sahaba Ne Arz Ki, Kya Aap Ke Wisaal Ke Ba'd Bhi?
Farmaya, Haan Mere Wisaal Ke Ba'd Bhi Kyunke Beshak Allah Ta'Aala Ne Zameen Par Haraam Kar Diya Hai Ke Wo Ambiya-E-Kiraam Ke Jismo'n Ko Khaye.
(Ibne Maaja, Tibrani, جلاءالافہام, Safha:63)
Ek Aur Irshad Mubarak Hai Ke, "Ahle_Mohabbat Ka Durood Me'n Khud Sunta Hu'n Aur Unhe'n Pehchanta Bhi Hu'n".
(Dalailul Khairaat)
◆ Sawal No.44) Huzoor ﷺ Wisaal Ke Ba'd Bhi Hamare Salam Sunte Hain. Hadeese Bataiye'n?
Jawab ▶️ Irshade Girami Hai, "Jab Koyi Mujh Par Salam Bhejta Hai To Allah Ta'Aala Meri Ruh Mujh Par Lota Deta Hai (Yaani Meri Ruh Ki Tawajjuh Salam Bhejne Wale Ki Taraf Hojati Hai) Yaha'n Tak Ke Me'n Usko Uske Salam Ka Jawab Deta Hu'n".
(Masnad Ahmed, Abu_Dawood, Baihaqi)
◆ Sawal No.45) Huzoor ﷺ Ke "ILme Ghaib" Ke Muta'alliq Ahle_Sunnat Ka Aqeeda Bayan Kare'n.
Jawab ▶️ Tamam Ambiya-E-Kiraam Alaihimussalam Ko Allah Ta'Aala Ne ILm-E-Ghaib Ata Farmaya Aur Apne Habeeb Kareem ﷺ Ko "علم ماکان و ما یکون " Yaani Kaayenaat Me'n Jo Kuch Ho Chuka Aur Jo Aaindah Hoga, Un Sab Ka ILm Ata Farmaya. Ye ILm Allah Ta'Aala Ki Ata Se Hai Isliye Ye ILm-E-Ghaib Atayi Huwa Aur Allah Ta'Aala Ka ILm Chunke Kisi Ka Ata Karda Nahi Balke Use Khud Haasil Hai Isliye Uska ILm-E-Ghaib Zaati Huwa. Lihaza Ambiya-E-Kiraam Ke Liye Atayi ILm-E-Ghaib Manna Shirk Nahi Hai.
◆ Sawal No.46) ILm-E-Ghaib Atayi Par QurAan Se Daleel Dijiye?
Jawab ▶️ Irshad Baari Ta'Aala Hai, "Allah Ta'Aala Yu'n Nahi Ke Tum Logo'n Ko Ghaib Par Matla Karde Lekin Allah Ta'Aala Apne Rasulo'n Me'n Se Jise Chahta Hai Chun Leta Hai".
(Surah Aal-E-Imran:179) Dusri Jaga Faramya, "(Aye Habeeb) Tumko Sikha Diya Jo Kuch Tum Na Jante The".
(Surah Al-Nisa:113)
Irshad Baari Ta'Aala Hai, "Ye Ghaib Ki Khabare'n Ham Tumhari Taraf Wahi Karte Hain".
(Surah Hood:49)
◆ Sawal No.47) Jin Aayaat Me'n ILm-E-Ghaib Ki Nafi Hai Unka Matlab Kya Hai?
Jawab ▶️Jin QurAani Aayaat Me'n ILm-E-Ghaib Ki Nafi Ki Gayi Hai Unse Muraad Us ILm Ki Nafi Hai Jo Zaati Ho Yaani Baghair Allah Ta'Aala Ke Bataye Ho. Pas Allah Ta'Aala Ke Bataye Baghair Koyi Ghaib Nahi Janta.
◆ Sawal No.48) "Nabi" Ka Tarjuma Kya Hai?
Jawab ▶️ Nabi Ka Tarjuma Hai, " Ghaib Ki Khabre'n Dene Wala". Ghaur Kare'n Ke Jannat Dozakh Sawaab Azaab Farishte Aur Qayamat Waghairah Sab Ghaib Hi To Hain Aur Ambiya-E-Kiraam Ghaib Hi Ki Khabre'n Dene Ke Liye Aate Hain.
◆ Sawal No.49) Huzoor ﷺ Ke ILm-E-Ghaib Ki Us'At Par Ahadees Bayan Kijiye?
Jawab ▶️ Hazrat Umar RadiyAllahu Ta'Aala Anhu Se Riwayat Hai Ke Huzoor ﷺ Ne Ek Din Kaayenaat Ki Takhleeq Se Tamam Ahwaal Bayan Karna Shuru Kiye Yaha'n Tak Ke Jannatiyo'n Ke Jannat Me'n Aur Jahannamiyo'n Ke Jahannam Me'n Jane Tak Ke Tamam Waqi'aat Bayan Farma Diye.
(Bukhari)
Ek Aur Hadees Shareef Me'n Hai Ke Aap ﷺ Ne Ek Taweel Khutba Diya Aur Us Me'n Maazi-O-Mustaqbil Ki Tamam Khabre'n Bayan Farma Di'n.
(Muslim) Ek Mauqa Par Sahaba Se Farmaya, Tum Mujhse Jo Chaho Pucho Me'n Tumhe'n Jawab Dunga.
(Bukhari)
◆ Sawal No.50) Aqeeda "Haazir-O-Naazir" Ka Mafhoom Bayan Kijiye?
Jawab ▶️ Ahle_Sunnat Ka Aqeeda Hai Ke Jis Tarah Ruh Apne Badan Ke Har Juz'o Me'n Maujood Hoti Hai Isi Tarah Ruhe Mustafa ﷺ Ki Haqiqat Kaayenaat Ke Har Zarre Me'n Jaari-O-Saari Hai Jiski Bina Par Jaane Kaayenaat ﷺ Roza-E-Aqdas Se Tamam Kaayenaat Ko Apni Hatheli Ki Tarah Mulaheza Farmate Hain, Door -O-Nazdeek Ki Aawaze'n Yaksa'n Sunte Hain Aur Apni Ruhaniyyat Aur Nooraniyat Ke Sath Bek Waqt Muta'addid Maqamaat Par Tashreef Farma Ho Sakte Hain.
◆ Sawal No.51) Huzoor ﷺ Ki Sifat "Shahid" Ke Maani Kya Hain?
Jawab ▶️ Iske Maani Hain "Haazir-O-Naazir". Mufassireen Farmate Hain Ke Shahidan Ka Maani Ye Hai Ke Huzoor ﷺ Apni Ummat Ke Af'aal Ka Mushahidah Farmate Hain.
(Tafsire Kabeer)
◆ Sawal No.52) Is Aqeede Par Aayaat Bayan Kare'n?
Jawab ▶️ Farmane ILahi Hai, "Ye Nabi Musalmano'n Ki Jaano'n Se Zyada Unke Qareeb Hai.
(Surah Al-Ahzaab:6)
Ye Bhi Irshad Huwa, "Aye Ghaib Batane Wale! Beshak Hamne Aapko Bheja Haazir-O-Naazir".
(Surah Al-Ahzaab:45)
◆ Sawal No.53) و یکون الرسول علیکم شھیدا Ka Tarjuma -O- Tafseer Bayan Kijiye?
Jawab ▶️ "Aur Ye Rasool Tumhare Nigehbaan-O-Gawah".
(Kanzul Eemaan)
Shah Abdul Azeez Mohaddis Dahelwi Farmate Hain, "Kyunke Aap Apne Noore Nabuwwat Se Har Deen_Daar Ke Darje Ko Jante Hain. Pas Huzoor ﷺ Tumhare Gunaho'n, Tumhare Eemaan Ke Darjaat, Tumhare Nek-O-Bad Aamaal Aur Tumhare IkhLaas-O-Nifaaq Ko Jante Hain".
(Tafseer Azizi)
◆ Sawal No.54) Aqeeda Haazir-O-Naazir Par Ahadees Bayan Kare'n?
Jawab ▶️ Aap ﷺ Ka Farmane Aalishaan Hai, "Allah Ta'Aala Ne Mere Liye Dunya Ko Zahir Farmaya Pas Me'n Dunya Ko Aur Jo Kuch Dunya Me'n Qayamat Tak Hone Waala Hai, Sab Kuch Is Tarah Dekh Raha Hu'n Jaise Me'n Apni Hatheli Ko Dekh Raha Hu'n".
(Tibrani)
Ek Aur Irshaad Hai, "Beshak Me'n Tumhara PeshRu Aur Tum Par Gawah Hu'n Aur Khuda Ki Qasam! Me'n Apne Hauze Kausar Ko Is Waqt Bhi Dekh Raha Hu'n".
(Bukhari)
Nabi Kareem ﷺ Ka Dilo'n Ki Kaifiyaat Se Aagah Hona Is Hadeese Saheeh Se Saabit Hai.
Irshaad Huwa, "Khuda Ki Qasam! Mujh Par Na Tumhara Ruku Poshida Hai Aur Na Khushu (Jo Ke Dil Ki Ek Kaifiyat Hai) Aur Beshak Me'n Tumhe'n Apne Peeche Se Bhi Dekhta Hu'n".
(Bukhari)
◆ Sawal No.55) Aqeeda Haazir-O-Naazir Par Teen Mohaddiseen Ke Aqwaal Ma'a Hawala-E-Kutub Bataye'n?
Jawab ▶️ Imam Qastalaani Farmate Hain, "Huzoor ﷺ Apni Ummat Ko Dekh Rahe Hain, Unki Haalato'n, Niyato'n, Irado'n Aur Dil Ki Baato'n Ko Bhi Jante Hain".
(مواہب الدنیہ)
Imam Suyuti Farmate Hain, "Huzoor ﷺ Hamari Aankho'n Se Is Tarah Poshida Hain Jaise Farishte Apne Ajsaam Ke Sath Zinda Hone Ke Bawajood Hamari Aankho'n Se Poshida Hain".
(الحاوی للفتاوی)
Sheikh Abdul Haq Muhaddis Dehelwi Farmate Hain, "Huzoor ﷺ Apni Ummat Ke Ahwaal Par Haazir-O-Naazir Hain".
(سلوک اقرب السبل)
◆ Sawal No.56) Allah Ta'Aala Apne Mahboob Bando'n Ko Jo Qudrat-O-Ikhtiyaar Ata Karta Hai Uspar Hadees Bataiye.
Jawab ▶️ Hadeese Qudsi Hai Ke Rab Ta'Aala Ne Farmaya, "Mera Banda Nawafil Ke Zariye Mera Qurb Haasil Karta Rehta Hai Yaha'n Tak Ke Me'n Use Apna Mahboob Bana Leta Hu'n To Me'n Uske Kaan Hojata Hu'n Jisse Wo Sunta Hai Aur Uski Aankhe'n Hojata Hu'n Jisse Wo Dekhta Hai Aur Uske Hath Ho Jata Hu'n Jisse Wo Pakadta Hai Aur Uske Paao'n Hojata Hu'n Jisse Wo Chlata Hai. Agar Mujhse Maange To Me'n Usko Ata Karta Hu'n Aur Agar Meri Panah Maange To Usko Panah Deta Hu'n".
(Bukhari)
◆ Sawal No.57) Is Hadees Ki Ru Se Saabit Kijiye Ke Auliya Allah Ke Liye Door-O-Nazdeek Barabar Hote Hain.
Jawab ▶️ Imam Raazi Tafsire Kabeer Me'n Farmate Hain Ke Jab Allah Ka Noore Jalaal Bande Ki Sama'at Hojata Hai To Banda Door-O-Nazdeek Ki Aawazo'n Ko Yaksa'n Sun Sakta Hai Aur Jab Ye Noor Bande Ki Basaarat Hojata Hai To Wo Door-O-Nazdeek Ki Chizo'n Ko Yaksa'n Dekh Sakta Hai Aur Jab Yahi Noor Bande Ka Hath Hojaye To Wo Door-O-Nazdeek Ki Chizo'n Me'n Tasarruf Karne Par Qaadir Hojata Hai.
◆ Sawal No.58) QurAan Se Saabit Kijiye Ke Auliya Allah Ke Liye Door-O-Nazdeek Barabar Hote Hain.Jawab ▶️ Hazrat Sulemaan Alaihissalam Ne Apne Darbariyo'n Se Kaha, Kon Hai Jo Takhte Bilqees Ko Yaman Se Bait-ul-Muqaddas Le Aaye? To Allah Ta'Aala Ke Ek Wali Ne Palak Jhapak Ne Se Pehle Us Takht Ko Waha'n Haazir Kar Diya. Surah Namal Ki Aayat 40 Me'n Ye Baat Mazkoor Hai.
◆ Sawal No.59) Nabi Kareem ﷺ Ne "Ya RasoolAllah" ﷺ Pukaarne Ki Ta'Leem Di, Daleel Dijiye.Jawab ▶️ Rasule MuAzzam ﷺ Ne Ek Naabina Sahabi Ko Qaza-E-Haajaat Ke Liye Ye Dua Ta'Leem Farmayi.
Tarjuma: "Aye Allah! Me'n Tujhse Mangta Hu'n Aur Teri Taraf Tawajjuh Karta Hu'n Tere Nabi Hazrat Mohammed ﷺ Ke Wasile Se Jo Ke Nabi-E-Rahmat Hain. Ya RasoolAllahﷺ ! Me'n Aapke Wasile Se Apne Rab Ke Darbar Me'n Isliye Mutawajjih Huwa Hu'n Taake Meri Ye Haajat Puri Hojaye. Ya Allah! Huzoor ﷺ Ki Shafa'at Mere Haq Me'n Qubool Farma".
(Haakim, Tirmazi, Ibne Maaja, Nisayi, Baihaqi, Tibrani)
◆ Sawal No.60) Huzoor ﷺ Ko Harfe Nida Se Pukaarna Sahaba Ki Sunnat Hai, Dala'il Dijiye.
Jawab ▶️ Nabi Kareem ﷺ Ko Harf "Ya" Ke Sath Nida Karna Sahaba Kiraam Ki Sunnat Hai. Imam Bukhari Ne Adab-ul-Mufarrad Me'n Riwayat Kiya Hai Ke Hazrat Abdullah Bin Umar RadiyAllahu Ta'Aala Anhuma Ka Paao'n Sogaya, Kisi Ne Kaha, Unhe'n Yaad Karo Jo Tumhe'n Sabse Zyada Mahboob Hain. Aapne Buland Aawaz Se Farmaya, Ya Mohammed ﷺ! To Aapka Paao'n Fauran Saheeh Hogaya. Hazrat Khalid Bin Waleed RadiyAllahu Ta'Aala Anhu Sahaba Kiraam Ke Hamrah Jab Muslimah Kazzaab Ke Lashkar Se Bar_Sare Paikaar The Us Waqt Sabki Zubaan Par Ye Nida Thi, Ya Mohammedah (Ya RasoolAllah ﷺ! Madad Farmaiye) Phir Musalmano'n Ko Fateh Naseeb Huwi.
(Ibne Aseer, Tibri, Tareekh Ibne Kaseer)
◆ Sawal No.61) Huzoor ﷺ Ko Harfe Nida Se Pukaarna Shirk Nahi Hai. Daleel Dijiye.Jawab ▶️ Tamam Musalman Roza-E-Nabwi Par Haazir Hokar "Ya RasoolAllah ﷺ" Pukaarte Hain. Jo Kaam Madinah Muwwarah Me'n Shirk Nahi Wo Yaha'n Kyunker Shirk Hoga?
Dusri Baat Ye Hai Ke Aaqa-O-Maula ﷺ Ko Harfe Nida "Ya" Ke Sath Mukhatib Karke Salam Arz Karna Yaani
السلام علیک ایھاالنبی
Assalamu Alaika Ayyhu_Han_Nabiyu
Kehna Jab Namaz Me'n Wajib Hai To Namaz Ke Bahar Shirk Kaise Ho Sakta Hai?
◆ Sawal No.62)Wasilah Jaaiz Hai, QurAan Se Daleel Dijiye?Jawab ▶️ Irshad Baari Ta'Aala Hai, "Aye Eemaan Walo'n ! Allah Se Daro Aur Uski Taraf Wasilah Dhoondo".
(Surah Al-Maidah:35, Kanzul Eemaan)
Ek Aur Irshade QurAani Hai, "Aur Isse Pehle Wo Usi Nabi Ke Wasile Se Kaafiro'n Par Fateh Maangte The".
(Surah Al-Baqarah:89)
◆ Sawal No.63) Sahaba Kiraam Mushkil Me'n Huzoor ﷺ Ka Wasilah Ikhtiyar Karte the, Ahadees Bayan Kijiye?Jawab ▶️Hazrat Umar RadiyAllahu Ta'Aala Anhu Ne Barish Ke Liye Huzoor ﷺ Ke Chacha Ke Wasile Se Dua Ki.
(Bukhari)
Ek Sahabi Ne Huzoor ﷺ Se Chadar Maangi Taake Wo Unka Kafan Bane.
(Bukhari)
Hazrat Aasma RadiyAllahuTa'Aala Anha Aap ﷺ Ka Jubbah Mubarak Dhokar Marizo'n Ko Pilate'n To Wo Shifa Paate.
(Muslim)
Hazrat Aayesha RadiyAllahu Ta'Aala Anha Ke Bataane Par Sahaba Kiraam Ne Aapke Roza-E-Aqdas Ke Wasile Se Barish Maangi.
(Mishkaat)
◆ Sawal No.64) Kisi Muqarrab Bande Se Nisbat Wali Jaga Ya Shay Ko Wasilah Banane Par QurAani Hawala Dijiye. Jawab ▶️ Hazrat Zakariah Alaihissalam Ne Hazrat Maryam RadiyAllahu Ta'Aala Anha Ke Paas Aulaad Ke Liye Dua Ki.
(Surah Aal-E-Imran:38)
Hazrat Yusuf Alaihissalam Ki Qameez Se Unke Walid Ko Binayi Haasil Huwi.
(Surah Yusuf:92)
Ambiya-E-Kiraam Ke Tabarrukaat Wale Taboot Se Bani Isra'eel Ki Mushkile'n Aasaan Hoti Thi'n.
(Surah Al-Baqarah:248)
◆ Sawal No.65) Huzoor ﷺ Ko Mukhtare Kul Kaha Jata Hai, Ahadees Se Daleel Dijiye?Jawab ▶️ Allah Ta'Aala Ne Apni Neamate'n Taqseem Farmane Ka Ikhtiyar Apne Habeeb ﷺ Ko Ata Farmaya.
Aap Ka Farmane Aalishaan Hai:
انما انا قاسم و اللہ یعطی
"Beshak Me'n Taqseem Karne Wala Hu'n Aur Allah Ta'Aala Ata Farmane Wala Hai.
(Bukhari Kitab-ul-ILm)
Aapse Sawal Kiya Gaya, Kya Hajj Har Saal Farz Hai?
Farmaya: Nahi. Aur Agar Me'n Haan Kehdu'n To Hajj Har Saal Farz Hojaye".
(Musnade Ahmed, Tirmazi, Ibne Maaja)
◆ Sawal No.66) Kya Nabi Kareem ﷺ Ko Kisi Cheez Ko Halaal Ya Haraam Karne Ka Ikhtiyar Haasil Tha?Jawab ▶️ Jee Haan. Rab Ta'Aala Ka Farmaan Hai, "Nabi Kareem ﷺ Un Logo'n Ke Liye Paak Chize'n Halaal Aur Naapaak Chize'n Haraam Karte Hain".
(Surah Al-A'raaf:157)
◆ Sawal No.67) Sahaba Kiraam Mushkil Ke Waqt Baargahe Nabwi Me'n Faryaad Karte Aur Aap Mushkil Kushayi Farmate, Ahadees Bataiye.Jawab ▶️ Hudaibiyah Ke Din Sahaba Kiraam Ne Paani Ke Liye Faryaad Ki To Aapki Mubarak Ungliyo'n Se Paani Ke Chashme Jaari Hogaye.
(Bukhari, Muslim)
Ek Sahabi Ne Qaht Padne Par Faryaad Ki To Aapki Dua Se Baarish Huwi.
(Bukhari)
Aap Ne Sattar As'haabe Suffah Ko Ek Pyala Doodh Se Ser Kar Diya.
(Bukhari)
Hazrat Jabir Ke Ghar Haandi Me'n LuAabe Dahan Daal Kar Ek Hazaar Sahaba Kiraam Ko Shikam Ser Farma Diya.
(Bukhari)
◆ Sawal No.68) Sahaba Kiraam Huzoor Akram ﷺ Se Wo Neamate'n Bhi Maangte Jo Aam Makhlooq Se Nahi Maang Sakte. Ahadees Bataiye.Jawab ▶️ Hazrat Abu Hurerah RadiyAllahu Ta'Aala Anhu Ne Hafizah Maanga Jo Ata Farmaya.
(Bukhari)
Hazrat Rabi'ah RadiyAllahu Ta'Aala Anhu Ne Jannat Maangi, Aap ﷺ Ne Ata Farmayi.
(Muslim, Abu_Dawood, Ibne Maaja)
Salmah Bin Aku RadiyAllahu Ta'Aala Anhu Ki Tuti Huwi Pindli Ko Jod Diya.
(Bukhari)
Ek Sahabi RadiyAllahu Ta'Aala Anhu Ne Barish Ki Kasrat Ke Wajah Se Faryad Ki To Aap ﷺ Ke Ishare Se Baadal Chatt Gaye.
(Bukhari)
◆ Sawal No.69) Huzoor ﷺ Ne Wisaal Ke Ba'd Sahaba Ki Pukaar Par Jawab Diya Hai, Daleel Dijiye.Jawab ▶️ Ek Aaraabi Ne Roza-E-Rasool ﷺ Par Haazir Hokar Maghfirat Mangi. Roza Mubarak Se Aawaz Aayi, "Tujhe Bakhsh Diya Gaya".
(Tafsire Qurtubi, Tafsire Madarik, Jazbul Quloob)
Hazrat Abu Bakar Siddeeque RadiyAllahu Ta'Aala Anhu Ne Apni Wafaat Se Qabl Wasiyat Farmayi Ke Mere Janaze Ko Roza-E-Nabwi Par Le Jakar Dafan Ki Ijazat Talab Karna, Sahaba Kiraam Ne Aisa Hi Kiya To Roza-E-Aqdas Se Aawaz Aayi, "Habeeb Ko Habeeb Ke Paas Le Aao".
(Tafsire Kabeer, Jild:5 , Safha:475)
◆ Sawal No.70) Irshad Baari Ta'Aala Hai, "Aur Ham Ne Tumhe'n Na Bheja Magar Rahmat Saare Jahaan Ke Liye". (Surah Al-Ambiya) Huzoor ﷺ Ke Rahmate Aalam Hone Ke Kya Taqaaze Hain?Jawab ▶️ Aaqa-O-Maula ﷺ Har Waqt Aur Har Lamha Kaayenaat Ke Liye Rahmat Hain Aur Rahmat Hone Ke Liye Zaruri Hai Ke Huzoor ﷺ Tamaam Jahaan Walo'n Ke Ahwaal Se Aagah Hon Yaani Haazir-O-Naazir Hon, Unki Pukaar Ko Sunte Hon Aur Unki Mushkil Kushayi Aur Haajat Rawayi Par Qudrat-O-Ikhtiyaar Rakhte Hon.
◆ Sawal No.71) Khatimun Nabiyeen Ke Kya Maani Hain? Wazahat Kijiye.
Jawab ▶️ Iske Maani Hai, "Sab Nabiyo'n Se Pichle Yaani Aakhri Nabi". Jo Huzoor ﷺ Ke Ba'd Kisi Aur Ko Nabuwat Milna Mumkin Jaane Wo Kaafir Hai.
◆ Sawal No.72) Shafa'at Ke Muta'alliq Musalmano'n Ka Kya Aqeedah Hai?
Jawab ▶️ Huzoor ﷺ Shafa'ae Mehshar Hain. Aapki Shafa'at Se Ahle Mehshar Ko Hisaab Kitaab Ke Intazar Se Najaat Milegi, Bahot Se Bila Hisaab Jannat Me'n Jayenge, Kayi Ke Darjaat Buland Honge, Bahot Se Jahannam Me'n Jaane Se Bach Jayenge, Bahot Se Jahannam Se Nikaal Liye Jayenge. Aapke Ba'd Ambiya Kiraam Phir Auliya-E- Izaam, Shohda, Ulma-E-Haq Huffaaz Waghairah Apne Muta'alliqeen Ki Shafa'at Karenge.
◆ Sawal No.73) Mojizah Aur Karamat Me'n Kya Farq Hai?
Jawab ▶️Wo Buland Kaam Jo Insani Aadat Ke KhiLaaf Ho Aur Nabi-O-Rasool Se Saadir Huwa, Use Mojizah Kehte Hain. Jaise Chaand Ke Do Tukde Karna, Doba Suraj Palta Dena, Ungliyo'n Se Paani Ke Chashme Jaari Kar Dena Waghairah.
Agar Aisa Buland Kaam Allah Ta'Aala Ke Wali Se Saadir Hoto Use Karamat Kehte Hain. Jaise Aasif Bin Barkhiya Ka Palak Jhapakte Me'n Takhte Bilqees Le Aana, Sarkar Ghause Aazam RadiyAllahu Ta'Aala Anhu Ka Murde Ko Zindah Kar Dena Waghairah.
◆ Sawal No.74) Aasmani Kitaabo'n Par Eemaan Laane Se Kya Muraad Hai?
Jawab ▶️ Allah Ta'Aala Ne Apne Rasulo'n Par Jo Kitaabe'n Aur Sahife Utare Hain, Wo Sab Haq Hai Albattah Ab Wo Asal Haalat Me'n Maujood Nahi Hai. QurAan Kareem Wo Be-Misl Kitaab Hai Jiski Hifazat Ka Allah Ta'Aala Ne Wa'dah Farmaya Hai. Jo Ye Kahe Ke QurAan Me'n Kisi Ne Kami Beshi Kardi Ya Asli QurAan Ghaayib Imam Ke Paas Hai Wo Kaafir Hai.
◆ Sawal No.75) Farishto'n Par Eemaan Laane Ka Kya Matlab Hai?
Jawab ▶️ Farishte Noor Se Paida Ki Gayi Makhlooq Hain. Wo Na Mard Hain Na Aurat. Wo Khaane Peene Se Paak Aur Har Qism Ke Gunah-O-Khata Se Ma'asoom Hain. Unhe'n Rab Ta'Aala Ne Be-Panah Quwwat Ata Farmayi Hai Aur Bahot Se Kaam Unke Supurd Kiye Hain.
Maslan__ Jaan Nikaalna, Barish Barsana, Rizq Dena, Nama-E-Aamaal Likhna, Majalise Zikr Me'n Shirkat Karna Waghairah Waghairah.
◆ Sawal No.76) "Qabr Me'n Azaab-O-Sawaab Haq Hai", Iski Wazahat Kijiye.
Jawab ▶️ Qabr Me'n Azaab Ya Neamate'n Milna Haq Hai Aur Ye Ruh-O-Jism Dono'n Ke Liye Hai, Agar Jism Jal Jayega Ya Gal Jaye Ya Khaak Hojaye Tab Bhi Uske Ajza-E-Asliyah Qayamat Tak Baaqi Rehte Hain. Ajza-E-Asliyah Ridh Ki Haddi Me'n Bareek Ajza Hote Hain Jinka Ruh Se Ta'alluq Hamesha Qaayim Rehta Hai Aur Ye Dono'n Azaab-O-Sawaab Se Aagah Aur Mutas'sir Hote Hain.
◆ Sawal No.77) Qabr Me'n Munkar Aur Naakeer Ke Teen Sawal Kon Se Hain?
Jawab ▶️ Pehla Sawal
من ربک
Tera Rab Kon Hai?
Dusra Sawal
مادینک
Tera Deen Kya Hai?
Tisra Sawal: Hzuoor ﷺ Ki Taraf Ishara Karke Puchte Hain,
ماکنت تقول فی ھذا الرجل
Inke Baare Me'n Kya Kehta Tha.
◆ Sawal No.78) Aakhirat Par Eemaan Laane Se Kya Muraad Hai?
Jawab ▶️ Hame'n Ye Yaqeen Hona Chahiye Ke Ek Din Aisa Aayega Jab Tamam Murdo'n Ko Zindah Karke Jam'a Kiya Jayega Aur Unse Unke Aamal Ka Hissab Hoga. Neko'n Ko Jaza Aur Buro'n Ko Saza Milegi. Is Din Ko Qayamat Ya Mehshar Ya Jaza-O-Saza Ka Din Bhi Kehte Hain.
◆ Sawal No.79) Kya Murdo'n Ko Hamari Ibadat Ka Sawaab Pohachta Hai? Ahadees Bayaan Kare'n.
Jawab ▶️ Ek Shakhs Ne Baargahe Nabwi Me'n Sawal Kiya, Ya RasoolAllah ﷺ! Meri Walidah Ka Achanak Intaqal Hogaya, Agar Me'n Unke Liye Sadqa Khairaat Karu'n To Kya Unhe'n Sawaab Pohchega? Irshad Farmaya, Haan Unhe'n Sawaab Zaroor Pohchega.
(Bukhari, Muslim)
Hazrat Anas RadiyAllahu Ta'Aala Anhu Ne Arz Ki, Ham Apne Murdo'n Ke Liye Duaye'n, Sadqaat-O-Khairaat Aur Hajj Karte Hain Kya Ye Chize'n Unhe'n Pohachti Hain? Farmaya, Haan Zaroor Pohachti Hain Aur Wo Inse Aise Khush Hote Hain Jaise Tum Ek Dusre Ke Hadye Se Khush Hote Ho.
(Masnad Ahmed)
◆ Sawal No.80) Kya Zindah Ko Bhi Aesaale Sawaab Kiya Ja Sakta Hai?
Jawab ▶️ Ahle_Sunnat Ke Nazdeek Ibadat Ka Sawaab Kisi Dusre Ko Bakhashna Jaaiz Hai Khwah Zindah Ko Hi Aesaale Sawaab Kiya Jaye. Hazrat Abu Hurerah RadiyAllahu Ta'Aala Anhu Ne Kuch Logo'n Se Farmaya, Tum Me'n Se Kon Is Baat Ka Zimme Daari Leta Hai Ke Wo Masjide Isha Me'n Mere Liye 2-4 Rak'aat Nafl Padh De Aur Kahe Ke Ye Namaz Abu Hurerah Ke (Aesaale Sawaab Ke) Liye Hai.
(Abu Dawood)
◆ Sawal No.81) Kin Chizo'n Ka Sawaab Insaan Ko Marne Ke Ba'd Bhi Milta Rehta Hai?
Jawab ▶️ Rasule Kareem ﷺ Ka Farmane Aalishaan Hai, Jab Insaan Marjata Hai To Uske Aamal Ka Silsila Bhi Khatam Hojata Hai Siwaye Teen Chizo'n Ke Jinka Sawaab Use Milta Rehta Hai.
Awwal Sadqa-E-Jaariyah, Duwwam Wo ILm Jisse Logo'n Ko Nafa Poha'nchta Rahe, Suwwam Wo Nek Aulaad Jo Uske Liye Dua Karti Rahe.
(Muslim)
◆ Sawal No.82) Sahabi Kise Kehte Hain? Sab Se Afzal Sahaba Kon Hain?
Jawab ▶️ Sahabi Us Musalmaan Ko Kehte Hain Jis Ne Nabi Kareem ﷺ Ka Didaar Kiya Aur Eemaan Ke Sath Duniya Se Gaya. Sahaba Kiraam Me'n Sab Se Afzal Sayyidina Abu Bakar Siddique Phir Sayyidina Umar Farooq Phir Sayyidina Usmaane Ghani Aur Phir Sayyidina Ali Murtada RadiyAllahu Ta'Aala Anhum Hai.
◆ Sawal No.83) Sahabi Ki Tauheen Karne Waale Ke Muta'alliq Kya Shara'ee Hukm Hai?
Jawab ▶️ Tamam Sahaba Muttaqi Aur Aadil Hain. Unki Tauheen Karne Waala Sakht Gumrah, Mal'oon Aur Mustahiqe Jahannam Hai. Hazrat Abu Bakar-O-Hazrat Umar RadiyAllahu Anhuma Ki Khilafat Ka Inkaar Kufr Hai. Sahaba Kiraam Ke Maa'bain Jo Ikhtelaaf Huwa, Uski Waja Se Unpar Ta'an Ya Unse Bad-Aetaqaadi Haraam Hai.
◆ Sawal No.84) Ahle_Bait Se Kon Muraad Hain? Imam Hussain Ko Baaghi Kehna Kaisa Hai?
Jawab ▶️ Ahle_Baite Athaar Se Rasule Kareem ﷺ Ki Azwaaje Mutehharaat Aur Aulaade Mubarak Muraad Hai. Sahaba Kiraam Aur Ahle_Baite Athaar Ki Mohabbat Dar Asal Rasule Kareem ﷺ Se Mohabbat Hai. Jo Imam Hussain RadiyAllahu Ta'Aala Anhu Ko Baaghi Kahe Ya Yazeed Paleed Ko Haq Kahe Wo Mardood Khaarji Aur Mustahiqe Jahannam Hai.
◆ Sawal No.85) Taaba'ee Kise Kehte Hain? Kya Imam Abu Haneefah RadiyAllahu Ta'Aala Anhu Taaba'ee Hain?
Jawab ▶️ Taaba'ee Us Musalmaan Ko Kehte Hain Jis Ne Sahabi Ki Ziyarat Ka Sharf Haasil Kiya. Imame Aazam Abu Haneefah RadiyAllahu Ta'Aala Anhu Ko Ye Aezaaz Haasil Hai Ke Aap Ne 20 Ta 30 Sahaba-E-Kiraam Ka Zamana Paaya Aur 7 Sahaba-E- Kiraam Ki Ziyarat Karke Unse Ahadees Bhi Sune'n.
◆ Sawal No.86) Wali Kise Kehte Hain? QurAan Me'n Unki Kya Alamaat Bayan Huwe'n Hain?
Jawab ▶️ Wo Sauleh Momin Jise Allah Ta'Aala Ka Qurb Aur Dosti Haasil Hoti Hai, Use Allah Ka Wali Kehte Hain. Unki Ek Alamat Ye Hai Ke Wo Saheeh-ul-Aqeedah Momin Hote Hain Lihaza Koyi Bad-Mazhab Gumrah Wali Nahi Ho Sakta.
Dusri Alamat Ye Bayan Huwi Ke Wo Muttaqi Parhezgar Hote Hain Lihaza Koyi Be-Namazi, Daadhi Munda, Faasiq Wali Nahi Ho Sakta.
◆ Sawal No.87) Taqleed Se Kya Muraad Hai? Iska Istelaahi Mafhoom Bayan Kare'n.
Jawab ▶️ Taqleed Ke Lagwi Maani Hain "Gardan Me'n Patta Daalna" Aur Istelaahi Maani Hain "Daleel Jaane Baghair Kisi Ke Qaul-O-Feal Ko Saheeh Samajhte Huwe Uski Perwi Karna". Har Insaan Zindagi Ke Har Shoube Me'n Kisi Na Kisi Ki Taqleed Kar Raha Hai To Deen Ke Maamle Me'n Ye Zyada Zaruri Hai Taake Insaan Gumrahi Se Bache.
◆ Sawal No.88) Taqleed Ka Shara'ee Hukm Kya Hai Aur Ye Kyun Zaruri Hai?
Jawab ▶️ Taqleed Ka Farz Hona Is Aayat Se Saabit Hai. Irshaad Huwa, "Aur Musalmano'n Se Ye To Ho Nahi Sakta Ke Sab Ke Sab Nikle'n To Kyun Na Ho Ke Unke Har Giroh Me'n Se Ek Jama'at Nikle Ke Deen Ki Samajh Haasil Kare'n Aur Waapas Aakar Apni Qaum Ko Dar Sunaye'n Is Ummeed Par Ke Wo Bache'n".
(Surah Al-Taubah:122, Kanzul Eemaan)
Is Aayat Se Ma'aloom Huwa Ke Har Shakhs Par Aalim-O-Faqiyah Banna Zaruri Nahi Lihaza Ghaire Mujtahid Ya Ghaire Aalim Ko Mujtahid Ya Aalim Ki Taqleed Karni Chahiye.
◆ Sawal No.89) Sahaba Kiraam Alaihimur Ridwaan Kis Ki Taqleed Karte The?
Jawab ▶️ Sahaba Kiraam Barahe Raast Nabi Kareem ﷺ Se Deen Ka ILm Haasil Kiya Karte The Isliye Unhe'n Kisi Ki Taqleed Ki Zarurat Nahi Thi. Aaqa-O-Maula ﷺ Ke Zahiri Wisaal Ke Ba'd Sahaba Kiraam Aur Ta'bayeen Bhi Apne Darmiyan Maujood Zyada Sahabe ILm Sahabi Ki Taqleed Kiya Karte. Hazrat Abu Musa Ash'ari RadiyAllahu Ta'Aala Anhu Hazrat Abdullah Bin Masood RadiyAllahu Ta'Aala Anhu Ke Baare Me'n Farmate The, "Jab Tak Ye Aalim Tumhare Darmiyan Maujood Hain, Mujhse Masayil Na Pucha Karo".
(Bukhari)
Yahi Taqleede Shakshi Hai Jo Daure Sahaba Me'n Bhi Maujood Thi.
◆ Sawal No.90) Ba'z Ghair Muqallid Khud Ko Mohaddiseen Ka Pero Kaar Aur Hame'n Muqallid Hone Ki Bina Par Gumrahi Kehte Hain. Kya Mohaddiseen Ghair Muqallid The?
Jawab ▶️ Tamam Mohaddiseen Bukhari, Tirmazi, Abu Dawood, Ibne Maja, Nisayi, Daarmi, Tahawi, Waghairah RahmahullAh Kisi Na Kisi Imam Ke Muqallid Hain. Imam Bukhari, Imam Abu Dawood Aur Imam Nisayi Ka Muqallid Hona To Khud Ghair Muqallid Aalam Nawab Siddique Hasan Bhopali Ne "Al-Hatah" Me'n Bayan Kiya Hai. Jab Aise Jaleel-ul-Qadr Mohaddiseen, Aaimah Arba Me'n Se Kisi Na Kisi Ke Muqallid Hain To Phir Ye Neem Maulvi Ghair Muqallid, Taqleed Se Be-Niyaaz Hokar Kyunker Gumrah Na Honge?
◆ Sawal No.91) Kya Mazahibe Arba Ahle_Sunnat Hain? Nez Ham Log Kiske Muqallid Hain?
Jawab ▶️Hanafi Mazhab, Maaliki Mazhab Shafa'ee Mazhab, Hambli Mazhab Chaaro'n Haq Hain Aur Chaaro'n Ahlesunnat-O-Jama'at Hain. Inke Aqaa'id Yaksa'n Hain Albatta Sirf Aamal Me'n Firu'ee Ikhtelaaf Hai. In Chaaro'n Me'n Se Ek Ki Taqleed Wajib Hai. Ham Log Imame Aazam Abu Haneefah RadiyAllahu Ta'Aala Anhu Ke Muqallid Hai.
◆ Sawal No.92) Fiqh Hanafi Dar Asal Hadees Hi Hai. Wazahat Kijiye?
Jawab ▶️ Mohaddiseen Ke Nazdeek Taba'ee Ka Qaul Hadise Qauli Hai, Iska Feal Hadise Feali Hai Aur Iska Kisi Ke Qaul Ya Feal Par Sukoot Farmana Hadise Taqriri Hai, To Imame Aazam Abu Haneefah RadiyAllahu Ta'Aala Anhu Ka Qaul, Feal Aur Sukoot Bhi Hadees Qaraar Paaya Kyunke Aap Taba'ee Hain. Aapne 7 Sahaba Kiraam Se Bila Waasta Ahadees Suni Hai. Pas Aapki Fiqh Dar Haqiqat Hadees Hi Hai.
◆ Sawal No.93) Ba'z Na Samajh Aetaraaz Karte Hain Ke "Fiqh Hanafi Ki Tayeed Me'n Jo Ahadees Pesh Ki Jati Hain Wo Za'eef Hain". Iska Kya Jawab Hai?
Jawab ▶️ Sahaba Kiraam Ke Zamana Me'n Koyi Hadees Bhi Za'eef Waghairah Nahi Thi Balke Sab Saheeh Ke Darje Me'n Thi'n Kyunke Hadees Ka Za'eef Hona Raawi Ki Waja Se Hota Hai. Imame Aazam Taba'ee Hain Isliye Aapko Sahabi Ya Taba'ee Ke Waasto'n Se Ye Ahadees Mile'n Jabke Ba'd Waalo'n Ke Paas Ye Ahadees Kayi Waasto'n Se Ponhchi Hain Isliye Aapke Ba'd Kisi Raawi Ke Za'eef Hone Se Fiqh Hanafi Par Koyi ILzaam Nahi Aa Sakta.
◆ Sawal No.94) Hadees Me'n Hai, "Meri Ummat Me'n 73 Firqe Honge, Ek Jannati Aur Baaqi Jahannami". Is Jannati Giroh Ki Kya Nishani Batayi Gayi?
Jawab ▶️ Sahaba Kiraam Ne Arz Kiya, Ya RasoolAllah ﷺ! Wo Jannati Giroh Konsa Hai? Farmaya, Jo Mere Aur Mere Sahaba Ke Raste Par Hai.
(Tirmazi, Abu Dawood)
◆ Sawal No.95) Jin Mohaddiseen Ne Huzoor ﷺ Aur Sahaba Kiraam Ke Raste Par Chalne Waala Giroh Ahle_Sunnat Ko Qaraar Diya, Un Me'n Se Chand Ke Naam Bataiye.
Jawab ▶️ Mohaddis Ali Qaari Ne Mirqaat Sharah Mishkaat Me'n, Sheikh Abdul Haq Mohaddis Dehlawi Ne Ash'atul Lam'Aat Me'n Aur Mujaddide Alf Saani RahmahumullAh Ne Maktubaat Jild:Awwal Safha:59 Par Ahle_Sunnat Ko Jannati Giroh Qaraar Diya Hai.
◆ Sawal No.96) QurAan Kareem Me'n Siraate Mustaqeem Ki Pehchan Kya Batayi Gayi?
Jawab ▶️ "Hamko Seedha Rasta Chala, Rasta Unka Jin Par Tune Ahsaan Kiya".
(Kanzul Eemaan)
Ham Har Namaz Me'n Allah Ta'Aala Se Ye Dua Karte Hain Ke ILaahi! Hame'n Apne In'aam Yaafta Bando'n Yaani Sahaba-O-Auliya-E-Kiraam Ke Raste Par Chala Kyunke Yahi Seedha Rasta Hai.
◆ Sawal No.97) Auliya-E-Kiraam Hamesha Kis Giroh Me'n Zahir Hote Rahe Hain?
Jawab ▶️ Hazrat Ghause Aazam, Daata Ganje Bakhsh, Khwaja Gharib Nawaz, Mujaddid Alf Saani, Baba Fareed Ganj Shakar Aur Digar Auliya-E-Kiraam RahmahumullAha Ta'Aala Ka Ta'alluq Ahle_Sunnat Se Hai. AlhamdulillAh! Ahle_Sunnat-O-Jama'at Hi Wo Giroh Hai Jo Sahaba Kiraam Ke Aqaa'id Ka Pero_kaar Hai Aur Isi Me'n Tamam Auliya-E-Kiraam Zahir Huwe Hain Aur Yahi Jannati Giroh Hai.
◆ Sawal No.98) Ahadise Mubaraka Me'n Jannati Giroh Ki Mazeed Kya Alamat Bayan Huwi Hain?
Jawab ▶️ Pehli Alamat Ye Hai Ke Ummate Muslimah Ka Ek Giroh Har Daur Me'n Zaroor Haq Par Rahega.
(Muslim)
Ahle_Sunnat Ke Aqaa'id Tauheede Baari Ta'Aala, Azmate Rasool ﷺ Aur Mohabbat-O-Ta'azeeme Mustafa ﷺ Ke Hawale Se Sahaba Kiraam, Taba'yeen Aur Aaima-E-Deen Se Muttasil Chale Aarahe Hain Aur Mukhlifeen Bhi Ye Maante Hain Ke Ahle Sunnat Nazariyaat Aur Aqaa'id Ke Aetabar Se Qadeem Jama'at Hai.
Dusri Alamat Jannati Giroh Ka Sawade Aazam Yaani Bada Giroh Hona Hai. Huzoor ﷺ Ka Farmaan Hai, "Bade Giroh Ki Perwi Karo Kyunke Jo Isse Alag Raha Wo Alag Hi Aag Me'n Jayega".
(Ibne Maaja, Mishkaat)
Dusri Jaga Irshad Huwa, "Bahattar(72) Firqe Jahannami Aur Ek Jannti Hai Aur Wo Bada Giroh Hai".
(Mishkaat)
Aur AhleSunnat Hi Wo Jama'at Hai Jise Har Daur Me'n Ummat Ka Bada Giroh Hone Ka Sharf Haasil Raha Hai.
◆ Sawal No.99) Imam Sakhawi Rahmullah Ne Nawwi'n Sadi Hijri Me'n Ahle Sunnat Ki Konsi Aham Nishani Bayan Ki?
Jawab ▶️ Aapne Farmaya, "Ahle Sunnat Ki Alamat Ye Hai Ke Wo Kasrat Se RasoolAllah ﷺ Par Durood Padhte Hain".
(Al-Qaul-ul-Badee, S:52)
◆ Sawal No. 100) AhleSunnat-O-Jama'at Ko Bareilwi Kyun Kaha Jata Hai?
Jawab ▶️ Mujaddid-O-Deen-O-Millat AalaHazrat Imam Ahmed Raza Mohaddis Bareilwi RahmatullAhi Alaih Ki Nisbat Se Ghair_Muqallid Aur Dev-Bandi Wahabi Waghairah Ahle Sunnat Ko Bareilwi Kehte Hain Kyunke Aapne Azmate Mustafa ﷺ Ki Hifazat Aur Ishqe Rasool ﷺ Ke Farogh Ke Liye Numaya'n Kirdaar Ada Kiya. Mukhalifeen Ye Bhi Maante Hain Ke Ahlesunnat Bareilwi Nazriyaat Aur Aqaa'id Ke Aetabar Se Qadeem Jama'at Hai.
(Al-Bareilwiyah, S:7)
Ye Koyi Naya Firqah Nahi Lihaza Ahlesunnat Ke Tamam Aqaa'id QurAan-O-Hadees Se Saabit Aur Akabire Aimmah Deen Se Mnaqool Hain.
◆ Sawal No. 101) Huzoor ﷺ Ne Yaman Aur Shaam Ke Liye Barkat Ki Dua Farmayi. Ek ILaqe Ke Muta'alliq Farmaya, Waha'n Se Shaytan Ka Seeng Niklega, Uska Naam Kya Hai? Ye Hadees Kis Kitab Me'n Hai?
Jawab ▶️ Logo'n Ne Najd Ke Liye Dua Ki Darkhwast Ki, Magar Aapne Sirf Shaam Aur Yaman Ke Liye Dua Farmayi. Tisri Baar Logo'n Ke Arz Karne Par Farmaya, "Waha'n Zalzale Aur Fitne Honge Aur Waha'n Se Shaytan Ka Seeng Yaani Shaytani Giroh Niklega".
(Bukhari)
◆ Sawal No. 102) Is Ghaibi Khabar Ke Mutabiq Najd Me'n Konsa Firqah Paida Huwa?
Jawab ▶️ 12wi'n Sadi Hijri Me'n Najd Me'n Shaikh Mohammed Bin Abdul Wahab Najdi Ne Ek Naye Firqe Ki Buniyad Rakhi, Aur Apne Siwa Tamam Musalmano'n Ko Kafir-O-Mushrik Qarar Diya Aur Unka Qatle Aam Kiya.
◆ Sawal No. 103) Shaikh Najdi Ne Kin Ma'mulaat Ki Bina Par Musalmano'n Ko Kaafir Kaha?
Jawab ▶️ Shaikh Najdi Ke Bhai Shaikh Suleman Bin Abdul Wahab RahmatullAhi Alaih Uske Rad Me'n Apni Kitaab-ul-Sawa'iqul ILahiyah Ke Safha:43 Par Likhte Hain, "Shaikh Najdi Ne Musalmano'n Ke Darmiyan Sadyo'n Se Raa'ij Ma'mulaat Ko Kufr Aur Musalmano'n Ko Kafir Bana Diya Halanke Makkah, Madinah, Aur Yaman Ke ILaqo'n Me'n Ye Ma'mulaat Yaani Auliya Ka Waseelah, Unke Mazaraat Se Tawassul-O-Istimdaad(Madad Talab Karna) Aur Auliya Allah Ko Pukarna Sadyo'n Se Raa'ij Hain".
◆ Sawal No. 104) "Mujhe Is Baat Ka Khauf Nahi Ke Tum Mere Ba'd Shirk Karoge Lekin Mujhe Khauf Hai Ke Tum Maal-O-Dunya Ki Mohabbat Me'n Mustaghraq Hojaoge". Ye Hadees Kis Kitaab Me'n Hai?
Jawab ▶️ Saheeh Bukhari Jild:1 Kitaab-ul-Jana'iz Baabus Salaati Alash_Shaheed.
◆ Sawal No. 105) Shaikh Najdi Ke Chand Gumrah Aqaa'id Bayan Kijiye.
Jawab ▶️ Allama Sayyad Ahmed Dehlaan Makki Rahmullah Likhte Hain, "Ibne Abdul Wahab Durood Padhne Se Mana Karta Tha Aur Sun Kar Naraz Hota Tha. Jo Durood Padhta Ye Use Sakht Saza Deta, Yaha'n Tak Ke Ek Naabina Sauleh MuAzzin Ko Durood Padhne Par Qatal Kar Diya. Wo Kehta Tha Ke Zaniyah Ke Ghar Aalaate Mosiqi Ka Gunah Minare Par Durood Padhne Se Kam Hai (MAaZallah) Usne Dala'ilul Khairaat Aur Durood-O-Salam Ki Doosri Kutub Ko Jala Diya".
(Al-Dur Rul Sunniyah, S:5)
◆ Sawal No. 106) Maujuda Daur Ke Kharji Firqo'n Ki Pechan Kya Hai?
Jawab ▶️Ek Badi Pehchan Ye Hai Ke Wo Shaikh Ibne Abdul Wahab Najdi Ko Shaikh-ul-Islam Aur Musleh-O-Mujaddid Kehte Hain Aur Uske Baatil Nazriyaat Ka Parchaae Karte Hain. Maslan Huzoor ﷺ Ke ILme Ghaib Ke Munkir Hain, Wasile Ko Shirk Kehte Hain, Muhafile Milaad-O-Naat Ko Bid'at-O-Haram Kehte Hain Aur Durood-O-Salam Se Rokte Hain Waghairah.
◆ Sawal No. 107) Maujudah Daur Me'n Ahlesunnat Ki Pehchan Kya Hai?
Jawab ▶️ Allah Ta'Aala Aur Uske Habeeb ﷺ Ki Ta'azeem Aur Mohabbat Ka Parchaar, Sahaba Kiraam-O-Auliya-E-Izaam Ka Adab, Mehfile Milaad Aur Aesaale Sawaab Ko Accha Samajhna, Durood Shareef Asslatu WasSalamu Alaika ya RasoolAllah Ko Jaaiz Samajhna, Huzoor ﷺ Ki Shaan-O-Azmat Ko Eemaan Ki Ruh Janna Aur Durood-O-Salam Ki Kasrat Karna.
◆ Sawal No. 108) Huzoor ﷺ Se Mohabbat Eemaan Ki Ruh Hai. Is Mohabbat Ka Ajr Kya Hai?
Jawab ▶️ Hadees Shareef Me'n Hai, "Jo Jis Se Mohabbat Karta Hai Wo Qayamat Me'n Usi Ke Sath Hoga".
(Bukhari, Muslim)
Ek Mohabbat Karne Waale Sahabi Ko Ye Khush Khabri Di Gayi, "Tum Jisse Mohabbat Karte Ho, Qayamat Me'n Usi Ke Sath Hoge".
(Bukhari)
◆ Sawal No. 109)Mohabbate Rasool ﷺ Ki Alamaat Kya Hain?
Jawab ▶️ Huzoor ﷺ Ka Zikr Kasrat Se Karna, Maslan Muhafile Milaad-O-Naat Mun'aqqid Karna, Durood-O-Salam Ki Kasrat Karna, Aapki Ta'alimaat Aur Sunnato'n Par Amal Karna, Aapke Pyaro'n Yaani Sahaba-O-Ahle_Baite Kiraam Aur Auliya-E-Ezaam Se Mohabbat Karna Aur Baargahe Risalat Ke Gustakho'n Se Nafrat Karna.